O Le Afioga Malie a le Atua

Saunia e Elder Francisco J. Viñas

O Le Fitugafulu

O le afioga malie a le Atua ua faaali mai ai le manaomia ona faifai pea o le salamo i o tatou olaga ina ia mafai ai ona tatou faatumauina le faatosinaga a le Agaga Paia.

O le toatele o i tatou ua potopoto mai e auai i lenei konafesi, ua o mai “e faalogologo i le afioga malie a le Atua, ioe, le afioga lea e faamalolo ai le agaga ua manu’alia” (Iakopo 2:8). O lena afioga e mafai ona maua i tusitusiga paia ma i savali mai o tatou taitai, e aumaia ai ia i tatou le faamoemoe ma le toafimalie i le pogisa o mafatiaga.

E ala i o tatou aafiaga i le olaga, tatou te aoao ai faapea e le o atoa le fiafia i lenei olaga, ae e atoatoa lo tatou olioli ia Iesu Keriso (tagai MF&F 101:36). O le a Ia aumaia ia i tatou le malosi ina ia tatou le mafatia ai i soo se ituaiga o puapuaga vagana ai ua tofatumoanaina i Lona olioli (tagai Alema 31:38).

E mafai ona faatumulia o tatou loto i le tiga pe a tatou vaai atu i se e pele ua mafatia i tiga ma se faama’i matuia.

O le maliu o se tasi tatou te alolofa i ai e mafai ona tuua ai se gaogao i o tatou agaga.

A oo ina se ese nisi o a tatou fanau mai le ala o le talalelei tatou te ono lagonaina le ta’usalaina ma le le mautonu e uiga i lo latou taunuuga e faavavau.

O le faamoemoe o le ausiaina o se faaipoipoga faaselesitila ma le faavaeina o se aiga i lenei olaga, e mafai ona amata matafi atu a o gasolo le taimi.

O le sauaina e i latou o e sa tatau ona alolofa ia i tatou e mafai ona tuua ai ni maila tiga matuitui i o tatou agaga.

O le le faamaoni o se toalua e mafai ona faataumaoia ai se sootaga sa tatou faamoemoe o le a faavavau.

O nei mea ma le tele o isi mafatiaga e aumaia e lenei tulaga faataitai e afua ai ona tatou fesili ifo ia i tatou lava i le fesili lava lea na fesili ai le Perofeta o Iosefa Samta: “Le Atua e, o fea o i ai oe?” (MF&F 121:1).

I na taimi faigata i o tatou olaga, o le afioga malie a le Atua lea e faamalolo ai le agaga ua faamanu’alia, e aumaia ai le savali lea o le faamafanafanaga i o tatou loto ma mafaufau:

“Ia filemu lou agaga; o lou tiga ma ou puapuaga o le a na o sina minute laitiiti;

“Ma ona oo lea, afai e te talitalia lelei, o le a faaeaina oe e le Atua i luga” (MF&F 121:7–8).

O le afioga malie a le Atua e faatumuina ai i tatou i le faamoemoe, ua iloa o i latou o e faamaoni i puapuaga o le a maua le taui e sili atu i le malo o le lagi ma “a mavae puapuaga e tele ona oo mai lea o faamanuiaga” (tagai MF&F 58:3–4).

O le afioga malie a le Atua, e pei ona fetalaia e ala mai i perofeta, e aumaia ai ia i tatou le puipuiga malu o o tatou faamauga e faavavau, e lagolagoina e lo tatou faamaoni i folafolaga paia na tuuina mai ia i tatou mo la tatou auaunaga totoa i le faamoemoega o le upumoni, o le a faamanuiaina ai i tatou ma a tatou fanau (tagai Orson F. Whitney, i le Conference Report, Apr. 1929, 110).

E aumaia ai foi ia i tatou le puipuiga malu faapea, a uma ona tatou ola i se olaga faamaoni, o le a tatou le maumauina lava se faamanuiaga ona o le le faia o mea patino pe ana tuuina mai ia i tatou le avanoa e faia ai. Afai na tatou ola faamaoni seia oo i le taimi tatou te oti ai, o le “a tatou maua faamanuiaga uma, faaeaga, ma le mamalu o le a maua e soo se alii po o se tamaitai [o le sa maua lena avanoa].” (Tagai The Teachings of Lorenzo Snow, ed. Clyde J. Williams [1984], 138.)

