“Vaai i se Mea e Mafai Ona Fai e se Faatuatua Laitiiti?”

Godfrey J. Ellis

Uosigitone, ISA

I se taimi ua mavae, sa matou o ai ma lou toalua ma le ma fanau tama laiti e toalua i Farani e taamilo i eria sa ou auauna atu ai o se faifeautalai faamisiona. Sa matou asiasi i paranesi o le Ekalesia sa ou auauna atu i ai ma olioli ai i tagata sa ou aoaoina. Sa matou asiasi atu foi i nofoaga o talafaasolopito.

O se tasi o nofoaga sa faaleagaina o le Château de Châlucet. O lenei maota tele malosi o le ogatotonu o taimi sa osofaia ma sa tele lava ina faaleagaina i le tele o seneturi ua mavae. O laau ma vao ua faatupulaia i mea uma na faaleagaina, ma o le auala e oo atu i ai, na vaiti ma tifato. Sa faigata ia i matou ona feaei, ae sa tauia le taumafaiga ina ua matou taunuu.

Sa fiafia tamaiti e feaei i lalo i le mea sa avea ma le ana ma i le tumutumu i se mea itiiti sa totoe o puipui o le maota tele. Na faagaeetia e le maota tele o la mafaufauga e pei lava ona faagaeetia ai au i le 24 tausaga na muamua atu.

A o matou i ai iina, sa aliae se afa o le taumafanafana i se mea mamao. Sa agai vave mai lava. Na faatumulia le lagi i ao pogisa ma le uila, ma sosoo mai ai ma le papa tetele o le faititili.

Sa matou faatatope agai i lalo o le auala ma tamomoe atu mo le taavale a o tuli mai i matou e le afa. E lei umi, ae mamafa mai timuga ma na liua le auala pefu i le palapala. Sa matou popole nei see se vae o se isi ma pau ifo i lalo o le alasopo tifato, ma le papa.

Sa matou iloa atu se malutaga i totonu o laau i le faatausiusiuga o le auala. Sa matou faapupuu faatasi i lalo o le malutaga ma mafaufau po o le a le umi o le a matou faatalitali ai e toe foi i lalo.

“Sei fai se tatou tatalo,” o le tala lea a le ma atalii laitiiti.

Sa fai mai o ia na te faia le tatalo ma na tatalo ina ia taofi le timu ina ia mafai ona matou oo saogalemu i lalo o le mauga. Sa tilotilo mai ia i matou ma fai mai, “Pau le mea tatou te manaomia o le lava o le faatuatua.”

Sa ou faamatala atu o tatalo e le talia mai i taimi uma faapena.

“Leai,” na ia fai mai ai, “o le a taofi i le 10 minute!”

Ina ua mavae le pe a ma le 10 minute, na uma le timu.

“Ua lelei, tatou o!” o lana tala lea.

“Afai tatou te tuua i le taimi nei, o le a toe amata lava timuga ma o le a maileia ai i tatou,” o le tala lea a lou atalii matua.

“E leai!” o le tali lea a le ma uii. “Tatou o!”

Sa matou o atu i vaega sa tau mago o le ala, ma taofia i tua le vao ma lala a o matou o. I le taavale, sa matou ofoina atu se tatalo o le faafetai. E lei umi ae toe amata foi le timu.

“Vaai i se mea e mafai e se faatuatua laitiiti ona fai?” o le tala lea a le ma atalii ma le lotomaualalo.

Sa ia aoaoina i matou i se lesona taua lava i lena aso.