Lipoti a le Matagaluega Suetusi a le Ekalesia, 2013
I Le Au Peresitene Sili o Le Ekalesia a Iesu Keriso o le Au Paia o Aso e Gata Ai
Uso Pele: E pei ona faatonuina ai e ala i le faaaliga i le vaega 120 o le Mataupu Faavae ma Feagaiga, o le Aufono e Faafoeina ia Sefuluai, e aofia ai le Au Peresitene Sili, le Korama a Aposetolo e Toasefululua, ma le Au Epikopo Pulefaamalumalu, e faatagaina tupe faaalu o tupe a le Ekalesia. E faamatuu atu e totino o le Ekalesia tupe e tusa ai ma paketi ua faamaoniaina, aiaiga faavae, ma faiga faavae.
O le Matagaluega Suetusi a le Ekalesia, lea e aofia ai suetusi ua faamaoniaina ma e tutoatasi mai isi matagaluega uma a le Ekalesia, ua i ai le tiutetauave e faatino ai suegatusi mo le faamoemoega o le tuuina atu o le faamautinoaga talafeagai e tusa ai ma saofaga na maua, tupe na faaalu, ma le malupuipuia o aseta a le Ekalesia.
E faavae i suegatusi ua uma ona faatino, ua i ai nei le manatu i le Matagaluega Suetusi a le Ekalesia e faapea, i tulaga uma, o saofaga na maua, o tupe na faaalu, ma aseta a le Ekalesia mo le tausaga 2013 ua faamaumauina ma taulimaina uma e tusa ai ma paketi na faamaoniaina a le Ekalesia, aiaiga faavae, ma faiga masani tau tausitusi. O loo mulimulitaia e le Ekalesia ia faiga masani o loo aoao atu i ona tagata o le ola lea i totonu o se paketi, aloese mai le nofoaitalafu, ma le faapolopoloina o mea mo aso leaga.
Ma le faaaloalo lava
Matagaluega Suetusi a le Ekalesia
Kevin R. Jergensen
Pule Faatonusili