Avea ma Tagata Na E Fanau Mai e Avea Ai
O Se Faasauga ma Peresitene Russell M. Nelson
Faigalotu i le Lalolagi Atoa mo Talavou Matutua • 10 Ianuari, 2016 • Iunivesite o Polika Iaga–Hawaii
O’u uso e ma tuagane, ua ma fiafia tele e faatasi ma outou i lenei aso Sapati. Ma te alolofa ia te outou! Ma e ma te talitonu ia te outou! A o ou tauina atu ni nai manatu, ou te tatalo o le a outou faaaogaina la outou faitalia e valaaulia ai le Agaga Paia e aoao outou.1
Muamua, Manuia le Tausaga Fou! O se tausaga fou lava. Pe na e faia ni sini o le Tausaga Fou? Ma—pe o lena ua uma ona e solia le afa o na sini? Pe e te manao ea ia avea lenei tausaga ma tausaga aupito silisili o lou olaga? O le tausaga e te tulituliloa ai—e sili atu nai lo se isi lava taimi muamua—ia sini e sili ona taua ia te oe? Ou te fia talanoa ma outou e uiga i se mea ou te talitonu e mafai ona fesoasoani. Sei vaai pe mafai ona outou iloa lena mea.
Mafaufau i le tamaitai o lē, mo le 12 tausaga, sa onosaia se gasegase lēmatogafitia. Sa aapa atu lona lima e pa’i atu i le ofu o le Faaola. Na o le pau lea o lona avanoa e faamaloloina ai.2
Mafaufau i le tagata i le vaitaele o Petesa o lē, mo le 38 tausaga, na mafatia i se gasegase ma sa lei mafai ona avea ma tagata muamua e oo atu i totonu o na vai faamalolo.3
Mafaufau i soo o le Faaola o ē, faatasi ai ma peau taufaamata’u o loo taia ai lo latou tamai vaa fagota, na alalaga atu i le Faaola: “E te le manatu mai ea ia te i matou a fano?”4
O a mea na tutusa ai nei tagata?
Sa latou faananau! Faananau mo le Faaola e faamalolo i latou, fesoasoani ia i latou, faamama i latou, taiala i latou, puipui ma laveai i latou! Sa latou faananau mo Iesu Keriso e fesoasoani ia i latou ina ia fai mea e le mafai ona faia e i latou lava ia. Sa latou faananau ia maua le malosi ma le mana o le Faaola i o latou olaga. E te iloaina ea lena lagona? Talitonu mai ia te au, ou te iloaina.
Atonu sa e faananau e faamaea se galuega atofaina ona ua vave oo mai le aso e faagata ai—pe ua te’a foi lea aso. Atonu sa e faananau ia i ai se tasi e malamalama moni ia te oe, ia alofa moni ia te oe. Atonu o loo e faananau i le taimi nei ina ia taliaina i se iunivesite pe maua se galuega po o se nofoaga e nofo ai. Faananau e faia ni uo fou ma ia maua sau soa e faavavau.
Ia, o le tala fiafia lenei: O le faananau e mafai moni ona avea ma se faaosofiaga sili.
Na manino lava le lagonaina e le Perofeta o Iosefa Samita o le faananau matuitui i le Falepuipui i Lipereti. Sa ia aioi atu i le Alii: “Le Atua e, o fea o i ai oe?”5Ona o lea faananau matuitui faaleagaga, na maua ai e le Perofeta nisi o faaaliga sili ona ofoofogia o lenei tisipenisione.
Pe a tatou faananau ina ia taialaina e le lagi, tatou te galulue malolosi atu nai lo se isi lava taimi muamua ina ia sagatonu i le lagi. Pe a tatou faananau ina ia ola maloloina faaletino, tatou te aai ma faamalositino e pei ona tatau ai. Leai ma se ‘alofaga! A tatou faananau ia maua nisi tupe e tele atu, tatou te mulimuli ma le naunautai i le tulafono a le Alii o mea tautupe—ioe, o le, sefuluai!
