Na faapefea ona faaliliu e Iosefa Samita le Tusi a Mamona?
A o lei nanaina papatusi auro, na tusia e Moronae, le perofeta mulimuli o le Tusi a Mamona, i luga o le itulau autu o le tusi o le a faaliliuina “e ala i le meaalofa ma le mana o le Atua.” O lenei mea o loo avea pea ma faamatalaga sili o le Faaliliuga o le Tusi a Mamona.
Sa faalau atu e Iosefa Samita upu o le faaliliuga i le au tusiupu, sa tele lava o Oliva Kaotui. Talu ai ona sa faaliliu e Iosefa se gagana e matua le iloa lava, sa manaomia ona ia faalagolago i le Alii. O se tasi auala na fesoasoani ai le Alii o le tuuina atu lea o mea faigaluega faaletino e fesoasoani ia Iosefa i le faaliliuga. Fai mai molimau na vaai atu Iosefa i mea faigaluega ma sa faaali atu ia te ia upu i le gagana Peretania. O mea faigaluega o le faaliliuga na aofia ai “faamatalaupu” po o le “Urima ma le Tumema”— o maa manino e lua e nonoa i se uamea lapotopoto ina ia mafai ona vaai i ai Iosefa i totonu. O nei mea na tuuina atu ia Iosefa faatasi ma papatusi. O se tasi meafaigaluega na faaaoga e Iosefa o se “maa talifaaaliga” lea sa ia tilotilo ai i totonu, e tele lava ina ia tuuina i totonu o se pulou. Na maua muamua mai e Iosefa lenei maa ma sa ia faaaogaina e sue ai mea natia po o mea na leiloloa. Sa ia faaaogaina uma ia faamatalaupu ma le maa talifaaaliga a o ia faaliliu, e faalagolago lava i le musumusuga mai le lagi.
O le faaliliuga o le Tusi a Mamona sa matua ofoofogia ma sa faia “e ala i le meaalofa ma le mana o le Atua.”