Avea ma Tagata Moni o le Meleniuma

Peresitene Russell M. Nelson

O Le Korama a Aposetolo e Toasefululua

O Se Faasauga ma Peresitene Russell M. Nelson

Faigalotu i le Lalolagi Atoa mo Talavou Matutua • Ianuari 10, 2016 • Iunivesite o Polika Iaga–Hawaii

Ou uso e ma tuafafine pele, o lenei tausaga fou e mautinoa lava o se tausaga pisi. I ona uluai aso, sa ma faatofa atu ai ma Wendy i lo’u tuafafine, o Marjory, ua tuua lenei olaga faaletino. Ua matou faafeiloai atu i ni pepe fou se lua i totonu o le matou aiga—Wade Richard Walker ma Isaac Russel McDonough. Ma o le taimi nei, ua ma maua ai le avanoa e lauga atu ia te outou le talavou matutua maoae i le lalolagi atoa. Ua ma faafetai lava i le faatasi ai ma outou.

Ou te matua talisapaia le savali taua a Wendy ma lana faataitaiga musuia! Ou te faamamaluina foi ma le lotofaafetai le auai mai o Elder Kim B. Clark, o le Fitugafulu ma le Komesina o Aoga a le Ekalesia; lona faletua, o Sue; ma Chad H. Webb, le taitai o seminare ma inisitituti, ma lona faletua o Krisiti.

Ou te momoli atu faamanuiaga ma alofaaga mai le Au Peresitene Sili ma le Korama a Aposetolo e Toasefululua. Matou te faafetai tele mo lo outou tuuto i le Alii ma Lana talalelei toefuataiina. Matou te faafetai lava i taimi uma tou te tutulai ai ma saunoa atu mo le upumoni—aemaise lava pe afai e le lagolagoina e le toatele.

E toatele tagata e faasino atu ia te outou o Tagata o le Meleniuma. Ou te tautino atu a faasino atu le au suesue ia te outou i lena faalagiga ma faamatala mea ua faaalia e a latou suesuega e uiga ia te outou—o mea tou te fiafia ma lē fiafia i ai, o o outou lagona ma faanaunautaiga, o tou malosiaga ma vaivaiga—ou te le to’afimalie ai. O loo i ai se mea e uiga i le ala latou te faaaogaina ai le upu Meleniuma e faalavelave ai lava ia te au. O le mea moni, ou te matua le fia naunau lava i mea o loo tau mai e tagata atamamai e uiga ia te outou nai lo mea ua ta’u mai e le Alii ia te au e uiga ia te outou.

A ou tatalo e uiga ia te outou ma ole atu i le Alii po o le a Sona lagona e uiga ia te outou, ou te lagonaina se mea e matua ese lava mai mea o loo ta’u mai e le au suesue. O uunaiga faaleagaga ua ou mauaina e uiga ia te outou ua taitai atu ai au e talitonu o le faaupuga Meleniuma e mafai ona tonu mo outou! Ae mo se mafuaaga sili ona ese ai nai lo mea e mafai ona malamalama i ai le au atamamai.

O le faaupuga Meleniuma ua matua tonu mo outou pe afai e faamanatu atu e lena upu ia te outou o outou tagata moni ma tou faamoemoega moni i le olaga. O se Tagata Moni o le Meleniuma o se tasi sa aoaoina ma sa aoao atua le talalelei a Iesu Keriso i le muai olaga, ma o le sa osifeagaiga ma lo tatou Tama Faalelagi iina e uiga i mea faalototele tagata—e oo lava i mea e faalototele ai le amio mama—e te faia a o i ai iinei i le lalolagi.

O se Tagata Moni o le Meleniuma o se alii po o se tamaitai ua lava le faatuatuaina e le Atua e auina mai i le lalolagi i le tisipenisione ua matua sili ona manaomia ai faatinoga i le talafaasolopito o lenei lalolagi mo le Afio Mai Faalua o Iesu Keriso ma Lona nofotupu ai i le meleniuma. Ia e mautinoa lenei mea—na e fanau mai ia avea oe ma se Tagata Moni o le Meleniuma.

O le fesili: “E mafai faapefeea ona e tu atu ma ola o se Tagata Moni o le Meleniuma?” E fa ni mea ou te fautuaina atu.

