Uluai Faaaliga

I le tautotogo o le 1820, na faaali mai ai le Atua le Tama ma Iesu Keriso ia Iosefa Samita a o ia tatalo i se togavao e lata ane i lona aiga i Niu Ioka sisifo. O lenei mea na tupu ua lauiloa o le Uluai Faaaliga. (Ina ia faitau e uiga i le faaaliga i upu a Iosefa lava ia, kiliki iinei.)

I le popofou o le 1800 i le Iunaite Setete sa i ai se vāvāō tele e uiga i mea tau tapuaiga. Sa auai tagata o le aiga o Iosefa i ekalesia eseese, ae sa le mautonu Iosefa po o lē fea o ekalesia e tatau ona auai ai.

Ina ua 14 tausaga o le matua o Iosefa, na musuia o ia e le Iakopo 1:5, lea o loo folafola mai, “A e afai ua leai se poto i so outou, ina ole atu ia i le Atua, o le foai tele mai i tagata uma ma le le toe ta’uta’ua, ona foaiina mai ai lea ia te ia.” Sa naunau Iosefa e tatalo ia iloa po o le fea o ekalesia e tatau ona auai ma ole atu mo le faamagaloga o ana agasala.

Ina ua tootuli Iosefa e ofo atu manaoga o lona loto, sa lofituina o ia i se mana pouliuli. Sa saisaitia ai lona laulaufaiva a o faataali’oli’o ia te ia le pouliuli mafiafia. Sa faaaoga e Iosefa lona malosi uma e valaau atu ai i le Atua.

Sa ia faamatalaina le mea na sosoo ai sa tupu:

“Na ou vaaia ai se malamalama faaniutu i luga ae tonu lava o lou ulu, ua sili atu le pupula i le la, ua alu ifo malie lava seia oo mai i ou luga.

“… Ina ua oo mai le malamalama i oʼu luga, sa ou vaaia ni Tagata e toalua, o lo laua pupula ma le mamalu e lē mafaamatalaina, o tutu mai i oʼu luga aʼe i le ea. Sa fetalai mai le tasi o i laua ia te au, ma tau mai ia te au lou igoa, ma fetalai mai, ao tusi ane i le tasi—O Lo’u Atalii Pele lenei. Faalogo ia te Ia!” I le taimi na sau ai le malamalama sa lagonaina e Iosefa le laveaiina o ia mai le fili lea na taofiofia o ia. Na lagonaina e Iosefa le olioli tele ma le alofa mo ni nai aso mulimuli ane.

I le taimi o le faaaliga, sa fesili ai Iosefa po o le fea o ekalesia e sa’o, ma sa tali Iesu Keriso, ma ta’u ane ia Iosefa e aua ne’i auai i se tasi o ia ekalesia. Na faamalamalama mai e le Alii e faapea, o ekalesia o lena taimi sa talitonu “i aoaoga faavae e le sa’o, ma e leai se tasi o i latou na faailoaina e le Atua faapea o Lana Ekalesia ma Lona malo.” O le Uluai Faaaliga ua faailogaina ai le amataga o le Toefuataiga o le talalelei a Iesu Keriso i lenei tisipenisione faaiu. Na filifilia Iosefa Samita e avea ma perofeta a le Alii i aso e gata ai. I le aluga o taimi, na toefuatai mai ai e le Alii Lana pule ma le Ekalesia e ala mai ia Iosefa Samita. Sa toe faamanuiaina le fanau a le Atua i faaaliga e ala mai i perofeta ua valaauina e le Atua, e pei lava ona sa i ai i taimi o le tusi paia. O loo faaauau pea faaaliga e oo mai i aso nei e ala mai i perofeta taitoatasi ua filifilia e le Atua o e na sosoo ai ma Iosefa Samita.

Faamolemole tagai i le itulau fou o le uepi, “O Le Uluai Faaaliga,” na fatuina mo le luaselau tausaga o le Toefuataiga.

Mo faamatalaga faaopoopo, faitau le “O le Toefuata’iga o le Atoatoaga o le Talalelei a Iesu Keriso: O Se Folafolaga o le Faamanatuina o le Lua Seneturi i le Lalolagi.”