O Le Atua le Tama

O le Atua le Tama o Ia o le Atua Silisiliese tatou te talitonu i ai, tatou te tapuai i ai, ma tatou te tatalo i ai. O Ia o Lē Foafoa, o le Pule sili, ma Lē Faasaosao o mea uma. E atoatoa o Ia, e ona le mana uma, ma e silafia mea uma. O Ia “ua i ai … se tino o aano ma ivi e mafai ona paʼi i ai e pei o le tagata” (Mataupu Faavae ma Feagaiga 130:22).

Vaaiga Aoao

Tusifaamaumau Ou Lagona Uunai

O Le Tama o o Tatou Agaga

O se tasi o fesili tele o le olaga o le, “O ai au?” E fesoasoani se pese faapelepele o le Peraimeri i tamaiti laiti e tali ai lenei fesili. Tatou te pepese, “O au o se atalii o le Atua, ua na auina mai au nei.” O le malamalama e faapea o i tatou o fanau a le Atua ua aumaia ia i tatou le malosi, mafanafana, ma le faamoemoe.

Ua leva ona faailoa mai e le au atamamai e faapea, o le manatu e uiga i le Atua lea na i ai i le au Kerisiano anamua, ua matuai suia lava i le aluga o seneturi. O manatu o le au Kerisiano anamua e uiga i le Atua sa matele ina patino, tele ina faaalia ai foliga ma uiga o se tagata, ma e tau le mautu nai lo manatu na aliae mulimuli ane i le aluga o le tulaga o le faamatalaga o le FaaKerisiano. O le suiga autu o manatu lea na amataina i le seneturi lona lua, ina ua aveesea le pule faaaposetolo, o le taunuuga lea o se tuufaatasiga o manatu o le aoaoga faavae faaKerisiano ma le filosofia faaEleni.

E talitonu le Au Paia o Aso e Gata Ai, o le tuufaatasia o talitonuga faalelotu a le au Kerisiano anamua ma filosofia faaEleni sa o se sasi ogaoga tele. Na aupito taua i nei aoaoga faavae na leiloa i le faagasologa o le natura o le aigaAtua. E mausali le talitonuga o le Au Paia o Aso e Gata Ai o le Atua le Tama o se tagata faitino e i ai ni uiga e pei ona faaalia e uluai Kerisiano. O lena talitonuga e ogatasi ma manatu o le au Kerisiano anamua e uiga i le Atua, peitai e ese mai i talitonuga na mulimuli ane ai.

O i tatou uma lava o fanau moni a le Atua, na fanauina faaleagaga i le muai olaga. I le avea ai ma Ana fanau, e mafai ona faamautinoaina o loo ia i tatou ni gafatia paia ma faavavau ma o le a fesoasoani o Ia ia i tatou i a tatou taumafaiga faamaoni e ausia na gafatia.

O Le Foafoa Silisiliese

O Le Tama Faalelagi o Le Foafoa Silisiliese. E ala ia Iesu Keriso, na Ia foafoaina ai le lagi ma le lalolagi ma mea uma lava o i ai (tagai i le Mose 2:1). Fai mai Alema, “Ua faailoa mai i mea uma o loo i ai se Atua; ioe, e oo i le lalolagi, ma mea uma ua i ona luga, ioe, ma lona faataamilosaga, ioe, ma paneta uma foi o loo i o latou ala masani ai ua molimau mai o loo i ai se Foafoa Silisiliese” (Alema 30:44).

O Le Mataisau o le Ata o le Faaolataga

E finagalo lo tatou Tama oi le Lagi ia tatou tatou mafuta ma Ia e faavavau. O Lana galuega ma Lona mamalu o le “ia aumaia le tino ola pea ma le ola faavavau o le tagata” (Mose 1:39). Ina ia mafai ona tupu lenei mea, ua Ia saunia ai le ata o le faaolataga. Na Ia auina mai Lona Alo Pele o Iesu Keriso, e talaia noataga o le oti ma togiola mo agasala a le lalolagi: “Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau” (Ioane 3:16). O lenei taulaga o le faailoaga aupito maoae lea o le alofa o lo tatou Tama mo i tatou.

O le Iloaina o le Atua le Tama

I le avea ai o ni fanau a le Atua, ua i ai sa tatou sootaga faapitoa ma Ia, ua tulaga ese ai i tatou mai isi Ana foafoaga uma. E tatau ona tatou saili ia iloa lo tatou Tama o i le Lagi. E alofa o Ia ia i tatou, ma ua Ia tuuina mai ia i tatou le avanoa taua e faalatalata atu ai ia te Ia pe a tatou tatalo. O a tatou tatalo, e tuuina atu ma le faamaualalo ma le faamaoni, e faafofogaina ma taliina mai.

E mafai foi ona tatou iloa lo tatou Tama e ala i le aoao e uiga i Lona Alo Pele ma faaaoga le talalelei i o tatou olaga. Na aoao e le Faaola i Ona soo: “Ana iloa e outou o a’u, po ua iloa foi e outou lo’u Tamā. … O le ua vaai mai ia te au, ua vaai o ia i le Tama” (Ioane 14:7, 9).

Tatou te faalatalata atu i le Atua le Tama a o tatou suesue i tusitusiga paia ma upu a perofeta o aso e gata ai ma a o tatou tuuina atu auaunaga. A tatou mulimuli i le finagalo o le Atua, ma ola e pei ona finagalo ai o Ia ia tatou ola ai, e avea atili i tatou e pei o Ia ma Lona Alo. Tatou te saunia i tatou lava e foi atu e nonofo i Lona afioaga.