Sa Ia i Latou Se Faamoemoe O Le A Afio Mai Keriso — Ma E Mafai Foi Ona Tatou Maua
Sa i ai i perofeta o le Tusi a Mamona le faamoemoe o le a afio mai Keriso. I le faitauina o a latou upu, e mafai ona tatou maua lena lava faamoemoe mo le taimi e toe afio mai ai o Ia.
O le Asiasiga, Na tusia e Jorge Cocco Santángelo
O a upu e oo mai i le mafaufau pe a e mafaufau i le Tusi a Mamona?
Sa Nifae, sa Lamana, o le isi-vaega?
Taua, vao, oi talofa?
Salamo, togiola, amiotonu?
Iesu Keriso?
Faamoemoe?
O le Eseta o le taimi lelei lea e mafaufau loloto ai i le savali o le Tusi a Mamona. O le mea e sili ona taua, o le savali e faapea o Iesu o le Keriso, lo tatou Faaola ma le Togiola. Ona o Ia, o le a iu lava ina tatou saoloto mai tiga o le tino ma le agaga. Mai le oti ma le agasala. E mafai ona tatou faatoilaloina mea leaga uma e lafo mai e le lalolagi ia i tatou.
I se faaupuga faigofie, e mafai ona tatou maua le faamoemoe.
Faamoemoe — faamoemoe moni, e taulai atu ia Iesu Keriso — lea na musuia perofeta anamua ina ia tausia faamaumauga i papatusi auro o le a avea ma le Tusi a Mamona. Ua tau mai e Iakopo ia i tatou, “Aua, o le faamoemoe lenei ua matou tusia ai nei mea, ina ia mafai ona latou iloa sa matou iloa e uiga ia Keriso, ma sa i ai ia te i matou se faamoemoe i lona mamalu i le tele o selau o tausaga i luma mai o lona afio mai” (Iakopo 4:4; faaopoopo le faamamafa).
Sa manao Iakopo ia tatou iloa o ia — ma isi perofeta e tausia faamaumauga — na silafia le afio mai o Keriso. I le fia selau o tausaga a o lei afio mai o Ia! Ma sa musuia i latou ia maua lena faamoemoe mai upu a perofeta sa latou faitauina. Na faamatala mai e Iakopo, “ma sa lē nao i matou sa i ai se faamoemoe mo lona mamalu, ae sa faapea foi perofeta paia uma o e na i ai i luma atu o i matou.
Faauta, sa latou talitonu ia Keriso ma tapuai i le Tamā i lona suafa, ma ua matou tapuai foi i le Tamā i lona suafa.
“O le mea lea, ua matou suesue ai i perofeta, ma sa matou maua faaaliga e tele ma le agaga o valoaga; ma o le mauaina o nei molimau uma na matou maua ai se faamoemoe, ma le maluelue ai lo matou faatuatua” (Iakopo 4:4–6; tagai foi i le 1 Nifae 19:21; Iakopo 7:11; Mosaea 3:13; Helamana 8:16).
O le faamoemoe na latou maua mai o latou lava aafiaga ma valoaga na latou faitauina i tusitusiga paia na saunia ai i latou mo le aso o le a afio mai ai Keriso. E faapena foi, o perofeta i aso nei e uunaia i tatou e saunia mo le taimi o le a toe afio mai ai Keriso. Afai e tatau ona tatou maua lena faamoemoe e tasi, e manaomia foi ona tatou “suesue i perofeta, ma [saili ia] maua le tele o faaaliga ma le agaga o valoaga.” O a latou molimau ia Iesu Keriso o le a le gata ina faamalosia ai i tatou, ae e fesoasoani foi ia i tatou e saunia mo Lona afio mai.
Liae
“O le mea lea, ua taua tele ai le faailoa atu o nei mea i tagata o le lalolagi, ina ia latou iloa e lē mafai e se tagata ona mau i le afioaga o le Atua, vagana ai ua ala atu i galuega, ma le alofa mutimutivale, ma le alofa tunoa o le Mesia Paia, o lē ua tuuina i lalo lona soifua e tusa ma la le tino, ma toe ave e ala i le mana o le Agaga, ina ia mafai ona ia faataunuuina le toetutu mai o e ua oti, i le avea ai o ia ma lē e muamua toetu mai.”
Nifae
“Ma ua matou tautalatala e uiga ia Keriso, ua matou olioli ia Keriso, ua matou talai atu Keriso, ua matou vavalo e uiga ia Keriso, ma ua matou tusitusi foi e tusa ma a matou valoaga, ina ia mafai ona iloa e a matou fanau po o le a le puna e mafai ona latou tepa taulai i ai mo se faamagaloga o a latou agasala. “
Tupu o Peniamina
“Ma o le a taua o ia o Iesu Keriso, le Alo o le Atua.
