Ua Na’o Tusiga Faatekinolosi: Talavou Matutua

E Te Manatu e Leai Sou Faamoemoega o se Talavou Matua? Toe Mafaufau

Saunia e Cesar Gervacio

O le mafaufau e uiga i le taitai i le Ekalesia i se aso e mafai ona taufaafefe, ae o loo i ai auala e mafai ona e amata taitai ai i le taimi nei.

I aso a o lumanai le Afio Mai Faalua o Iesu Keriso, o le a i ai “taua, ma tala o taua.

“… O le a tutu atu le tasi nuu i le tasi nuu, ma le tasi malo i le tasi malo; o le a i ai oge, ma faamaʼi, ma mafuie, i nofoaga eseese.

“Ma le tasi, ona o le a tele le amioleaga, o le a faasolo ina maalili le alofa o tagata’’ (Iosefa Samita—Mataio 1:28–30).

I le lotolotoi o ia faafitauli, o ai o le a fesoasoani e taitai o tatou uso ma tuafafine, i totonu ma fafo o le lafu, e toe foi atu ai i lo tatou Tama Faalelagi?

O iina tatou te o mai ai.

O Le Auala E Tatau Ona Tatou Taʻitaʻi Ai

Ua ta’ua i tatou o se tasi o augatupulaga silisili o talavou matutua. Ua faamatalaina e Peresitene Russell M. Nelson i tatou o e na “lava le faatuatuaina e le Atua e auina mai i le lalolagi i le tisipenisione sili ona faigata i le talafaasolopito o lenei lalolagi’’ (“Tutu Atu o ni Tagata Moni o le Meleniuma,” Liahona, Oke. 2016, 46).

O lea la, e mafai faapefea ona tatou ola e tusa ai ma o tatou gafatia e avea ma ni taitai maoae i le Ekalesia a le Alii? Ia, afai e te autilo solo i ai, atonu e te matauina ua avea oe ma se taitai i se auala se tasi po o se isi.

E mafai ona e taitai atu i se valaauga o le Ekalesia. I le avea ai ma se faifeautalai, e mafai ona e taitaia se talanoaga, e nafa ma se gaoioiga talai, pe tofia o se taitai o se sone po o se tuafafine. E mafai ona avea oe ma taitai i lou aiga po o au uo. E mafai ona e taitaia ou tuaa i le faaolataga e ala i le galuega o talafaasolopito o aiga. Atonu e mafai foi ona avea oe ma se taitai faaupufai, ma e mafai ona e taitaiina i taimi uma soo se galuega e te filifilia.

Ae o le fesili la, e tatau faapefea ona tatou taitai? Na taitai le Faaola e ala i Ana faataitaiga. Na Ia taitai i le “Sau, mulimuli mai ia te a’u” nai lo le “E sili atu Laʻu ala.” Sa Ia auauna atu, aoao atu, alofa, ma tausia e na siomia o Ia. O Iesu Keriso o le faataitaiga sili o se taitai. Ma ina ia avea ma se tupulaga maoae o taitai, e mafai ona tatou amata e ala i le taumafai ina ia avea e faapei o le Faaola ma i le faia o mea laiti nei:

1. Tatalo mo i latou o loo tauivi, o e o manaomia le fesoasoani, po o e o loo e vaaia, ma saili ia iloa pe faapefea ona fesoasoani atu ia i latou. Tatalo mo i latou i le igoa o ni tagata taitoatasi, e pei ona auauna atu le Faaola “taitoatasi” (3 Nifae 11:15).

2. Faaalu se taimi e suesue patino ai i tusitusiga paia mo faataitaiga lelei o le taitaiga, aemaise lava mai le Faaola lava Ia.

3. Tatalo mo lau uarota, siteki, ma taitai aoao o le Ekalesia. Tatalo foi mo taitai faalemalo, ina ia mafai ona musuia i latou ma galulue i le agaga o le filemu ma le lotogatasi.