Ia Iloa po o ai Moni Lava Oe

O lau fautuaga muamua: Ia iloa po o ai moni lava oe!

Faaalu se taimi e mafaufau ai ma le agaga tatalo i mea moni nei:

O oe o se atalii po o se afafine filifilia o le Atua.
Ua foafoaina oe i Lona faatusa.
Sa aoaoina oe i le lalolagi o agaga e saunia oe mo soo se mea ma mea uma o le a lua fetaiai i lenei vaega mulimuli o nei aso e gata ai.¹ O loo tumau lena aoaoga ia te oe!

O loo tatou ola nei i le “itula lona sefulutasi.” Ua folafola mai e le Alii o le taimi mulimuli lenei o le a Ia valaauina ai e galulue i Lona tovine e faapotopoto mai le au filifilia mai tuluiga e fa o le lalolagi.² Ma ua auina mai oe ina ia auai i lenei faapotopotoina. Ua faafia ona ou vaaitino i le faatosinaga mamana a Tagata Moni o le Meleniuma a o latou aumaia isi i le malamalama o le upumoni. O se vaega lenei o lou faasinomaga ma le faamoemoega o le avea ai ma ni fanau a Aperaamo!³

I nai masina talu ai sa ma maua ai ma Wendy se aafiaga ofoofogia i le nuu maotua o Saiperia. O se tasi sa matou malaga faatasi i la matou “aso sauniuni” i Irkutsk o le peresitene o le misiona, Gregory S. Brinton; o lona faletua, o Sally; ma lo latou atalii ua foi mai le misiona, o Sam, sa faamisiona i Rusia. Sa matou asia le vaito’a matagofie o Lake Baikal ma se maketi i lona auvai.

Ina ua matou foi atu i le matou taavale, sa matou matauina ua le o i ai ia Sam. Mulimuli ane sa ia foi ane, faatasi ma se tamaitai faatagata matua e igoa ia Valentina. I lana gagana FaaRusia, sa alaga ma le malosi mai ai Valentina, “Ou te fia feiloai i le tina o lenei alii talavou. E ese ma lona faaaloalo, atamai, ma agalelei! Ou te fia feiloai i lona tina!” Sa tosina atu Valentina i fofoga susulu ma le fiafia o Sam.

Sa faailoa atu e Sam ia Valentina i lona tina ma lona tama, ma tuu atu ia te ia se tamaitusi e uiga i le Faaola, ma faafesootai faifeautalai e asiasi ia te ia. Ina ua foi ane faifeautalai mulimuli ma se kopi o le Tusi a Mamona, sa ia folafola atu o le a ia faitauina. Sa i ai foi nisi tamaitai e faigaluega i lea lava nofoaga e tasi sa fiafia foi i lea tusi fou na maua e Valentina. Matou te le iloa le taunuuga o lenei tala, ae ona o le malamalama tulagaese na susulu atu ia Sam, na faalauiloa atu ai Valentina ma nisi o ana uo i le talalelei.

O Tagata Moni o le Meleniuma, e pei o Sam, e iloa lelei po o ai moni lava i latou. O i latou o soo tuuto o Iesu Keriso o e faaaogaina avanoa uma e fesoasoani ai ia i latou lava ma isi ia saunia mo le nofotupu o lo tatou Faaola i le meleniuma.

O le mea lea, o la’u fautuaga muamua o le tou mo outou lava ia po o ai moni lava outou. Ole atu i lou Tama Faalelagi, i le suafa o Iesu Keriso, po o le a Sona lagona e uiga ia te oe ma lau misiona iinei i le lalolagi. Afai e te ole atu ma le manatu moni, i le aluga o le taimi o le a musumusu atu e le Agaga ia te oe ia upumoni e suia ai le olaga. Ia tusi na uunaiga ma toe iloilo soo, ma mulimuli i ai ma le atoatoa.

Ou te folafola atu ia te outou a tou amata ona maua se vaaiga o le auala e silasila mai ai lou Tama Faalelagi ia te oe ma le mea ua Ia faatuatuaina oe e fai mo Ia, o le a le toe tutusa lava lou olaga!

