O Ki ma le Pule o le Perisitua
E taitaia e ki o le perisitua tamaitai faapea foi ma alii, ma o sauniga o le perisitua ma le pule o le perisitua e faatatau foi i tamaitai e pei foi o alii.
I.
I lenei konafesi ua tatou vaaia ai le faamaloloina o nisi o uso faamaoni, ma ua tatou lagolagoina foi le valaauina o isi. I nei suiga—ua masani ai le Ekalesia—tatou te le manatu ai ua “itiiti lo tatou taua” pe a faamaloloina i tatou, ma tatou te le manatu foi ua “sili lo tatou taua” pe a valaauina i tatou. E leai se “valaauga tele pe itiiti” i le galuega a le Alii. E na o le “agai i luma po o le solo i tua,” ma o lena eseesega e faalagolago lea i le auala tatou te taliaina ai ma faatinoina ai lo tatou faamalologa ma o tatou valaauga. Sa i ai se taimi na ou pulefaamalumalu ai i le faamalologa o se peresitene talavou o se siteki sa auauna atu ma le lelei tele mo le iva tausaga ma o loo olioli nei i lona faamalologa i le valaauga fou ua faato’a la maua nei ma lona faletua. Ua valaauina i laua e avea ma taitai o le vasega pepe i le latou uarota. Ua na o lenei lava le Ekalesia e vaaia ai lena mea o se faamamaluga tutusa!
II.
A o lauga atu i se konafesi a tamaitai, sa saunoa ai le peresitene aoao o le Aualofa o Linda K. Burton, “Matou te faamoemoe ia gaepuina i totonu o i tatou taitoatasi se faanaunautaiga sili atu ia malamalama atili i le perisitua.”1 O lena manaoga e faatatau ia i tatou uma, ma o le a ou tulitataoina e ala i le tautalagia o ki ma le pule o le perisitua. Talu ai o nei mataupu e aafia faatasi ai alii ma tamaitai, ua ou fiafia ai lava o loo faasalalauina ma lolomiina nei taualumaga mo tagata uma o le Ekalesia. E faamanuiaina e le mana o le Perisitua i tatou uma. E taitaia e ki o le perisitua tamaitai faapea foi ma alii, ma o sauniga o le perisitua ma le pule o le perisitua e faatatau foi i tamaitai e pei foi o alii.
III.
Na faamatalaina e Peresitene Iosefa F. Samita le perisitua “o le mana o le Atua ua faamatuu atu i alii lea e mafai ai e alii ona galulue i le lalolagi mo le faaolataga o aiga o tagata.”2 Ua aoaoina i tatou e isi taitai o le perisitua “o le mana silisiliese lea ua i ai i lenei lalolagi. O le mana lea sa foafoaina ai le lalolagi.”3 Ua aoao mai tusitusiga paia e faapea “O lea lava Perisitua, lea sa i ai i le amataga, o le a i ai foi i le iuga o le lalolagi” (Mose 6:7). O lea, o le perisitua o le mana lea o le a tatou toetutu ai ma agai atu i le ola e faavavau.
O le malamalama lea tatou te sailia e amata i se malamalama o ki o le perisitua. “O ki o le perisitua o le pule lea a le Atua ua tuuina mai i [e o umiaina] le perisitua e faatonu ai, faafoe ai, ma pulea ai le faaaogaina o Lana perisitua i luga o le fogaeleele.”4 O galuega po o sauniga uma e faatinoina i totonu o le Ekalesia e faia i lalo o le pule tuusao po o le pule faamatuu a le tagata o loo umiaina ki mo lena matafaioi. E pei ona faamatalaina e Elder M. Russell Ballard, “O i latou o loo i ai ki o le perisitua … ua latou faafaigofieina moni mo tagata uma o loo auauna atu ma le faamaoni i lalo o la latou taitaiga e faaaoga le pule o le perisitua ma maua ai le mana o le perisitua.”5
I le puleaina ai o le faaaogaina o le pule o le perisitua, o le matafaioi o ki o le perisitua na te faalauteleina ma faatapulaaina. Na te faalauteleina e ala i le faafaigofieina ona maua le pule ma faamanuiaga o le perisitua mo fanau uma a le Atua. Na te faatapulaaina e ala i le faatonuina po o ai o le a tuu atu i ai le pule o le perisitua, o ai o le a umiaina ona tofi, ma pe faapefea foi ona faaee atu ana aia tatau ma mana. Mo se faataitaiga, o se tagata na te umiaina le perisitua e le mafai ona ia faaee atua lona tofi po o le pule i se isi tagata, sei vagana ai ua faatagaina o ia e le o loo umiaina ki. A aunoa ma lena faatagaga, o le a le aoga le faauuga. Ua faamanino ai i i le mafuaaga e le mafai ai e se tasi o loo umiaina le perisitua—e tusa lava po o le a le tofi—ona faauuina se tagata o lona aiga pe faatautaia le faamanatuga i lona lava fale e aunoa ma le faatagaga mai le o loo umiaina ki e tatau ai.
