Tofotofoina ma Faaosoosoina—ae o le a Maua le Fesoasoani
Saunia e Elder Hugo Montoya
O Le Fitugafulu
E mafai ona tatou fesoasoani le tasi i le isi o ni fanau a lo tatou Tama Faalelagi i o tatou mafatiaga ma tofotofoga.
I le gasologa o le olaga, e feagai i tatou ma faigata ma tofotofoga. Tatou te maua foi le avanoa e faaaoga ai lo tatou faitalia ma fesoasoani ai le tasi i le isi. O nei upumoni o se vaega o le fuafuaga atoatoa ma matagofie a lo tatou Tama Faalelagi.
Na aoao mai Peresitene Ioane Teila: “Sa ou faalogo i le Perofeta o Iosefa o fai mai, a o talanoa atu i le Toasefululua i se tasi taimi: ‘O le a outou feagai ma ituaiga uma o tofotofoga e ui atu ai. Ma e tatau lava foi ona tofotofoina outou e faapei foi o Aperaamo ma isi tamalii o le Atua, ma (fai mai a ia) o le a tofotofoina outou e le Atua, ma o le a Ia tofotofo outou seia oo i le mea e gata mai ai lo outou mafai.’”
O le taimi lava tatou te oo ai i le tausaga e tali atu ai mo i tatou lava, o tofotofoga ma faaosoosoga o le a taatele. O nisi taimi e mafai ona avea o ni avega mamafa, ae e aumaia ai foi ia i tatou le malosi tatou te tuputupu ae ai pe a tatou faatoilaloina ma le manuia.
O le mea e lelei ai, o nei avega e le tauaveina na o i tatou. Na aoao mai Alema, “Ona ua outou mananao e o mai i le lafu a le Atua, ma ta’ua o ona tagata, ma outou loto e tauave avega a le tasi, ina ia mama.” Ua ta’u mai i nei upu ua ia i tatou le tiutetauave e fesoasoani ai le tasi i le isi. O lena tiutetauave e mafai ona oo mai mai se valaauga i le Ekalesia, o se tofiga, o se faauooga, po o se vaega o o tatou tiute o ni matua, toalua, po o tagata o le aiga—pe na o o se vaega foi lava o le aiga o le Atua.
O le a ou faapupulaina atu ni auala se fa e faamamaina ai a tatou avega a o tatou fesoasoani atu i le tasi ma le isi.
1. Na fetalai le Faaola, “Ai se tauanau mai lua te o ma ia i le maila e tasi, ina o ia oulua ma ia i maila e lua.” O se faataitaiga, ua talosagaina i tatou e o e le aunoa i le malumalu, pe a faatagaina ai i o tatou tulaga. O le auai atu i le malumalu e manaomia ai le ositaulaga i taimi ma punaoa, aemaise mo i latou e mamao se mea e malaga ai. Ae ui o lea, o lenei osigataulaga e mafai ona mafaufau i ai o se vaega o le maila muamua.
Tatou te amata ona savavali i le maila e lua pe a tatou malamalama i upu “Sue, ave, ma aoao atu,” pe a tatou saili atu ma saunia igoa mo o tatou tuaa mo sauniga o le malumalu, pe a tatou fesoasoani i le faia o faasinoupu o igoa, pe a tatou galulue o ni tagata faigaluega i le malumalu, ma pe a tatou vaavaai mo ni auala e fesoasoani ai i isi ia maua ni aafiaga anoa i le malumalu.
A o avea au o se Fitugafulu Eria, sa faia e se tasi o siteki i la’u aufono faamaopoopo se malaga tele i le malumalu. O le malumalu na ō i ai tagata e laitiiti, ae paga lea, sa i ai ni tagata o e e ui ina sa latou faia se malaga umi e 12-itula, ae sa le mafai ona ulu atu i le malumalu ona ua silia ma le avanoa e gafatia e le malumalu.
I nai aso ina ua mavae lea malaga, sa ou asiasi atu ai i le siteki ma fesili i le peresitene pe mafai ona ou talanoa i nisi o tagata sa lei mafai ona ulu atu i le malumalu i lena aso. Na fai mai se tasi o uso na ou talanoa i ai: “Elder, aua e te popole. Sa ou i ai i le maota o le Alii. Sa ou saofai i luga o se nofoa i le togalaau ma mafaufau loloto ai i sauniga. Ona tuu mai lea o se avanoa ou te ulu atu ai, ae nai lo lo’u alu sa ou tuu le avanoa i se tasi o uso e alu ai ona o le taimi muamua lea na sau ai i le malumalu e faamau ai i lona toalua. Ona la maua ai lea o le avanoa e o ai i sauniga e lua i lena aso. Ua silafia au e le Alii, ma ua Ia faamanuiaina au, ma o loo manuia matou.”