O lenei, e taua le malamalama faapea o nisi mafatiaga ma puapuaga e mafai foi ona oo mai i o tatou olaga pe afai tatou te le salamo moni mai a tatou agasala. Na aoao mai Peresitene Marion G. Romney: “O mafatiaga ma faanoanoaga e feagai ma tagata o lenei lalolagi o le taunuuga o agasala e lei salamo ai ma e lei faamagaloina. … Faapei ona i ai i le agasala le mafatiaga ma le faanoanoaga, e faapena foi ona i ai le fiafia ma le olioli i le faamagaloina o agasala ” (i le Conference Report, Apr. 1959, 11).

Aisea e mafua ai ona mafatia ma tiga ona o le le salamo?

O se tasi o tali e mafai ona i ai e faapea “e i ai se faasalaga [sa] faapipiiina, ma se tulafono faamasinotonu na tuuina mai, lea ua aumai ai le faanoanoa o le mafaufau i le tagata” (Alema 42:18; tagai foi i le fuaiupu 16). Na aoao mai e le Perofeta o Iosefa Samita e faapea o i tatou o e e tausalaina i tatou lava ma o le tiga o le le fiafia i o tatou mafaufau lea e afua ai ona ogaoga e pei o se vaituloto musaesae o le lepa afi ma le teio (tagai Aoaoga a Peresitene o le Ekalesia: Iosefa Samita [2007], 224).

Afai tatou te taumafai e faatoafilemu o tatou loto fuatiaifo e ala i le taumafai e tauamiotonuina i tatou lava i se matāutu itiiti lava ona o a tatou agasala” (Alema 42:30) po o le taumafai e ufiufi, na pau le mea o le a tatou faia o le faatausuai i le Agaga (tagai MF&F 121:37) ma faatuai lo tatou salamo. O lea ituaiga o toomaga, e le gata i le na o sina taimi, ae o le a iu ina aumaia ai le tiga ma le faanoanoa e sili atu i o tatou olaga ma o le a faaitiitia ai lo tatou avanoa e maua ai se faamagaloga o a tatou agasala.

Mo lea ituaiga o mafatiaga, o le afioga malie a le Atua e aumaia ai foi le faamafanafanaga ma le faamoemoe; e ta’u mai ai ia i tatou faapea o loo i ai le fesoasoani mai le tiga na afua mai i aafiaga o le agasala. O lea fesoasoani e maua mai le taulaga togiola a Iesu Keriso ma e aoga pe afai tatou te faatinoina le faatuatua ia te Ia, salamo, ma usiusitai i Ana poloaiga.

E taua lo tatou iloaina faapea e pei lava o le faamagaloina o agasala, o le salamo foi o se faagasologa ae le o se mea e tupu i se taimi faapitoa se tasi. E manaomia ai le faia pea lava i ona laasaga taitasi.

Mo se faataitaiga, a tatou aai ma feinu i le faamanatuga, ua tatou faaali atu i le Alii o le a tatou manatua pea o Ia i taimi uma ma tausi i Ana poloaiga. O se faaaliga lea o lo tatou faamoemoega ma le loto faamaoni.

O le taimi lava tatou te amata ai ona manatua o Ia ma tausi Ana poloaiga i aso taitasi—ae le na o se aso Sapati—o le taimi foi lea e amata ai le faamagaloga o a tatou agasala e faasolosolo malie lona aoga ma amata ai ona faataunuu Lana folafolaga o le i ai o Lona Agaga e faatasi ma i tatou.

A aunoa ma le usitai e tatau ai, lea e tatau ona o faatasi ma lo tatou faamoemoega, e ono mou vave atu le aoga o le faamagaloga ma amata ai ona mou ese atu le mafutaga ma le Agaga. O le a feagai i tatou ma le tulaga matautia o le faamamaluina o Ia i o tatou laugutu a o o tatou loto ua mamao ma Ia (tagai 2 Nifae 27:25).

E le gata i le faamafanafanaina o i tatou, o le afioga malie a le Atua e lapataia ai i tatou faapea o lenei faagasologa o le mauaina o se faamagaloga o a tatou agasala e mafai ona faalavelaveina pe a tatou lavelavea “i mea le aoga o le lalolagi,” ma e mafai ona toe faaauau e ala i le faatuatua pe afai tatou te salamo ma le loto faamaoni ma faalotomaualaloina i tatou lava (tagai MF&F 20:5–6).