Ia Faamoemoeina ma Saunia e Faataunuu Mea Faigata

O lau fautuaga lona lua: Ia faamoemoeina ma saunia e faataunuu mea faigata.

E poloaiina lava e le Atua i taimi uma Lana fanau o le feagaiga ina ia faia ni mea faigata. Ona o outou o atalii ma afafine o le Atua e tausi feagaiga, o le ola ai i le vaega mulimuli o aso e gata ai, o le a poloaiina outou e le Alii ina ia faia ni mea faigata. Ia outou mautinoa lena mea—sa le i faamutaina tofotofoga FaaAperaamo ia Aperaamo.⁴

Ou te iloa le taufaafefe e mafai ona oo i ai pe a poloaiina e faia se mea e foliga mai e matua le oo i ai lo tatou malosi. Sa faatoa 19 masina talu ona avea au ma se uso o le Korama a Aposetolo e Toasefululua ae maliu Peresitene Spencer W. Kimball. I le uluai fonotaga a le Au Peresitene Sili ma le Korama a Aposetolo e Toasefululua lea na sosoo ma le faauuga o Peresitene Ezra Taft Benson, sa ia tuu mai ai ni tofiga maoti. O ana faatonuga ia te au sa aofia ai: “Elder Nelson: E ao ona e tatalaina atunuu o Europa i Sasae mo le talaiina o le talalelei.”

O le 1985 lena. I le taimi o na tausaga o vevesiga faaupufai lea tatou te faasino i ai o le Taua i le va o Amerika ma Rusia, sa le gata na vaeluaina moni lava le aai o Perelini i se papupuni, ae o le atu Europa i Sasae atoa sa i lalo o pulega faaKomenisi. Sa tapunia Ekalesia, ma sa tapulaa lava ia tapuaiga faalelotu.

Sa tele so’u taimi o lo’u olaga faigaluega i le tatalaina o fatu e faatino ia taotoga e laveai ai le ola, ae sa leai ma so’u potomasani sa ono taitai atu ai au e talitonu e mafai ona ou tatalaina ni atunuu mo le talaiina o le talalelei. Ae o lea, ua tuuina mai e se perofeta ia te au se tofiga, o lea sa ou alu atu ai e fai le mea sa foliga mai e matua faigata lava.

Mai le amataga o au taumafaiga, sa tuu ai faafitauli i lo’u ala. Sa ou taunuu i le tele o atunuu e aunoa ma se iloa po o fea e alu i ai. E tusa foi lava pe sa mafai ona ou mauaina le igoa o se taitai talafeagai o se malo, ae sa masani lava ona faaleaogaina mai se feiloaiga i le taimi mulimuli po o le tolopo foi. I se tasi atunuu, ina ua tolopo se feiloaiga mo le lua aso, sa i ai ni nai faaosoosoga na oo mai ma le faamoemoe e tofotofo ai au—sa aofia ai ni mailei mo fefaatauaiga tupe faasolitulafono ma isi gaoioiga faasolitulafono. I se isi taimi, sa amata ai se fonotaga i le faatonuga ina ia ou alu ese vave loa mai le atunuu!

Ae e mafai e le Alii ona faia Lana lava galuega,⁵ ma sa faamanuiaina au e vaaia le faataunuuina o lea vavega ma lea vavega—i taimi uma, ma sa faatoa tupu, pe a uma ona gauai i ai ou mafaufau silisili, ma au taumafaiga sili ona lototele, ma au tatalo sili ona faatauanau i le galuega.

Sa faamamalu ma taliaina le Ekalesia e nisi o na atunuu a o lei talepeina i lalo le Puipui o Perelini. Sa mulimuli ane taliaina e isi atunuu. I le tausaga e 1992, sa mafai ai ona ou lipoti atu ia Peresitene Benson ua faatuina nei le Ekalesia i atunuu uma i Europa i Sasae!

I le avea ai ma se Tagata Moni o le Meleniuma lea e mafai ona faalagolago i ai le Alii, o le a outou faia foi ni mea logologoa! O le a poloaiina outou e talia ni tofiga faigata ma avea ma se meafaigaluega i aao o le Alii. Ma o le a Ia faafaigofieina mo oe ona faataunuuina mea faigata.

