Manatua Lou Ala E Toe Foi Ai i le Aiga
Ua ia i tatou le faataitaiga atoatoa a Iesu Keriso e mulimuli ai, ma o le malaga agai atu i lo tatou aiga faavavau e na o Ana aoaoga, Lona soifua, ma Lana taulaga togiola e mafai ai.
I le 1946, sa savali sopo ai le alii suesue talavou o Arthur Hasler e ui atu i se auvai o se mauga e lata ane i le mea sa ia ola ae ai o se tamaitiiti, lea na i ai sona aafiaga na tau atu ai i se mea fou taua na ia aoaoina e uiga i le auala e maua ai e i’a lo latou ala e toe foi ai i matavai na fananau ai.
A o sopo atu i luga o se mauga, e aunoa ma le vaaia o le afu sa fiafia i ai i lona tamaitiiti, ae sa faafuasei ona toe manatua e Hasler se mea ua leva ona galoma atu. Na ia fai mai, “A o faatumulia papa tifato o tuaoi i se savili mālū, o loo aumaia ai le sasala o limu ma fuga o laau o le vao, sa faafuasei ona mapuna mai i lo’u mafaufau ia auiliiliga o lenei afu ma lona tulaga i luga o le mauga.”1
O nei manogi na ia toe manatua ai mea na tutupu i lona tamaitiiti ma sa faamanatu mai ai ia te ia lona aiga.
Afai e mafai e manogi ona faama’ite mai na manatua mo ia, sa ia mafaufau foi atonu e mafai e manogi ona faamanatu i samani, ia a mavae tausaga e nonofo ai i le vasalaolao, ona toe foi atu i le matavai tonu na latou fananau mai ai e tolo’a’i ai foi latou.
E faavae i lenei aafiaga, o lea na o ai Hasler ma isi tagata suesue e faapupula atu faapea e manatua e le samani ia manogi tonu ia o le a fesoasoani ia i latou e fe’ausi ai i le fiaafe o kilomita e toe sue ai lo latou ala e foi ai i le aiga mai le vasa.
O le tala lea na afua ai ona ou mafaufau faapea, o se tasi o mea aupito sili ona taua e mafai ona tatou faia i lenei olaga o le aloaia lea ma manatua le ala e toe foi ai i lo tatou Tama Faalelagi ma tumau ai pea ma olioli i le aluga atoa o le malaga.
Sa ou mafaufau i faamanatu e fa faapea, pe a faaaoga ma faia pea lava pea i o tatou olaga, e mafai ona toefaamumu mai ai lagona i lo tatou aiga faalelagi.
Muamua, E Mafai Ona Tatou Manatua o i Tatou o Fanau a le Atua
E i ai lo tatou tofi paia. O le iloa ai o i tatou o fanau a le Atua ma e finagalo o Ia ia tatou toe foi atu i Lona afioaga o se tasi o uluai laasaga i le malaga toe foi i lo tatou aiga faalelagi.
Faamanatu ia te oe lava e uiga i lenei tofi. Ia faaavanoa se taimi e le aunoa e faamāti’e ai lou gafatia faaleagaga e puipuia ai, e ala lea i le manatuaina o faamanuiaga ua e maua mai le Alii. Ia talitonuina taiala ua tuuina atu ia te oe mai ia te Ia, nai lo le liliu atoa atu i le lalolagi e fua i ai lou taua patino ma sue ai lou auala.
Talu ai nei sa ma talanoa ai ma se e pele, ina ua toe taliu mai mai le falemai. Sa ia faamatala mai ma loimata e faapea, a o taoto ai o ia i luga o le moega i le falemai, na pau lava le mea sa ia manao i ai o se tasi lea e usuina atu le pese “O Au o se Atalii o le Atua.” Na o lena lava mafaufauga, na ia fai mai ai, na ia maua ai le filemu sa ia manaomia i lena lava itula o mafatiaga.
O le iloa ai pe o ai oe, e suia ai ou lagona ma mea e te faia.
O le malamalama pe o ai moni oe, e saunia lelei ai oe ia iloa ma manatua lou ala e toe foi atu ai i lou aiga faalelagi, ma moomoo ia i ai iina.
Lona lua, E Mafai Ona Tatou Manatua le Faavae e Puipuia i Tatou
E oo mai le malosi ia i tatou pe a tatou tutumau i le amiotonu, faamaoni, ma faatuatua i le Tama Faalelagi ma Iesu Keriso, tusa lava pe matuai le amana’iaina e isi ia poloaiga ma mataupu faavae o le faaolataga.2
I le Tusi a Mamona, na aoao atu ai e Helamana ona atalii ia manatua e tatau ona latou fausia o latou faavae i luga o Iesu Keriso ina ia mafai ai ona latou maua le malosi e tatalia ai faaosoosoga a le fili. O loo fesasaa’i matagi ma afā malolosi a Satani i o tatou luga, ae o le a leai lava so latou malosi e toso ifo ai i tatou i lalo, pe afai tatou te tuu atu lo tatou faatuatuaga i le nofoaga aupito saogalemu—i lo tatou Togiola.3
Ua ou iloa mai se aafiaga patino a tatou filifili e faalogo i Lona siufofoga ma mulimuli ia te Ia, o le a tatou maua Lana fesoasoani. O le a tatou mauaina se vaaiga lautele atu i o tatou tulaga ma se malamalama loloto atu e uiga i le faamoemoega o le olaga. O le a tatou lagonaina ni uunaiga faaleagaga o le a taiala ai i tatou i lo tatou aiga faaleagaga.
