Mauaina o Lo’u Faamoemoega

Nancy J. Maynes

O Se Afiafi ma Elder Richard J. Maynes

Faigalotu i le Lalolagi Atoa mo Talavou Matutua • 1 Me, 2016 • Tapeneko i Sate Leki

Ua ou fiafia lava e i ai iinei faatasi ma lo’u toalua i lenei po, ma ou te faafetai mo le avanoa e talanoa atu ai ia te outou.

Ina ua ta’u muamua mai e lo’u toalua ia te au o le a lauga atu i le Toefuataiga o le talalelei, ae maise lava le Uluai Faaaliga a Iosefa Samita, sa ma talanoa i le auala na aafia ai lo’u olaga i lenei autu ma le auala atonu o le a i ai se faatosinaga lelei o lo’u aafiaga i le faamalosia o lo outou faatuatua.

O a’u o se tagata liliu mai i le Ekalesia, ma ou te fia faasoa atu ia te outou lo’u aafiaga e sili ona faapelepele ia te a’u—o le tala i lo’u liua.

Sa ou ola a’e i se aiga alolofa tele, ma na ou maua ni matua lelei tele. Matou te le’i ō soo i le lotu, ae i le avea ai ma ni tagata o le Lotu Peresipiteriane, matou te auai lava i lotu i le Kerisimasi ma le Eseta, ma o nisi taimi e ave ai a’u e lo’u tina i le a’oga Aso Sa. O iina na muamua ou mauaina ai la’u molimau i le Faaola. Sa ou fiafia lava e faalogologo i tala e uiga ia Iesu. Sa ou iloaina e faapitoa tele o Ia.

A o ou teineitiiti sa ou lagonaina le manaomia ona faia o a’u lava ia tatalo i lo’u moega i le po. Sa ou iloaina na faafofoga mai lo’u Tama Faalelagi ia te a’u.

I le popofou o lo’u vaitausaga 20 sa ou tafao faamasani ai ma sa oo i le tele o faanoanoaga, le fiafia, ma le lotovaivai ia e masani ona oo mai i tafaoga faamasani. Atonu ua lagonaina e nisi o outou na lava lagona e tasi, ae o loo i ai se eseesega. Ua ia te outou le talalelei a Iesu Keriso i o outou olaga. Oka se maoae o lena faamanuiaga. E avatu e le talalelei ia te outou le faamoemoega ma le malosi. Na te avatua le faamoemoe. Ma i lena taimi i lo’u olaga, sa ou iloaina sa i ai se mea na misi. Sa ou lagonaina sa ou le’i mauaina se faamoemoega moni po o se taitaiga i lo’u olaga. Sa amata ona ou alu i lotu eseese ma le faamoemoe ia maua ai ni tali. Sa ou saili mo se mea o le a aumaia i lo’u olaga se uiga, ae sa ou le iloaina po o fea e maua ai.

I se tasi aso sa matua patino lava le faigata, sa tonu ai ia te au o le a faia sa’u tatalo. O lea sa ou tootuli ai i lalo i autafa o lo’u moega—o se mea sa lei masani ona ou faia—ma sa ou sasaa atu lou loto i le Tama Faalelagi, ma ole atu ia te Ia mo se fesoasoani ma pe mafai ona Ia tuu mai ia te au sina taitaiga i lo’u olaga. Sa lagona sina ou toafimalie ma faaauau ai au gaoioiga masani o aso uma.

I ni nai aso mulimuli ane sa taliina ai la’u tatalo. O se faifeautalai ua foi mai le misiona na ulufale mai i lo’u olaga. O lona igoa o Richard John Maynes. Sa ia talosaga mai ia te au ma te tafafao faamasani ma sa faia mea e faia e faifeautalai lelei ua foi mai le misiona. Sa ia fesili mai ia te a’u pe ua ou iloaina se mea e uiga i le Ekalesia ma pe sa ou faitau i le Tusi a Mamona.

Sa lei pine lena ae ia foai mai ia te au se Tusi a Mamona e faitau. Sa amata ona ou faitaua, ma o se tasi o mea na vave ona ou gauai atu i ai o le itulau autu, lea e faitauina, “O Le Tusi a Mamona: O Se Tasi Molimau ia Iesu Keriso.” Sa leai ma sou manatu o le Tusi a Mamona e faatatau ia Iesu.

Sa amata foi ona fai a’u lesona e faifeautalai, ma sa suluia ai loa lo’u olaga i le malamalama. Ina ua aoaoina a’u e faifeautalai e uiga i le taulealea o Iosefa na asiasi mai i ai le Atua le Tama ma Lona Alo, o Iesu Keriso, o ni tagata mavaevae, sa foliga mai e moni i se mea sa ou lagonaina lava ma talitonu i ai i taimi uma, ae e le o le mea lena sa aoaoina i la’u lotu. O le Uluai Faaaliga o se vaega taua o lo’u liuaina. Sa ou lagonaina se fesootaiga ma Iosefa Samita ona sa ia te ia le fesili lava e tasi sa ia te au: O fea ou te maua ai le upumoni? Sa taliina e le Tama Faalelagi lana tatalo faamaoni, ma sa Ia taliina foi la’u tatalo. Sa faaauau pea ona faia au lesona uma ma iloa ai i lou loto o mea sa ou aoaoina sa moni.

