O Lo Tatou Taimi Lenei!
Ua auina mai i tatou iinei e le Atua, i le taimi nei lava, i lenei taimi maoae i le talafaasolopito.
I le 1978, sa ou tu ai luga o se malae lakapi faaAmerika i se malaetaalo sa matua tumu i le au maimoa e 65,000. I o’u luma sa i ai ni tagata lapopo’a o le isi ‘au, o e sa foliga mai sa mananao e aveese lo’u ulu [tulou]. O la’u taaloga muamua lea o sē e setiina ma togiina le polo [quarterback] faatoa amata i le Liki Lakapi Faavaomalo a Amerika, ma sa matou taaalo ma Siamupini o le Super Bowl. O le mea moni, sa ou fesili pe sa lava lo’u lelei ou i ai i luga o le malae. Sa ou la’a i tua e togi la’u ulua’i pasi, ma a o alu ese atu le polo mai lo’u lima, sa matua mamafa le taiaina o a’u nai lo se isi lava taimi na taia ai a’u muamua. O le taimi lea, a o ou taatia i lalo o se faaputuga o na tagata taaalo lapopoa, sa ou taumanatunatu pe o le a la’u mea sa faia iina. Sa i ai sa’u faaiuga e tatau ona fai. Pe o le a ou tuu e faatoilalo a’u e o’u masalosaloga, pe o le a ou su’ea le lototoa ma le malosi e tu ai i luga ma ia faaauau?
Lolomi Fesootai
Ou te le’i iloaina i lena taimi pe o le a faapefea e lena aafiaga ona saunia ai a’u mo avanoa i le lumanai. Sa ou manaomia ona aoao e mafai ona ou malosi ma lototoa pe a feagai ma tulaga faigata.
Atonu e le tutusa le taua o se taaloga lakapi ma luitau o le a oulua fetaiai. O le tele o taimi, o le a leai se malaetaalo e tumu i tagata matamata. Ae o au faaiuga lototoa o le a i ai se taua e faavavau.
Atonu tatou te le lagonaina i taimi uma lo tatou gafatiaina o le lu’i. Ae e silasila mai lo tatou Tama Faalelagi ia i tatou o ni tufuga e le fefefe o Lona malo. O le mafuaaga lena na Ia auina mai ai oe i lenei taimi tupito i le talafaasolopito o le lalolagi. O lo tatou taimi lenei!
Faalogo i mea na saunoa i ai Peresitene Russell M. Nelson ae e lei leva ona avea ma Peresitene o le Ekalesia: “O lo tatou Faaola ma le Togiola, o Iesu Keriso, o le a faatinoina nisi o Ana galuega aupito mamana i le va o le taimi nei ma le taimi e toe afio mai ai o Ia. O le a tatou vaai i faailoga ofoofogia o le pulefaamalumalu ai o le Atua le Tama ma Lona Alo, o Iesu Keriso i luga o lenei Ekalesia i le mamalu ma le viiga” (“Faaaliga mo le Ekalesia, Faaaliga mo o Tatou Olaga,” Liahona, Me 2018, 96).
Galuega aupito mamana? Faailoga ofoofogia? O a ni foliga o ia mea? O le a la tatou matafaioi, ae o le a faapefea foi ona tatou malamalama i le mea e fai? Ou te le iloa tali uma, ae ou te iloa e manaomia e le Alii i tatou ia sauniuni! O le faaaogaina ma le agavaa o le perisitua, e leai se isi taimi na sili ona taua ai.
Pe tatou te talitonu i le perofeta a le Atua? Pe mafai ona tatou su’ea ma faataunuu lo tatou taunuuga? Ioe, e mafai, ma ioe e tatau, aua o lo tatou taimi lenei!
Pe a tatou faalogo i tala o auauna maoae a le Atua o e na mua i malae—e pei o Mose, Maria, Moronae, Alema, Eseta, Iosefa, ma le toatele o isi—e foliga mai e sili atu lo latou taua nai lo le tagata masani. Ae e leai so latou eseesega mai ia i tatou. O i latou lava o ni tagata masani sa feagai ma luitau. Sa latou faatuatuaina le Alii. Sa latou faia ni filifiliga tonu i taimi taua tele. Ma, faatasi ai ma le faatuatua ia Iesu Keriso, sa latou faatinoina galuega sa moomia i o latou taimi.
