“Afai Tou Te Alofa Mai ia te Au, Ia Outou Tausi Mai i Au Poloaiga”
O le faaaogaina o lo tatou faitalia e usiusitai ai o lona uiga o le filifili lea e “fai mea tonu [ma tuu] i taunuuga e mulimuli mai.”
Uso e ma tuafafine, mai lesona uma ua tatou aoaoina mai le soifuaga o le Faaola, e leai se lesona ua sili ona manino ma mamana nai lo le lesona o le usiusitai.
O Le Faataitaiga a le Faaola
I le Fono i le Lagi i le muai olaga, na fouvale ai Lusifelo i le fuafuaga a le Tama Faalelagi. O i latou na mulimuli ia Lusifelo na faamutaina lo latou alualu i luma e faavavau—ia faaeteete i lē e te mulimuli i ai!
Ona faaalia lea e Iesu Lana tautinoga e usiusitai, i le fetalai atu, “Le Tama e, ia faia lou finagalo, ma e a oe pea le mamalu e faavavau.”1 I Lana galuega atoa, “Sa mafatia o ia i faaosoosoga ae sa [latou] le gauai atu i ai.”2 E moni lava, “o mea sa tiga ai o ia na aoaoina ai o ia ia usiusitai.”3
Ona sa usiusitai lo tatou Faaola, na Ia togiolaina ai a tatou agasala, ua mafai ai ona tatou toetutu ma saunia le ala mo i tatou e toe foi atu ai i lo tatou Tama Faalelagi, o le na silafia o le a tatou faia ni mea sese a o tatou aoao e usiusitai i le olaga faaletino. A tatou usiusitai, ua tatou talia Lana taulaga, aua “[tatou] te talitonu e ala i le Togiola a Iesu Keriso, e mafai ai ona faaolaina tagata uma, e ala i le usiusitai i tulafono, sauniga, ma poloaiga ua tuuina mai i le talalelei.”4
Na aoao i tatou e Iesu ina ia usiusitai i se gagana faatauvaa lea e faigofie ona malamalama i ai: “Afai tou te alofa mai ia te au, ia outou tausi mai i au poloaiga”5 ma “Sau, mulimuli mai ia te au.”6
Pe a tatou papatiso, tatou te “ave i o [tatou] luga le suafa o Keriso” ma ulu atu “i le feagaiga ma le Atua o le a [tatou] usiusitai e oo i le iuga o o [tatou] ola.”7 O Aso Sa taitasi tatou te faafouina ai lena feagaiga o le papatisoga e ala i le taumamafa i le faamanatuga ma molimau atu ua tatou loto e tausi ia poloaiga. Tatou te sailia le faamagaloga mo soo se manatu, lagona, po o amioga e le o ogatusa ma le finagalo o lo tatou Tama Faalelagi. A tatou salamo e ala i le liliu ese mai le le usiusitai ma amata ona toe usiusitai, ua tatou faaalia lo tatou alolofa mo Ia.
O Ituaiga o Usiusitai
A o tatou ola i le talalelei, tatou te alualu i luma i lo tatou malamalama i le usiusitai. O nisi taimi e ono faaosoosoina ai i tatou e faataitai le mea ou te ta’ua o le “usiusitai i le poto o tagata,” lea tatou te teena ai ma le le usiusitai le tulafono a le Atua ae filifili lo tatou atamai po o o tatou manaoga e oo lava i le lauiloa. Ona e faia e le toatele o tagata lenei mea, o le a faaitiitia e lenei tulaga sese o le usiusitai ia tulaga faatonuina a le Atua i la tatou aganuu ma i a tatou tulafono.
E ono i ai ni taimi e faatino ai e tagata o le ekalesia le “usiusitai filifili,” fai mai e alofa i le Atua ma ava i le Atua ae ilo ma filifili po o fea o Ana poloaiga ma aoaoga—ma aoaoga ma fautuaga a Ana perofeta—o le a latou mulimuli atoatoa i ai.
O nisi e filifili le poloaiga e usiusitai i ai ona latou te le o malamalama i mafuaaga uma mo se poloaiga, e pei lava foi ona le malamalama i taimi uma le fanau i mafuaaga o tulafono ma fautuaga a o latou matua. Ae ua tatou iloaina lava ia mafuaaga tatou te mulimuli ai i perofeta, aua o le Ekalesia lenei a Iesu Keriso, ma o le Faaola o loo taitaia Ana perofeta i tisipenisione uma.
A o faateleina lo tatou malamalama e uiga i le usiusitai, ua tatou iloa le matafaioi taua o le faitalia. A o i ai Iesu i le Faatoaga i Ketesemane, sa Ia tatalo faatolu i Lona Tama i le Lagi, “Lo’u Tama e, afai e mafai, ia ave ese lenei ipu ia te au, a e aua le faia lo’u loto, a o lou finagalo.”8 E le mafai ona ave ese e le Atua le faitalia a le Faaola, o lea na Ia auina mai ai ma le alofa mutimutivale se agelu e faamalosi i Lona Alo Pele.
