Auaunaga e ala i Konafesi Aoao

Faatasi ai ma upusii musuia uma, tu ma aga faaleaiga, ma aoaoga mai auauna a le Alii, ua tatou maua ai i konafesi aoao le tele o auala e auauna atu ai — a o lei faia, i le aluga, ma le maea ai o le konafesi aoao i le faaiuga o le vaiaso!

Ata

scenes from general conference

I le avea ai ma faiaoga o le vasega sauniuni mo le misiona, e luiina e le aunoa e Susi ma Tom Mullen ia tagata o a la vasega e valaaulia se tasi e matamata i le konafesi aoao.

“O le valaauliaina o se tasi e faia se mea o se vaega taua o le galuega faafaifeautalai, ma e faatatau foi faapena i le auauna atu,” o lana tala lea. “O a matou tamaiti aoga e lipoti atu e le aunoa i le tulaga lelei mo i latou faapea foi mo le tagata sa latou valaaulia.”

O ni nai auala nei na lipotia mai e tamaiti aoga na aapa atu ai:

“Matou te auauna atu i se uo o loo i ai ni faafitauli o loo ia tauivi ai. Sa ma valaaulia o ia e faalogologo i le konafesi aoao mo ni tali. Ina ua matou talanoa ma ia ina ua maea le konafesi, sa ia tau mai ia i matou sa ia faalogo i le tele o manatu o le a fesoasoani.”
“Sa matou faia se pati o le konafesi aoao ma na aumai e tagata uma ni meaai mama e faasoa atu. Sa matuai malie lava na matou filifili e toe fai.”
“Sa ou valaaulia se uo ma te matamata i le konafesi aoao. A o matou talanoa atu i ai, sa tonu ia i maua e tietie atu i le falelotu e vaai pe mafai ona matou matamata ai iina. Sa matou faia, ma o se aafiaga sili le i ai iina!”

Na aoaoina e le au Mullens ma a la tamaiti aoga, e tele auala e auauna atu ai e ala i le konafesi aoao. O se auala matagofie tele e faasoa atu ai upusii faagaeetia, tu ma aga faaleaiga, talanoaga anoa, ma aoaoga a auauna a le Alii!

Valaaulia Isi i Lou Aiga

“Na poloaiina e le Faaola Ona soo, ‘ia outou fealofani; faapei ona ou alofa atu ia te outou (Ioane 13:34). O lea tatou te vaai atu i auala sa Ia alofa ia i tatou. … Afai tatou te faia o Ia ma o tatou faataitaiga, e tatau ona tatou taumafai e le aunoa e aapa atu ia faaaofia ai tagata uma.” —Peresitene Dallin H. Oaks¹

I tausaga ua mavae sa iloa ai e lo matou faiaoga lelei lava o aiga o Mike, o lau fanau e toatolu ma au sa i ai se tamai komepiuta e matamata ai i le konafesi aoao. Sa vave ona ia valaaulia i matou e o mai i lona fale matou te matamata faatasi ma ia ma lona faletua, o Jackie, ma finau mai o le a la fiafia i le matou faatasi atu. Sa matuai fiafia lau fanau e matamata i le konafesi i luga o se Televise moni; Sa matuai ou talisapaia lou mauaina o le lagolago; ma e matou te fiafia uma lava i o matou taimi faatasi.

Ina ua mavae lena, o le matamata faatasi i le konafesi aoao o se tu masani. E ui lava ina ua i ai sa matou lava TV, ae matou te agai atu pea ma le fiafia ia Mike ma Jackie ma a matou aluga, api, ma meaai mo konafesi aoao. O le faalogo faatasi i upu a perofeta e sili atu ai ona faapitoa. Sa avea i matou pei o se aiga. Na avea Mike ma Jackie ma nisi o au uo mamae ma matua matutua lona lua i lau fanau. O lo la alolofa ma le faauo na avea ma se faamanuiaga ofoofogia i lou aiga. Ou te matua faafetai mo lo latou naunau e tatala lo latou aiga ma o latou loto ia i matou.

