Ata e Fa mai le Vaiaso o le Eseta

“E le mai le lalolagi nei Lo’u malo” (Ioane 18:36).

Pale Tuitui

Tagai Mataio 27:29; Mareko 15:17; Ioane 19:2.

Sa tuu e fitafita Roma se pale tuitui i luga o le Faaola. “Atonu o lenei faatinoga leaga o se taumafaiga le mafaatusalia lea e faataitaia ai le tuuina o le pale o se tupu i luga o Lona ao. E maeu le ootia o lenei mea, pe a mafaufau atu o tuitui sa faatusa i ai le le fiafia o le Atua a o Ia fetuuina le laueleele ona o Atamu o le a oo mai i le taimi nei o le a aumaia ai le vaotuitui. Ae o le faia o le pale, sa suia ai e Iesu le vaotuitui i se faatusa o Lona mamalu” (Peresitene James E. Faust, Ape. 1991 konafesi aoao).

Ofu Talaloa Pauli

Tagai Mataio 27:28; Mareko 15:17; Ioane 19:2.

O le pauli o se lanu tau tupu, ma sa tuu atu ma le taufaifai e fitafita le ofu talaloa lenei ia Iesu Keriso ona sa Ia tautino mai o Ia o le tupu o tagata Iutaia. Ioe, o le mea moni, e sili atu o Ia nai lo lena—o Ia o le “Tupu o tupu, ma Alii o alii” (1 Timoteo 6:15; Faaaliga 19:16).

“E sau le toto mai pu afu uma, ona o le a tele naua o lona mafatia” (Mosaea 3:7).

Soligā Vine

Tagai i le Mataio 26:36; Mareko 14:32; Luka 22:39–40; Ioane 18:1.

“O se faatusa loloto le ‘sau o le toto mai ona pu afu uma’ [Mosaea 3:7] a o mafatia ai Iesu i Ketesemane, le nofoaga o le soligā vine. Ina ia gaosi le suauu olive i le taimi o le Faaola, e olopala muamua olive e ala i le faataavale ai i luga o se maa tele. O ‘mea ua olopalaina’ sa tuu i totonu o se ato lalaga faavalavala vaivai, lea sa faaputu le tasi i luga o le isi. O lo latou mamafa e tatauina mai i fafo le suauu muamua ma sili ona lelei. Ona toe faaaoga lea o se isi mamafa faaopoopo e ala i le tuuina o se amopou tele po o se ogalaau i luga o ato ua faaputuina, ma toe maua ai nisi suauu. Mulimuli lava, ina ia tatau mai i fafo ni mataua mulimuli, e faamamafa le amopou i ni maa i le tasi pito e maua ai le mamafa sili, mo le olopalaina. Ioe, e mumu totototo le suauu ao tafe muamua mai i fafo” (Elder D. Todd Christofferson, konafesi aoao Oke. 2016).

“E le o iinei o ia, a ua tu” (Luka 24:6).

Tuugamau Avanoa

Tagai Mataio 28:1–8; Ioane 20:1–18.

“O le tuugamau avanoa i lena uluai taeao o le Eseta o le tali lea i le fesili a Iopu, ‘Afai e oti le tagata, e toe ola mai ea o ia?’ [Iopu 14:14]. Outou uma o mafai ona lagona mai lo’u leo, ou te folafola atu, afai e oti le tagata, o le a toe ola mai o ia. Ua tatou iloa, aua ua ia i tatou le malamalama o le upu moni faaalia” (Peresitene Thomas S. Monson, “Ua Toetu o Ia!” Konafesi aoao Ape. 2010).

Ata o se pale tuitui na saunia e Dilleen Marsh

Keriso ma Pilato saunia e Marcus Vincent, faaaloaloga a le Mataaga o Talafaasolopito o le Ekalesia

Ata pue o le soliga vine mai le Getty Images