Faamalosia Lou Faatuatua e ala i le Uluai Faaaliga
Ou te tatalo ia outou mulimuli i le mamanu a Iosefa o le tatalo, aoao i upumoni na ia aoaoina, ma faamalosia lo outou faatuatua i lo outou Tama Faalelagi ma Lona Alo, o Iesu Keriso.
Ina ua 16 ou tausaga, sa ou malaga mai i lou fale i Idaho i se konafesi i le Talafatai i Sasae o le Iunaite Setete, na auai ai alii talavou ma tamaitai talavou mai setete uma e 50 ma le lata i le 40 atunuu. A o lei oo i lena taimi, sa seasea ona ou i ai i se tulaga e faaesea ai au e ou talitonuga ma tautinoga.
I se tasi afiafi i se faapotopotoga le aloaia, sa tulai mai ai se talanoaga e uiga i nisi o talitonuga ma faiga masani a le Ekalesia a Iesu Keriso o le Au Paia o Aso e Gata Ai. Sa faafuasei ona gauai mai se vaega toatele o tamaiti aoga ia te au ma amata ona fai mai ni fesili, o nisi o ia fesili sa faitio i o tatou talitonuga.
Na matuai ou tei lava i lena mea. Ae ina ua uma ona ou mafaufau mo sina taimi, sa amata ona ou faasoaina atu ni mataupu faavae autu o le talalelei. Sa ou faamatala atu o loo i ai so tatou Tama Faalelagi, o i tatou o Ona atalii ma afafine, ma ua tatou i ai i le lalolagi e atiina ae le faatuatua ia Iesu Keriso ma faamaonia i tatou lava i le filifilia o le lelei nai lo le leaga.
O le faasoaina atu o nei mataupu faavae na taitai atu ai au i le molimau a Iosefa Samita. E lei fesili mai isi tamaiti aoga e uiga ia Iosefa Samita, ae na ou oo atu i le amataga o le mafuaaga na ou talitonu ai i mea ou te talitonu i ai. A o ou faamatalaina le faaali mai o le Tama ma le Alo i le Vao Paia, na faafuasei lava ona filemu tagata uma. Sa oo mai se lagona mamana ma paia i totonu o le potu, ma sa i ou luga se lagona tele o le mana faaleagaga ma au upu.
Ina ua maea, sa faafetai mai nisi o tamaiti aoga ia te au mo ou talitonuga malolosi. Sa i ai foi nisi sa fesili mai mo nisi faamatalaga e uiga i le Ekalesia. A o ou toe foi atu i lou potu i lena po, sa ou iloaina o le tagata lea na aupito sili ona manuia i lea aafiaga o au. Sa ou lagonaina mo au lava ia le mana o le tuuina atu o le molimau i le Atua le Tama, o Iesu Keriso, ma le Uluai Faaaliga.
Talu mai lena aafiaga ua silia ma le 50 tausaga ua mavae, ua faafia selau ona ou molimau atu e uiga i le Tama, le Alo, ma le Perofeta o Iosefa Samita. I nei aafiaga, ou te lagonaina pea le molimau faamautinoa a le Agaga Paia.
Ou te fia faasoa atu ni mataupu faavae se lima ua ou aoaoina mai i lou malamalama faaleagaga e uiga i le Uluai Faaaliga. O nei mataupu faavae ua faamalosia ai lou faatuatua ma lou naunau e mulimuli i lo tatou Tama Faalelagi ma Lona Alo Pele. Ou te faamoemoe o le a latou faamalosia foi oe.
1. O le Tama, le Alo, ma le Agaga Paia o ni Tagata Mavaevae
Mo le tele o seneturi, sa felafolafoai ai le au atamamai ma le au faitofa faalelotu i le natura o le Atua le Tama, o Iesu Keriso, ma le Agaga Paia. Sa talitonu le toatele o i Latou o se tagata e toatasi. Ona o le aafiaga o Iosefa i le Vao Paia i le 200 tausaga ua mavae, ua tatou iloa ai le upumoni aiai e uiga i le natura o le Atua.
