Mauaina o Lou Faatuatua i le Tasi le Laa i le Taimi
O le mauaina o se molimau e mafai ona tele se taimi e alu ai. E tele lava ina manaomia ai ni aafiaga laiti e tuu faatasi.
O se tasi o taimi taua i lou olaga na tupu ia te au i le 10 o ou tausaga ina ua ou faaaluina le lua vaiaso i le aoaoina o aoaoga faavae Katoliko i le Misiona a le Katoliko Roma Loreto, pe tusa ma le 20 maila (32 km) mai lou fale i nuu maotua i Silobela, Zimbabwe. Ua ou iloa ma ou alofa i le Faaola o Iesu Keriso ma vaavaai atu i le Alii e ala i nei uluai lesona ma uunaiga.
A o ou i ai i le falelotu Katoliko, sa ou vaaia ai ata vali o vaaiga mai le soifuaga o le Faaola o faapipiina i luga o le puipui: vaaiga o le soifua mai o Iesu Keriso, o loo aoao atu i le malumalu, tatalo i le Faatoaga o Ketesemane, amoina le satauro i Kalevario, na faasatauroina i Kolokota, ma Lona Toetu. Na matuai ou faanoanoa lava i le vaaia o na fao ma laau tuitui. E oo ane i le taimi na ou oo atu ai i le ata vali o le Faasatauroga, sa faatumulia ou mata i loimata. Ma o taimi uma ou te tagi ai ma fai atu, “Ei, e tele naua mea na Ia oo i ai, mo na o au lava.”
I le taimi o le sauniga o le faamaoniga, sa tilotilo mai se tasi o ositaulaga i ou mata ma faapea mai, “O oe o le malamalama o le lalolagi” (tagai i le Mataio 5:14). Ona, ia tusi atu lea i se moligao ola, ma ia sii mai le fetalaiga a le Faaola: “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:16).
A o ou aoao atili e uiga ia Iesu, sa amata ona ou fia auauna atu i isi. Mo se faataitaiga, e tatau ona matou aumaia le vai i le lima maila (8 km) le mamao mai lo matou nuu. E masani lava, o tamaitai i le nuu, e aofia ai ma lou tina, e aveina se koneteina e 20-lita i luga o o latou ulu e tumu i vai. Ina ua mavae lou aafiaga i le seminare Katoliko, sa masani ona ou tuleia le koneteina e 200 lita o le vai e fesoasoani i lou tina, ma sa ou fesoasoani foi i isi fafine e toalua ua maliliu a la tane o lo matou tuaoi. Sa ou manatuaina le lagona lelei na ou lagonaina i taimi uma ou te fesoasoani ai i isi.
O nei aafiaga na fesoasoani e atiae lou faatuatua i le Tama Faalelagi ma Iesu Keriso ma saunia ai au e talia ai le talalelei a Iesu Keriso ina ua 22 ou tausaga.
Taliaina o le Tusi a Mamona
Sa ou ola ae i se taimi o suiga i lou atunuu. O le vaega toaitiiti o tagata papae na taitaia e Ian Samita, na folafola mai le tutoatasi mai Peretania i le 1965. O lena mea na uunaia ai vaega o Malo Aufaatasi ma amatalia ai le taua faalemalo seia oo i le 1980, lea na faailogaina ai le tutoatasi o Zimbabwe. Ina ua uma lau aoga, sa ou siitia atu i se aai e galue ai ma e lei auai i se lotu mo ni nai tausaga.
I se tasi aso sa matou taaalo ai ma atalii o lou pule. O i latou sa iva ma le fitu tausaga le matutua. Sa la fai mai, “E te iloa o lo ma tama o le peresitene o le paranesi i la matou Ekalesia.” Sa la faamalamalama le peresitene o se paranesi ma, e aunoa ma se manatu i ai, sa ou fai atu, “E le alu lou Tama i le lagi.” Sa ou iloaina ua ou faia se mea sese tele, ma sa ou matua mafaufau lava e uiga i le mea e mafai ona ou fai atu ia i laua ina ia galo ai ia i laua lau faamatalaga. I le faaiuga o le aso, ina ua la vaai i lo la tama, sa la taufetuli atu ia te ia ma toe fai atu le mea na ou fai atu ai. Sa ou faapea o le a tuli au ma la’u galuega.
Sa faaali mai e lou pule ia te au se ofu mafanafana mai le taimi sa i ai o ia i le militeli lea sa faaalia ai na ia fasioti tagata. O le mea lena na ou fai atu ai lena tala. Sa fesili mai o ia i se auala toamalie lava, pe aisea na ou faia ai lena tala. Sa ou fai atu, “Pule, manatua, na e fai mai ia te au sa e fasioti i le taua. I le Tusi Paia o loo fai mai, “Aua e te fasioti tagata.”
Sa ia fesili mai po o le fea lotu ou te auai. Sa ou fai atu ia te ia, sa masani ona ou auai i le Ekalesia Katoliko ae ou te lei toe alu lava mo le fitu tausaga. Sa ia faasoa mai ni aafiaga i le Feagaiga Tuai e uiga i taua ma tulaga faatupu faalavelave, ona ia tuuina mai lea o se kopi o le Tusi a Mamona. Sa matuai ou fiafia lava ona e lei aveesea lau galuega.