Mafaufau i le manatu o Peresitene George Q. Cannon i le sefuluai a o avea o ia ma se alii talavou mativa. Ina ua talanoa atu lana epikopo i le aofaiga telē o le sefuluai sa totogiina e le taulealea mativa o George, sa fai atu i ai George i se mea faapenei: “Oi epikopo, ou te le o totogiina la’u sefuluai i le tupe ou te mauaina. O loo ou totogiina la’u sefuluai i le [tupe] ou te manao ia maua.” Ma o le tausaga lava na sosoo ai na maua ai e George le aofaiga tonu o le tupe na ia totogia mo lana sefuluai i le tausaga na muamua atu!6
A tatou faananau ia avea ma tagata na tatou fananau mai ia avea ai, e sui la tatou vaaiga mamao. Tatou te feala i luga mai se moegase faaleagaga e tuuina mai ma le atamai tele e le fili, ma faafuasei ai ona tatou vaaia mea e uiga ia i tatou lava, o isi, ma o tatou olaga tatou te le’i vaaia muamua lava. O le “fiafiaga” ma “mea faafiafia” a le lalolagi e amata ona vaaia e toetoe e faigata ona talitonuina, atonu e lamatia faaleagaga. Tatou te amata ona vaai i togafiti ma mailei a le fili mo mea moni ua latou i ai—o faaosoosoga ina ia galo ai ia i tatou lo tatou faasinomaga moni ma lo tatou taunuuga.
E amata ona ese lo tatou faaaluina o o tatou taimi. E foliga mai le taimi i le Facebook e le latalata lona ofoofogia i le taimi i le malumalu. Ua tatou lagonaina mo i tatou lava le upumoni loloto na aoao mai e se peresitene atamai o le malumalu: “A tatou ulufale atu i le malumalu, tatou te tuua le lalolagi o mea faafoliga.”7 E faasolo ina tatou naunau atili i upumoni e faavavau e aoao mai e le Alii ia i tatou i Lona maota paia nai lo manatu fou ofoofogia i ala o faasalalauga faaleagafesootai, lea e ono faasamasamanoa tele ma gase ai le mafaufau.
Sa tau mai e se tasi o tamaitai aoga atamai o le BYU ia te au na ia mauaina se aafiaga le lelei i lona lagona mautinoa ma le fiafia ma le aofaiga o le taimi na ia faaaluina i ala o faasalalauga faaleagafesootai. Sa ia faaitiitia lana taimi i le Facebook ma le Twitter ma fai mai: “Ou te lagona ua ou maua se vaaiga lelei atu ma se mafaufau manino atu e mafaufau loloto ai i autu ma faia ni talanoaga loloto ma isi. O lea ua mafai nei ona ou lagonaina se aafiaga malosi atu o le Agaga i lo’u olaga, o se mea aupito sili lea e mafai ona ou talosagaina.”
Pe a tatou faananau ina ia avea ma ni tagata moni, tatou te faaaogaina ma le amiotonu tekinolosi. Afai e te le iloa le ala e faia ai lena mea, alu i le LDS.org ma aoao ai.
Pe a tatou faananau ia avea ma ni soo moni o Iesu Keriso na tatou fananau mai ia avea ai, e faafuasei lava ona tatou maua le lototele ma le naunautaiga e aveese ai soo se mea ma mea uma mai o tatou olaga e lē paia ma lē mama! O lo tatou naunautaiga e mulimuli i fautuaga a o tatou taitai, e suia. Tatou te saili atu i fautuaga ma naunau ia mulimuli i ai—ma le saolele! O le lotomaualalo na te tuleiesea le faamaualuga ma le faasausili. E avea tusitusiga paia ma o tatou “puna sili ona taua” mo tali ma le mafanafana tatou te iloa e masani ona tatou saili i ai i le initoneti.
Pe tou te loto ea e faataitai se suega mo le 30 aso?
Ia tootuli i aso uma ma faafetai i lou Tama Faalelagi mo tusitusiga paia. Tau atu ia te Ia le fesili e tasi e sili ona e manaomia ona taliina i lena aso. Augani atu ia e maua le Agaga Paia e faatasi ma oe a o e faitau. Ona tatala lea o au tusitusiga paia soo se mea ma faitau seia oo ina e maua le tali.8 Faataitai i ai mo le 30 aso ma vaai po o le a le mea e tupu.
Pe a tatou faananau e tuputupu ae i tagata e finagalo le Atua ia tatou avea ai, e mafai ona tatou iloa ai o loo i ai se avega e le manaomia o loo taofia i tatou. O lena avega atonu o se tiga faaleagaga lea e o mai faatasi i taimi uma ma filifiliga leaga ma agasala e le’i salamoina. O le mea moni o lena agasala e le’i salamoina e pei o se maneta mo isi agasala! Pe a tatou naunau ia salamo, e pei o le tama o le Tupu o Lamonae, tatou te mananao ia lafoai uma a tatou agasala9 (e oo lava i mea e sili ona tatou fiafia i ai), ona aveesea lea o le faatuai, solaese le maasiasi, ma tatou loto ai, ma naunau foi, e o atu—o le mea moni, tatou te fia taufetuli atu—i lo tatou epikopo mo le fesoasoani tatou te manaomia ina ia salamo moni ai.