Goodsalt
Manatu i le toa o Iosua i le Feagaiga Tuai. O ia o se soo tuuto o Mose, o se tasi o taitai silisili i le talafaasolopito. Ina ua mavae atu Mose, sa oo mai le taimi o Iosua. Sa tatau ona ia taitaia le fanauga a Isaraelu i le nuu o le folafolaga. O le a faapefea ona ia faia lena mea? Sa fanau ma ola a’e Iosua i le pologa i Aikupito. Sa leai sana tusitaulima po o ni vitio faaleaoaoga e fesoasoani ia te ia. Sa le’i i ai foi sana telefonipoto. Ae sa ia te ia le folafolaga lenei mai le Alii.
“E pei ona ou i ai ia Mose, e faapea ona ou i ai ia te oe; ou te le tuua lava oe: ou te le tuulafoai lava ia te oe.
“Ia e faamalosi, ma loto tele” (Iosua 1:5–6).
A o avea a’u o se Fitugafulu e fou ma leai se poto masani, sa ou maua se telefoni faanatinati mai le Ofisa o le Au Peresitene Sili, na fesili mai ai pe mafai ona ou suia le perofeta e talanoa ma se alii talavou i le falemai—i le taimi lava lea. O le igoa o le alii talavou o Zach. Sa tapena o ia e avea ma se faifeautalai ae sa afaina i se faalavelave ma mafatia ai i se manu’a tuga i lona ulu.
A’o alu atu la’u taavale i le falemai, sa faatatope solo o’u mafaufauga. Se fe’au mo le perofeta—se pe o se tala ula? O le a a se mea o le a ma fetaia’i? E faapefea ona ou fesoasoani i lenei alii talavou? Pe o lava lo’u faatuatua? O le tatalo naunau ma le iloa ai o loo ou umia le pule o le perisitua paia na avea ma o’u toomaga.
Ou te taunuu atu, o loo taoto Zach i se moega i le falemai. Sa tu saunia se tagata e faataalise atu o ia i le potu mo taotoga, ina ia mafai ai e fomai ona aveesea le faaletonu o i lona fai’ai. Sa ou tilotilo atu i lona tina loimatā ma se uo talavou atuatuvale o tutu i talaane, ma sa ou iloa manino sa manaomia e Zach se faamanuiaga faaleperisitua. E lei leva ona maua e lana uo le Perisitua Mekisateko, o lea sa ou talosagaina ai o ia e fesoasoani mai ia te a’u. Sa ou lagonaina le mana o le perisitua a o ma tuuina atu ma le lotomaualalo se faamanuiaga ia Zach. Ona faataalise ese atu lea o ia mo le taotoga, ma sa faamautu mai e se lagona toafimalie o le a taulima e le Faaola mea e tusa ai ma Lona poto.
Sa faia e le aufaigaluega a le falemai se faaata mulimuli a o lei faia le tosi muamua. Sa latou mauaina, ma lo latou maofa, o le a le moomia se taotoga.
Ina ua mavae le mau taumafaiga, sa mafai e Zach ona toe savali ma toe tautala. Sa faataunuu e ia se misiona faamanuiaina ma ua tausia nei sona aiga matagofie.
Ioe, e le faapea o le taunuuga lava lea i taimi uma. Na ou tuuina atu isi faamanuiaga faaleperisitua ma le faatuatua lava lea e tasi, ae sa le’i tuuina mai e le Alii se faamalologa atoatoa i lenei olaga. Tatou te talitonuina Ona faamoemoega ae taatia atu ia taunuuga ia te Ia. E le mafai ona tatou filifilia i taimi uma le taunuuga o a tatou faatinoga, ae e mafai ona tatou filifili e sauniuni e faatino.
Atonu o le a le talosagaina lava oe e le Au Peresitene Sili e suitulaga mo i latou i se tulaga e faamata’uina ai le ola. Ae ua valaauina i tatou uma e faia mea taufaamata’u o le olaga i a tatou matafaioi o ni sui o le Alii. O le a Ia le tuulafoaiina lava i tatou. O Lo Tatou Taimi Lenei!
