Aiga e Faavavau o Alonso
“E paia le malumalu tatou te faamau ai” (Tusipese a tamaiti, 99).
“E mafai ona ou toe faatasi ma Mama ma Papa?”
“O le Eseta o se taimi lelei e mafaufau ai ia Iesu ma manatua ai Lona Toetu,” o le tala lea a Sister Rojas. Sa ia uuina i luga se ata o Iesu. “Ona o Ia, o tagata na maliliu e mafai ona toe ola mai.”
Sa ea i luga Alonso i le taimi na fai ai e lona faiaoga lenei tala. Pe o lona uiga ea e mafai ona ou toe vaai i ou matua? Sa mafaufau ai Alonso.
Na maliu Mama i tausaga ua mavae. Sa lei manatua lelei o ia e Alonso, ae sa fiafia o ia e tilotilo i ona ata. Ona maliu foi lea o Papa.
O lenei ua nofo Alonso ia Abuela, lona tinamatua. Sa ia aoaoina o ia e uiga i lana Ekalesia, O Le Ekalesia a Iesu Keriso o le Au Paia o Aso e Gata Ai. O le a papatisoina ma faamauina o ia i le tausaga a sau, pe a lava lona matua.
Ona uu lea i luga e Sister Rojas se ata o se fale paepae. “O le isi meaalofa ofoofogia mai ia Iesu o malumalu. O se tasi lenei o malumalu iinei i Chile.“
Sa tilotilo atu Alonso i le faatagata auro i luga o le fale. Sa matagofie! Sa ia mafaufau po o a mea o tutupu i totonu.
“O malumalu e faamauina faatasi ai aiga e faavavau,” o le tala lea a Sister Rojas. “O lenei malumalu i Santiago na faamauina ai au i ou matua ina ua matou auai i le Ekalesia. Talu ai sa faamauina i matou, e mafai ona matou faatasi ma i laua e oo lava i le mavae ai o lenei olaga.”
Sa lagona e Alonso le fiafia ina ua ia faalogo i lena mea. “E mafai ona faamauina au i ou matua?” o lana fesili lea. “E ui lava ua feoti i laua?”
Sa lue atu le ulu o Sister Rojas. “Ioe! O se tasi lena o mafuaaga e taua tele ai malumalu. Latou te faamanuiaina tagata uma o o tatou aiga, e aofia ai i latou o e ua maliliu.”
Mo le vaega o totoe o le aso, sa mafaufau pea Alonso i malumalu. Na ia fesili atu ia Abuela e aoao atili o ia. Sa ia talanoa e uiga i lavalava papae e ofuina e tagata i totonu ma ata matagofie i luga o puipui.
“O le mea sili, e mafai ona faamauina ai oe i ou matua,” o le tala lea a Abuela. “Tatou te fai atu i ni tagata se toalua mai le uarota e sui mo i laua i le taimi o le faamauga.”
“E mafai ona ta o taeao?” Sa fesili atu ai Alonso. “Ou te fia faatasi ma Mama ma Papa e faavavau!”
Sa ataata Abuela. “Ua ou fiafia e te fia alu,” o lana tala lea. “Ae o le malumalu aupito lata mai o loo i Concepcion. E le lava ta tupe mo le pasi.”
“O le a ou fesoasoani e sefe mo le malaga!” Sa fai atu ai Alonso.
Mai i lena taimi,o soo se taimi lava e maua ai e Alonso se tupe siliva i luga o le alatele pe maua foi se avanoa e maua ai se tupe, sa ia totogiina le sefuluai ona faaopoopo lea o le isi vaega i le la tupe o le malumalu.
Ina ua mavae le tele o masina o teuga tupe, na iu lava ina lava le tupe a Alonso ma Abuela e malaga ai i le malumalu. Sa la talosaga ia Uso ma Tuafafine Silva latou te o faatasi. I le aso o le malaga, na latou malaga umi ai i se pasi i le aai o Concepcion. Sa toetoe lava a goto le la ae vaaia loa e Alonso se auro mai i se mea mamao.
“Ua mafai ona ou vaai i le agelu o Moronae!” Sa fai atu ai Alonso, a o tusi atu i le faatagata i luga o le taualuga lanumoana o le malumalu.
Sa latou malolo i le po i se fale mautotogi e sosoo ma le malumalu. I le taeao, na ulu atu ai Alonso i totonu o le malumalu mo le taimi muamua lava. Sa ia vaaia se ata tele o Iesu i totonu. Sa ofu papae i laua ma Abuela. Sa ia lagonaina le fiafia ma le toafilemu.
Ina ua oo i le taimi o le faamauga, sa savali atu Alonso i se potu matagofie ma fa’ata i luga o puipui. Sa faaali atu e se tagata faigaluega o le malumalu ia Alonso, Abuela, ma le au Silva le auala e tootutuli ai i se laulau faapitoa e taua o se fatafaitaulaga. Sa ufitia i se ie vaivai.
Sa i ai iina Uso ma Tuafafine Silva mo le tina ma le tama o Alonso. Sa i ai Abuela iina mo lona tuafafine o le na maliu a o lei fanau mai Alonso.
Sa moeiini ona mata, ma vaai faalemafaufau Alonso ua faatasia uma lona aiga.
Ua le mafai ona ou faatali e toe vaai ia i latou, sa mafaufau ai Alonso. Ou te matuai fiafia e mafai ona faatasi e faavavau aiga! ●
Ata na tusia e Mark Jarman