O le a faapefea ona e faataunuuina mea faigata? E ala i le faia o soo se mea e faamalosia ai lou faatuatua ia Iesu Keriso e ala i le faateleina o lou malamalama i le aoaoga faavae o loo aoaoina i Lana Ekalesia toefuataiina ma e ala i le sailia pea ma le naunautai o le upumoni. I le avea ai ma se Tagata Moni o le Meleniuma, ua taula atu i le aoaoga faavae mama, a poloaiina oe e faia ni mea faigata, o le a mafai ona e laa atu i luma i le faatuatua ma le naunautaiga faifai pea ma faia mea uma ma le fiafia e tusa ma lou malosi e faataunuu ai faamoemoega o le Alii.⁶

O le a i ai aso o le a e matua faalotovaivai ai lava oe. O lea, tatalo mo le lototele ia le faavaivai ai! O le a e manaomiaina lena malosi ona o le a faateleina le inosiaina o oe i le avea ai ma se tasi o le Au Paia o Aso e Gata Ai. O le mea e faanoanoa ai, o nisi e te manatu o au uo o le a faalataina oe. Ma o nisi mea o le a faigofie lava ona foliga mai e le talafeagai.

Peitai, ou te folafola atu a outou mulimuli ia Iesu Keriso, o le a outou mauaina le filemu tumau ma le olioli moni. A outou tausia a outou feagaiga ma le saolele atoa faateleina, ma a outou puipuia le Ekalesia ma le malo o le Atua i le lalolagi i le taimi nei, o le a faamanuiaina outou e le Alii i le malosi ma le atamai e faataunuu ai mea faigata.

Aoao le Auala e Maua Ai le Mana o le Lagi

O la’u fautuaga lona tolu: Aoao le auala e maua ai le mana o le lagi.

E tofu i tatou uma ma ni fesili. O le saili e aoao, malamalama, ma le iloaina o le upumoni o se vaega taua lea o lo tatou aafiaga faaletino. O le tele o lo’u olaga na faaaluina i suesuega. O le a sili foi lo outou aoaoina e ala i le faia o ni fesili musuia.

I lenei lava taimi o nisi o outou o loo tauivi ia iloa po o le a se mea e tatau ona fai i lou olaga. O isi o outou atonu o loo tuufesili pe ua faamagaloina ea a outou agasala. O le toatele o outou o loo tau mafaufau po o ai lau soa e faavavau ae po o fea foi o i ai—ma i latou e le o mafaufau lava i lenei mea, ua tatau nei ona mafaufau i ai.

O nisi atonu o loo fesiligia pe aisea e faia ai e le Ekalesia nisi o mea o loo ia faia. Masalo o le toatele o outou e le o mautinoa lava pe faapefea ona maua ni tali i a outou tatalo.

O loo tu mai lo tatou Tama Faalelagi ma Lona Alo ua saunia e tali mai i a outou fesili e ala i le auaunaga a le Agaga Paia. Ae o lou lava tiute o le aoao o le auala e agavaa ai, ma maua na tali.

O fea e te amata ai? Amata e ala i le faaaluina o taimi sili atu i nofoaga paia. O le malumalu o se nofoaga paia. E faapena foi le falesa, le nofoaga e te osia ai feagaiga fou o le faamanatuga i Aso Sa taitasi. Ou te valaaulia foi oe ia avea lou falemautotogi, lou fale nofotumau, lou aiga, po o lou potu o se nofoaga paia e mafai ona e malolo ai ma le saogalemu mai mea leaga faalavefau o le lalolagi.

O le tatalo o le ki lea. Tatalo ia iloa po o le a le mea e ao ona tuu ma mea e ao ona amata fai. Tatalo ia iloa po o le a le mea e faaopoopo i lou siosiomaga ma mea e aveese ina ia mafai ai ona faatasi tele le Agaga ma oe.

Aioi atu i le Alii mo le meaalofa o le iloatino. Ona ola lea ma galue ina ia agavaa e maua lena meaalofa, ina ia tulai mai ni mea fenumiai i le lalolagi, ae ua e iloa tonu le mea e moni ma le mea e le moni⁷

Auauna atu ma le alofa. O auaunaga alofa ia i latou ua leiloloa o latou ala po o latou ua manunua i la le agaga e tatala ai lou loto i faaaliga faaletagata lava ia.