O Peteru, le Aposetolo sinia a le Faaola sa i le vaa i luga o le sami ina ua ia vaaia Iesu o savali i luga o le vai. Sa manao o ia e faatasi atu ma Ia, ma sa fetalai atu le Faaola, “Ina sau ia.” Faatasi ai ma le lototoa ma le ofoofogia, sa tuua e Peteru le saogalemu o le vaa ae amata ona savali agai atu i le Faaola. Ae ina ua vaai atu Peteru i le matagi ua tetele, o lea na vaivai ai lona faatuatua. “Ua fefe o ia, ona afua ai lea ona goto, ua alaga, ua faapea mai, Le Alii e, ia e faaola mai ia te au. “Ona aapa atu loa lea e Iesu o lona aao, ua tago ia te ia.” (Tagai Mataio 14:22–33.)
Pe a oo ina agi matagi i o tatou olaga, o fea tatou te tepataulai i ai? Manatua, e i ai lava le punavai faamoemoeina e tasi o le malosiaga ma le lototoa. E faaloaloa mai aao o Iesu ia i tatou, e faapei foi ona faaloaloa atu ia Peteru. A o tatou aapa atu ia te Ia, o le a Ia lavea’ia ma le alofa i tatou. O i tatou o Ana fanau. Na Ia fetalai, “Aua le fefe, aua ua ou faatauina oe, ua ou valaauina oe i lou lava igoa, e faia oe mo’u” (Isaia 43:1). O le a manumalo o Ia i lou ola pe afai e te faatagaina o Ia. O le filifiliga e a oe lea. (Tagai ia Russell M. Nelson, “Ia Faamuamua le Atua,” Liahona,, Nov. 2020, 92–95.)
I le faaiuga o lona soifua, sa augani atu ai Iosua i lona nuu, “Ina filifili ia o outou i le aso nei po o ai tou te auauna i ai; … ao au nei ma lo’u aiga, matou te auauna ia Ieova” (Iosua 24:15). Ona o filifiliga sa ia faia e auauna i le Atua, o lea na avea ai Iosua ma se taitai sili i lona taimi. A’u uo pele, o lo tatou taimi lenei! Ma o filifiliga tatou te faia o le a filima’oti ai lo tatou taunuuga (tagai Peresitene Thomas S. Monson, “O Filifiliga e Iloa Ai Taunuuga” [Brigham Young University fireside, Nov. 6, 2005], speeches.byu.edu).
A o avea a’u o se epikopo, sa i ai se matou anavatau i le matou uarota: O filifiliga lelei e aumaia ai le fiafia—faavavau. E savavali ane talavou i o’u luma i le faapaologa ma fai mai, “Epikopo, o lea ou te faia filifiliga lelei!” O se naunauga lena o se epikopo!
O le a le uiga o “filifiliga lelei?” Na fesili se tagata ia Iesu i se tasi taimi, “O lē fea poloaiga o i le tulafono ua sili?” Sa ia tali mai:
“E te alofa atu i le Alii lou Atua ma lou loto atoa, ma lou agaga atoa, ma lou manatu atoa.
“O le poloaiga muamua lena ma le sili.
“E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:36–39).
Ou te le iloa ia te outou, ae a ou faitauina nei poloaiga sili e lua, ou te matauina ai se poloaiga lona tolu o loo aofia ai: ia e alofa ia te oe lava.
Pe ua e mafaufau ea e alofa ia te oe lava o se poloaiga? Pe mafai ea ona tatou alolofa moni i le Atua ma alofa i Ana fanau pe afai tatou te le alolofa ia i tatou lava?
Sa fautuaina talu ai nei e se taitai poto se alii sa taumafai e faatoilalo ia tausaga o filifiliga faataumaoi. Sa lagona le maasiasi e lea alii, ma na le talitonu e agavaa o ia mo se alofa o se tagata.
