Muai Olaga

O lo tatou olaga faatasi ma le Atua ae tatou te lei fananau mai

I nisi taimi, o le toatele o tagata o le a taumanatunatu po o le a le mea o le a tupu pe a latou oti. Ae pe na i ai se taimi na e mafaufau ai pe na e i ai muamua ae e te lei fanau mai ma, afai o lea, po o ai la oe i lena taimi?

Ua tatou iloa mai tusitusiga paia ae tatou te lei o mai i le lalolagi, sa tatou nonofo faatasi ma le Atua ma tapuai atu ia te Ia o lo tatou Tama e Faavavau. Sa tatou mauaina foi faatonuga ma sauniuniga mo o tatou olaga faaletino ma filifili ai e mulimuli i le fuafuaga a lo tatou Tama mo lo tatou faaolataga.

O lenei fuafuaga o le faaolataga na aofia ai lo tatou o mai i le lalolagi. O se vaega o le aafiaga faaletino, o le a tatou maua ai tino faaletino ma se veli o le a ufitia ai manatuaga o lo tatou muai olaga. O iinei i le lalolagi e tatau ona tatou faaaogaina lo tatou faitalia, po o lo tatou tomai e filifili ai. I se Fono Tele sa faia i le taimi o lo tatou muai olaga, sa filifilia ai e le Tama Faalelagi Iesu Keriso e totogi le tau mo a tatou agasala ma faatoilalo le oti, ma sa taliaina ma le naunautai e Iesu le matafaioi. Sa tatou aoaoina o lo tatou alualu i luma ia avea faapei o lo tatou Tama Faalelagi o le a manaomia ai le tuuina o lo tatou faatuatua ia Iesu Keriso ma usitai i poloaiga a le Atua.

O Le A Le Muai Olaga?

O le “Muai olaga” e faasino i le olaga sa tatou ola ai ae tatou te lei o mai i le lalolagi o ni tagata soifua. I le muai olaga, sa nonofo tagata uma ma le Atua o Ni Ana fanau agaga.

Vaaiga aoao i autu: Muai Olaga

Taiala fesootai mo le suesueina o le talalelei: Fuafuaga o le Faaolataga, Olaga Faitino, Lalolagi o Agaga, Iesu Keriso, Fanau a le Atua

Vaega 1

Sa E Ola Faatasi ma le Atua ae E Te Le’i Fanau Mai

Ata

fafine o loo mafaufau loloto i le muai olaga

Ae tatou te lei fananau mai, sa i ai o tatou tino agaga ma sa nonofo faatasi ma le Atua o ni afafine agaga ma atalii o ni matua faalelagi (tagai Mose 3:4–5). O iina na tatou “iloa ai ma tapuai i le Atua o lo [tatou] Tama Faavavau.” ¹ O se taimi lenei o le aoaoina ma sauniuniga, ma sa silafia i tatou e le Atua (tagai Ieremia 1:5) ma sa fesoasoani ia i tatou e saunia ai mo lo tatou olaga i le lalolagi (tagai Mataupu Faavae ma Feagaiga 138:56).

Mea e mafaufau i ai

O upumoni o loo aoao mai i le “O Le Aiga: O Se Folafolaga i le Lalolagi” e fesoasoani tatou te malamalama ai i le ala e fetaui ai lo tatou olaga i le muai olaga i le fuafuaga a le Tama Faalelagi mo lo tatou fiafia. Faitau parakalafa muamua e tolu o le folafolaga, gauai faapitoa atu i mau faasino i lo tatou muai olaga. E faapefea ona fesoasoani lou malamalama i lo tatou muai olaga pe a e feagai ma luitau? Aisea e te manatu ai na faaali mai e le Atua nei upumoni e uiga i le muai olaga?
E le tele ni mea tatou te le iloa e uiga i lo tatou muai olaga. Peitai, ua tatou iloa “e toatele … na mauaina a latou uluai lesona i le lalolagi o agaga ma sa saunia e o mai i le taimi tatau ai a le Alii” (Mataupu Faavae ma Feagaiga 138:56). Mafaufau i mea ua e iloa e uiga i le fuafuaga o le faaolataga ma le faaeaga a le Atua ma le talalelei a Iesu Keriso, o a ni lesona atonu na tatou aoaoina i lea taimi? Suesue le Mataupu Faavae ma Feagaiga 138:53–57, ma gauai faapitoa atu i le (fuaiupu 56). Afai e i ai sou faamanuiaga faapeteriaka, o le faitauina e mafai foi ona fesoasoani. E mafai faapefea e le iloaina sa e saunia mo lou olaga faaletino ona e maua ai le to’a i taimi faigata?

