Toe Tulitatao
Ia tatou aafia uma sili atu i taimi uma i le galuega faafaifeautalai e ala i le suitulagaina o lo tatou fefe i le faatuatua.
E atoa ia Setema nei, le ono sefulufa tausaga talu ona ou foi mai la’u misiona i Egelani. E tolu aso talu ona ou foi mai, ae ou auai i se siva Faafeiloai i le Iunivesite o Iuta faatasi ma sa’u uo. Sa ia faamatala mai ia te au se tamaitai lalelei ua lua ona tausaga i le iunivesite e igoa ia Barbara Bowen, o le na ia manatu e tatau ona ou feiloai i ai. Sa ia aumai o ia ma ma feiloai, ma amata loa ona ma sisiva.
Ae paga lea, o le siva lea sa matou ta’ua o le “siva eu,” o lona uiga e te siva ma se teine seia oo ina eu pe pōpō mai oe e se isi tagata e fia siva i le teine. Sa tiotio ma lauiloa tele Barbara, o lea sa le’i atoa ai se minute na ma sisiva ai ae eu mai a’u e se isi alii talavou.
Sa lei taliaina lena mea i lo’u mafaufau. I le aoaoina ai o le taua o le toe tulitatao i la’u misiona, sa ou maua ai le numera o lana telefoni ma valaau i ai i le aso na sosoo ai mo se ma tafaoga faamasani, ae sa pisi tele o ia i le aoga ma isi fegalegaleaiga ma uo. E faafetai ai, i la’u misiona mo le aoaoina o au ina ia finau pea e tusa lava pe ua oo mai le lotovaivai, ma sa iu ai lava ina ma tafafao faamasani. Ma o lena tafaoga na sosoo ai ma isi tafaoga faamasani. Masalo o taimi o na tafaoga faamasani sa mafai ai ona ou faatalitonuina o ia ua na o au lava le faifeautalai ua foi mai le misiona e moni ma le ola—e agavaa mo ia. O le taimi nei, i le 64 tausaga mulimuli ane, ua toafitu le fanau, ma le toatele o fanau a fanau iti ua avea ma faamaoniga o le upumoni taua e faapea, e tusa lava po o le a le lelei i fea o lau savali, e le mafai lava ona e faatalitonuina se tasi e aunoa ma le tinoū e tulitatao pea.
Atonu o le mafuaaga lea ua ou lagonaina ai se uunaiga manino ina ia toe tulitatao i le asō ni savali se lua o a’u savali o konafesi aoao talu ai nei.
I le konafesi ia Oketopa 2011, sa ou augani atu ai ina ia tatou manatuaina le fetalaiga taua lenei a le Alii: “Aua o le a faapea ona ta’ua o la’u ekalesia i aso e gata ai, O Le Ekalesia a Iesu Keriso o le Au Paia o Aso e Gata Ai.”1
I lenei fetalaiga, ua faamanino mai ai e le Alii e le gata o le faalagiga aloaia lea ae o le igoa foi lea e ao ona valaauina ai Lana Ekalesia. E tusa ai ma Lana tautinoga manino, e le tatau la ona tatou faasino atu i le Ekalesia i se isi lava igoa, e pei o le “Lotu Mamona” po o le “Ekalesia AAG.”
O le upu Mamona e mafai ona faaaogaina ma le talafeagai i nisi o tusiga e faasino lea i tagata o le Ekalesia, e pei o paionia Mamona, po o faalapotopotoga, e pei o le Aufaipese a le Tapeneko Mamona. Ua lauiloa tagata o le Ekalesia o Mamona, ma i fegalegaleaiga ma i latou e le o nisi o lo tatou faatuatuaga, atonu e talafeagai lo tatou faasino ia i tatou lava o ni Mamona, pe a tatou tuufaatasia lea faamatalaga ma le igoa atoa o le Ekalesia.
Afai e aoao tagata ia faaaoga le igoa sa’o o le Ekalesia e fesootai ma le upu Mamona, o le a faamamafaina ai o i tatou o Kerisiano, o tagata o le Ekalesia a le Faaola.
Uso e ma tuafafine, sei o tatou toe tulitatao ma atiae le mausa o le faamanino atili i taimi uma tatou te auai i Le Ekalesia a Iesu Keriso o le Au Paia o Aso e Gata Ai.