Na fai atu lona taitai ia te ia, “E silafia e le Alii oe, e alofa ia te oe, ma ua faamalieina lava o Ia ia te oe, ma laasaga lototoa o loo e uia.” Peitai ona ia faaopoopo atu lea, “E manaomia ona [e] faalogo i le poloaiga ia e alofa ia te oe lava ina ia mafai ai ona e lagonaina le alofa o le [Atua] ma le alofa i isi.”
Ina ua faalogo atu lenei uso i lena fautuaga, sa ia vaaia le olaga i ni mata fou. Na ia fai mai mulimuli ane, “Na ou faaaluina lo’u ola atoa e taumafai ai e su’e le filemu ma le taliaina o a’u. Sa ou sailia na mea i nofoaga sese e tele. E na o le alofa lava o le Tama Faalelagi ma le Faaola e mafai ona ou maua ai le toafilemu. Ou te iloa e finagalo i La’ua ia ou alofa ia te a’u lava; e na o le pau moni lava lea o le ala e mafai ona ou lagonaina lo La’ua alofa mo a’u.”
E finagalo lo tatou Tama Faalelagi ia i tatou ia alolofa ia i tatou lava—ia le faamaualuluga ai pe manatu ifo ia i tatou lava, ae ina ia tatou vaai ai ia i tatou lava i le ala o loo silasila mai ai o Ia ia i tatou: o Ana fanau faapelepele. A oo ina magoto ifo lenei upumoni i le lualoto o o tatou fatu, ona tuputupu a’e ai lea o lo tatou alolofa mo le Atua. Pe a oo ina tatou vaai ifo ia i tatou lava ma se faaaloalo faamaoni, ona tatala ai lea o o tatou loto e faia faapena foi isi. O le tele o lo tatou iloaina o lo tatou taua faalelagi, o le sili atu foi lena o lo tatou malamalama i lenei upumoni faalelagi: na auina mai oe e le Atua iinei, i le taimi nei lava, i lenei taimi tupito o le talafaasolopito, ina ia mafai ai ona tatou faia mea lelei silisili tatou te mafaia i taleni ma meaalofa ua ia i tatou. O lo tatou taimi lenei! (Tagai Russell M. Nelson, “Becoming True Millennials” fagalotu i le lalolagi atoa mo talavou matutua, Jan. 10, 2016], broadcasts.ChurchofJesusChrist.org).
Na aoao mai Iosefa Samita e faapea o perofeta uma, i tupulaga uma, “ua latou tulimatai atu ma le naunautaiga fiafia i aso ua tatou ola ai; ma le musuia i le fiafia ma le naunautaiga faalelagi ua latou pepese ai ma tusia ai ma valoia ai lo tatou taimi lenei; … o i tatou o tagata filifilia o e ua [filifilia] e le Atua ina ia aumaia le mamalu i Aso e Gata Ai” (Aoaoga a Peresitene o le Ekalesia: Iosefa Samita (2007], 186).
A o e feagai ma ou luitau i aso taitasi, manatua le faamautinoaga lenei na tuuina mai e Elder Jeffrey R. Holland: “Ua tele naua mea ua faaee mai i o tatou tau’au, ae o le a avea o se aafiaga mamalu ma le faamanuiaina. … Ua uma ona tautino mai le manumalo i lenei tauvaga faaiu. Ua uma ona tusia le manumalo i tusi o faamaumauga … , o tusitusiga paia!” (“Be Not Afraid, Only Believe” [address to Church Educational System religious educators, Feb. 6, 2015], broadcasts.ChurchofJesusChrist.org).
I lenei faaiuga matagofie o le vaiaso o le Eseta, ou te fia tuuina atu se valaaulia ina ia tatou tatalo uma ia iloa ma talia a tatou matafaioi taitoatasi a o tatou saunia mo le aso faamamaluina pe a toe afio mai le Faaola. E sili atu le alofa o le Alii ia i tatou nai lo le tatou silafiaina, ma o le a Ia tali mai ia tatou tatalo! Pe o tatou i luga o se malae lakapi, i totonu o se potu o se falemai, po o soo se isi lava nofoaga, e mafai ona avea i tatou o se itutino taua o nei gaoioiga sili ona mataina—aua o lo tatou taimi lenei! I le suafa, o Iesu Keriso, amene.