Fausiaina o le Malo i Niu Kaletonia

Saunia e Mindy Selu

Mekasini a le Ekalesia

Ua tulai le autalavou matutua i Niu Kaletonia ma isi i le lalolagi atoa i le valaau e auauna atu ma ia avea ma taitai i le Ekalesia.

“O le avanoa e auauna atu ai o se tasi o faamanuiaga maoae o le auai i le Ekalesia.”¹ I le avea ai ma se talavou matua, o le auauna atu i le Ekalesia e mafai ona avea ma se avanoa faagaeetia mo le tuputupu ae, taitaiga, ma le faamalosia o ou musele faaleagaga. Ae faatasi ai ma isi tiutetauave e aumai e le autalavou matutua, o le auauna atu e mafai ona faigata i nisi o taimi — aemaise lava i nofoaga e laitiiti le Ekalesia. Mo se faataitaiga, o le a lau mea e fai pe a valaauina oe e avea ma peresitene o Tamaitai Talavou a le siteki, o loo e taumafai e saunia e auauna atu i se misiona a o e auai i le kolisi ma fesoasoani e faamaopoopo le inisitituti, ma ioe, e na o le 21 ou tausaga?

Mo le tele o eria o le Ekalesia, e le o se tulaga e le masani ai. I Niu Kaletonia, o se tamai teritori e i fafo atu o le atunuu o Farani e tusa ma le 2,400 tagata o le Ekalesia, e tele lava ina tuuina atu i tagata talavou matutua uma ni tiutetauave tetele i le fausiaina o le malo o le Alii. Sa saunoa mai Peresitene Russell M. Nelson i le autalavou matutua,: “O outou o taitai i le lumanai o le Ekalesia a le Alii! Ua e sauni e uu le faagutu o le taitaiga?”² Ona o le manaomia ma le alofa ua ia i latou mo le Faaola, ua saunia ai le autalavou matutua i le lalolagi atoa e auauna atu ma taitai i le Ekalesia.

I lana Auaunaga mo le Olaga

Mo le toatele o talavou matutua o Niu Kaletonia, o a latou misiona e fesoasoani e saunia i latou mo se auaunaga faale-Ekalesia i le olaga atoa. Sa maua e Syoelanne (Syo) Ulivaka se valaauga e avea o se fesoasoani lua i le au epikopo i le na o se vaiaso talu ona faamalolo mai lana misiona talai. “Faatoa uma lau misiona,” o le tala lea a Syo. “Sa ou le lava, ma sa ou faapea ifo ia te au lava, o lea o le a ou malolo.” Ae sa ia taliaina lava le valaauga. “Sa ou iloaina o le a ou alu i le mea e finagalo le Alii ou te alu i ai. O loo ou i ai i Lana galuega—e le mo na o le lua tausaga, ae mo le olaga.”

Talu ona ia auauna atu i le au epikopo, ua faaipoipo nei Syo, ua i ai sona alo, ma ua siitia atu i se isi uarota. Ae o loo faaauau pea ona ia auauna atu ma faataunuu ona valaauga i le Ekalesia.

Elder Earl C. Tingey, o se Fitugafulu o le Pulega Aoao ua malolo, na tau atu i le autalavou matutua: “O se valaauga i le Ekalesia o se tasi lea o faamanuiaga e sili ona matagofie e mafai ona e fiafia i ai i le tulaga o lou olaga. E tele naua mea e te saofaga ai i le uarota po o le paranesi o loo e nofo ai. O au taleni ma tomai e manaomia mo se Ekalesia ua faatupulaia. ”³ O Syo e le na o le pau lea o le talavou matua i luga o le motu na faaaoga ona tomai e fesoasoani ai i le Ekalesia ua faatupulaia — o isi talavou matutua e auauna atu i le toetoe lava o avanoa uma i le uarota ma le siteki. Fai mai Syo, “Matou te taumafai e toe aumai mea na tatou aoaoina mai a matou misiona e faamalolosia a matou siteki ma uarota.” O nei talavou matutua ua faia ni osigataulaga se tele ina ia mafai ai ona faamalosia le malo i lo latou atunuu, ae pei o Syo, “o le mea matou te ositaulaga ai o lo matou taimi lea.”

O nisi o talavou matutua e i ai ni valaauga se lua pe tolu foi. “E mafai ona avea lena ma se faamanuiaga mo i latou, ae e mafai foi ona avea o se avega mamafa,” o le tala lea a Syo, o le tele lava o le faigata o le faapaleniina o manaoga o talavou matutua i o latou tiutetauave i le Ekalesia. “E faigata ona faia mea uma i le taimi e tasi.” Ae na iloa e Syo ina ua ia faamuamua le Alii, sa faigofie ona ausia le vaega na totoe. Fai mai a ia, “Ua fesoasoani mai le Alii i isi mea uma—aoga, mauaina o se āva—sa i ai uma i aao o le Alii.”

O Le Lumanai o le Ekalesia

Ua i ai i perofeta ma aposetolo ni manatu malolosi e uiga i tomai ma auaunaga e mafai e le autalavou matutua ona tuuina mai i le Ekalesia: “Matou te manaomia lou loto atoa ma le agaga. Matou te manaomia ni autalavou matutua e malolosi, talitonu, ma naunautai, o i latou e iloa ona faalogo ma usitai i musumusuga a le Agaga Paia.”⁴

Ua o atu le autalavou matutua i Niu Kaletonia ma isi tagata uma i le lalolagi atoa i lenei valaauga faaaposetolo. Ua latou iloa o i latou o le lumanai o le Ekalesia, ma ua latou filifili e auauna atu i soo se auala latou te mafaia ai. Latou te uunaia le tasi ma le isi i o latou valaauga. Latou te galulue faatasi ma faifeautalai. Latou te faasoa atu le talalelei ma valaaulia a latou uo i le lotu. Latou te tuuina atu fautuaga i le autalavou i a latou uarota ma uunaia i latou e auauna atu i ni misiona. Latou te malaga mamao atu e auai i le malumalu. Latou te aoaoina tagata le lolotu i o latou aiga. Ma o nei taumafaiga uma o loo fausiaina ai le malo.

E iloa e Syo lena mea, pe a oo mai i le auauna ai i le Alii, “O i matou o Ana meafaigaluega.” I nei taimi o le tuputupu ae o le Ekalesia, o le a valaau atu ai le Alii i le Au Paia i vaitausaga uma, i soo se mea, e talia tiutetauave e fausia ma faamalosia ai Lona malo. Pe ua tatou saunia ea e tali atu i lena valaau?