O le savali lona lua ua ou lagona e tatau ona ou toe tulitataoina lea sa tuu atu i le konafesi aoao na sei mavae atu nei, ina ua ou uunaia tagata ia tatalo ina ia taitai atu i se tagata se toatasi o se e mafai ona tuu atu i ai se valaaulia e aoao i le talalelei toefuataiina a o lei oo i le Kerisimasi. E toatele tagata o le Ekalesia na faasoaina mai ia te au nisi o aafiaga faapitoa ona o se taunuuga o lo latou ole atu i le Alii mo ni avanoa faafaifeautalai.
Mo se faataitaiga, e tasi se faifeautalai ua foi mai le misiona, na tatalo faapitoa ina ia taitai atu “i le tasi” e mafai ona ia aapa atu i ai. Sa oo atu i lona mafaufau le igoa o se uo sa la aooga muamua. Sa ia maua se fesootaiga ma ia i le Facebook, ma ia iloa ai sa tatalo lea tamaitai mo se faamoemoega ma le uiga o lona olaga. Sa ia tulitatao tonu lava i le taimi sa saili ai lea tamaitai mo le upumoni, ma papatiso ai o ia ia Tesema.
Sa tele ni valaaulia faapea na lipoti mai ia te au, ae toalaiti lava i latou na toe tulitataoina e pei ona faia e lea uso.
O au o se tagata e talitonu tele i le mataupu faavae o le tulitatao. E pei ona ta’ua i totonu o le taiala a faifeautalai o le Tala’i La’u Talalelei, “o le tuuina atu o se valaaulia e aunoa ma le tulitatao e pei lava o le amataina o se malaga e aunoa ma le faamaeaina po o le faatau o se pepa ulufale i se konaseti e aunoa ma le alu i totonu o le fale matamata. A aunoa ma le faatinoga e faamaea ai, ua leai lava se aoga o le tautinoga.”2
Ua aoao e le Tala’i La’u Talalelei ia tagata uma i le auala e le gata e valaaulia ai ae faapena foi ona tulitatao ai a tatou valaaulia. O le faamoemoega o le galuega faafaifeautalai o loo faauigaina o le valaauliaina o “isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.”3
O le valaauliaina e mautinoa lava o se vaega o le faagasologa. Ae ia matauina e tele lava isi mea e faatatau i le galuega faafaifeautalai mo tagata o le Ekalesia nai lo le tau na ona tuu atu o valaaulia i tagata e faalogologo ai i faifeautalai. O loo aofia ai foi ma le tulitatao o faifeautalai i le atiaeina o le faatuatua, le faaosofia o le salamo, ma sauniuniga mo le osiaina o feagaiga, ma le tumau e oo i le iuga.
O lenei mataupu faavae o le tulitatao o loo faaalia i le tusi o Galuega:
“Ua o ae faatasi Peteru ma Ioane i le malumalu. …
“Ua ave foi le tasi tagata ua pipili talu ina fanau mai, ua tuuina ifo o ia e i latou i aso fai soo i le faitotoa o le malumalu ua igoa i le Matagofie, e faatoga atu i se mea alofa i e ulu atu i le malumalu;
“Ua iloa mai e ia o Peteru ma Ioane a ulu atu i le malumalu, ona faatoga lea o ia i se mea alofa.
“Ona pulatoa lea o Peteru ma Ioane ia te ia, ua faapea atu, Vaai mai ia ia te i maua.
“Ona naunau mai lea o ia ia te i laua, fā’i e maua se mea mai ia te i laua.
“Ona fai atu lea o Peteru, E leai sa’u ario po o sa’u auro; a o le mea ua ia te au, ou te avatu lea ia te oe, O le suafa o Iesu Keriso o le Nasareta, ina tu ai ia i luga, ina savali.”
O se valaaulia mamana tele lena mai se auauna a le Alii a ea? Ae sa lei uma ai i le valaaulia le galuega a Peteru. O le faamatalaga a le mau e sosoo ai o loo ta’u mai ai ia i tatou e faapea “ua tago atu foi o ia i lona lima taumatau, ua faatu ia te ia i luga: ona faamalosia loa lea o ona vae ma ponaponāvae.
