Iloaina o le Paia i Totonu o i Tatou
Saunia e Rosemary M. Wixom
Peresitene Aoao o le Peraimeri
Ua tatou o mai i lenei lalolagi e faafailele ma iloa fatu o le natura paia o loo i totonu o i tatou.
Uso e, matou te alofa ia te outou! Ou te molimau atu o le ola o se meaalofa. Ua i ai se fuafuaga a le Atua mo i tatou taitoatasi, ma o faamoemoega o o tatou olaga taitoatasi sa amataina ae tatou te le’i o mai i lenei lalolagi.
Talu ai nei lava, ua ou iloaina o le vavega o le fanau mai o se pepe i le olaga faitino, o se vaega o le fuafuaga a le Alii. O i tatou taitoatasi na atiina ae faaletino i totonu o le manava o o tatou tina a o faalagolago mo le tele o masina i lona tino e lagolagoina o tatou tino. Peitai, mulimuli ane o le faagasologa o le fanau mai—e taua uma mo le tina ma le tamaitiiti—e tuueseeseina ai i tatou.
A o ulufale mai se pepe i lenei lalolagi, o le suiga o le vevela ma le malamalama ma le faamatuu faafuasei atu o le avega mamafa i le fatafata [o le pepe] e faamalosia ai o ia e apoina lana uluai manava. E faafuasei ona faatumuina na tama’i mama laiti i le ea mo le uluai taimi, e amata ai ona gaoioi totoga, ma amata ai ona manava le pepe. Pe a faamauina le pute, o lena laina o le ola i le va o le tina ma le pepe e tuueseeseina e faavavau ma amata ai le olaga o le pepe i le lalolagi.
Na saunoa Iopu, “Na faia a’u e le Agaga o le Atua, o le manava foi a Le e ona le malosi uma lava ua ola ai a’u.”
Tatou te o mai i lenei lalolagi “ma ao o le mamalu i o tatou luga.” Ua aoao mai le “O Le Aiga: O Se Folafolaga i le Lalolagi” faapea o i tatou taitoatasi “o se atalii po o se afafine agaga faapelepele a ni matua faalelagi,” ma “ua tofu ai ma se natura paia ma se taunuuga paia.” Ua faasoa mai ma le limafoai e le Tama Faalelagi se vaega o Lona paia mo i tatou. O lena natura paia e oo mai o se meaalofa mai ia te Ia ona o Lona alofa lea e na o se matua e mafai ona lagonaina.
Ua tatou o mai i lenei lalolagi e faafailele ma iloa fatu o le natura paia o loo i totonu o i tatou.
Ua Tatou Iloa Pe Aisea
O Elaine Cannon, o se peresitene aoao muamua o Tamaitai Talavou na saunoa mai, “E lua ni aso taua i le olaga o se tamaitai: O le aso e fanau mai ai ma le aso na te iloa ai pe aisea ua fanau mai ai.”
Ua tatou iloa pe aisea. Ua tatou o mai e fesoasoani e fausia Lona malo i lenei lalolagi ma saunia mo le Afio Mai Faalua o Lona Alo, o Iesu Keriso. Faatasi ma mānava uma tatou te mānavaina, tatou te tauivi ai ia mulimuli ia te Ia. O le natura paia i totonu o i tatou taitoatasi ua faaleleia ma faatupuina e ala i le taumafaiga tatou te faia e faalatalata atili ai i lo tatou Tama ma Lona Alo.
O lo tatou natura paia e leai se mea e aafia ai lo tatou ausiaga faaletagata lava ia, le tulaga tatou te ausiaina, le tele o malafoni tatou te tamomoe ai, po o lo tatou lauiloa ma le faatauaina o le tagata o ia lava. O lo tatou natura paia e sau mai le Atua. Sa faavaeina i se olaga ae tatou te le’i fananau mai ma o le a faaauau pea e oo atu i le faavavau.