Susanne Erd., Kalefonia, ISA

Mataupu Faavae e Mafaufau i Ai

“Matauina”

Na faaaluina ma le alofa e le Faaola le taimi e vaai ai i manaoga o isi ona galue lea e faafetaiaia na manaoga (tagai i le Mataio 9:35–36; Ioane 6:5; 19:26–27). E mafai ona tatou faia ia tutusa.

“Valaaulia loa lava”

A uma ona tatou matauina manaoga o i latou tatou te auauna i ai, o le isi laasaga o le faatino.“Faalogo i upu a perofeta.”

E tatau ona tatou “potopoto soo faatasi” (Moronae 6:5) ina ia aoao faatasi, ola faatasi, ma talanoa e uiga i mea faaleagaga e sili ona taua i o tatou agaga.

“O mai, faalogo i le leo o se perofeta, ma faalogo i le afioga a le Atua”² atonu o se tasi lea o valaaulia sili ona taua e mafai ona tatou tuuina atu ia i latou tatou te auauna i ai.

“Alofa ma le faauo”

Ina ia fesoasoani moni lava ma faatosina i isi, e tatau ona tatou fausia ni sootaga ma le agaalofa ma “le alofa faamaoni” (tagai Mataupu Faavae ma Feagaiga 121:41).

Ata

looking at a tablet

Faasoa i le Initoneti

“O ala o faasalalauga o ni meafaigaluega faavaomalo e mafai ona aoga patino ma le lelei i tagata e toatele taitoatasi ma aiga. Ma ou te talitonu ua oo mai le taimi mo i tatou i le avea ai ma soo o Keriso e faaaoga lelei nei meafaigaluega musuia, ma ia sili atu ona lelei e molimau atu i le Atua le Tama faavavau, Lana fuafuaga o le fiafia mo Lana fanau, ma Lona Alo, o Iesu Keriso, o le Faaola o le lalolagi.” — Elder David A. Bednar³

E faataga i tatou e le Initoneti e faasoa atu le talalelei i le lalolagi atoa. Ou te fiafia i lena tala! Ou te faasoa atu ai ni nai gaoioiga mo le konafesi aoao, ae o le tele lava o taimi ou te taumafai ai e fesoasoani i isi e fatu se talanoaga mai saunoaga o konafesi aoao. O le vaaia o fesili mai isi e tele ina fesoasoani ia i tatou e iloa ai mea i se malamalama fou ma e mafai ona avea ma se amataga i a tatou lava fesili o talanoaga sili.

Ua ou iloa a e faaaogaina fesili e talanoaina ai ia lauga o konafesi aoao ma au aiga o loo auauna atu i ai, e fesoasoani ia te oe e iloa ai o latou malosiaga faapea foi ma o latou manaoga. O se tasi o fesili e sili ona ou fiafia e fai atu, O le a sou lagona i se autu mai le sauniga e sili ona lata mai o le konafesi aoao?

O le tali toetoe lava o taimi uma e te vaai ai i mea o loo tutupu i o latou olaga ma mea e taua ia i latou. E mafai ai ona avea oe ma se uso po o se tuafafine e sili atu, aua ua sili atu lou malamalama ia i latou.

Camille Gillham, Colorado, ISA

Mataupu Faavae e Mafaufau i Ai

“Faasoa atu le talalelei!”

Ua tatou osi feagaiga e “tutu o ni molimau a le Atua i taimi uma ma i mea uma, ma i nofoaga uma” (Mosaea 18:9).

“Fatu se talanoaga”

O savali o konafesi aoao e mafai ona musuia ai talanoaga ofoofogia, fitoitonu, ma faaleagaga. Ma o nei ituaiga o talanoaga e mafai ona faamalosia ai au sootaga, fesoasoani i lau molimau ia tuputupu ae, ma aumai ia te oe le olioli! (tagai Mataupu Faavae ma Feagaiga 50:22).

‘Faaaoga Fesili”

“O fesili lelei o le a fesoasoani e te malamalama ai i mea e fiafia i ai, o popolega, po o fesili a isi tagata. E mafai ona faalauteleina au aoaoga, valaaulia le Agaga, ma fesoasoani i au tagata e aoao.”⁴