Sa Faamanatu Mai e se Tamai Manulele ia te Au

Laura Linton

Iuta, ISA

Sa 26 ou tausaga ae maliu le ma tama muamua ma lou toalua. Na maua Kennedy i se tuma o le faiai ina ua na o le 13 masina le matua. Ina ua mavae ni taotoga se tolu, sa faalima ona fai ni togafitiga i vailaau, ma le tele o fualaau ma togafitiga, sa maliu o ia i o ma lima i le 20 masina le matua.

Sa ou matua le fiafia lava ina ua aveesea lau teineitiiti aulelei, ma le tiotio, ma le malosi laitiiti. E faapefea ona tupu lenei mea? E faapefea ona ou agai i luma? Sa tele ni au fesili sa i ai, ae sa leai ni au tali. I le lua aso talu ona uma le maliu, sa ma asiasi atu ma lou toalua i le tuugamau, o loo i ai pea fugalaau matagofie lanu piniki ma le tele o lipine mai le falelauasiga.

A o ou mafaufau e uiga i lou afafine, sa ou vaaia se tamai manulele, laitiiti tele e lele, o osooso i luga o le mutia. Sa faamanatu mai e lenei manulele ia te au ia Kennedy ona e fiafia o ia i meaola. Na oso mai le manulele i le tuugamau ma taalo i lipine ma fugalaau. Sa ou ataata, ma le iloaina o le mea tonu lava lea e ono manao ai Kennedy. Ona oso mai lea o le manulele ia te au. Ou te lei lototoa e toe minoi. Na oso mai le manulele i ou tafatafa tonu lava, ma faalagolago mai i lou vae, moeiini ona mata, ma moe.

E faigata ona ou faamatalaina ou lagona sa i ai i lena taimi. Sa ou lagonaina le pei na ou maua se opo mai lau Kennedy. Sa le mafai ona ou opo maia lou afafine, ae o lenei tamai manulele — o se foafoaga a lo tatou Tama i le lagi — e mafai ona oo mai ma faalagolago mai lona tamai ulu ia te au, ma faamanatu mai ia te au e malamalama le Tama Faalelagi i ou tiga ma o le a i ai pea iina e faamafanafana au ma fesoasoani ia te au i lenei tofotofoga.

Na saunoa mai Elder David A. Bednar o le Korama a Aposetolo e Toasefululua, “A le mafai e upu ona tuuina mai le faamafanafanaga tatou te manaomia, pe afai e le mafai ona lava se malamalama i manatu ma mafuaaga e uiga i le faamasinoga tonu ma le mea manatu faapito o le olaga, ma a oo ina foliga mai atonu ua tuua na o i tatou, e moni lava ua faamanuiaina i tatou e ala i le alofa mutimutivale o le Alii” (“O le Alofa Mutimutivale o le Alii,” Liahona, Me 2005, 100).

Sa lei i ai ia te au ni tali uma i au fesili, ae o lenei alofa mutimutivale na faamautinoa mai ai ia te au, o maua ma Kennedy e alofagia e lo tatou Tama Faalelagi, ma e ala i le taulaga togiola a Lona Alo, o Iesu Keriso, ua ou maua ai le faamoemoe e faapea o Kennedy, o lou toalua, ma au o le a i ai se aso e toe faatasia ai o se aiga.