Fuafuaga o le Faaolataga

O le fuafuaga a le Tama Faalelagi mo lo tatou toe foi saogalemu atu ma le fiafia ia te Ia

Pe ua e mafaufau ea pe aisea ua e i ai i le lalolagi po o le a lou faamoemoega i le olaga? Pe e te mafaufau i nisi taimi pe aisea e faigata tele ai le olaga? E te popole e uiga i le mea o le a tupu pe a e maliu po o se e pele ia te oe? Pe a e feagai ma fesili faigata e pei o nei—ma e tatou te feagai uma lava—e fesoasoani le iloa o loo i ai se fuafuaga a le Tama Faalelagi mo oe, mo i tatou uma lava. O le malamalama i lena fuafuaga e mafai ona fesoasoani ia te oe e maua ai tali i nei fesili ma maua ai le fiafia moni, e tusa lava po o a mea e ono tutupu i lou olaga.

O le a Le Fuafuaga o le Faaolataga?

O le fuafuaga o le faaolataga, po o le fuafuaga o le fiafia, o le fuafuaga a le Tama Faalelagi e fesoasoani ia i tatou ia avea e faapei o Ia ma toe foi atu ia te Ia. O le Foafoaga o le lalolagi, o le Pau o Atamu ma Eva, o lo tatou fanau mai ma le oti, o le Togiola a Iesu Keriso, o lo tatou toetutu ma le Faamasinoga Mulimuli, ma tulafono uma, poloaiga, ma meaalofa a le Atua o ni vaega o Lana fuafuaga. Ua i ai ia Iesu Keriso le matafaioi autu i le aumaia o le faaolataga o fanau a le Tama Faalelagi. E ala i Lana Togiola, ua Ia faia ai le fuafuaga ia mafai, ona tatou faataunuuina le faamoemoega o le fuafuaga—ia maua le ola e faavavau faatasi ma le Atua.

Vaaiga Aoao i autu: Fuafuaga le Faaolataga

Taiala fesootai mo le suesueina o le talalelei: Muai Olaga, Olaga Faitino, Ola e Faavavau

Vaega 1

Na Saunia e le Tama Faalelagi Lana Fuafuaga Ina ia Mafai ai Ona Avea Oe e Faapei o Ia

O i tatou uma—o tagata uma na soifua pe o le a ola i le lalolagi—sa nonofo faatasi ma o tatou matua faalelagi ae tatou te lei fananau mai. O i tatou o o Laua atalii ma afafine agaga, ae sa tele naua mea sa manaomia ona tatou oo i ai ina ia avea faapei o i Laua. E alofa le Tama Faalelagi ia i tatou ma e finagalo ia tatou ola uma e pei ona Ia faia: i le mamalu e faavavau faatasi ma e pele ia i tatou. O le mafuaaga lena na Ia saunia ai le fuafuaga o le faaolataga.

Ata

tamaitai o loo tatalo

O le galuega ma le mamalu o le Atua ia “aumaia le tino ola pea ma le ola faavavau o le tagata” (Mose 1:39). I se isi faaupuga, o le faamoemoega atoa o le fuafuaga e mo i tatou ia avea faapei o le Atua ma ola e faavavau faatasi ma Ia. O le iloaina e uiga i le fuafuaga e mafai ona fesoasoani e te malamalama ai i lou faasinomaga paia ma le gafatia e faavavau.

Mea e mafaufau i ai

Faitau pe matamata i le saunoaga a Dieter F. Uchtdorf “E Taua Oe ia te Ia.”¹ O le a le uiga ia te oe o le iloa faapea o le Atua e “silasila mai ia te oe o le tagata e mafai ona avea ai oe ma tagata ua fuafuaina e avea ai oe”? E mafai faapefea e lena malamalama ona suia le ala e te mafaufau ai ma taulima ai oe lava ma isi?

Gaoioiga mo le aoao faatasi ma isi

E ala i Lana faataitaiga, na faaali mai ai e Iesu Keriso ia i tatou le ala e mafai ai ona avea i tatou e faapei o le Atua. Fai se lisi o nisi o uiga e oo mai i le mafaufau pe a e mafaufau ia te Ia. (E mafai ona e vaai i le mataupu 6 o le Tala’i La’u Talalelei mo nisi o manatu.) Faasoa atu pe faapefea ona e vaaia nisi o nei uiga i le tasi ma le isi. Valaaulia tagata taitoatasi e filifili se tasi o na uiga e manao o ia e atiae ma fai se fuafuaga e faamalosia ai lena uiga. Faasoa atu au fuafuaga i le tasi ma le isi, ma uunaia le tasi ma le isi a o e taumafai e ausia au sini.

Aoao atili

Alema 12:28–34
Robert D. Hales, “O le Fuafuaga o le Faaolataga: O Se Oa Paia o le Malamalama e Taialaina i Tatou,” Liahona, Oke. 2015, 25.

