O Le A Sou Manatu?
Ou te aioi atu ia te outou ia faataitai ona fesili atu, faatasi ma se faaaloalo agamalu mo le aafiaga o se isi tagata, le fesili lenei: “O le a sou manatu?”
Ua fasefulu tasi tausaga talu ai sa ou a’e ai i luga o le nofoa o le ave loli o se loli e 18 pa’u ma lo’u toalua lalelei, o Jan, ma le ma atalii laitiiti o Scotty. Sa matou aveina se uta mamafa o mea faufale i nisi o setete.
I na aso sa leai ni tulafono o fusipa’u o nofoa po o ni nofoa taavale mo pepe. Sa sii e lo’u toalua lo ma atalii pele i ona lima. O lana faamatalaga “Ua mautinoa lava lo tatou maualuga ese mai le eleele” sa tatau lava ona ou maua ai se faaiteite e uiga i ona lagona atuatuvale.
A o matou pasia lelei le auala lauiloa maugā o Donner, o se vaega tifato o le alatanu, na faafuasei ma le le mafaufauina ona faatumulia le pito i luma o le loli i se asu mafiafia. Na faigata ona iloa se mea ma sa faigata ona matou manava.
Faatasi ai ma se uta mamafa, sa le mafai e taofi ona faaitiitia vave le saoasaoa. I le faaaogaina ai o taofi o le afi ma le tasuiina faamaualalo o le kia, sa ou taumafai ai ma le popole e taofi.
A o ou afe i autafa o le auala, ae le i tu foi lena o le loli, na tatala ai e lo’u toalua le faitotoa ma oso i fafo ma le ma pepe i ona lima. Sa ou vaai atu i ai ma le leai o se mea e mafai ona faia a o la pa’u’u atu i le palapala.
O le taimi lava na tu ai le loli, sa ou oso ese mai le loli asu. I le atuatuvale tele, sa ou tamo’e atu ai i luga o papa ma vao ma fusi mai i laua. Sa mafoefoe uma ma tafetotoi ogalima ma lima o Jan, ae o le mea e faafetai ai sa taufai manava uma i laua. Sa ou fusi mau i laua a o to’a ifo le pefu i le itu o le alatanu.
Ina ua to’a le tātāvale o lo’u fatu ma maua foi la’u manava, sa ou alaga atu, “O le a sou mafaufau? E te iloa le matautia o lenei mea [ua e faia]? Semanu e te lua feoti!”
Sa ia tepa mai ia te au, ma ona loimata o loo tafe ifo i ona alafau ua palapala i le asu, ma fai mai se upu na tuia ai lo’u fatu ma o loo tatagi pea i ou taliga: “Sa na ona ou taumafai lava e laveai le ta tama.”
Sa ou iloaina i lena taimi sa ia manatu ua talalī le afi o le loli, ma fefe ai ina ne’i pasae le loli, ma matou feoti ai. Peitai, sa ou iloaina o se faaletonu tau eletise—sa matautia ae lē lamatia. Sa ou tepa atu i lo’u toalua pele, o loo milimili lemu le ulu o le ma atalii pepe, ma ou mafaufau po o le a sea ituaiga o tina na te faia se mea matua lototele faapea.
O lenei tulaga semanu e matautia faalelagona e pei o le faaletonu moni o le afi [o le loli]. Ma le agaga faafetai, i le maea ai ona onosaia o se taimi umi na ma le fetautalaa’i ai, na ma taufai talitonu ai sa ma sese uma, sa iu ai ina ma faailoaina ni lagona na mafua ai lo ma le fiafia tele. I le fefaasoaaiina o lagona o le alofa ma le popole mo le saogalemu o le tasi ma le isi na taofia ai le faalavelave matautia mai le faaleagaina o le ma faaipoipoga faapelepele.
Na lapatai mai Paulo, “Aua nei alu atu se upu leaga ai o outou gutu, [na o le] upu lelei [ma] aoga, e tupu ai le lelei i e faalogologo i ai” (Efeso 4:29). Ua i ai i ana upu se mama a’ia’i.
