E Le Mafai Ona Latou Manumalo; E Le Mafai Ona Tatou Pauu

Saunia e Elder Chi Hong (Sam) Wong

O Le Fitugafulu

Afai tatou te atiaʼe lo tatou faavae i luga o Iesu Keriso, e le mafai ona tatou pauu.

Na saunoa lo tatou perofeta pele o, Peresitene Russell M. Nelson, i la tatou konafesi talu ai: “I nei taimi faigata lea sa valo’iaina e le Aposetolo o Paulo, e le o toe taumafai Satani e nana ana osofaiga i le fuafuaga a le Atua. Ua salalau solo manatu faatiapolo. O le mea lea, e na’o le pau le ala i le saogalemu faaleagaga o le filifili lea e faamuamua le Atua i o tatou olaga, ia aoao e lagona Lona siufofoga, ma ia faaaoga lo tatou malosi e fesoasoani ai e faapotopoto Isaraelu.”¹

A o tatou mafaufau i le valaaulia a le perofeta e aoao ia faalogo i le siufofoga o le Atua, pe ua naunau ea o tatou loto pe o faama’aa? Ia tatou manatua le fautuaga na tuuina mai i le Iakopo 6:6: “Ioe, o le asō, afai tou te lagona mai lona siufofoga, aua le faama’aaina o outou loto; ona aisea tou te fia oti ai?” Ia tatou naunautai e tuu atu ia manumalo le Atua i o tatou olaga.

E mafai faapefea ona tatou tuu atu ia manumalo le Atua i o tatou olaga, ae le o le fili? I le Mataupu Faavae ma Feagaiga 6:34 tatou te faitau ai, “O lea, aua le matatau, le lafu itiiti e; fai mea lelei; ia tuu le lalolagi ma seoli e aufaatasi faasaga mai ia te oulua, auā afai ua lua atiaʼe i luga o laʼu papa, e lē mafai ona latou manumalo.” O se folafolaga taua tele. E ui atonu e soofaatasi le lalolagi ma seoli e faasagatau mai ia i tatou, e le mafai ona latou manumalo pe afai tatou te filifili e tuu atu ia manumalo le Atua e ala i le faavaeina o o tatou olaga i luga o Lana papa.

I le talanoa atu i Ona soo, na aoao atu ai Iesu e uiga i se tagata poto ma se tagata valea, o loo tusia i le Mataio mataupu e 7 o le Feagaiga Fou. E toatele outou ua faalogo i le pese a le Peraimeri “O Le Tagata Poto ma le Tagata Valea.”² Afai na e faaalu se taimi e faatusatusa ai fuaiupu e fa o le pese, o le a e iloa ai o fuaiupu 1 ma le 2 e talitutusa lava ma fuaiupu e 3 ma le 4. Sa tofu fauina e le tagata poto ma le tagata valea se fale. E mananao i la’ua e saunia se fale e saogalemu ma toafimalie mo o la’ua aiga. E mananao i la’ua e ola fiafia faatasi e faavavau o se aiga, e faapei foi o oe ma a’u. Sa tutusa lelei tulaga na siosiomia ai: ”Ua to mai le timu ua alu ae le tafe .” Tatou te lagiina faaono pe a usuina lena pese. Na pau le eseesega o le tagata poto na fauina lona fale i luga o le papa ma sa tumau le fale, ae o le tagata valea na fauina lona fale i luga o le oneone ma sa tafiesea lona fale. O le mea lea, o le tulaga o lo tatou faavae e taua tele, ma e i ai lona aafiaga taua i le taunuuga i le iuga ma le faavavau.

Ou te faamoemoe ma tatalo o le a tatou maua uma ma tumau ai i le faavae mautu a o tatou faavaea o tatou olaga mo le lumanai. Ua faamanatu mai ia i tatou i le Helamana 5:12: “Ma o lenei, ou atalii e, ia manatua, ia manatua o luga lava o le papa o lo tatou Togiola, o le o Keriso lea, le Alo o le Atua, e ao ina oulua atinae ai lo oulua faavae; ina ia pe a auina mai e le tiapolo ana matagi malolosi, ioe, ana ufanafana i le asiosio, ioe, pe a pesi mai ia te oulua ana uatoa uma ma lana afa malosi, o le a leai sona mana i luga o oulua e toso ifo ai oulua i lalo i le to o le pagatia ma le malaia e le gata, ona o le papa lea ua oulua atinae ai i luga, o le faavae mautinoa lea, o se faavae lea afai e atiae ai tagata e le mafai lava ona pauu i latou.”

O le folafolaga lena mai le Atua! Afai tatou te fauina lo tatou faavae i luga o Iesu Keriso, e le mafai ona tatou pauu. A tatou tumau ma le faamaoni e oo i le iuga, o le a fesoasoani le Atua ia i tatou e faavae o tatou olaga i luga o Lana papa, “ma o le a le mafai e faitotoa o seoli ona manumalo e faasaga ia te i tatou” (Mataupu Faavae ma Feagaiga 10:69). Atonu e le mafai ona tatou suia mea uma e oo mai, ae e mafai ona tatou filifili i le ala pe faapefea ona tatou tapena mo mea o le a oo mai.

Atonu e manatu nisi o i tatou, “E lelei le talalelei, o lea e moomia ai ona tatou tuuina i o tatou olaga, pe na o le taitasi i le vaiaso.” O le alu i le lotu i le na o le faatasi i le vaiaso, e le lava e fauina ai i luga o le papa. O o tatou olaga atoa e ao ona faatumuina i le talalelei a Iesu Keriso. O le talalelei e le o se itutino o o tatou olaga, ae o le tatou olaga o se itutino moni o le talalelei a Iesu Keriso. Mafaufau i ai. Pe le sa’o lena mea? O lo tatou olaga faitino ua na o se itutino o le ata atoa o le faaolataga ma le faaeaga.

O le Atua o lo tatou Tama Faalelagi. E alofa o Ia ia i tatou uma. Na Te silafia o tatou gafatia e sili mamao atu nai lo lo tatou iloaina o i tatou lava. E le na o auiliiliga o o tatou olaga Na Te silafia. E silafia e le Atua ia auiliiliga o auiliiliga o auiliiliga o o tatou olaga.

Faamolemole ia mulimuli i le fautuaga poto a lo tatou perofeta soifua, o Peresitene Nelson. E pei ona tusia i le Mataupu Faavae ma Feagaiga 21:5–6:

“Ona o lana upu ia outou talia, e pei lava ua mai i loʼu lava gutu, i le onosai ma le faatuatua atoa.

“Ona o le faia o nei mea o le a lē manumalo ai faitotoa o seoli ia te outou; ioe, ma o le a faamataa ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei, ma le mamalu o lona suafa.”

Ona o lena le mafuaaga, e le mafai ai ona latou manumalo, ma e le mafai foi ona tatou pauu!

Ou te molimau atu ia te outou o le a toe afio mai Keriso mo le taimi lona lua e faapei ona sa Ia faia i le taimi muamua, ae o le taimi lenei o le a faatasi ai ma le mamalu tele ma le tautupu. Ou te faamoemoe ma tatalo o le a ou saunia e talia o Ia, pe i lenei itu o le veli po o le isi itu. A o tatou faamanatuina i lenei vaitau matagofie o le Eseta, ou te faamoemoe, e ala i le Togiola a Iesu Keriso ma le mana o Lona Toetu (tagai i le Moronae 7:41), o le a mafai ai ona ou alu atu e faafetaiai lo’u Mataisau ma fai atu, “Faafetai.” I le suafa o Iesu Keriso, amene.