Gaoioiga mo le aoao faatasi ma isi

Sa faamanatu mai e Peresitene Russell M. Nelson i tagata o le Ekalesia, “O ai oe? O le mea muamua lava ma le sili, o oe o se atalii ma se afafine o le Atua.”² Valaaulia tagata uma e faasoa mai pe aisea e taua ai ia i latou lo latou faasinomaga o ni fanau a le Atua. Ona faitau faatasi lea o le Eperu 12:9; Mataupu Faavae ma Feagaiga 76:24; Galuega 17:29; ma le Roma 8:16 . O a ni malamalamaaga ua e maua mai nei mau? O a mea ua e aoao mai i nei mau e uiga i le avea ai ma atalii o le Atua? Faasoa atu ou manatu i le vaega.
Mafaufau i tala na faamatala atu e isi ia te oe e uiga i lou laitiiti. E ui lava e te le manatuaina le avea ma se pepe po o se tamaitiiti, ae o le mea na tupu ia te oe e mafai lava ona aafia ai oe i lou olaga atoa. Valaaulia le vaega e faasoa mai ni nai faataitaiga. E pei lava ona le mafai ona tatou manatua lo tatou laitiiti, e le mafai foi ona tatou manatuaina lo tatou muai olaga. E faapefea e lenei mea ona aafia ai le auala tatou te mafaufau ai i lo tatou muai olaga?

Aoao atili

Dieter F. Uchtdorf, “O Lau Malaga Matagofie i le Aiga,” Liahona, Me 2013, 125–29
Neal A. Maxwell, “Premortality, a Glorious Reality,“ Ensign, Nov. 1985, 15–18
“Mataupu 6: O Lo Tatou Muai Olaga,” Tusi Lesona a le Tagata Aoga o Aoaoga Faavae o le Talalelei (2010), 13–15

Vaega 2

Na Filifilia Iesu Keriso i le Muai Olaga e Avea ma o Tatou Faaola

Ata

O Iesu Keriso ua filifilia e avea ma o tatou Faaola

I le muai olaga, sa valaauina ai e le Tama Faalelagi se Fono Tele e tuuina atu Lana fuafuaga mo lo tatou alualu i luma e faavavau. Sa tatou aoaoina o le a tatou o mai i le lalolagi, lea e mafai ona tatou faaaoga ai lo tatou faitalia ma avea atili ai e faapei o le Atua (tagai Aperaamo 3:23–26). Na filifilia e le Tama Faalelagi ia Iesu Keriso e avea ma Faaola ma Togiola o le lalolagi, ma sa Ia taliaina ma le loto i ai lena matafaioi (tagai 1 Peteru 1:19–20). I le avea ai ma o tatou Togiola, o le a Ia faia ia mafai ai e i tatou ona toe foi atu i le afioaga o le Atua e ala i le faatoilaloina o le oti ma le agasala.

Peitai, sa saili Lusifelo (Satani) e faaumatia le faitalia na tuu atu e le Atua i Ana fanau (tagai Mose 4:1–3). Sa manao foi o ia ia maua le mamalu o le Atua (tagai Isaia 14:12–15; Mataupu Faavae ma Feagaiga 76:25–29). O lenei mea na afua ai se vaevaega tele o fanau a le Atua (tagai Aperaamo 3:27–28; Faaaliga 12:7). O i latou o e na mulimuli ia Lusifelo sa tutulieseina mai le lagi faatasi ma ia (tagai Faaaliga 12:8–9; Mataupu Faavae ma Feagaiga 29:36–37). O i latou uma na taliaina Iesu Keriso o le Faaola sa mafai ona alualu i luma ma maua se tino faaletino i le lalolagi.

Na tuuina mai e le Atua mo i tatou le meaalofa o le faitalia. Faitau le 2 Nifae 2:27–29, ma gauai atu i le matafaioi o loo faia e le faitalia i o tatou olaga. Aisea ua avea ai le meaalofa o le faitalia o se vaega taua o le fuafuaga a le Tama Faalelagi ma lo tatou aafiaga i le olaga nei? O le a se mea o aoao atu ia te oe e le tutulieseina o Lusifelo ma e na mulimuli ia te ia e uiga i le taua o le faitalia?

Na muai faauuina Iesu Keriso e avea ma o tatou Faaola. O le a le uiga o le faalagiga “Faaola”? Faitau le Ioane 3:17; Galuega 2:21; Helamana 14:15; ma le Mose 1:6. O le a se mea ua e aoao mai i nei fuaiupu e uiga i le matafaioi a Iesu Keriso?

Gaoioiga mo le aoao faatasi ma isi

I le taimi o lo tatou muai olaga, sa tatou iloa ai le Atua ma Iesu Keriso. I le olaga faitino, tatou te le manatuaina lenei taimi ma e tatau ona “savavali i le faatuatua, ae le o le vaai” (2 Korinito 5:7). Afai o loo e aoaoina tamaiti laiti, e mafai ona e valaaulia i latou e savavali i le isi itu o le potu o loo fusi mata e fesoasoani ai ia latou malamalama i le uiga o lenei mea. I le avea ai o se vaega, suesue nisi o mau o loo lisiina i lalo o le ”Faatuatua” i le Taiala i Tusitusiga Paia. Ona talanoaina lea o le matafaioi o le faatuatua ia Iesu Keriso e faia i la tatou malaga toe foi atu i lo tatou aiga faalelagi.

Aoao atili

Dallin H. Oaks, “O Le Fuafuaga Sili,” Liahona, Me 2020, 93–96
Taiala i Tusitusiga Paia, “Fono i le Lagi,” Potutusi o le Talalelei
Taiala i Tusitusiga Paia, “Faaola,” Potutusi o le Talalelei

O Isi Punaoa e uiga i le Muai Olaga