“Ua oso ia i luga ma tu, ua savali foi, ua ulu faatasi foi ma i laua i le malumalu, o loo savali ia, ma oso, ma vivii atu i le Atua.”4
I se isi faaupuga, sa lei tau na ona faaaoga e Peteru lona pule o le perisitua ma valaaulia le tagata lea e tu i luga ma savali. Sa ia toe tulitatao foi lana valaaulia e ala i le aapa atu i le tagata lea, ma uu lona lima taumatau, sii o ia i luga, ma la savavali faatasi ma ia i totonu o le malumalu.
E tusa ai ma le agaga o le faataitaiga a Peteru, e mafai ona ou fautua atu ina ia tatou aafia uma sili atu i taimi uma i le galuega faafaifeautalai e ala i le suitulagaina o lo tatou fefe i le faatuatua, ma valaaulia se tasi ia le itiiti ifo ma le faatasi i le kuata—pe faafa i tausaga uma—ina ia aoaoina e faifeautalai faamisiona. Ua saunia [faifeautalai] e aoao atu i le Agaga faatasi ma musumusuga faamaoni loloto mai le Alii. E mafai ona tatou tulitatao faatasi i a tatou valaaulia, ma uu mai lima o isi, sii i latou i luga ma savavali faatasi ma i latou i la latou malaga faaleagaga.
Ina ia fesoasoani ia oe i lenei faagasologa, ou te valaaulia tagata uma, e tusa lava po o le a sou tofiga o i ai i le taimi nei po o le a foi le tulaga o lou toaga i le Lotu, ia maua se kopi o le Tala’i La’u Talalelei. O loo maua i a tatou faletusi ma i luga foi o le initoneti. O le kopi i luga o le initoneti e mafai ona faitau i ai pe siiina mai e aunoa ma se tau. O se tusitaiala mo le galuega faafaifeautalai—o lona uiga o se tusitaiala mo i tatou uma. Faitau i ai, suesue i ai, ona faaaoga lea o mea e te aoaoina e fesoasoani ai ia te oe ia malamalama ai i le auala e aumai ai agaga ia Keriso e ala i valaaulia ma tulitatao. E pei ona saunoa ia Peresitene Thomas S. Monson, “O le taimi lenei mo tagata o le ekalesia ma faifeautalai e o mai faatasi ai, ma galulue faatasi, e galueaiina le tovine a le Alii ina ia aumai agaga ia te Ia.”5
Na aoao atu e Iesu Keriso Ona soo:
“E tele le saito e seleseleina, a o le au fai galuega e toaitiiti ia;
“O lea ia outou aioi atu ai i le Alii e ana le saito e seleseleina, ina ia aauina mai e ia ni e galulue i lana saito e seleseleina.”6
Ua tali e le Alii lena tatalo i o tatou aso i se aofaiga ua sili ona toatele o faifeautalai faamisiona i le talafaasolopito o le lalolagi. Faatasi ai ma lenei faatelega fou o le aufaigaluega faamaoni, ua tuu mai ai foi e le Alii ia i tatou se isi avanoa e fesoasoani ai ia te Ia i lena seleselega tele o agaga.
O loo i ai ni auala aoga mo le au paia e fesoasoani ai ma lagolagoina a tatou faifeautalai maoae. Mo se faataitaiga, e mafai ona e ta’u atu i faifeautalai o loo e suesueina le Tala’i La’u Talalelei ma fai atu ia i latou e faaali mai ia te oe mea o loo la aoaoina i a la suesuega. A o outou fefaasoaai i le tasi ma le isi, o le a mautinoa lava le atiaeina o se talitonuga faateleina i le va o le au paia ma faifeautalai faamisiona, e pei lava ona poloaiina e le Alii:
“Ae ia mafai e tagata taitoatasi [ma tamaitai] ona tautala i le suafa o le Atua le Alii, le Faaola lea o le lalolagi.”7
Ma, “Faauta, na Ou auina atu outou e molimau ma lapatai atu i tagata, ma ua tatau i tagata taitoatasi o e ua uma ona lapataia ona lapatai atu i le la te tuaoi.”8
Uso e ma tuafafine, e mafai ona e mafaufauina le aafiaga pe a faaaofia e aiga ma uo ni mea o loo latou aoaoina mai a latou suesuega faaletagata lava ia o le Talai La’u Talalelei i a latou tusi ma imeli e avatu i a latou faifeautalai faamisiona? E mafai ona e mafaufauina ia faamanuiaga o le a oo mai i aiga pe a latou iloa ma malamalama atili i mea o le a suesueina ma aoaoina e o latou atalii ma afafine i a latou misiona? E mafai ea ona e amata malamalama i faamanuiaga tulagaese o le alofa tunoa togiola tatou te maua, o ni tagata taitoatasi ma se [au paia atoa], e tusa ma le folafolaga a le Faaola i tagata uma o loo tauaveina se molimau i le faagasologa o le valaauliaina o agaga ia o mai ia te Ia—ona toe tulitatao lea o na valaaulia?