2. Ataata. O si nei taga itiiti e mafai ona fesoasoani ia i latou o e lofituina pe o feagai ma avega mamafa. I le taimi o le sauniga perisitua i le konafesi aoao o Aperila na mavae atu nei, sa ou nofo ai i luga o le tulaga faatasi ai ma le Au Pulega Aoao fou faatoa tofia. Sa matou nonofo i le mea lea ua alaala atu ai tuafafine o au pulega aoao o ausilali. Sa ou lagonaina le gatete ma le lofituina i lo’u valaauga fou.
A o matou lagiina le pese vailauga, sa ou lagonaina se uunaiga malosi faapea o loo i ai se tagata o loo mata’i maia au. Sa ou mafaufau ifo ia te au lava: “E silia ma le 20,000 tagata o i lenei fale, ma o le toatele lava o i latou la e faasasaga mai. Ioe, e i ai se tagata o loo mata’ia oe.”
A o ou pese pea, sa ou toe lagonaina foi le uunaiga malosi o loo i ai se tagata o loo matā’ia au. Sa ou tilotilo atu i laina sa i ai Aposetolo e Toasefululua ma iloa atu ai Peresitene Russell M. Nelson ua matua faliu mai lava lona nofoa, ma tilotilo mai i le mea sa matou nonofo ai. Sa ou maua atu ona fofoga, ma sa ia tuu maia se ataata lapoa. O lena ataata na aumaia ai le filemu i lo’u loto ua lofituina.
Ina ua mavae Lona Toetu, sa asiasi atu Iesu Keriso i isi o Ana mamoe. Sa Ia tofia ma faauuina soo e toasefululua, ma faatasi ai ma lena pule, sa latou auauna atu ai i tagata. O le Alii lava ia o Iesu Keriso na tu atu ia te i latou. Na faatonu atu e le Alii ia latou tootutuli ma tatalo. Ou te le o mautinoa pe na lofituina ia soo e toasefululua sa faatoa tofia ma faauuina i o latou valaauga, ae fai mai le mau, “Sa oo ina faamanuiaina i latou e Iesu a o latou tatalo atu ia te ia; ma sa susulu mai le malamalama o ona fofoga i luga o i latou.” I le taimi o le konafesi aoao talu ai, sa faamamaina e se ataata la’u avega i se ala vave tulagaese.
3. Faaali lagona o le agaalofa i isi. Afai o oe o se e umia le perisitua, faamolemole faaaoga lou mana mo le fanau a le Atua, avatu ia i latou faamanuiaga. Ta’u atu upu o le faamaisega ma le faamafanafana i tagata o loo mafatia pe o feagai ma puapuaga.
4. O le maatulimanu o le fuafuaga a le Atua o le Togiola a le Alii o Iesu Keriso. Ia le itiiti ifo i le taitasi i le vaiaso, e tatau ai ona tatou mafaufau loloto e pei ona sa faia e Peresitene Iosefa F. Samita i le “alofa tele ma le matagofie na faaalia e le Tama ma le Alo i le afio mai o le Togiola i la lalolagi.” O le valaaulia o isi e omai i le lotu e aai ma feinu ma le agavaa i le faamanatuga o le a mafai ai ona salamo atili. Manatua na afio ifo i lalo le Alo o le Silisili Ese o mea uma, ma tauave i Ona lava luga faatausuai, agasala, solitulafono, o ma’i, tiga, mafatiaga ma le tuuatoatasi. Ua aoao mai e le mau, “O ia o le na afio ae i luga, e pei foi ona afio ifo o ia i lalo o mea uma, lea na malamalama ai o ia i mea uma.”
E le afaina po o a o tatou tauiviga patino o i ai—pe o se faama’i po o se tuuatoatasi faaumiumi po o se mafatiaga mai tofotofoga ma faaosoosoga a le fili—o loo i ai iina le Leoleo Mamoe Lelei. E valaau mai e ia i tatou i o tatou igoa ma faapea mai, “Ia outou o mai ia te au, o outou uma o e tigaina ma mafatia i avega, o au foi e malolo ai outou.”
Ou te fia aoteleina atu ni itu se fa:
Muamua—o i maila e lua.
Lua—faamolemole ataata. O le a fesoasoani lau ataata i isi.
Tolu—faaali atu le agaalofa.
Fa—valaaulia isi e o mai i le lotu.
Ou te tuu atu la’u molimau e uiga i le Faaola. O Iesu o le Keriso, o le Alo o le Atua soifua, ma o loo soifua o Ia. Ou te iloa Na te lagolagoina i Lona malosi uma ma le mana, le fuafuaga a le Tama. Ou te iloa o Peresitene Thomas S. Monson o se perofeta soifua. O loo ia umia ki uma e tauaveina ai ma le manuia le galuega a le Atua i le lalolagi. Ou te iloa e mafai ona tatou fesoasoani le tasi i le isi o ni fanau a lo tatou Tama Faalelagi i o tatou mafatiaga ma tofotofoga. I le suafa o Iesu Keriso, amene.