Faaalu se taimi sili atu—matua sili atu—i nofoaga o loo afio ai le Agaga. O lona uiga ia faateleina le taimi ma uo o loo saili ia maua le Agaga e faatasi ma i latou. Faaalu le tele o le taimi e te tootuli ai ma tatalo, se taimi sili atu i tusitusiga paia, se taimi sili atu i galuega o talafaasolopito o aiga, se taimi sili atu i le malumalu. Ou te folafola atu ia te outou a o outou tuu atu pea i le Alii se vaega lotofoai o lou taimi, o le a Ia faateleina le manuia i isi ou taimi o totoe.

Ua tatou lagolagoina ia tamalii e 15 ua faauuina o ni perofeta, tagavaai, ma talifaaaliga. A tulai mai se faafitauli lavelave—ma foliga mai e faateleina le lavelave i aso taitasi—e tauivi nei tamalii e 15 ma le faafitauli, e taumafai e tagai i taunuuga uma o auala eseese o faatinoga, ma latou saili atu ma le filiga ia lagona le siufofoga o le Alii. A maea ona anapopogi, tatalo, suesue, mafaufau loloto, ma fefautuaai faatasi ma le Usoga e uiga i mataupu mamafa, o le mea ua ou masani ai o le ala ae i se taimi o le po i nisi uunaiga e uiga i faafitauli ia o loo matou popole i ai. Ma e oo foi le matou Usoga i lea aafiaga e tasi.

E fefautuaai faatasi le Au Peresitene Sili ma le Korama a Aposetolo e Toasefululua ma fefaasoaai mea uma ua faatonuina mai e le Alii ia i matou ina ia malamalama ma lagonaina, e le tagata lava ia ma le vaega atoa. Ona matou vaavaai lea a o uunaia e le Alii le Peresitene o le Ekalesia e folafola mai le finagalo o le Alii.

O lenei faagalosoga faaperofeta na mulimulitaia i le 2012 ina ua faia le suiga i le tausaga mo faifeautalai, ma na toe faia foi i le faaopoooga talu ai nei i le tusitaulima a le Ekalesia, ona o se taunuuga o le faatulafonoina o le faaipoipoga o le itupa e tasi i nisi o atunuu. I le faatumuina ai i le agaalofa mo tagata uma, aemaise lava mo le fanau, na faaumiumi o matou tauivi ina ia malamalama i le finagalo o le Alii i lenei mataupu. A o mafaufau pea i le fuafuaga o le faaolataga a le Atua ma Lona faamoemoe mo le ola e faavavau mo Ana fanau taitoatasi, na matou iloiloina ai eseesega ma tuufaatasiga le mafaitaulia o tulaga e ono mafai ona tulai mai. Sa matou fono soo i le malumalu i le anapogi ma le tatalo ma saili atili atu i le taitaiga ma musumusuga. Ona sosoo lea, a musuia e le Alii Lana perofeta, o Peresitene Thomas S. Monson, e tautino mai le mafaufau o le Alii ma le finagalo o le Alii, i lena taimi paia e tofu lagona uma ai e i matou taitoatasi se faamautinoaga faaleagaga. O se faamanuiaga mo i matou o Aposetolo le lagolagoina o le mea na faaali atu ia Peresitene Monson. O faaaliga mai le Alii i Ana auauna o se faagasologa paia. Ma e faapena foi le avanoa o le mauaina o faaaliga faaletagata lava ia.

Ou uso e ma tuafafine pele, e tutusa lava lo outou mauaina o le mafaufau ma le finagalo o le Alii mo lou oe lava ia olaga e pei foi o i matou o Aposetolo mo Lana Ekalesia. E pei lava ona finagalo le Alii ia tatou saili atu ma mafaufau loloto, anapogi ma tatalo, suesue ma tauivi ma fesili faigata, ua Ia finagalo foi ia te oe ia faia lea lava mea e tasi a o e sailia ni tali i au lava fesili.

E mafai ona e aoao e lagona le siufofoga o le Alii e ala i musumusuga a le Agag Paia.⁸ E pei lava ona foliga mai e aoga tele le Google, Twitter, ma le Facebook, ae latou te le tuuina maia ni tali i a outou fesili aupito sili ona taua!