O nisi o na mea le aoga e mafai ona faalavefau i le faagasologa o le mauaina o se faamagaloga o a tatou agasala ma e o faatasi ma le tausia o le aso Sapati ia paia?

O ni nai faataitaiga e aofia ai le tuai mai i le sauniga faamanatuga e aunoa ma se mafuaaga tatau; taunuu mai e aunoa ma le suesueina muamua o i tatou lava, ai i le areto ma inu i le ipu ma le le agavaa (tagai 1 Korinito 11:28); ma le taunuu mai e aunoa ma le tautau atu muamua o a tatou agasala ma ole atu i le Atua mo se faamagaloga o na agasala.

O isi faataitaiga: o le le faaaloalo i le feaveaia o feau i luga o a tatou masini eletonika, tuua o le sauniga pe a uma ona ai ma inu i le faamanatuga, ma le faia o gaoioiga i o tatou fale e le talafeagai ma lena aso paia.

Mata o le a se mafuaaga e tasi, o lea ua iloa nei mea uma, ae e tele ina tatou le tausia le aso Sapati ia paia?

I le tusi a Isaia, e mafai ona tatou maua se tali e ui ina fesootai ma le Sapati, ae e faaaoga foi i isi poloaiga ia e tatau ona tatou tausia: “Liliu ese lou vae i le sapati, a e le faia lou lava loto i lo’u aso sa” (Isaia 58:13).

O upu autu o le, “liliuese … mai le faia o lou loto,” pe i se isi faaupuga, o le faia o le finagalo o le Atua. E tele taimi, o o tatou loto—e faafoliga ai o tatou manao, naunauga, ma tuinanau o le tagata natura—e feteenai ma le finagalo o le Atua. Na aoao mai le perofeta o Polika Iaga e faapea “a oo ina gauai atoatoa atu le loto, naunauga, ma lagona o se tagata i le Atua ma mea Na te manaomia, ua faapaiaina lena tagata. O lenei mea e mo lo’u loto ina ia tofatumoanaina i le finagalo o le Atua, lea o le a taitai atu ai au i mea lelei uma, ma iu ai ina faapaleina au i le tino ola pea ma le ola e faavavau (Deseret News, Sept. 7, 1854, 1).

Ua valaaulia i tatou e le afioga malie a le Atua e faaaoga le mana o le Togiola o Keriso e faatatau ai ia i tatou lava ma faaleleia ai ma Lona finagalo—ae le o le loto o le tiapolo ma le tino—ina ia mafai ai ona faaolaina i tatou e ala i Lona alofa tunoa (tagai 2 Nifae 10:24–25).

O le afioga malie a le Atua ua tatou faasoa ai i le aso, ua faaali mai ai le manaomia ona faifai pea o le salamo i o tatou olaga ina ia mafai ai ona tatou faatumauina le faatosinaga a le Agaga Paia i le umi e mafai ai.

O le i ai o le mafutaga a le Agaga o le a avea ai i tatou ma tagata e sili atu ona lelei. O le a “musumusu maia le filemu ma le olioli i o [tatou] agaga, … o le a aveesea ai le lotoleaga, inoino, matau’a, finauga, ma mea leaga uma mai o [tatou] loto; ma o lo [tatou] naunauga atoa o le faia lea o mea lelei, aumaia le amiotonu, ma fauina le malo o le Atua” (tagai Aoaoga: Iosefa Samita, 98).

Faatasi ai ma le faatosinaga a le Agaga Paia, o le a le tiga o tatou loto, tatou te le faatiga foi i isi; o le a tatou lagonaina le fiafia tele, ma o le a sili atu ona mama o tatou mafaufau. O le a faateleina lo tatou alolofa i isi. O le a tele atu lo tatou naunau e faagalo atu ma faasalalau atu le fiafia i e o siomia ai i tatou..

O le a tatou lagonaina le lotofaafetai e vaai atu o agaigai i luma isi, ma o le a tatou sailia foi mea lelei i isi.

O la’u tatalo ia tatou maua le olioli lea e maua mai le taumafai e ola i le amiotonu ma ia tatou tausisia le mafutaga ma le Agaga Paia i o tatou olaga e ala i le salamo pea lava pea ma le loto faamaoni. O le a avea i tatou ma tagata sili atu ona lelei, ma o le a manuia o tatou aiga. Ou te molimau atu i nei mataupu faavae i le suafa paia o Iesu Keriso, amene.