E Alofagia i Tatou
Tatou te iloaina e ala i lo tatou natura paia pe a tatou lagonaina ma foai atu le alofa mai lo tatou Tama i le Lagi. Ua ia i tatou le faitalia e faafailele ai, ma tuu e uluola, ma fesoasoani e faateleina. Sa saunoa Peteru, ua tuuina mai e le Atua ia i tatou “folafola[ga] … o mea … aoga” ina ia tatou “tofusia faatasi ai … i le amio Atua.” Pe a tatou malamalama po o ai i tatou—o afafine o le Atua—tatou te amata ona lagonaina na folafolaga o mea aoga.
O le taulai atu i isi, ae le na o i tatou, e mafai ai ona tatou vaaia i tatou lava o Ona afafine. E masani lava ona tatou liliu atu ia te Ia i le tatalo, ma tatou naunau e faitau Ana afioga ma faia Lona finagalo. Tatou te maua lo tatou lagona faatauaina mai ia te Ia, ae le mai i tagata o loo siomia i tatou, pe mai ia i latou i luga o le Facebook po o le Instagram.
Afai e te masalosalo i lena paia o i totonu ia te oe, tootuli i le tatalo ma ole atu i le Tama Faalelagi, “O a’u moni ea o Lou afafine, ma e Te alofa ea ia te au?” Na saunoa Elder M. Russell Ballard, “O se tasi o savali aupito sili e ta’u mai e le Agaga, o lagona o le Alii mo oe.”
O i tatou o Ana [fanau]. Na saunoa Paulo, “O loo molimau mai lea lava Agaga i o tatou agaga, o fanau i tatou a le Atua.” E masani o le pese muamua a le Peraimeri tatou te aoaoina o le “O Au o se Atalii o le Atua.” Ia ave nei lena fuaitau faapelepele “O au o se atalii o le Atua” ma faaopoopo i ai upu “Ona, a lea?” Atonu tatou te fesili foi ni fesili e pei o fesili nei: “O le a le mea ou te faia ia ou ola ai i lou olaga o se afafine o le Atua? E mafai faapefea ona ou atiaeina le natura paia o i totonu ia te a’u?”
Na saunoa Peresitene Dieter F. Uchtdorf, “Na auina mai oe e le Atua iinei e saunia mo se lumanai e sili atu i lo soo se mea e mafai ona e mafaufauina.” O lena lumanai, o se aso i se taimi, e moni ia te oe pe a e faia le tele o mea nai lo le na ona i ai iina; e moni lona oo mai pe a e ola i lou olaga e faataunuu le faamoemoega na foafoaina ai oe. E valaaulia e lenei mea le aafiaga o le Alii i lou olaga, ma e te amataina ona faataga Lona finagalo e avea ma lou loto.
Tatou te Aoao Ona o Lo Tatou Natura Paia
O le natura paia e atiaeina i totonu o i tatou le manao ia iloa nei upumoni e faavavau mo i tatou lava.
O se tamaitai talavou e igoa ia Amy sa aoaoina a’u talu ai nei i lenei lesona ina ua ia tusia: “E faigata le avea ma se talavou i nei onapo. Ua sili atu le matautia o le tiapolo o loo siomia le ala o le talalelei. Ua matuai faaosoosoina i tatou e Satani ia ‘aua nei tausia poloaiga. A le o le sa’o po o le sese, e leai se faaituau.”
Sa ia faaauau: “O nisi taimi e faigata ona maua ni uo lelei. E oo lava pe a e manatu ua e maua ni uo mamae e le o ese lava, e mafai ona sui lena mea mo soo se mafuaaga. O le ala lena ua ou fiafia ai tele ua ou maua se aiga, o le Tama Faalelagi, o Iesu Keriso, ma le Agaga Paia, o ē e mafai ona avea ma a’u soa pe a faaletonu se mea ma a’u uo.”
Sa faaauau ona fai mai Amy, “I se tasi o po sa ou le mautonu ai, ma sa ou fai atu i lo’u uso ua ou leiloa le mea e fai.”
Mulimuli ane i lena po sa auina mai e lona uso ia te ia se feau tusitusia na aofia ai se upusii mai ia Elder Jeffrey R. Holland ina ua ia saunoa mai: “Aua e te fiu. … Aua e te faavaivai. Savali pea. Taumafai pea. O loo i ai le fesoasoani ma le fiafia i luma atu. … O le a lelei mea uma i le iuga. Ia talitonu i le Atua ma talitonu i mea lelei o le a oo mai.”