O le a le uiga ia te oe o le fasifuaitau “aua nei alu atu se upu leaga”? Ua tatou oo i le tele o taimi i lagona faamaualuga o le ita—o i tatou lava ia ma isi’. Ua tatou vaai i se ita le mataofiofia e mapuna ae i nofoaga faitele. Ua tatou lagonaina foi se ituaiga o ita vave i taaloga, i faiga faaupufai, ma e oo lava i o tatou lava fale.
O nisi taimi e tautatala ai le fanau i matua pele i upu malolosi ma faatiga. O ulugalii, na atiae faatasi ni tamaoaiga o le olaga ma ni aafiaga agamalu, ua leiloa le vaaiga mamao ma le onosai i le tasi ma le isi ma siisii o la leo i le ita. O i tatou uma, e ui lava o fanau o le feagaiga a se Tama Faalelagi agaalofa, ae ua salamo i ni faaiuga vave faafiaamiotonu ma tautatala i ni upu malolosi ae tatou te le o malamalama i se tulaga o tupu mai i se isi vaaiga. Ua tatou maua uma le avanoa e aoao ai le auala e mafai ai e upu faataumaoi ona ave se tulaga mai le matautia i le lamatia.
O se tusi talu ai nei mai le Au Peresitene Sili o loo ta’ua manino ai e faapea, “Ua aoaoina i tatou e le talalelei a Iesu Keriso ia alolofa atu ma taulima tagata uma i le agalelei ma le migao—e tusa lava pe eseese o tatou manatu” (Tusi a le Au Peresitene Sili, Ian. 10, 2014). O se faamanatu sili lava lea e mafai ma e tatau ona auai ai i le faaauauina o le gagana faaaloalo, aemaise lava pe a tatou vaai atu i le lalolagi mai ni vaaiga e ese ai.
O loo fautua mai le tusitala o le Faataoto, “O le tali filemu, e liliueseina ai le ita; a o le upu faatiga e tupu ai le ita” (Faataoto 15:1). O se “tali filemu” ua i ai se tali faautauta—o ni upu pulea mai se loto e maualalo. E le faapea la tatou te le tautatala tuusao atu ai pe tatou te fetuunaia upumoni faaleaoaoga faavae. O upu atonu e tuusao atu e mafai ona mālū i le agaga.
O le Tusi a Mamona o loo i ai se faataitaiga ofoofogia o le faamautuina o le gagana ua tuuina atu foi i manatu o se feeseeseaiga faaleulugalii. Na toe auina atu atalii o Sarai ma Liae i Ierusalema e aumai ia papatusi apamemea ma sa lei toe foi ane. Sa talitonu Sarai ua lamatia ona atalii ma sa faatumulia o ia i le ita ma manaomia ai se tasi e tuua’ia.
Faafofoga i le tala mai le vaaiga a lona atalii o Nifae: “Ona fa te ia [lo’u tina] ua fano i matou i le vao; ma sa muimui foi o ia e faasaga i lo’u tama, ua fai atu ia te ia o ia o se tagata mau faaaliga; fai mai: Faauta ua e taitaieseina i matou mai le fanua o lo tatou tofi, ma ua le toe i ai a’u tama tane, ma o le a tatou fano i le vao” (1 Nifae 5:2).
Ia, tatou mafaufau i le mea e masalo sa mafaufau i ai Sarai. Sa faatumulia o ia i le popole i ona atalii finauvale ia sa toe foi atu i le nofoaga sa lamatia ai le ola o lona toalua. Sa ia faafesuiaia lona fale matagofie ma uo mo se faleie i se togavao tuufua a o talavou pea o ia e toe fai nisi fanau. I se taimi o le atuatuvale tele ona o lona fefe, sa foliga mai ai na puna ese ma le lototoa Sarai, pe afai sa le mafaufauina, mai le maualuga o se loli saoasaoa i se taumafaiga e puipui lona aiga. Sa ia faailoaina ni popolega faamaoni i lona toalua i le gagana o le ita ma le masalosalo ma tuua’iga—o se gagana lea e foliga mai e matua lelei ai tele tagata uma.