Faatasi ai ma le tuusaunoaga o le galuega paia a tuafafine o loo faia i totonu o le malumalu i lalo o ki o loo umiaina e le peresitene o le malumalu, lea o le a ou faamalamalama atua i se taimi o mulimuli mai, e na o le tasi lava le tagata o loo umiaina le tofi o le perisitua e mafai ona faatautaia se sauniga faaleperisitua. Ma o sauniga uma faaleperisitua ua faatagaina e faamaumauina i faamaumauga a le Ekalesia.
O le faatumutumuga lava, o ki uma o le perisitua o loo umiaina e le Alii o Iesu Keriso, o Le e ana le perisitua. O Ia Na te fuafuaina po o a ki e faamatuu mai i tagata ma pe o le a faapefea foi ona faaaogaina na ki. E masani ona tatou manatu o ki uma o le perisitua na faaee atu i luga o Iosefa Samita i le Malumalu o Katelani, ae ua ta’ua i tusitusiga paia e faapea o ki uma na faaee atu iina o “ki o lenei tisipenisione” (MF&F 110:16). I le konafesi aoao i le tele o tausaga ua mavae, sa faamanatu mai ai e Peresitene Spencer W. Kimball ia i tatou o loo i ai isi ki o le perisitua e lei tuuina mai i tagata i le lalolagi, e aofia ai ki o le foafoaga ma le toetu.6
O le natura paia o tapu e tuu i luga o le faaaogaina o ki o le perisitua ua faamalamalama mai i se eseesega taua i le va o faaiuga e uiga i mataupu a le pulega o le Ekalesia ma faaiuga e aafia ai le perisitua. O Le Au Peresitene Sili ma le Aufono a le Au Peresitene Sili ma le Korama a le Toasefululua, o loo pulefaamalumalu i le Ekalesia, ua faatagaina e faia le tele o faaiuga e aafia ai aiaiga faavae ma faiga faavae a le Ekalesia—o mataupu e pei o nofoaga o fale o le Ekalesia ma tausaga mo auaunaga faamisiona. Ae e ui lava o loo umiaina e nei pule faamalumalu ma faaaoga ki uma o loo faamatuu atu i alii i lenei tisipenisione, ae e le saoloto i latou e fesuiai le mamanu na faatulagaina mai le lagi, e na o alii lava e umiaina ia tofi i le perisitua.
IV.
Ua ou oo mai nei i le mataupu o le pule o le perisitua. Ou te amata atu i mataupu faavae e tolu lea faatoa uma ona talanoaina: (1) o le perisitua o le mana o le Atua ua faamatuu mai i alii e galulue ai mo le faaolataga o le aiga o tagata, (2) o le pule o le perisitua e puleaina e i latou e umiaina ki o le perisitua, ma le (3) talu ai o loo ta’ua i tusitusiga paia “o isi pule uma po o tofi i le ekalesia o ni faaopoopoga i lenei perisitua [Mekisateko]” (MF&F 107:5), ma o mea uma e faia i lalo o le taitaiga a na ki o le perisitua faatasi ai ma le pule o le perisitua.