“Ma faauta, e afio mai o ia i ona lava tagata, ina ia mafai ona oo mai o le olataga i le fanauga a tagata e ala lava i le faatuatua i lona suafa;
“Ma o le a toetu mai o ia i le aso lona tolu mai e ua oti.
“Aua faauta, e togiola foi lona toto mo agasala a i latou o e na pauu i le solitulafono a Atamu, o e na maliliu e aunoa ma le iloa o le finagalo o le Atua e uiga ia te i latou, po o e na agasala i le lē iloa.”
Alema
“Ma o le a afio atu o ia, ma mafatia i tiga ma puapuaga ma faaosoosoga o ituaiga eseese uma; ma o le a oo ia te ia nei mea, ina ia mafai ona faataunuuina o le upu ua fai mai, o le a Ia ave i ona luga tiga ma mai o ona tagata.
“Ma o le a ia ave i ona luga le oti, ina ia mafai ona ia tatalaina fusi o le oti ia ua noatia ai ona tagata; ma o le a ia ave i ona luga o latou vaivaiga, ina ia mafai ona faatumuina ona loto i le alofa mutimutivale, e tusa ai ma la le tino, ina ia mafai ona ia silafia e tusa ai ma la le tino le ala e fesoasoani ai i ona tagata, e tusa ma o latou vaivaiga.”
Amoleka
“Ma o lena taulaga tele ma mulimuli o le Alo lea o le Atua, ioe, ua le gata ma faavavau.
‘Ma o le a faapea ona aumai e ia le olataga ia i latou uma o e e talitonu i lona suafa; ona o le faamoemoe lea o lenei taulaga mulimuli, e aumai ai loto o le alofa mutimutivale, ia ua faumalo i le faamasinotonu, ma aumai ai ala i tagata e mafai ai ona latou maua o le faatuatua e salamo ai.
“Ma faapea ona mafai ai e le alofa mutimutivale ona faamalie manaoga o le faamasinotonu, ma siosiomia ai i latou i lima o le saogalemu, aʼo ia o le na te le faaaoga se faatuatua e salamo ai, ua tualiali i le tulafono atoa o manaoga o le faamasinotonu; o lea ua nao ia o le ua i ai le faatuatua e salamo ai, ua aumai ai le fuafuaga tele ma faavavau o le togiolaina.”
Gethsemane, by Jorge Cocco Santangelo
Samuelu le sa Lamana
‘Aua faauta, e tatau moni lava ona maliu o ia, ina ia mafai ona oo mai o le olataga; ioe, e ao ia te ia ma e tatau ia te ia ona maliu o ia, e aumai ai le toetutu mai o e ua oti, ina ia mafai ai ona aumai o tagata i luma o le Alii.
“Ioe, faauta, o lenei maliu e aumai ai le toetutu mai, ma togiola ai tagata uma mai le oti muamua—le oti faaleagaga lena; ona ua vavae ese tagata uma, i le pau o Atamu, mai luma o le Alii, ma ua faapea ua feoti, e faatatau i mea faaletino ma mea faaleagaga.
“Ae faauta, o le toetu mai o Keriso ua togiolaina ai tagata, ioe, o tagata uma, ma toe aumai ai i latou i luma o le Alii.”
Blessing the Children, by Jorge Cocco Santangelo
Mamona
‘Ia outou iloa e ao ina outou malamalama e uiga i o outou tamā, ma salamo ia outou agasala uma ma amioletonu, ma talitonu ia Iesu Keriso, o ia o le Alo o le Atua, ma sa fasiotia o ia e tagata Iutaia, ma ua toetu mai o ia e ala i le mana o le Tama, o lea ua maua ai e ia le manumalo i luga o le tuugamau; ma ua tofatumoanaina ai foi ia te ia le tui o le oti.
“Ma ua faataunuuina e ia le toetutu mai o e na oti, o lea o le a faatu mai ai le tagata e tu i luma o lona nofoa-faamasino.
“Ma ua faataunuuina e ia le togiolaina o le lalolagi, lea o le a tuu atu ai ia te ia o le e maua i le le sala i ona luma i le aso faamasino, e mau i luma o le Atua i lona malo, e pese viiga le motusia faatasi ma aufaipese i luga, i le Tamā, ma i le Alo, ma i le Agaga Paia, o e o ni Atua ua tasi, i se tulaga o le fiafia lea ua leai se iuga.”