Sa faalogo le perofeta o Liae i le fefe lea na mafua ai le ita o lona toalua. Ona ia faia lea o se tali faautauta i le gagana o le agaalofa. Muamua, sa ia umiaina le upumoni o mea na foliga moni mai i le vaai a lona toalua: “Ma sa … fai atu lo’u tama ia te ia, ua fai atu: Ua ou iloa o a’u o se tagata mau faaaliga; … ae [ana] ou nofo pea i Ierusalema, [semanu ua tatou] fano ai faatasi ma o’u uso” (1 Nifae 5:4).
Ona talanoa atu lea i ai o lona toalua i mea na fefe i ai o ia e faatatau i le tulaga manuia o o la atalii, a o molimau atu le Agaga Paia ma le le masalosalo ia te ia, e faapea:
Ae faauta, ua ou maua se laueleele o le folafolaga, o mea ia ua ou olioli ai; ioe, ma ua ou iloa o le a laveaiina e le Alii o’u atalii i fafo mai lima o Lapana. …
“Ma sa faapea le ituaiga o gagana sa faamafanafana atu ai lo’u tama, o Liae, … i lo’u tina … e uiga ia i matou” (1 Nifae 5:5–6).
O loo i ai i aso nei se manaoga tele mo alii ma tamaitai ia atiaeina le faaaloalo mo le tasi ma le isi e tusa lava pe eseese o latou talitonuga ma amioga ma e tusa lava pe eseese mea o loo uunaia i latou. E faigata ona iloaina mea uma o loo i o tatou mafaufau ma loto pe le malamalama atoatoa foi i le mafuaaga o tofotofoga ma filifiliga e fetaiai ma i tatou taitoatasi.
Ae ui i lea, o le a se mea e tupu i upu leaga na ta’ua e Paulo pe afai ua aofia i lo tatou lava tofiga le tigaalofa mo se aafiaga muamua o se isi tagata? O le taliaina atoa o tapulaa o lou lava ia lē atoatoa ma tulaga faigata, ou te aioi atu ai ia te outou ia faataitai ona fesili atu i lenei fesili, faatasi ma se faaaloalo agamalu mo le aafiaga o se isi tagata: “O le a sou manatu?”
Manatua le taimi na faateia ai e le Alii ia Samuelu ma Saulo i le filifilia o se taulealea leoleo mamoe laitiiti, o Tavita o Peteleema, e fai ma tupu o Isaraelu? Sa faamalamalama mai e Lana perofeta, “Aua e le vaai Ieova pei o le vaai o tagata, aua e vaai tagata i le tino, a e vaai Ieova i le loto” (1 Samuelu 16:7).
Ina ua faatumulia le matou loli i le asu, sa faatino e lo’u toalua se amio sili ona toa sa mafai ona ia mafaufauina e puipuia ai lo ma atalii. Sa ou galue foi o se tagata o le puipuiga ina ua ou fesiligia lana filifiliga. O le mea e faateia ai, sa le afaina po o ai sa sili ona sa’o. O le mea na taua o le faalogo atu i le tasi ma le isi ma malamalama i le mea o loo vaai i ai le isi.
O le naunautaiga ia malamalama mai le vaaiga a le isi tagata o le a suia ai “upu leaga” ia “tupu ai le lelei.” Sa malamalama le Aposetolo o Paulo i le mea lenei, ma i nisi tulaga e mafai foi ona tatou lagonaina uma. Atonu o le a le suia pe foia ai le faafitauli, ae o le mea e sili atu ona taua atonu o le mafai lea e le alofatunoa e tupu ai le lelei ona suia i tatou.
Ou te tuu atu lau molimau faamaulalo e mafai ona “tupu ai le lelei” e ala i le gagana agaalofa pe a tuia o tatou loto i le meaalofa faafailele o le Agaga Paia i le tiga-alofa mo lagona ma aafiaga o isi. E mafai ai ona tatou suia ni tulaga matautia e avea o ni nofoaga paia. Ou te molimau atu i se Faaola alofa o le “vaai i [o tatou] loto” ma e popole i mea o loo tatou mafaufau i ai. I le suafa o Iesu Keriso, amene.