Autalavou Matutua
E Mafai Ona Tatou Faasalalau Atu le Malamalama o le Talalelei
Ata na pueina e Weston C. Colton
O le avea ma se tagata matua talavou o se taimi lea mo le tuputupu ae, avanoa, ma se avanoa e amata fausia ai lou olaga. Ma e mafai ona lofituina, faafiafiaina, ma taufaafefe i le taimi lava e tasi (sa mautinoa le faapea mo i matou).
Peitai e ui atonu tatou te le iloa tali i fesili uma e sili ona taua o le olaga, e tasi lava le mea o loo tatou matua mautinoa — o loo ua avea pea le autalavou matutua o se malosiaga taua i le Toefuataiga faifai pea o le Ekalesia a Iesu Keriso.
I le fuafuaina o le vaega o le masina lenei, sa matou talanoa ai ma le toatele o talavou matutua e uiga i lo latou auai i le faapotopotoina o Isaraelu. Ma ua matua faalotomaualaloina i matou e lo latou alolofa faamaoni ma le tuuto atu i le talalelei a Iesu Keriso. Po o a lava o latou tulaga, o nei Au Paia talavou e malamalama i le matafaioi taua o loo ia i latou i lenei tisipenisione mulimuli. I le “Ua Faapefea Ona Faia e le Autalavou Matutua se Eseesega i le Toefuataiga Faifai Pea” i le itulau e 44, e mafai ona e faitau i le auala na saunia ai e le autalavou matutua mai Initia, Hanikeri, Barbados, Ausetalia, ma le Iunaite Setete le lalolagi mo le Afio Faalua Mai o le Faaola.
I le na o tusiga faatekonolosi, o loo tuuina mai ai e Cesar se malamalamaaga i le auala e mafai ai ona tatou maua lo tatou faamoemoe ma avea ma ni taitai e sili atu. Ua talanoa Lauri e uiga i faamanuiaga tatou te maua pe a tatou mulimuli i fautuaga a le perofeta. Ua faasoa mai e isi talavou matutua o latou aafiaga i sauniga o le malumalu, auaunaga, talafaasolopito o aiga, ma le galuega faafaifeautalai. Ma e ma te faasoa atu se faataitaiga mai se talavou matua i Niu Kaletonia, lea e faapupula ai le auala o loo faia ai e tagata talavou le galuega a le Alii i eria laiti atu o le Ekalesia.
Po o fea lava o e i ai ma po o a foi ou tulaga o i ai, e mafai ona tele atu se eseesega i le faapotopotoina o Isaraelu nai lo le mea e te manatu i ai. I le avea ai ma talavou matutua, o i tatou o taitai o le lumanai o lenei Ekalesia. Ma o le aloiafi o a tatou taumafaiga i le aso o le a faamumu ma faasalalau atu ai le malamalama o le talalelei i le lalolagi atoa taeao.
Ma le faamaoni lava,
Chakell Wardleigh ma Mindy Selu
Mekasini a le Ekalesia vaega o faatonu o talavou matutua