Lona Tolu, E Mafai Ona Tatou Manatua ia Loto Tatalo
Ua tatou ola i se taimi e na o sina pa’i po o se leo o poloai mai, e mafai ona tatou amata saili mo tali mo le toetoe o soo se autu i le anoanoai o utufaamatalaga o loo teuina ma ua faatulagaina i upegafesootai lavelave o komepiuta.
I se isi itu, ua ia i tatou se valaaulia faigofie e amata sailia tali mai le lagi. “Tatalo e le aunoa, ma o le a ou liligi atu lo’u Agaga i ou luga.” Ona folafola mai lea o le Alii, “Ma o le a tele lava lou faamanuiaga—ioe, e sili atu lava nai lo ʼoa o le lalolagi.”4
Ua silafia atoatoa e le Atua i tatou taitoatasi ma ua saunia e faafofoga mai ia tatou tatalo. Pe a tatou manatua e tatalo, tatou te maua Lona alofa lagolago, ma o le tele ona tatou tatalo i lo tatou Tama o i le Lagi i le suafa o Keriso, o le tele foi lena tatou te aumaia ai le Faaola i o tatou olaga ma o le atili lelei foi lea o lo tatou iloa o le ala ua Ia faailogaina e toe foi atu ai i lo tatou aiga faalelagi.
Lona Fa, E Mafai Ona Tatou Manatua E Auauna Atu i Isi
A o tatou taumafai malosi e mulimuli ia Iesu Keriso e ala i le auauna atu ma faaalia le agalelei i isi, ua tatou faia le lalolagi o se nofoaga e sili atu ona lelei.
O a tatou faatinoga e mafai ona faamanuiaina tele ai olaga o i latou o siomia i tatou ma o tatou lava foi olaga. O auaunaga alofa e faaopoopo atu ai uiga lelei e le gata i olaga o lē e tuuina atu ae faapea foi i lē na te taliaina.
Aua e te manatu faatauvaa i lou gafatia e tosina mai isi mo le lelei, e le gata i le auaunaga o au faatinoga ae faapea foi le auaunaga e ala i au faataitaiga.
O auaunaga alofa i isi e taialaina ai i tatou i luga o le ala i lo tatou aiga faalelagi---le ala o le avea e faapei o lo tatou Faaola.
I le 1975, o se taunuuga o se taua faaleatunuu, na tatau ai ia Arnaldo ma Eugenia Teles Grilo ma le la fanau ona tuua lo latou fale ma mea sa latou fauina i le fiasefulu tausaga o le galulue malosi. I lo latou atunuu moni o Potukale, sa feagai ai Uso ma Tuafafine Teles Girlo ma le luitau o le toe tau amata. Ae i ni tausaga mulimuli ane, ina ua mavae ona auai i Le Ekalesia a Iesu Keriso o le Au Paia o Aso e Gata Ai na la fai mai, “Sa leiloloa uma a matou mea sa i ai, ae o se mea lelei aua na uunaia faamalosi ai i matou e mafaufau i le taua o faamanuiaga e faavavau.5
Na leiloa lo latou aiga faalelalolagi, ae sa latou mauaina le ala e toe foi ai i lo latou aiga faalelagi.
Po o a lava mea e tatau ona e tuua ina ia mulimuli ai i le ala i lou aiga faalelagi, o le a i ai se aso e foliga mai ai e le o se osigataulaga.
Ua ia i tatou le faataitaiga atoatoa a Iesu Keriso e mulimuli ai, ma o le malaga agai atu i lo tatou aiga faavavau e na o Ana aoaoga, Lona soifuaga, ma Lana taulaga togiola e mafai ai---e aofia ai ma Lona maliu ma le Toetu mamalu.
Ou te valaaulia outou ia oo i le olioli o le manatuaina o i tatou o fanau a le Atua ma ua alofa tele mai o Ia i le lalolagi, o lea na Ia auina mai ai Lona Alo6 e faaali mai ia i tatou le ala. Ou te valaaulia outou ia manatua ia faamaoni, ia liliu atu lou ola i le Faaola ma ia fausia lou faavae i Ona luga. Ia manatua ia loto tatalo i lau malaga ma ia auauna atu i isi i luga o le ala.
O’u uso e ma tuafafine pele, i lenei Aso Sa o le Eseta, ou te tuuina atu la’u molimau o Iesu Keriso o le Togiola ma le Faaola o le lalolagi. O Ia o lē e mafai ona faafeaoina atu i tatou i le laoai o se olaga olioli ma taiala i tatou i la tatou malaga. Se’i o tatou manatua ma mulimuli ia te Ia i lo tatou aiga. I le suafa o Iesu Keriso, amene.