4. Ia faamasani ia i latou o siomia oe. Saili e uiga i mea latou te fiafia i ai, o o latou aiga, a latou suesuega, ma o latou manaoga ma tuinanauga i le olaga (tagai i le Efeso 2:19).

5. Faitau lou faamanuiaga faapeteriaka ma manatunatu loloto pe mafai faapefea ona avea oe ma tagata sili ona lelei.

A o tatou faia le mea sili tatou te mafaia e taitai ai i le amiotonu, e avea i tatou ma soo moni ma ē mulimuli ia Iesu Keriso ma agavaa mo le mafutaga a le Agaga Paia. A o tatou osia ma faamamaluina feagaiga paia, ua ia i tatou le aia tatau e maua ai sauniuniga e tatau ai ma le ofutau faaleagaga e o atu e tau faasaga i le fili.

E Mafai Ona e Amata Nei

O le a le ituaiga taitai o le a e i ai? Po o le, sii mai le fetalaiga a le Faaola, “O a ituaiga o [taitai] e tatau ona outou i ai? E moni ou te fai atu ia te outou, e pei lava o a’u nei” (3 Nifae 27:27).

A o tatou latalata atu i le Afio Mai Faalua, o le a manaomia e le Alii le tele o ni taitai amiotonu o e o le a mulimuli i Lana perofeta ma auai i lenei taua. E Na te manaomia i tatou. O loo ua tatou i ai i le itula lona 11, ma e tele mea tatou te faia. E mafai ona tatou amata saunia e avea ma tupulaga maoae o taitai i le taimi nei. E le i tuai le amataina! Afai e i ai ni mea e tatau ona e talanoa atu ai i lou epikopo, e mafai ona ia fesoasoani ia te oe i le ala o le salamo. Afai e te manaomia se taitaiga i le auala e faaleleia atili ai oe lava ia, ia amata i le faaleleia o la oulua sootaga ma le Tama Faalelagi ma Iesu Keriso; E mafai ona La’ua faailoa atu ia te oe le mea e te alu i ai mai iina. Ua valaauina oe ma a’u i le taimi nei e fai le galuega a le Alii ma fesoasoani i lo tatou perofeta e taitai le aiga o Isaraelu i le saogalemu, ma afai e na ona tatou taumafai e fai le mea sili tatou te mafaia, o le a tatou manuia.

O Cesar Gervacio e sau mai Misuri, ISA, ae o loo i ai nei o se tamaitiiti aoga i le Iunivesite o Polika Iaga–Hawaii. Sa ia auauna atu i se misiona i Filipaina ma e fiafia e kuka, matamata i ata tifaga, ma fatu ma tata musika.

O Le A se Mea e Mafai Ona Ou Faia?

Ina ia maua nisi auala e avea ai ma se taitai lelei, toe iloilo le “Gaoioiga o Uiga” i le mataupu e 6 o le Tala’i La’u Talalelei: O Se Taiala mo le Galuega Faafaifeautalai, rev. ed. (2018), 135. Mafaufau po o a suiga e mafai ona e faia i lou olaga ina ia avea atili ai e faapei o Iesu Keriso i uiga tauleleia. Ma le isi, mafaufau e suesue le “Tutu Atu o ni Tagata Moni o le Meleniuma” na saunia e Peresitene Russell M. Nelson (Liahona, Oke. 2016, 46–53). Vaai i autu ma aoaoga faavae e fai soo o le a fesoasoani ia te oe e avea ai ma se taitai ma se soo e sili atu ona lelei.

Suesue Atili

E mafai ona e maua nisi tusiga e uiga i le auai i le Toefuataiga faifai pea i le vaega a le autalavou matutua i le Liahona o Aperila 2020.

Siaki le AM Faalevaiaso, o loo i le vaega o Autalavou Matutua i le polokalama o le Gospel Library, mo nisi anotusi fou ma musuia mo autalavou matutua i vaiaso taitasi.

E mafai ona e auina mai au lava tala, manatu, ma manatu faaalia i le liahona.ChurchofJesusChrist.org. Matou te fia faalogo atu ia te oe!