Sa ia tuuina mai ia te au le Tusi a Mamona i le 1981, ae ou te lei faitauina pe tatalaina foi mo le lua tausaga. I se tasi Aso Sa, sa ou le fiafia ai ina ua o ese au uo mai le taulaga, o lea na ou aumaia ai le tusi ae ou alu i se nofoaga o nofoaafi e lata ane ma faitau ai. Ina ua ou faitau i lena aso, sa mafai ona ou lagonaina le uunaiga e fai le lelei, ae o le mea na sili ona pai mai ia te au i se taimi mulimuli ane i lau faitauga o le 3 Nifae 11. Sa ou faitau e uiga i sa Nifae na totoe o e na oo i taua ma faigata, ona faaali mai lea o le Faaola o Iesu Keriso ia i latou.
Na oo mai i lo matou atunuu le matou lava taua mo le 15 tausaga. O nisi o tagata sa ou ola ae faatasi i lou nuu na o i le taua ma e lei toe foi mai. O isi na pipili mo le olaga atoa.
O lea, a o faitau e uiga ia sa Nifae, sa ou lagonaina e pei o le Faaola o Iesu Keriso sa aapa mai ia te au ina ua Ia fetalai, “Tutulai ia ma o mai ia te au, ina ia outou tagotago i mea na tutui ai fao i ou lima ma ou vae, ina ia outou iloa ai o au o le Atua o Isaraelu, ma le Atua o le lalolagi uma, ma ua fasiotia mo agasala a le lalolagi” (3 Nifae 11:14).
Sa ou lagonaina e pei lava na ia aapa mai ia te au, valaauliaina au e alu atu ia te Ia. Na ou ootia i le mafai ona ou faia lenei mea. Na suia ai mea uma.
Mauaina o La’u Molimau
Sa tele ni masina faatoa maua le lototele e alu ai i le lotu. Sa ou iloa le mea sa i ai le lotu, ae sa leai ni faifeautalai i la matou tamai paranesi. Ia Fepuari 1984, sa ou savali atu ai i le falesa o Kwekwe. Sa ou manao e toe savali atu i fafo. Sa ou le mautinoa pe tatau ona ou auai ma nofo i le pito i tua, ua sauni e sola. Ina ua maea le sauniga amata, sa tuuina mai e le peresitene o le paranesi, o Mike Allen, lana molimau e uiga i le Faaola o Iesu Keriso ma le Tusi a Mamona. Sa ou lagonaina le fetaui tonu lava. O le isi tagata na tuuina mai foi lana molimau e uiga i le Faaola ma le Tusi a Mamona, ma e faapena foi le lona tolu. Sa ova lou fiafia. Sa le mafai ona ou maua le lototele e alu ai i le pulelaa, o lea sa ou tu ai i le mea sa ou i ai ma fai atu, “Ou te alofa ia Iesu. O loo ou faitauina le Tusi a Mamona.” Ma sa ou nofo i lalo. O le amataga lena o la’u molimau.
O na molimau o le auala lea na aapa mai ai le Alii ia te au aua na fesoasoani ou te lagona ai e tatau ona ou auai iina. Sa ou lagonaina o ou uso ma tuafafine ia. I aso na sosoo ai sa ou tatalo mo i latou ma mo le taliaina. Sa ou feiloai i tagata iina sa agalelei ma sa fesoasoani ia te au.
E tele mea na tutupu i lena aso ina ua ou savali atu i totonu o le falesa. Sa ou mafaufau po o le a le mea semanu e tupu pe ana faapea e le tuuina atu e na tagata a latou molimau. E te le iloa lava pe o i ai se tasi o loo tauivi. Pe a e tu i luga ma fai atu ou lagona, atonu o le mea tonu lena e manaomia ona faalogo i ai se tagata.
Tuu atu pea lava pea lau molimau. Pe a e faia, ua e faamalosia oe lava ia ma isi o siomia oe. Tu atu mo mea ua e iloa. A o e mulimuli i le fautuaga mai le Tusi a Mamona, o le a e latalata atili atu i le Faaola.
Faalatalata atili atu i le Faaola
O le taimi sa ou faaaluina i le Misiona a le Katoliko i Loreto Roma na amataina ai au i le ala i le avea ma se soo o le Faaola o Iesu Keriso. Talu mai lena taimi ua ou aoaoina ai o le avea ma se soo o se faagasologa ma e manaomia ona tatou agai pea i luma e tusa lava po o a o tatou vaivaiga ma tapulaa. Pe a tatou taliaina le valaaulia: “O lenei, ia atoatoa ona lelei o la outou amio, e pei o lo outou Tama o i le lagi e atoatoa ona lelei o ia” (Mataio 5:48), o le a tatou alualu i luma i le ola e faavavau “i lea fasifuaitau ma lea fasifuaitau, o lea mataupu i lea mataupu” (tagai Mataupu Faavae ma Feagaiga 98:12).
Tatou te iloa o le a le faigofie pea le ala, ma o le a tatou oo i ni faigata ma tiga i le faagasologa, ae o le vaavaai atu i le Alii ua na o le pau lea o le ala e maua ai le filemu i o tatou olaga.
O le Togiola a le Faaola o Iesu Keriso o mea uma ia ia te au. Ou te iloa e aapa mai le Faaola ia i tatou. E tatau ona tatou tepa ae i luga, mulimuli ia te Ia, ma aapa atu e siitia isi a o Ia aapa mai ma siitia i tatou.
Ua ou aoaoina o le avea ma se soo o se faagasologa ma e tatau ona tatou agai pea i luma.
Ata na tusia e Greg Newbold