Au uo talavou pele, e mafai ona e iloaina le mafaufau ma le finagalo o le Alii mo lou lava olaga. E te le tau mafaufau pe o e i ai i le mea o loo manaomia ai oe e le Alii pe o e faia le mea o loo Ia manaomia ona e faia. E te iloaina lava! O le a tau atu e le Agaga Paia ia te outou “mea uma e tatau ona outou faia.”⁹

Mulimuli i Perofeta

O lau fautuaga lona fa: Mulimuli i perofeta.

I le 1979, a o auauna atu o le peresitene aoao o le Aoga Sa, sa valaaulia ai au e auai i se semina a Sui Lisone i le taimi na tuu atu ai e Peresitene Spencer W. Kimball se lauga musuia e uiga i le tatalaina o faitotoa o malo sa tapunia i lena taimi i le Ekalesia, e pei o Saina. Sa ia luiina i latou uma sa i ai ina ia suesue le gagana Meneterini ina ia mafai ai ona tatou ofoina atu o tatou tomai faalematata e fesoasoani ai i tagata o Saina.

Ia te au, o le lui a Peresitene Kimball sa foliga mai o se poloaiga faaperofeta. O lena la po sa ou fesili atu ai i lou toalua o Dantzel, pe o fia naunau e suesue le gagana Mereterini faatasi ma au. Sa ia malie i ai, ma sa ma mauaina se faiaoga e fesoasoani ia i maua. Ioe sa lei lelei tele le ma tautala FaaMereterini, ae sa lava lo ma aoaoina, lea ina ua valaaulia au i le tausaga na sosoo ai (i se soloaiga o mea na matua lei faamoemoeina e tutupu) e alu i Saina o se polofesa asiasi e aoao atu le taotoga o fatu, sa lelei atu lou saunia e talia le valaaulia.

I le ono tausaga mulimuli ane i le 1985, le tausaga ina ua mavae ona valaauina au i le Korama a le Toasefululua. I se tasi aso na ou mauaina ai se talosaga faananati e alu i Saina e faatino se taotoga o le fatu o le latou tagata pese opera lauiloa, e lauiloa i Saina atoa o se toa manumanu. Sa ou faamalamalama i ai o lou tiutetauave faalelotu o loo taofia au mai lo’u alu atu, ae sa augani mai fomai i Saina ia ou alu atu vave lava e faatino le taotoga e laveai ai le ola.

Sa ou talanoaina le mataupu ma lau peresitene o le korama ma le Au Peresitene Sili. Sa uunaia i latou e faapea, o se mea lelei mo tagata o Saina, le tatau ona ou malaga ma faatino le taotoga.

Ma sa ou faia. Ma le agaga faafetai, sa faamanuiaina le taotoga! Ae, o le taotoga mulimuli lena o le fatu sa ou faatinoina. Sa faia i Jinan, Saina, i le aso 4 o Mati, 1985.

Ia toe faatelevave la i luma, o le taimi lenei ia Oketopa 2015, na o le tolu masina talu ai. Sa valaaulia maua ma Wendy e toe foi atu i le Iunivesite o Vailaau Faafomai o Shandong i Jinan. Sa ma maofa ina ua faafeiloaia a’u ma le agalelei o se “uo ua leva” o Saina ma sa toe faatasi ai ma fomai tipitipi sa ou aoaoina i le 35 tausaga ua mavae. O se mea laualuga o le ma asiasiga o le feiloai ai lea ma le atalii ma le atalii o le atalii o lena tagata pese opera lauiloa. O nei aafiaga ofoofogia uma na mafua ona o le mafuaaga lava e tasi: Sa ou faalogo i le fautuaga a se perofeta e suesue le FaaMereterini!

E vaaia e perofeta le lumanai. Latou te vaaia tulaga lamatia ma matautia ua tuu e le fili pe o le a ia tuuina i lo tatou ala. E muai vaaia foi e perofeta ia avanoa ma faamanuiaga matagofie o loo faatalitali mai ia i latou e faalogo ma le faamoemoe e usiusitai. Ou te iloa e moni lenei mea! Ua ou oo i ai au lava ia i le tele o taimi.

