Ua Toefuatai mai le Ekalesia a Iesu Keriso!

Ae tatou te lei o mai i le lalolagi, sa tatou nonofo faatasi ma o tatou Matua Faalelagi. Sa La alolofa ia i tatou! Sa i ai se fuafuaga matagofie a le Tama Faalelagi mo i tatou. O le a tatou o mai i le lalolagi ina ia tatou maua se tino ma aoao ma tuputupu ae. Ona mafai ai lea ona tatou toe foi atu e nonofo i lo tatou aiga faalelagi. Ae e le mafai ona tatou faia na o i tatou lava. O le a tatou manaomia se fesoasoani.

Sa filifilia e le Tama Faalelagi lo tatou uso matua, o Iesu Keriso, e afio mai i le lalolagi e fesoasoani ia i tatou. Na faaali mai e Iesu ia i tatou le ala e alofa atu ai i isi ma mulimuli i poloaiga a le Tama Faalelagi. Na Ia filifilia Aposetolo e taitai Lana Ekalesia.

Ona puapuagatia lea o Iesu mo i tatou i le faatoaga o Ketesemane. Na Ia lagonaina o tatou tiga ma puapuaga uma lava. Na maliu o Ia mo i tatou i luga o le satauro. Ona o lenei mea, e mafai ona tatou liliu atu ia te Ia pe a tatou tiga pe faanoanoa pe manaomia se fesoasoani. E mafai ona tatou salamo pe a tatou faia se mea sese.

I le aso lona tolu ina ua mavae le maliu o Iesu, sa toetu mai o Ia. Sa toe soifua mai Iesu! Ona o lenei mea, o le a tatou toetutu foi. E mafai ona tatou toe nonofo i le lagi pe a tatou oti.

Ina ua mavae Lona Toetu, sa asiasi atu Iesu i Ona soo i Ierusalema ma Amerika. Sa Ia fai atu i Ana Aposetolo e faaauau pea ona aoao atu tagata e uiga i Lana talalelei. O le tele o tagata sa faalogo i upu a Aposetolo na papatiso ma auai i le Ekalesia.

Ina ua mavae le maliliu ai o Aposetolo, na amata ona galo i tagata ni vaega taua o le talalelei a Iesu. Sa latou le toe talitonu o le a musuia pea e le Tama Faalelagi Lana fanau i le lalolagi. Na galo ia i latou o le a maua e tagata uma i le lalolagi se avanoa e papatiso ai. Sa latou le talitonu o perofeta ma aposetolo o le a taitaia i taimi uma le Ekalesia.

Na mavae le tele o tausaga. Mulimuli ane, na oo i le taimi e toe faafoi mai ai vaega o loo misi o le talalelei a Iesu. Ua oo i le taimi e toefuatai mai ai Lana Ekalesia! Na manaomia e le Tama Faalelagi se tagata e avea ma perofeta ma fesoasoani e toe faafoi maia i le lalolagi. Sa ia filifilia se tama talavou e igoa ia Iosefa Samita.

I se tasi aso, sa faitau ai e Iosefa le Tusi Paia. I le Iakopo 1:5, o loo tau mai ai o le a tali mai le Tama Faalelagi ia tatou fesili pe a tatou ole atu i le faatuatua. Sa i ai se fesili a Iosefa! Sa ia iloa e tele ekalesia sa aoao mai e uiga ia Iesu. Ae sa manao o ia ia iloa pe o i ai se tasi e pei o le Ekalesia a Iesu i le Feagaiga Fou.

I se aso matagofie o le tautotogo pe tusa o le taimi o le Eseta, na alu ai Iosefa i le vao e lata ane i lona fale. Sa ia tootuli ma amata ona tatalo. Ona lagona ai lea e Iosefa se lagona pogisa. Sa taumafai Satani e faalotovaivai o ia. Ae sa tatalo pea Iosefa ma lona malosi atoa.

Ona oo mai lea o se malamalama matagofie. Sa vaai Iosefa i le Tama Faalelagi ma Iesu Keriso. Ua taua lea mea o le Uluai Faaaliga. Sa La tau mai e le o i ai le Ekalesia a Iesu i le lalolagi. Ae e le o toe mamao se taimi. Ua amata le Toefuataiga!

Na auina mai e le Tama Faalelagi agelu e toefuatai mai vaega taua o le talalelei. Na tuuina mai e le agelu o Moronae ia Iosefa papatusi auro ina ia mafai ai ona tatou maua le Tusi a Mamona e fesoasoani ia i tatou e aoao e uiga ia Iesu Keriso.

Na aumaia e Ioane le Papatiso le Perisitua Arona ina ia mafai ai ona tatou papatiso. Na aumaia e Peteru, Iakopo, ma Ioane le Perisitua Mekisateko ina ia mafai ai ona tatou maua le Agaga Paia ma maua ai faamanuiaga pe a tatou mamai.

Na sau Elia ina ia mafai ona faamauina i tatou i o tatou aiga i totonu o le malumalu.

Na faatuina Le Ekalesia a Iesu Keriso o le Au Paia o Aso e Gata Ai. O lona uiga ua toe i ai le Ekalesia a Iesu i le lalolagi! O nei mea uma o se vaega o le Toefuataiga.

O loo tupu pea le Toefuataiga o le talalelei i le taimi nei. O loo faasoa mai e perofeta, aposetolo, faifeautalai ma tagata auai le tala fiafia a Iesu Keriso i le lalolagi atoa. Ua fausia malumalu i le tele o atunuu ina ia mafai ona faamauina tagata i o latou aiga e faavavau. Ma o le Ekalesia o loo fesoasoani i tagata i nofoaga e i ai e fiaaai po o ni faalavelave.

E mafai e tagata uma ona faia se mea e fesoasoani ai i le Toefuataiga. E mafai ona e fesoasoani e ala i lou aoao e uiga i lou talafaasolopito o aiga ma le faia o papatisoga i le malumalu. E mafai ona e tuuina atu le sefuluai e fausia ai falelotu ma malumalu. E mafai ona e tuuina atu le taulaga anapogi e fesoasoani ai i tagata e le tagolima. E mafai ona e tau atu i tagata e uiga ia Iesu Keriso.

Ua tuuina mai e Iesu ia i tatou Lana Ekalesia e fesoasoani tatou te toe foi atu ai i lo tatou aiga faalelagi. E mafai ona tatou tagofia le faamanatuga ma manatua pea le mea na ia faia mo i tatou. E mafai ona tatou faaali atu le alofa mo isi e pei ona sa Ia faia. E mafai ona tatou fesoasoani i isi e aoao e uiga i Lana talalelei! ●

Ata na tusia e Apryl Stott