O le mea muamua lava, o loo soifua o Ia! Lona lua, o le Tama ma le Alo o ni tagata mavaevae se toalua, mamalu, ma toetu, e tulaga ese mai le tasi i le isi. Mulimuli ane, sa aoao ai Iosefa “o le Agaga Paia e leai se tino o aano ma ivi, ae o se peresona Agaga. A na le faapea, e le mafai e le Agaga Paia ona mau i totonu o i tatou” (Mataupu Faavae ma Feagaiga 130:22).
2. O i Tatou o Atalii ma Afafine o le Atua
Na ala mai i le Uluai Faaaliga ma isi aafiaga, na iloa ai e le Perofeta o Iosefa Samita o le Atua e le o se mana mamao o le na foafoaina le lalolagi ma ona tagata e nonofo ai ona galo ai lea o i latou. O le mea moni, o i tatou taitoatasi o “se afafine faapelepele [po o se atalii] o ni matua faalelagi.”1
Ua ta’ua e le folafolaga i le aiga: “O tagata soifua uma—tane ma le fafine—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga.”2 Ua fetalai mai ma le manino e lo tatou Tama lena taunuuga: “O la’u galuega ma lo’u mamalu lenei—ia aumaia le tino ola pea ma le ola faavavau o le tagata” (Mose 1:39).
O lo tatou faasinomaga ua i ai lea i le Atua, ma ua tatou i ai iinei i le lalolagi ina ia avea atili e faapei o ia. O lenei malamalamaaga mai le Uluai Faaaliga na faatagaina ai au o se alii talavou ia iloa sa ia te au se Tama Faalelagi patino o le na alofa ia te au ma finagalo ia ou toe foi atu ia te Ia.
3. E Mafai ona Faamagaloina i Tatou mai a Tatou Agasala
O se tasi o popolega loloto o Iosefa ina ia faamagaloina ana agasala. I se tasi o tala o le Uluai Faaaliga, na fetalai mai ai le Alii i upu nei i le talavou na sailia le upumoni: “Iosefa e, lou atalii e, ua faamagaloina au agasala. Alu i ou ala, savali i a’u tulafono ma tausi i aʼu poloaiga. Faauta, o a’u o le Alii o le mamalu. Sa faasatauroina au mo le lalolagi ina ia mafai ona maua e i latou uma o e talitonu mai i lou igoa le ola e faavavau.”3
Na iloa e Iosefa e ala mai i le Togiola a Iesu Keriso, e mafai ona faamagaloina ana agasala ma faamamaina ma mama i luma o le Atua. Sa tuuina atu ia te ia se malamalama mautinoa e faapea, na tauaveina e Iesu Keriso i Ona lava luga ia agasala ma avega a i latou uma o e na soifua ma o le a ola ai i le lalolagi.
Mai le Uluai Faaaliga, ua tatou aoao ai ona o le alofa tunoa o lo tatou Faaola, o Iesu Keriso, e mafai ai foi ona faamagaloina a tatou agasala ma tutu i se aso ma le mama i luma o le Tama.
4. E Faafofoga ma Tali mai e lo tatou Tama Faalelagi a Tatou Tatalo
I le vao i lena aso i le 1820, sa iloa ai e Iosefa e faafofoga ma tali mai le Tama Faalelagi i tatalo. Mulimuli ane, sa faapea atu Iosefa, “Sa ia te au se mautinoa atoatoa i le mauaina o se faaaliga paia, talu ai ona sa ou mauaina se tasi muamua” (Iosefa Samita—Talafaasolopito 1:29). O lana faataitaiga ua aoao mai ai ia i tatou, e mafai ona tatou faalatalata atu i le Tama Faalelagi i le tatalo ina ia maua a tatou lava tali.
Na faia soo e Iosefa lenei mamanu o le tatalo i lea taimi ma lea taimi. Sa talitonu o ia o le a faafofoga ma tali mai le Alii i ana tatalo. Sa tatalo o ia e uiga i mea o loo e ono tatalo atu ai.