E faapefea la ona faatatau lenei mea i tamaitai? I se saunoaga i le Aualofa, sa saunoa ai Peresitene Iosefa Filitia Samita, o le taimi lena o loo avea ma Peresitene o le Korama a Aposetolo e Toasefululua e faapea: “E ui e le tuuina atu i tuafafine le Perisitua, e le faaeeina atu i o latou luga, ae e le faapea ai la ua le tuuina atu e le Alii ia i latou le pule. … E mafai ona tuu atu i se alii le pule, po o se tuafafine, e faia ai ni mea patino i le Ekalesia lea e fusia ai ma talafeagai tonu mo lo tatou faaolataga, e pei o le galuega o loo faia e o tatou tuafafine i totonu o le Maota o le Alii. Ua ia i latou le pule na tuu atu ia i latou e faia ai nisi o mea silisili ma ofoofogia, e paia i le Alii, ma fusia atoatoa ai e pei lava o faamanuiaga o loo tuuina atu e le alii o loo umiaina le Perisitua.”7
I lena lauga iloga, sa tau atu pea lava pea e Peresitene Samita e faapea ua tuuina atu i tamaitai le pule. Sa ia faapea atu i tamaitai, “E mafai ona outou tautatala atu i le pule, ona ua tuu atu e le Alii le pule ia te outou.” Sa ia tau atu foi e faapea “ua tuu atu [i le Aualofa] le mana ma le pule e faia ai le tele o mea silisili. O le galuega o loo latou faia o loo faia i le pule faalelagi.” Ma e moni lava, o le galuega a le Ekalesia o loo faia e tamaitai po o alii, pe o totonu o le malumalu po o totonu o uarota po o paranesi, o loo faia i lalo o le taitaiga a i latou o loo umiaina ki o le perisitua. O lea, a o saunoa ai e uiga i le Aualofa, sa faamalamalama mai ai e Peresitene Samita, “Ua tuu atu [e le Alii] ia i latou lenei faalapotopotoga maoae lea ua latou maua ai le pule e auauna ai i lalo o taitaiga a epikopo o uarota … , i le vaavaaia o mea e fiafia i ai o tatou tagata i le faaleagaga ma le faaletino.”8
O lea, e moni lava lenei mea mo tamaitai, o le Aualofa e le na o se vasega mo tamaitai ae o se mea ua fitoitonu mo i latou—o se faaopoopoga i le perisitua na faavaeina mai le lagi.9
E le masani ona tatou talanoa i tamaitai i le i ai o le pule o le perisitua i o latou valaauga faale-Ekalesia, ae o le a se isi pule o i ai? Pe a vaetofiaina se tamaitai—talavou pe matua—e talai le talalelei o se faifeautalai faamisiona, ua tuu atu ia te ia le pule o le perisitua e faatino ai se matafaioi faaleperisitua. E moni foi lena mea pe a vaetofiaina se tamaitai e galue o se taitai po o se faiaoga i se faalapotopotoga o le Ekalesia i lalo o le taitaiga a se tasi o loo umiaina ki o le perisitua. Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina.
Po o ai lava e faaaogaina le pule o le perisitua e tatau lava ona faagaloina o latou lava aia tatau ae taulai atoa i o latou tiutetauave. O se mataupu faavae lena o loo manaomia i le lautele o le malo. E siiina mai se saunoaga a se tusitala Rusia lauiloa o Aleksandr Solzhenitsyn e faapea, “O le taimi lenei … e puipuia ai, e le o le tele o aia tatau o tagata, ae o matafaioi o tagata.”10 Ua iloa ma le mautinoa e le Au Paia o Aso e Gata Ai e faapea o le agavaa mo le faaeaga e le o se mataupu o le folafola atu o aia tatau ae o se mataupu o le faataunuuina o tiutetauave.
V.
Ua faatonu mai le Alii e na o alii lava o le a faauuina i tofi o le perisitua. Ae, e pei ona faamamafaina e le tele o taitai o le Ekalesia, o alii e le “o le perisitua lea.”11 E umia e alii le perisitua, faatasi ai ma se tiute paia e faaaoga mo le faamanuiaina o fanau uma a le Atua.