“Ua faamanuiaina outou,” na fetalai mai ai le Alii e auala mai i le Perofeta o Iosefa Samita, “ona o le molimau na outou tuu atu ua tusi faamaumau i le lagi mo agelu e vaai i ai; ma ua latou olioli i luga o outou, ma ua faamagaloina a outou agasala mai ia te outou.”9
“Aua o le a Ou faamagaloina outou ia outou agasala ma le poloaiga lenei—ia outou tutumau-mausali … i le tuuina atu o le molimau i le lalolagi atoa e uiga i mea na ua ta’u atu ia te outou.”10
Afai e tatou te tulitataoina, o le a fesoasoani moni le Alii ia i tatou. Ua ou vaai i le olioli le mafaamatalaina lea e o mai faatasi ma valaaulia e musuia e se molimau atoa ai ma tulitatao faamaoni i tagata o le Ekalesia i le lalolagi atoa. A o ou i ai talu ai nei i Atenitina, sa ou uunaia ai le au paia ia valaaulia se tasi i le lotu a o lei oo i le konafesi aoao lenei. Sa faalogo se tamaitiiti e valu tausaga e igoa ia Joshua ma valaaulia lana uo mamae ma le aiga o lana uo i se fale tatala i lo latou uarota i Buenos Aires. Sei ou faitau atu mai se tusi faatoa ou mauaina o loo faamatalaina ai le valaaulia a Joshua ma lana tulitatao faamaoni:
“Toetoe lava o minute uma e tamoe atu ai [Joshua] i le faitotoa e vaai pe ua latou o mai. Sa ia fai mai na te iloaina lava o le a latou [o mai].
“Ua mavae le afiafi ae lei alu atu le uo a Joshua, ae sa lei faavaivai ai Joshua. Sa ia siaki lava ma le faatuatua le faitotoa i luma toeitiiti o minute uma. Na oo mai le taimi e amata ai ona tapena ese mea ae amata ona tuu puna i luga Joshua ma faasilasila mai, ‘O lea ua o mai! Ua o mai!’ Sa ou tepa ae i luga ma vaaia ai se aiga atoa ua latalata mai i le falesa. Sa tamoe atu i fafo Joshua ma faafeiloai i latou ma fusi i lana uo. Sa latou o mai uma i totonu ma sa foliga na latou fiafia tele i le fale tatala. Sa latou aveina ni tamaitusi ma faaalu le tele o le taimi e faamasani ai ma nisi o uo fou. Sa maoae le vaaia o le faatuatua o lenei tamaitiiti laitiiti ma iloa e mafai foi ona avea tamaiti Peraimeri ma ni faifeautalai.”11
O lau molimau lea a o tatou galulue faatasi, i le sailia o le tasi, valaaulia, ma tulitatao faatasi ma le faatuatuaina ma le faatuatua, o le a ataata mai le Alii i o tatou luga ma le faitau selau o afe o fanau a le Atua o le a maua le faamoemoe ma le filemu i Le Ekalesia a Iesu Keriso o le Au Paia o Aso e Gata Ai. Tau ina ia faamanuiaina i tatou uma e le Alii i a tatou taumafaiga ia faanatinati le galuega o le faaolataga, ou te tatalo faamaualalo ai i le suafa o Iesu Keriso, amene.