Vaega 2

O Le Malamalama i le Fuafuaga o le a Fesoasoani ia te Oe i Tulaga Faigata

A e malamalama e faapea o lenei olaga ua na o sina vaega itiiti o lou olaga, e mafai ona e faalagolago i le faamoemoe pe a e feagai ma tofotofoga. E le faapea ai la o le a mafai ona e taliina i taimi uma fesili e pei o le “Aisea na tupu ai lenei mea?” Ae e tusa lava pe utiuti lou malamalama, e mafai ona e mautinoa e alofa le Atua ia te oe (tagai i le 1 Nifae 11:17) ma o le a le tumau e faavavau ou luitau. E mafai foi ona e iloa ona o Iesu Keriso, o le oti e le o le mutaaga lea; ua na o se laasaga i luga o le ala e avea ai e faapei o le Atua.

Ata

tamaitai o loo tootuli i le maa faamanatu i le fanuamaliu

Mea e mafaufau i ai

Matamata “Plan of Salvation—We’re Still a Family” (4:47). Ua fesili le alii talavou i le vitio, “O le a le uiga o le i ai o se vaaiga e faavavau?” Mafaufau pe faapefea ona e taliina lenei fesili. Atonu e te manao e faasoa atu ou manatu i se tagata o le aiga po o se uo pe faamaumau i se api talaaga.
Faitau mau nei, ma vaavaai mo igoa eseese mo le fuafuaga o le faaolataga: 2 Nifae 9:6, 13; 11:5; Alema 34:16; 41:2; 42:8, 31. O a ni mea o aoao mai e nei igoa e uiga i le fuafuaga a le Atua?

Gaoioiga mo le aoao faatasi ma isi

E mafai faapefea ona e taulai atu i le fuafuaga a le Tama Faalelagi a o e fetaomi atu i luma i le olaga? Na aoao mai Peresitene Russell M. Nelson, “Afai o taulaiga o o tatou olaga e i le fuafuaga o le faaolataga a le Atua … ma ia Iesu Keriso ma Lana talalelei, e mafai ona tatou lagona le olioli e tusa lava po o a mea e tutupu—pe le o tutupu foi—i o tatou olaga.”² Talanoa faatasi e uiga i le auala e mafai ai ona e avea Keriso ma Lana talalelei ma taulaiga o o outou olaga. E mafai ona outou feauauai i le pueina o ata o se potu. Ona tuu atu lea i tagata taitoatasi e filifili po o le fea vaega o le potu o le a ia taulai i ai. Vaai faatasi i ata, ma talanoa pe faapefea ona ese foliga o le potu mai vaaiga eseese. Talanoa e uiga i le auala e mafai ai e le taulai atu ia Keriso ona fesoasoani tatou te iloa ai o tatou olaga mai se vaaiga e faavavau.

Aoao atili

Roma 8:31–39; Mose 6:57–62
Russell M. Nelson, “Mauaina o le Mana o Iesu Keriso i o Tatou Olaga,” Liahona, Me 2017, 39–42
Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 101–4
Thomas S. Monson, “O Le Ala Atoatoa i le Fiafia,” Liahona, Nov. 2016, 80–81

Vaega 3

Ua Faia e Iesu Keriso le Fuafuaga ia Mafaia mo Tagata Uma

Atonu e te lagona ua tele naua au mea sese pe o le a le lava lou lelei e maua ai faamanuiaga folafolaina uma a le Atua. Afai o le manuia o le fuafuaga a le Atua e faalagolago atoa lava i au taumafaiga faaletagata lava ia, o le a moni lena mea. Ae ua faia e Iesu Keriso le fuafuaga e faavavau a le Atua mo tagata uma. Ona o Lana taulaga togiola, tatou te le tau faia uma ai e i tatou lava. Ua Ia valaaulia tagata uma ia aoao e uiga i le fuafuaga, salamo, osia ma tausia feagaiga ma Ia, ma olioli i faamanuiaga folafolaina o le fuafuaga. A tatou faia mea uma tatou te mafaia e faatino ai le faatuatua ia te Ia, salamo, ma tausia a tatou feagaiga, o le a Ia faia le eseesega ma faamalosia i tatou i luga o le ala. E mafai ona tatou maua le fiafia i le fuafuaga, i le iloaina o Ana folafolaga e mautinoa.

Mea e mafaufau i ai

Faitau pe matamata i le saunoaga a Elder Adrián Ochoa mai le konafesi aoao ia Aperila 2022, “O Aoga ea le Fuafuaga?”³ Ua faamatala mai e Elder Ochoa ni mataupu faavae se tolu e ono fesoasoani pe a e lagona e le o aoga le fuafuaga o le faaolataga i lou olaga. Maitau le taua o Iesu Keriso i na mataupu faavae taitasi. Fai se sini e taulai atili atu ia te Ia. A o e galue i lau sini, tusifaamaumau ou lagona e uiga i le ala e te vaai ai i le fuafuaga o le fiafia o loo galue i lou olaga.

Aoao atili

Alema 22:12–16
Dallin H. Oaks, “O Le Fuafuaga Sili,” Liahona, Me 2020, 93–96
Dallin H. Oaks, “O Le Aiga Atua ma le Ata o le Faaolataga,” Liahona, Me 2017, 100-103
L. Tom Perry, “O Le Fuafuaga o le Faaolataga,” Liahona, Nov. 2006, 69–72
“The Plan of Salvation” (vitio), Gospel Library

O Isi Punaoa e uiga i le Fuafuaga o le Faaolataga