O Mata e Vaai ma Taliga e Faalogo

Saunia e Elder Kim B. Clark

O Le Fitugafulu

Afai o le a tatou vaavaai atu ia Keriso ma tatala o tatou mata ma o tatou taliga, o le a faamanuia i tatou e le Agaga Paia ia vaai atu i le Alii o Iesu Keriso o galue i o tatou olaga.

I Lana galuega faaletino, sa faaatinoina ai e Iesu ni vavega maoae i le faamaloloina ma le aoao atu ma le pule ma le mana lea na ta’ua i le mau, “Ua oo atu lona logo i Suria uma … ona mulimuli atu lea ia te ia o le motu o tagata e toatele.”

O nisi na vaai ma faalogo ia te Ia o faamalolo ma aoao atu, na teenaina o Ia. O isi na mulimuli ia te Ia mo se vaitaimi, ae lei toe feoai i latou ma Ia. Na i ai le Alii o Iesu Keriso i o latou luma, peitai latou te lei vaai po o ai tonu lava o Ia. Sa latou tauaso, ma filifili e liliuese. O i latou na fetalai mai ai Iesu:

“Na ou sau i ou lava tagata, ma sa le talia au e ou lava tagata.”

“Ua faalogo gata o latou taliga i faalogo, ua moeiini o latou mata.”

Peitai, sa toatele alii ma tamaitai, e aofia ai Ana Aposetolo faamaoni, o e na taulai atu o latou olaga ia te Ia. E ui sa latou tauivi ma faatosinaga faalelalolagi, ma le le mautonu i mea sa Ia aoao mai, e oo lava i le fefe, sa latou talitonu ia te Ia, alofa ia te Ia, ma mulimuli ia te Ia.

O i latou na fetalai mai ai Iesu: “Amuia o outou mata, aua ua vaavaai; ma o outou taliga, aua ua faalogo.”

A o lumanai Lona puapuagatia i Ketesemane ma Kalevaria, sa tuuina atu e Iesu se folafolaga maoae lenei i Ona soo: “O lē talitonu mai ia te au, e faia lava e ia o galuega ou te faia; e fai foi e ia mea e sili i ia mea, aua ou te alu i lo’u Tama.”

Na faataunuuina e Iesu lena folafolaga: na amata i le aso o le Penetekoso, na faamanuiaina le au soo i le papatisoina i le afi ma le Agaga Paia. E ala atu i le faatuatua ia Keriso, salamo, ma le usiusitai, na avea le Agaga Paia ma o latou soa, suia o latou loto, ma faamanuiaina i latou i se molimau tumau o le upumoni.

Na faamalosia e nei meaalofa ma faamanuiaga le au soo a le Alii. E ui lava sa latou ola i taimi faigata ma le le mautonu, sa latou maua le meaalofa faaleagaga o mata e vaai ma taliga e faalogo ai. E ala atu i le mana o le Agaga Paia, sa amata ai ona latou vaai i le moni o mea e pei ona i ai moni lava, aemaise lava le Alii o Iesu Keriso ma Lana galuega i totonu o i latou. Sa faamalamalamaina e le Agaga Paia lo latou malamalama, ma sa latou faalogo ma le manino i le siufofoga o le Alii. Sa gotouga ifo i lo’u loto le talalelei a Iesu Keriso. Sa latou tutumau ma usiusitai. Sa latou talai atu le talalelei ma le lototele ma le malosi ma fausia le malo o le Atua. Sa latou maua le olioli i le Alii o Iesu Keriso.

E tele mea matou te tutusa ai ma na alii ma tamaitai faamaoni i le meritiana o taimi. Ua tatou ola foi i le taimi ua galueaina ai e le Alii o Iesu Keriso ia vavega ia i tatou—e aofia ai le faamaloloina o ma’i, faamamaina o i tatou mai le agasala, ma le tatalaina o le olataga i fanau a le Atua i itu uma o le veli. Ua tatou maua foi i o tatou taimi ia perofeta ma aposetolo soifua, mana o le perisitua, meaalofa faaleagaga, ma faamanuiaga faalelagi o sauniga o le faaolataga.