O le mana aupito silisili na tuuina mai e le Atua i Ona atalii e le mafai lava ona faaaogaina e aunoa ma le mafutaga a se tasi o Ona afafine, ona ua na o Ona afafine lava ua tuuina atu i ai e le Atua le mana “e avea ai ma foafoa o tino … ina ia ausia ai e le mamanu a le Atua ma le Fuafuaga Sili lona taunuuga.”12 O upu na a Peresitene J. Reuben Clark.
Sa ia faaauau: “O le tulaga lenei a ō tatou taitoalua ma o tatou tina i le Fuafuaga e Faavavau. E le o i latou e tauaveina le Perisitua; e le nafa i latou ma le faatinoina o tiute ma matafaioi o le Perisitua; pe latou te amoina foi le mamafa o ona tiutetauave; ae o i latou e fausiaina ma faatulagaina i lalo o lona mana, ma o e e tofo i ona faamanuiaga, mauaina o le lagolago o mana o le Perisitua ma le mauaina o se matafaioi e pei ona valaauina faalelagi, e pei ona taua ai e faavavau i lona tulaga e pei o le Perisitua lava ia.”13
I na upu musuia, sa saunoa ai Peresitene Clark e uiga i le aiga. E pei ona ta’ua ai i le folafolaga i le aiga, e pulefaamalumalu le tama i le aiga, ma e eseese ona tiutetauave ma le tina, ae “e ao [ia i laua] ona fesoasoani le tasi i le isi o se paaga tutusa.”14 I nai tausaga a o lei oo mai le folafolaga i le aiga, na tuu mai ai e Peresitene Spencer W. Kimball le faamalamalamaga musuia lenei: “Pe a tatou talanoa e uiga i le faaipoipoga o se paaga, ia tatou talanoa i le faaipoipoga o se paaga atoatoa. Tatou te le mananao i o tatou tamaitai o le Ekalesia o ni paaga e le tautatala po o ni paaga e tapulaa manatu i lena tofiga e faavavau! Faamolemole ia avea o se paaga e saofaga atu ma atoatoa.”15
I le silafaga a le Atua, pe o totonu o le Ekalesia po o le aiga, e tutusa uma tamaitai ma alii, ma ni tiutetauave eseese.
Ou te faamaea atu i nai upumoni e uiga i faamanuiaga o le perisitua. E le pei o ki ma faauuga o le perisitua, o faamanuiaga o le perisitua o loo avanoa mo tamaitai ma alii i tuutuuga lava e tasi. O le meaalofa o le Agaga Paia ma faamanuiaga o le malumalu o faataitaiga ia ua masani ai o lenei upumoni.
I lana lauga manino i le Vaiaso o Aoaoga a le BYU i le taumafanafana ua tea, na tuu mai ai e Elder M. Russell Ballard ia aoaoga nei:
“O le aoaoga faavae a le tatou Ekalesia ua tutusa ai tamaitai i alii e ui e eseese. E le manatu le Atua e lelei atu pe taua atu le tasi itupa i le isi. …
“A malaga alii ma tamaitai i le malumalu, ua latou tau fai maua uma faaeega paia i le mana lava e tasi, o le mana lea o le perisitua. … O le mauaina o le mana ma le faamanuiaga o le perisitua ua avanoa lea i fanau uma a le Atua.”16
Ou te molimau atu i le mana ma faamanuiaga o le perisitua a le Atua, ua avanoa mo Ona atalii faapea ma Ona afafine. Ou te molimau atu i le pule o le perisitua, lea e galue i tofi uma ma gaoioiga a Le Ekalesia a Iesu Keriso o le Au Paia o Aso e Gata Ai. Ou te molimau atu i le galuega na tuusao mai le lagi o ki o le perisitua, ua umia ma faaaogaina i lo latou atoatoa e lo tatou perofeta/peresitene, o Thomas S. Monson. Ma le mea mulimuli ma sili ona taua, ou te molimau atu i lo tatou Alii ma le Faaola, o Iesu Keriso, o Le ana le perisitua lenei ma o i tatou o Ana auauna, i le suafa o Iesu Keriso, amene.