Perofeta

O perofeta o tamalii musuia na valaauina e saunoa mai mo le Alii. O le Peresitene o le Ekalesia o le perofeta lea i le taimi nei—ua na o le pau lea o le tagata i le lalolagi e mauaina faaaliga e taitaiina ai le Ekalesia atoa.

Vaaiga Aoao

I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua faamanuiaina i tatou ina ia taitaiina e perofeta soifua—o tamalii musuia ua valaauina e saunoa mai mo le Alii, e pei ona sa i ai Mose, Isaia, Peteru, Paulo, Nifae, Mamona, ma isi perofeta o tusitusiga paia. Tatou te lagolagoina le Peresitene o le Ekalesia o se perofeta, tagatavaai, ma talifaaaliga—na o le pau lea o le tagata i le lalolagi e mauaina faaaliga e taitai ai le Ekalesia atoa. Tatou te lagolagoina foi fesoasoani i le Au Peresitene Sili ma sui o le Korama a Aposetolo e Toasefululua, o ni perofeta, tagatavaai ma talifaaaliga.

E pei o perofeta o anamua, o perofeta o aso nei e molimau ia Iesu Keriso ma aoao mai Lana talalelei. Latou te faalauiloa mai le finagalo o le Atua ma [Lona] uiga moni. Latou te saunoa mai ma le le fefe ma le manino, e tautino mai le leaga o le agasala ma lapatai mai i ona taunuuga. E i ai foi taimi, e musuia ai i latou e perofeta ane i mea o le a tutupu i le lumanai mo lo tatou manuia.

E mafai ona tatou faatuatuaina i taimi uma i perofeta soifua. O a latou aoaoga e atagia ai le finagalo o le Alii, o le na tautino mai: “O le mea ua fai atu ai A’u o le Alii ua Ou fai atu ai, ma Ou te lē faatoese mai ai au lava ia; ma e ui ina mavae atu le lagi ma le lalolagi, e lē mavae atu lava lau upu, ae o le a faataunuuina uma lava, pe i lou lava leo po o i le leo o au auauna, ua tutusa lava” (Mataupu Faavae ma Feagaiga 1:38).

O lo tatou saogalemu silisili o loo taoto lea i le mulimulitaia a’ia’i i le afioga a le Alii e tauala mai i Ana perofeta, ae maise lava le Peresitene o loo i ai nei o le Ekalesia. Ua lapatai mai le Alii o i latou o e le fia faalogo i upu a perofeta soifua o le a pau (tagai i le Mataupu Faavae ma Feagaiga 1:14–16). Ua Ia folafola mai faamanuiaga silisili ia i latou o e mulimuli i le Peresitene o le Ekalesia:

“Ia outou uai atu i ana upu uma ma poloaiga o le a ia tuu atu ia te outou e pei ona maua e ia, ma savavali i le paia atoa i o’u luma;

“Ona o lana upu ia outou talia, e pei lava ua mai i loʼu lava gutu, i le onosai ma le faatuatua atoa.

“Aua o le faia o nei mea o le a le manumalo ai faitotoa o seoli ia te outou; ioe, ma o le a faamataaese e le Alii le Atua le malosi o le pouliuli mai o outou luma, ma luluina le lagi mo lo outou lelei, ma le mamalu o lona suafa” (Mataupu Faavae ma Feagaiga 21:4–6).

Tusifaamaumau Ou Lagona Uunai