Ua folafola mai e le Alii ia i tatou o le a Ia le faatagaina lava le perofeta na te taitaiseseina i tatou. Sa tautino mai e Peresitene Harold B. Lee: “Atonu e te le fiafia i se mea e sau mai le pulega o le Ekalesia. Atonu o le a feteenai ma ou manatu faaupufai. Atonu e feteenai ma ou manatu faaleagafesootai. Atonu e faalavelave i nisi o mea o lou olaga faaleagafesootai. Ae a e faalogo i nei mea, e peiseai ua mai le fofoga o le Alii Lava Ia, faatasi ai ma le onosai ma le faatuatua, o le folafolaga e faapea ‘o le a le manumalo [lava] faitotoa o seoli ia te outou; ioe, ma o le a faamataa ese ai e le Alii le Atua mana o le pouliuli mai i o outou luma, ma faia ia luluina le lagi mo lo outou lelei, ma le mamalu o lona suafa’ (MF&F 21:6).”¹⁰

Atonu e te le malamalama i taimi uma i tautinoga uma a se perofeta soifua. Ae a e iloaina se perofeta o se perofeta, e mafai ona e faalatalata atu i le Alii i le lotomaualalo ma le faatuatua ma ole atu mo lau oe lava molimau e uiga i soo se mea ua folafola mai e Lana perofeta.

Pe tusa ma le 41 t.l.m., e toatele sa Nifae na auai i le Ekalesia, ma sa uluola le Ekalesia. Ae sa amata foi ona tuputele ia taupulepulega faalilolilo, ma o le toatele o o latou taitai taufaasese sa filo faatasi ma tagata ma sa faigata ona iloaina. A o faasolo pea ina faamaualuluga ia tagata, sa toatele sa Nifae sa “ faatauemu i mea paia, ma faafitia le agaga o le valoaga ma faaaliga.”¹¹

O na taufaamatau e tasi ua i ai foi ia i tatou i nei aso. O le mea moni matuia o loo i ai “auauna a Satani”¹² o loo lalafi solo i faalapotopotoga. O lea ia matua faaeteete ai po o ai e ana le fautuaga e te mulimuli ai.¹³

Ou uso e ma tuafafine pele, ua outou fananau mai e avea ma Tagata Moni o le Meleniuma! O outou o se tupulaga filifilia,¹⁴ na muai filifilia e le Atua e faia se galuega ofoofogia—e fesoasoani e saunia ia tagata o lenei lalolagi mo le Afio Faalua Mai o le Alii.

O lenei i le avea ai ma se Aposetolo a le Alii o Iesu Keriso, ou te faamanuia ai outou taitoatasi, e peiseai o faaee atu ou lima i luga o o outou ao, faatasi ai ma le gafatia e avea ai ma Tagata Moni o le Meleniuma na outou fananau mai ai e avea ai. Ou te faamanuia ia te outou ina ia maua le manao ma le tomai e iloa ai lou faasinomaga moni ma lou faamoemoega; ina ia e faamoemoe i ai ma saunia e faia mea “faigata”; ina ia outou le faavaivai i a outou taumafaiga e aoao le auala e maua ai mana o le lagi e fesoasoani ia te outou e foia tou faafitauli ma tali a outou fesili. Ma ou te faamanuia ia te outou ia mulimuli i perofeta ma le saolele atoa, ia lagona le filemu i o outou loto a o outou faia lena mea. Ou te faamanuia ia te outou ia iloa ma lagonaina le tele o le alofa o le Alii ia te outou ma le tele o Lona talitonuina o outou.

Ou te alofa ma lagolagoina Peresitene Thomas S. Monson i lenei galuega paia a le Atua Silisiliese. O Iesu Keriso o lo tatou Faaola. O Lana Ekalesia lenei. O tatou o Lona nuu! Ou te molimau atu ai i le suafa paia o Iesu Keriso, amene.

© 2015 Puletaofia e le Intellectual Reserve, Inc. Ua taofia aia tatau uma. Faamaonia le FaaPeretania: 0/00. Faamaonia le faaliliuga: 0/00. Faaliliuga o le “Becoming True Millennials.” Samoan. PD60000934 890