Sa papatisoina au e le faifeautalai ua foi mai le misiona o Richard John Maynes i lena taumafanafana. Sa faaauau pea ona ma tafafao faamasani, ma i se tausaga mulimuli ane sa ma faaipoipo ai i le Malumalu o Manti Iuta.

Ia, o le amataga moni lava lena o lo’u liuaina. E pei ona i ai i le toatele o i tatou, o le liuaina o se faagasologa. E manaomia ona faafaileleina a tatou molimau ma faamalosia i aso uma e ala i le faitauina o tusitusiga paia, fai a tatou tatalo, ō i le lotu, auai i le malumalu, ma le mulimuli i lo tatou perofeta.

E tatau ona avea tusitusiga paia ma se vaega taua o lo tatou olaga. A o ou teineitiiti, sa le i avea ma se tagata o le Ekalesia, sa talosagaina ai a’u e filifili se mau e tauloto. Sa ou filifilia le Faataoto 3:5–6:

“Ia e faatuatua ia Ieova ma lou loto atoa; a e aua le faalagolago i lou lava atamai.

“Ia e manatua o ia i ou ala uma, ona faatonuina ai lea e ia lava ou ala.”

E le mafai ona ou ta’u atua ia te outou le tele o taimi e oo mai ai lena mau i lo’u mafaufau pe a ou manaomiaina se fesoasoani mai luga. Afai e tau lava ina tuu lo tatou faatuatua ma le faalagolago i le Alii, ma le iloaina tatou te le malamalama i mea uma e tutupu i o tatou olaga ma manatua e faafetai atu ia te Ia mo le tele o faamanuiaga ua tatou maua, o le a Ia faaali mai ia te i tatou le ala. Ia atonu e le tupu i le taimi tatou te mananao ai, ae ou te iloa ua i ai i le Tama Faalelagi se fuafuaga mo i tatou uma taitoatasi.

O se tasi o isi mau ou te fiafia lava i ai o loo maua i le Mataupu Faavae ma Feagaiga 123:12: “Aua o loo i ai nei tagata e toatele i luga o le lalolagi i totonu o lotu uma, vaega, ma tapuaiga, o e ua faatauasoina i le taufaasese poto o tagata, lea ua latou taooto faapupuna ai e faasese, ma o e ua nao na taofia mai le upumoni ona ua latou le iloa le mea e maua ai.”

E matua taua lava mo i tatou o tagata o le Ekalesia le aapa atu ma faasoa atu le talalelei i isi. E matua anoanoai tagata e pei foi o a’u o loo saili mo le upumoni ae le iloa po o fea e maua ai.

O faaiuga sili ona taua e lua ua ou faia i lo’u olaga o le papatisoina ma le faaipoipoina i le malumalu i lo’u toalua. Ou te matua faafetai lava mo le talalelei i lou olaga. Ua tatou iloa uma e i ai taimi e le faigofie ai le olaga. E manaomia ona tatou manatuaina upu a Elder Jeffrey R. Holland. Sa ia saunoa:

“Ua i ai iina le Matai o le Lagi ma le Lalolagi e faamanuia ia te outou. …

“Faalagolago ia te Ia. Faalagolago atoa ia te Ia. Faalagolago ia te Ia e faavavau.”¹

Ou te iloa e moni le Tama Faalelagi. E alofa o Ia ia te i tatou. E faafofoga o Ia ia tatou tatalo. Ou te iloa o Iesu Keriso o lo tatou Faaola. Sa maliu o Ia mo i tatou taitoatasi ma foai mai ia i tatou le meaalofa sili o le salamo, lea e faatagaina ai i tatou ia faia ni suiga i o tatou olaga ina ia lelei atu i aso taitasi. Ou te iloa ua ia i tatou se perofeta soifua, Peresitene Thomas S. Monson, ma ou te iloa sa vaai le Perofeta o Iosefa Samita i le Tama ma le Alo ma aumai ia i tatou le Tusi a Mamona: O Se Tasi Molimau ia Iesu Keriso.

Ou te tatalo ia outou faaauau pea ona faamalosia ma faafailele a outou molimau i aso uma e ala i le faia o na mea ua aoaoina ai i tatou e fai e le Faaola ma o tatou perofeta. O lau tatalo ia tatou faaauau pea ona faalagolago i le Alii ma iloa e silafia e Ia po o ai oe ma o le a Ia faatonu i ou ala.

Ou te fai atu ai nei mea i le suafa o Iesu Keriso, amene.