Na fetaiai le Faaola ma se isi tofotofoga i Kolokota, lea sa mafai lava ona ia valaau atu i au a agelu e ave ifo o Ia i lalo mai le satauro, ae sa Ia faia Lana lava filifiliga e tumau ai ma le usiusitai e oo i le iuga ma faamaea ai Lana taulaga togiola, e ui lava na oo ai i puapuaga matuia ma le maliu.
O le usiusitai faaleagaga faatagata matua o “le usiusitai [lea] o le Faaola”. E uunaia lea e ala i le alofa moni mo le Tama Faalelagi ma Lona Alo. A tatou usiusitai ma le loto i ai, e pei ona faia e lo tatou Faaola, ua tatou faatauaina afioga a lo tatou Tama Faalelagi: “O lo’u atalii pele lena, ua ou fiafia lava ia te ia.”9 Ma o le a tatou tulimatai atu e faalogo, pe a ulu atu i le afioaga a lo tatou Tama Faalelagi, “Ua lelei ia, le auauna lelei e: … ulufale mai … ia i le fiafia o lou alii.”10
O le faaaogaina o lo tatou faitalia e usiusitai ai o lona uiga o le filifili lea e “fai mea tonu [ma tuu] i taunuuga e mulimuli mai.”11 E manaomia ai le loto pulea ma aumaia ai le faamautinoaga, fiafia e faavavau, ma se lagona o le faamalieina ia i tatou ma, i se faataitaiga, ia i latou o siomiaina i tatou; ma e aofia ai lava pea se tautinoga loloto a le tagata lava ia ina ia lagolagoina taitai perisitua ma mulimuli i a latou aoaoga ma fautuaga.
O Taunuuga
I le filifili ai pe o le a tatou usiusitai, e aoga ai la i taimi uma le manatuaina o taunuuga o a tatou filifiliga. Pe na malamalama Lusifelo ma ona soo i taunuuga o le filifili e tetee i le fuafuaga a le Tama Faalelagi? Afai na malamalama, aisea la na latou faia ai sea filifiliga leaga? Atonu tatou te fesiligia i tatou lava i se fesili talitutusa: aisea e filifili ai soo se tasi o i tatou ina ia le usiusitai ae ua tatou iloa lava ia taunuuga e faavavau o le agasala? Ua tuu mai e tusitusiga paia se tali: o le mafuaaga na filifili ai Kaino ma nisi o fanau a Atamu ma Eva ina ia le usiusitai ona sa “sili atu lo latou alolofa ia Satani nai lo le Atua.”12
O lo tatou alolofa i le Faaola o le ki lea i le usiusitai faale-Faaola. I le lalolagi o aso nei, a tatou taumafai ina ia usiusitai, ua tatou tautino atu lo tatou alolofa ma le faaaloalo mo fanau uma a le Tama Faalelagi. Ae o le faigata ia ona suia e lenei alofa mo isi ia poloaiga a le Atua, lea na tuuina mai mo lo tatou lelei! Mo se faataitaiga, o le poloaiga “aua e te … fasioti tagata, pe e te faia soo se mea faapena”13 na faavaeina i luga o le tulafono faaleagaga lea e puipuia ai fanau uma a le Atua, e oo lava i e e lei fananau mai. O aafiaga anamua o loo fautua mai ai afai tatou te le amanaiaina lenei tulafono, e lemafuatiaina taunuuga o le faanoanoa. Ae e talitonu le toatele e le taliaina le faamutaina o le ola o se tamaitiiti e lei fanau mai mo ni mafuaaga e fiafia i ai po o se mafuaaga talafeagai.
O le fetuunai o le usiusitai e le suia ai le tulafono faaleagaga po o ona taunuuga ae e taitai atu ai i le fenumiai, le mautonu, fesesetai solo i ala ese, leiloa ai, ma le faavauvau. I le avea ai ma soo o Keriso, ua ia i tatou se matafaioi paia e tausia Ana tulafono ma poloaiga atoa ai ma feagaiga ia tatou te tauaveina i o tatou luga.
Ia Tesema 1831, na valaau ai nisi o le usoga ina ia fesoasoani e faatoafilemu ni lagona le fiafia na aliae e faasaga i le Ekalesia. E ala atu i le Perofeta o Iosefa Samita, na faatonuina ai e le Alii i latou i se auala e le masani ai ma faateia:
“Faafememeai o oulua fili; valaau atu ia te i latou ia latou feiloai ma oulua i luma o nuu ma tua o nuu. …
“O le mea lea, tuu atu ia te i latou e aumai o latou manatu malolosi e faasaga i le Alii.
