O se Taavale Laupasese, se Tamaitiiti Aoga, ma se Tali i Tatalo

Saunia e Sydney Chime Ihunwo

E alaala le tusitala i Rivers State, Nigeria.

Sa matou maua se uunaiga o le a matou mauaina o ia, aisea la ua le aoga ai?

I se tasi aso na tuuina mai ai ia i maua ma lau soa faifeautalai se igoa o se alii e aoao sa nofo i se nuu e igoa ia Tema, e latalata i le aai matagofie o Accra, Ghana. O le faanumeraina o fale i lena aai sa le sao lelei, o lea na tuuina mai ai ia i matou se faamatalaga tusitusia e fesoasoani ia i maua i le sueina o le fale.

Ina ua ma taunuu i le nuu, sa ma mulimuli i le faatonuga ae sa le mafai ona maua le alii ona sa foliga mai o le tele o fale e fetaui ma lena faamatalaga e tasi. I le lagonaina o le le mautonu, sa tonu ai ma te tuitui atu i faitotoa i totonu o le pitonuu e fesili i ai, ae sa leai se tasi na iloaina le alii sa ma sailia. Sa ou maua le uunaiga e ole atu i le Tama Faalelagi mo se fesoasoani.

Ina ua uma ona ma tatalo, sa ou maua le lagona o le a ma maua le alii sa ma sueina, o lea na ma faateleina ai a ma taumafaiga. Ae, ma te lei mauaina lava o ia. Sa ma lelavava ma filifili ai e toe foi atu i le ma eria na talai ai aua e i ai isi a ma fuafuaga faatulagaina. Ina ua ma taunuu i le paka taavale laupasese, sa vaaia e le avetaavale na aumaia i maua i le nuu i o matou mata le le fiafia ma fesili mai pe ua ma maua le tagata sa ma sailia. O le ma tali, i ai, e leai.

Sa ia fai mai ma te o i totonu o se aoga sa tu i le tulimanu ma fesili i ai. Sa ma fai atu ia te ia e le o le faamatalaga lena na tuuina mai ia i maua, ae sa ia tauanau mai pea. Sa ma o ese mai le taavale laupasese ma agai atu i le aoga—e le faapea ona sa ma manatu o le a ma maua se tasi, ae ia faamalie le ma uo popole.

A o amata ona ma savavali atu i le fale o le ofisa o le aoga, sa tamoe mai se tamaitiiti i lo ma itu. Sa ataata o ia ma fai mai o ia ma lona uso sa na o le pau lea o tagata O Le Ekalesia a Iesu Keriso o le Au Paia o Aso e Gata Ai e nonofo i lenei eria ma e mafai ona fesoasoani mai ia i maua.

Sa ma tilotilo atu ma lau soa i le tasi ma le isi i le le talitonu. O se vavega lava. Sa fesoasoani le tamaitiiti ia i maua e sue le alii sa ma sailia, ma mulimuli ane ai talia le talalelei ma papatisoina.

O lenei aafiaga na aoaoina ai au e tali e le Tama Faalelagi ia tatalo i Lana lava taimi ma i Lana lava ala. A tatou le maua ni tali vave i a tatou tatalo, e mafai ona tatou faatinoina le faatuatua ia te Ia ma aoao ina ia onosai.

Ata na tusia e Corey Egbert