O se Ekalesia mo Zulma
Atonu e tele atu mea na finagalo le Atua ia iloa e Zulma.
“Saili, ma o le a outou maua” (3 Nifae 14:7).
Sa nofo Zulma i se tasi o nofoa uumi a le lotu ma faamafolafola le sakete o lana toniga aoga. Na susulu mai le malamalama lanu i faamalama tioata, ma sa tu se satauro i le pito i luma o le falesa. Sa alu Zulma i se aoga lotu, o lea sa ia alu ai i sauniga lotu e faalua i le aso ma isi tamaiti aoga. Sa fiafia Zulma i lana lotu. Sa alofa o ia ia Iesu ma e fiafia e aoao e uiga ia te Ia.
Sa nofo filemu o ia ina ua amata ona tautala le patele. Peitai, sa ese se lagona i le asō. Na faafuasei ona oo mai se manatu fou i lona mafaufau ma le loto: E tele isi upumoni o i ai i fafo i o.
Sa faapuiti e Zulma ona mata. Isi upumoni? O le a le uiga o lena mea?
Na toe oo mai foi le manatu. E tele isi upumoni.
Na moeiini mata o Zulma ma taulai atu i le mea sa ia lagonaina. Sa ia aoaoina le tele o mea lelei i le lotu. Ae o lenei ua mafaufau o ia pe o misi se mea. Atonu e tele atu mea e finagalo le Atua na te iloa. Ae e faapefea ona ia mauaina?
Mulimuli ane, sa ia talanoa atu i lona tuagane matua, o Alberto, e uiga i ona manatu.
“E te manatu e i ai nisi mea moni o i ai iina?” O le fesili lea a Alberto.
Sa lue atu le ulu o Zulma. “Ou te fia iloa e uiga i isi ekalesia,” o lana tala lea.
“Ua lelei,” o le tali lea a Alberto. “O le a ta o!”
Mo ni nai tausaga, sa asiasi atu ai Zulma ma Alberto i lotu eseese. Ina ua maea se tasi o sauniga lotu, sa fai mai Alberto, “Na aoaoina e lena lotu ni mea lelei.”
Sa ioe atu Zulma, ae sa la lagona lava le pei na i ai se mea o misi, o lea sa la sailiili ai pea.
I se tasi aso na tamoe atu ai Alberto i luga o faasitepu o le latou fale. “Ua ou maua le ekalesia o loo ta sailia!” Na fai mai ai Alberto. Sa ia tuu atu ia Zulma se opo lapo’a.
Na faalautele le pupula a Zulma. “I fea? Ae na faapefea?”
“Sa feiloai lau uo i ni faifeautalai mai Le Ekalesia a Iesu Keriso o le Au Paia o Aso e Gata Ai,” o le tala lea a Alberto. “Sa ou faalogo ia i laua, ma ou te talitonu i mea sa la aoaoina mai!”
Sa matua fiafia Zulma ma Alberto ma sa la sisiva faataamilo ai i le fale atoa. Ona maua lea e Zulma o se tala faanoanoa. Sa le manao mama ia te ia e feiloai atu i faifeautalai. “E na o le 12 ou tausaga,” o le tala lea a Mama. “E te laitiiti tele.”
Talu ai ona sa matua atu Alberto, sa faatagaina o ia e faaauau pea ona feiloai i faifeautalai. I nai vaiaso mulimuli ane, na papatiso ai loa o ia.
Sa toe faaauau pea ona fesili atu Zulma ia Mama pe mafai ona ia aoao mai faifeautalai. Mulimuli lava, na fai mai Mama ioe.
Ina ua aoaoina e faifeautalai ia Zulma, sa ia lagonaina le mafanafana i lona loto. Sa faigata i se tasi o faifeautalai ona tautala i le faa-Sipaniolo, ae sa lei afaina. O le mea sa taua o le lelei o le lagona na oo ia Zulma. Ina ua ia aoao e uiga ia Iosefa Samita ma le Tusi a Mamona, sa ia iloa ua ia maua le upumoni sa ia sailia!
Sa manao Zulma ia papatisoina. Ae o le a se tala a mama? Sa matua fiafia Zulma ina ua fai mai Mama ioe! I le aso o lona papatisoga, na laei papae atoa ai Zulma. Sa ia iloa sa alofa le Atua ia te ia. Sa ia iloa na Ia silafia o ia. Ma sa ia iloa sa fesoasoani o Ia i lana sailiga o Lana Ekalesia toefuataiina! ●
O Zulma lea a o avea ma se teineitiiti laitiiti. I le itu taumatau o loo i ai se la ata ma lana tane i le taimi nei, o Elder Walter F. Gonzalez o le Fitugafulu.
Ata na tusia e Scott Wakefield