Ia, e itiiti lava nai faamautinoaga i lenei olaga, ae o se tasi lenei: O loo i ai se faamautinoaga 100 pasene e faapea, afai tatou te salamo faamaoni, o le a faamamaina i tatou ma faamaloloina—ma le mae’ae’a lelei, ma le atoatoa—i tatou e le Faaola.
Na aoao mai Elder D. Todd Christofferson: “O le mana o le Togiola [a le Faaola] e mafai ona soloiesea ai taunuuga o agasala mai ia i tatou. A tatou salamo, o Lona alofatunoa togiola e tauamiotonuina ma faamamaina ai i tatou (tagai 3 Nifae 27:16–20). E peiseai sa lei faatoilaloina i tatou, e peiseai sa tatou lei gauai atu i faaosoosoga.”10
Ou uso e ma tuagane pele, ou te folafola atu ia te outou e moni lena mea! Ma, e tusa pe o se agasala matuia e le’i salamoina po o ni vaivaiga faigata o loo faaauau ai pea ona tatou pauu ai, tatou te manaomia uma le fesoasoani a le Faaola ia avea ai tatou ma tagata na tatou fananau mai ia avea ai. E faigofie lava ona faigata ona faia e aunoa ma Lona malosi ma le mana.
Ma le agaga faafetai, na totogi e le Faaola le tau mo meaalofa uma a le Agaga o le a tatou manaomiaina pea e fesoasoani ai ia i tatou.11 O la tatou galuega le mauaina ma le agaga tatalo po o a meaalofa tatou te manaomiaina. Atonu tatou te manaomia le meaalofa o le amio pulea po o le fiafia. Atonu tatou te manaomia le meaalofa o le onosai, po o le meaalofa o le faamaloloina, po o le meaalofa o le lotofaamagalo. Atonu tatou te manaomia le meaalofa o le faaogatusaina o o tatou lagona feusuai ma tulafono e faavavau. Atonu tatou te iloa e le mafai ona tatou feola i se isi minute e aunoa ma le meaalofa o le faatuatua mausali i le Alii o Iesu Keriso. Pe a tatou faananau mo soo se meaalofa o le Agaga, o lona uiga, o le taimi o le a iu ai ina tatou tatalo ma le malosi atoa o o tatou loto mo lena meaalofa.12 Ma o le tala fiafia sili e faapea, o meaalofa faaleagaga taitasi e avatu ai i tatou i le isi laasaga e sosoo ai i luma ia avea ma tagata moni e tatau ona tatou i ai.
Ou uso e ma tuagane pele, o e ou te alofa i ai, o le mea moni o le a i ai se aso, o le a tatou taitoatasi ai ma faafesagai i se faatalanoaga patino ma le Faaola Lava Ia. Pe a tatou iloa o le a tupu moni lenei mea, o le a tatou naunau e faia soo se mea ina ia saunia ai!
O lea la, o se fesili lenei a o ou faaiu atu: Ae a pe a e iloaina ua toe afio mai le Faaola i lenei lalolagi—ma ua uma ona Ia feiloai ma nisi o Ona soo moni i nai faapotopotoga toatele ofoofogia13—faapotopotoga ia e le iloaina e le lalolagi, e aofia ai le CNN ma vaega o tusitusiga i le initoneti. Afai e te iloaina ua leva ona i ai le Faaola i le lalolagi, o le a se mea o le a e faananau lava ia faia i le aso, ae o a foi mea o le a e naunau ma saunia e faia taeao?
Ou te tatalo i lenei tausaga o le a outou maua ni taimi o le faananau matuitui o le a tuleia ai outou ia o atu atili i luma i le ala ina ia avea ma ni alii po o ni tamaitai na outou fananau mai ia avea ai. E ofoofogia lou lava tagata moni! Aua nei e lolo atu i se mea e leai sona taua. I le suafa paia o Iesu Keriso, amene.
© 2015 Puletaofia e le Intellectual Reserve, Inc. Ua taofia aia tatau uma. Faamaonia le Faaperetania: 0/00. Faamaonia le Faaliliuga: 0/00. Faaliliuga o le “Becoming the Person You Were Meant to Be.” Samoan. PD60000934 890