O le a le Uiga o le Eseta mo Au?

30 Mati–12 Aperila Eseta

I le Eseta, tatou te faamanatuina ai le “aso e sili ona taua i le talafaasolopito”¹— o le Toetu o lo tatou Faaola o Iesu Keriso. O lenei vaega e totonugalemu i le fuafuaga o le fiafia a le Tama Faalelagi.

I le muai olaga, na filifilia ai Iesu Keriso e avea ma o tatou Faaola. Na Ia folafola mai o le a saunia le ala mo i tatou ina ia faamagaloina ai a tatou agasala ma toe foi atu i lo tatou aiga faalelagi.

O lena taeao muamua o le Eseta, na faataunuuina ai e Iesu Lana folafolaga. Na ia faatoilaloina le oti. O le taunuuga, “O Ia o le malamalama ma le ola o le lalolagi; ioe, o se malamalama e lē gata, e lē mafai lava ona faapouliuligia; ioe, ma se ola foi e lē gata, e lē mafai ona toe i ai se oti” (Mosaea 16:9).

O a faamanuiaga ua aumaia e le Toetu ia te oe?

Salamo

Ua fesili Iesu ia i tatou taitoatasi, “Pe tou te le foi mai nei ea ia te au, ma salamo ia outou agasala, ma liliu, ina ia ou faamaloloina outou?” Ua Ia folafola mai, “Ai se fia sau, ou te talia o ia” (3 Nifae 9:13–14). O a ni ou lagona pe a e salamo?

Toetu

E le maalofia le oti, ae o le manumalo o le Faaola i le oti e mautinoa ai o le a toetutu tagata uma — o le tino ma le Agaga e toe faatasia i le foliga atoatoa (tagai Alema 11:43). E faapefea ona aumaia e le malamalama o le Toetu le faamoemoe ia te oe?

Ola e faavavau

O le Togiola a le Faaola ua mafai ai ona maua le ola e faavavau, po o le faaeaga. Ina ia maua lenei faamanuiaga, e tatau ona tatou usiusitai i poloaiga. Na taua e Peresitene Russell M. Nelson le ala i le ola e faavavau “o le ala o feagaiga.”² O le a se mea e tatau ona tatou faia e mulimuli ai i lenei ala i le ola e faavavau?