“… e leai se auupega ua faia e faasaga ia te oulua e manumalo;
“Ma afai e i ai soo se tagata e sii lona leo faasaga mai ia te oulua o le a faafememeaiina o ia i lou lava taimi e tatau ai.
“O le mea lea, ia tausi i au poloaiga; ua moni ma faamaoni i latou.”14
O Lesona mai Tusitusiga Paia
Ua tumu tusitusiga paia i faataitaiga o perofeta o e na aoaoina ni lesona o le usiusitai e ala i o latou lava aafiaga.
Na aoaoina e Iosefa Samita ni taunuuga mo le gauai atu i ta’iga a lona lagolago, uo ma tusiupu o Matini Harisi. I se tali atu i talosaga a Matini, na fesili atu ai Iosefa i le Alii mo se faatagaga e nono atu ai ia itulau e 116 o le Tusi a Mamona ina ia mafai ona faaali e Matini i lona aiga, ae na tau atu e le Alii ia Iosefa e fai atu i ai e leai. Na aioi Matini ia Iosefa e toe fesili atu i le Alii. Ina ua mavae le talosaga lona tolu a Iosefa, na aumai ai e le Alii le faatagaga mo tagata faapitoa e toalima e vaai i itulau. “O se feagaiga faamaoni na folafola atu ai e Matini o le a mulimuli i lenei maliliega. Ina ua ia taunuu i le fale, ma ua oo atu le uunaiga faamalosi i ona luga, na galo ai lana tautoga faamaoni ma ia faatagaina ai isi e matamata i itulau, ma i se taunuuga mai se togafiti ona o lona tufatufaina atu o itulau,”15 sa leiloloa ai. O se taunuuga la, na aoaiina ai Iosefa e le Alii ma taofia ai le faatagaga e faaauau ai ona faaliliu le Tusi a Mamona. Na mafatia Iosefa ma salamo mai lana solitulafono mo le gauai atu i ta’iga a isi. Ina ua mavae se vaitau, sa faatagaina Iosefa e toe faaauau le galuega faaliliu. Na aoaoina e Iosefa se lesona taua e uiga i le usiusitai lea na aoga mo ia i lona olaga atoa!
Ua tuuina mai e le perofeta o Mose se isi faataitaiga. Ina ua faiava ma le usiusitai Mose i se fafine Kuso, sa fai upu Miriama ma Arona ia te ia. Ae na aoaiina i laua e le Alii, ma fetalai atu, “Ma te faafesagai ona ma tautala ma [Mose].”16 Na faaaoga e le Alii lenei mea maoae na tupu e aoao ai tagata o le Ekalesia i la tatou tisipenisione. I le 1830 na fai mai Hiram Page ua ia maua faaaliga mo le Ekalesia. Na faasa’oina o ia e le Alii ma aoao atu le Au Paia, “Ia e usiusitai i mea o le a Ou tuu atu ia [Iosefa], e pei lava o Arona,”17 “ona e maua e ia … e pei lava o Mose.”18
O le usiusitai e aumaia ai faamanuiaga, “ma a tatou maua se faamanuiaga mai le Atua, e maua i le usiusitai i lena tulafono ua faavae ai i luga.”19
O le usiusitai e aoao atu e ala i le faataitaiga. E ala i le auala tatou te ola ai, tatou te aoao ai a tatou fanau, “Aoao le poto i lou talavou; ioe, aoao i lou talavou e tausi i poloaiga a le Atua.”20
O le usiusitai o le a malosi ai lo tatou alualu i luma, mafai ai ona onosaia ma le faamaoni ia tofotofoga ma luitau i le lumanai. O le usiusitai i Ketesemane na saunia ai le Faaola ina ia tumau e oo i le iuga i Kolokota.
Ou uso ma tuafafine pele, o upu a Alema e faaalia ai lagona o lo’u loto:
“Ma o lenei ou uso pele e, ua ou fai atu nei mea ia te outou ina ia mafai ai ona ou fagua o outou i se lagona o lo outou tiute i le Atua, ina ia mafai ona outou savavali ma le le pona i ona luma. …
“Ma o lenei ou te manao ina ia outou lotomaualalalo, ma augofie ma agamalu; … ma filiga i le tausiga o poloaiga a le Atua i taimi uma.”21
Ou te tuu atu lau molimau faapitoa o loo soifua lo tatou Faaola. Talu ai sa usiusitai o Ia, o le a “tootuli tulivae uma, ma tautino atu laulaufaiva uma … o ia o [lo tatou Faaola].”22 Tau ina ia tatou matua alolofa ia te Ia ma talitonu atoatoa ia te Ia i le faatuatua ina ia tatou usiusitai foi, tausia Ana poloaiga, ma toe foi atu e nonofo faatasi ma Ia e faavavau i le malo o lo tatou Atua, o lau tatalo lea i le suafa o Iesu Keriso, amene.