Na faamatala e Amy, “Ou te manatua le faitauina o lena [upusii] ma tau lava o le tatalo o le a ou lagona le alofa mai le Atua pe o i ai moni o Ia iina mo a’u.”
Na ia saunoa: “O le taimi lava na ou ole atu ai ma talitonu na i ai o Ia iina, na ou lagona ai se lagona sili atu ona matagofie, fiafia, ma mafanafana. E le mafai e upu ona faamatalaina. Na ou iloa o loo i ai o Ia iina ma e alofa o Ia ia te au.”
Ona o oe o Lona afafine, Na te silafia le tagata e mafai ona avea ai oe. Na te silafia ou popolega ma ou faamoemoega. E fiafia o Ia i ou gafatia. O loo faatali mai o Ia mo oe e te alu atu ia te Ia i le tatalo. Ona o oe o Lona afafine, e le gata e te manaomiaina o Ia, ae Na te manaomiaina foi oe. O i latou o loo nonofo i ou autafa i lenei sauniga e manaomiaina oe. E manaomia oe e le lalolagi, ma o lou natura paia e faatagaina ai oe e avea ma Ona soo faatuatuaina i Ana fanau uma. O le taimi lava tatou te vaaia ai le paia ia i tatou lava, o le a mafai ai foi ona tatou vaaia i isi.
Tatou te Auauna Atu Ona o Lo Tatou Natura Paia
O le natura paia e atiaeina i totonu o i tatou le manao ia auauna atu i isi.
Talu ai nei sa faamatala ai e Sharon Eubank, o le faatonu o Auaunaga Alofa ma Galuega Alofa a le Ekalesia, se aafiaga na faasoaina e Elder Glenn L. Pace. Sa i ai se lamala ma se oge matautia tele i Efiopia i le ogatotonu o le 1980. Ina ia tuuina atu le toomaga, sa faatuina ni nofoaga e fafaga ai tagata na i ai vai ma meaai mo i latou na mafai ona malaga atu i ai. Sa i ai se toeaina sa matelaina sa savali i se mea mamao ina ia oo atu i se nofoaga mo meaai. Sa ia pasia se nuu ina ua ia faalogoina se tagi a se pepe. Sa ia saili seia oo ina ia mauaina le pepe o nofonofo i talaane o lona tina ua maliu. Sa piki i luga le pepe, ma faaauau le savali a le toeaina i le 25 maila (40 km) i le nofoaga mo meaai. Ina ua ia taunuu, o ana upu muamua sa le o le “Ua ou fiaai po o le “Fesoasoani mai ia te a’u.” O na upu o “O le a se mea e mafai ona faia mo lenei pepe?”
O le natura paia i totonu o i tatou e faateleina ai lo tatou mananao e aapa atu i isi ma uunaia i tatou ia galulue. E mafai e le Tama Faalelagi ma Iesu Keriso ona fesoasoani ia i tatou ia maua le malosi e faia ai. Mata o fesili mai le Alii ia i tatou, “O le a se mea e mafai ona faia mo lenei afafine, lenei tuagane, lenei tama, po o lenei uo?”
E ala mai i musumusuga a le Agaga e maua ai e le natura paia o se tagata masalosalo i le talalelei, pe a maea ona tau mole mo le manava, le filemu e toe manava ai.
Pe a saunoa le perofeta, o ana upu e aafia ai lo tatou natura paia ma tuuina mai ia i tatou le malosi e mulimuli ai.
O le aai ma feinu i le faamanatuga i vaiaso taitasi e manavaina le faamoemoe i le paia i totonu o i tatou, ma tatou manatua ai lo tatou Faaola, o Iesu Keriso.
Ou te folafola atu a o outou saili ia iloaina le loloto o le natura paia o loo i ai i totonu o i outou, o le a amata ona sili atu ona faataunuu le faamoemoega o la outou meaalofa taua. Ia faatagina le [natura paia] e taialaina oe ia avea ma Ona afafine, e savalia le ala e toe foi atu ai ia te Ia—lea o le a tatou “toefuatai ai i lena Atua o le na tuuina mai [ia i tatou] le manava.” I le suafa o Iesu Keriso, amene.