Sa ia tatalo mo le poto (tagai Iosefa Samita—Talafaasolopito 1:12–13).
Sa tatalo o ia e uiga i le papatisoga (tagai Iosefa Samita—Talafaasolopito 1:68).
Sa tatalo o ia mo le laveaiga (tagai Mataupu Faavae ma Feagaiga 121:1–4).
Na ia tatalo mo faifeautalai (tagai Mataupu Faavae ma Feagaiga 109:22).
Sa ia tatalo mo le Ekalesia, o ona sui, ma ona taitai (tagai Mataupu Faavae ma Feagaiga 109:71–76).
Ma sa tatalo o ia mo lona aiga (tagai Mataupu Faavae ma Feagaiga 109:68–69).
O se mamanu lenei mo i tatou. Na faaali mai e Iosefa ia i tatou e mafai ona tatou o atu uma i lo tatou Tama i le tatalo.
5. E Silafia Patino i Tatou e le Tama ma le Alo
Mai le Uluai Faaaliga, ua tatou aoao ai o nei Tagata selesitila e iloa i tatou taitoatasi, e pei lava ona laua silafia Iosefa. Na valaau atu e le Tama ia Iosefa i lona suafa ma, “ao tusi ane i le tasi,” na fai mai, “O Lou Atalii Pele Lenei. Faalogo ia Te Ia!” (Iosefa Samita—Talafaasolopito 1:17).
Na silafia e le Tama ma le Alo manaoga, popolega, ma faanaunauga o Iosefa, e pei lava ona La silafia i tatou. Ua La silafia foi mea ua faamanuiaina ai i tatou ma faanoanoaga.
I lou talavou, sa ou tatalo mo le tele o mea. A o ou toe tepa nei i tua, o nisi o na mea e le foliga e taua tele. Ae sa taua ia te au i lena taimi, ma sa ou malamalama mai lou laitiiti sa i ai sou Tama oi le Lagi o le sa faalogo mai ia te au. Ou te lei mauaina i taimi uma se tali i le taimi lava lena, ae sa ou lagonaina i Lana lava taimi ma i Lana lava ala o le a Ia faamamaluina ai lau olega i le ala ua sao mo au.
Ia mautinoa ma talitonu o le a fetalai mai le Atua ia te oe. Ia talitonu i na lagona e oo mai i le taele o lou loto. Sa oo ina ou talitonu i le tatalo ma malamalama i lona mana aua na ou iloa aafiaga o le Perofeta o Iosefa Samita. Sa ou iloa na silafia e le Atua lo’u igoa ma o le a Ia tali mai ia te au, e pei lava ona Ia silafia lou igoa ma o le a tali atu ia te oe.
Molimau
Mo le tele o le 68 tausaga sa ou ola ai i luga o le fogaeleele, ua ou tuuina ai le mamanu o tatalo a Iosefa i se suesuega. E pei foi o soo moni uma o le Faaola, sa ou mauaina foi ni tali mai le lagi. Ou te iloa o Iesu o le Keriso. O Ia o le Alo o le Atua. Sa toetu o Ia ma o loo soifua nei. O loo ia te Ia le mana e faamagalo ai a tatou agasala. E ala i lo tatou faatuatua, usiusitai, ma le salamo, e mafai ai e Ia ona toe aumaia ma le saogalemu i tatou i lo tatou aiga faalelagi.
I le avea ai o se Aposetolo a le Alii o Iesu Keriso ma Lana molimau faauuina, ou te molimau atu ai ma se mautinoa ma le talitonuga maumaututu ua faamaonia mai e le Agaga Paia na faaali le Tama ma le Alo ia Iosefa Samita i le Vao Paia. Ou te tatalo ia outou mulimuli i le mamanu o le tatalo a Iosefa, aoao i upumoni na ia aoaoina, ma faamalosia lo outou faatuatua i lo outou Tama Faalelagi ma lona Alo, o Iesu Keriso.
Ata na tusia e David Malan
Ata na tusia e Kendall Ray Johnson