O lo tatou taimi o se taimi lamatia—o se taimi o le tele o le amioleaga ma faaosoosoga, o se taimi o le le mautonu ma le faanunununu. I lenei taimi faigata, ua valaau mai ai le perofeta a le Alii i le lalolagi, o Peresitene Thomas S. Monson, ina ia tatou laveai e ua manunua faaleagaga, tu atu ma le lototele mo le mea sa’o, ma ia fausia le malo o le Atua. Po o a lava o tatou tulaga faaleagaga po o faatuatua po o le usiusitai o i ai nei, o le a le lava mo le galuega o loo taoto mai i luma. Tatou te manaomia le malamalama ma le mana faaleagaga sili atu. Tatou te manaomia ia mata ina ia vaai manino atili ai i le Faaola o loo galue i o tatou olaga ma taliga e faalogo ma le loloto i o tatou loto i Lona siufofoga.

E oo mai lenei faamanuiaga maoae pe a tatala o tatou loto ma taliaina, taliaina moni, le Alii o Iesu Keriso, Lana aoaoga faavae, ma Lana Ekalesia i o tatou olaga. E le manaomia ona tatou atoatoa, ae e tatau ona tatou lelei ma saga lelei ai pea. E tatau ona tatou taumafai ia ola i upumoni faatauvaa ma faigofie o le talalelei. Afai tatou te ave i o tatou luga le suafa o Keriso, galue ma le faatuatua ia te Ia ina ia salamo mai a tatou agasala, tausi Ana poloaiga, ma manatua pea o Ia, o le a avea le Agaga Paia ma o tatou soa e le aunoa e ala i le alofa mutimutivale ma le alofatunoa o Iesu Keriso.

O le usiusitai faigofie e aumaia le Agaga i o tatou loto. Tatou te tatalo i o tatou fale i le faatuatua, suesue i tusitusiga paia, ma tausia le paia o le aso Sapati. I o tatou faletapuai, tatou te aai ma feinu i le faamanatuga ma osia ni folafolaga paia i lo tatou Tama Faalelagi i le suafa o Keriso. I o tatou malumalu paia tatou te auai atu ai i sauniga paia e fai ma sui o o tatou uso ma tuafafine o i le isi itu o le veli. I o tatou aiga ma i o tatou tofiga mai le Alii, tatou te aapa atu ai i isi, tauave a latou avega ma valaaulia i latou e o mai ia Keriso.

Uso e ma tuafafine, ou te iloa afai tatou te faia nei mea, o le a oo mai le Agaga Paia! O le a tatou tuputupu ae faaleagaga ma malamalama i le Agaga Paia, ma o le a avea o Ia ma a tatou soa. Afai o le a tatou vaavaai atu ia Keriso ma tatala o tatou mata ma o tatou taliga, o le a faamanuia i tatou e le Agaga Paia ia vaai atu i le Alii o Iesu Keriso o galue i o tatou olaga, faamalosia lo tatou faatuatua ia te Ia ma le faamautinoaga ma le faamaoniga. O le a faateleina ona tatou vaai atu i o tatou uso ma tuafafine i le ala o silasila mai ai le Atua ia i latou, ma le alofa ma le popole. O le a tatou faalogo i le siufofoga o le Faaola i tusitusiga paia, i musumusuga a le Agaga, ma i upu a perofeta soifua. O le a tatou vaai i le mana o le Atua o faalagolago i luga o Lana perofeta ma taitai uma o Lana Ekalesia moni ma le ola, ma o le a tatou iloa ma le mautinoa o le galuega paia lenei a le Atua. O le a tatou vaai ma malamalama ia i tatou lava faapea ma le lalolagi o siomiaina i tatou i le ala a le Faaola. O le a tatou maua le mea na ta’ua e le Aposetolo o Paulo “le finagalo o Keriso.” O le a i ai o tatou mata e vaai ma taliga e faalogo, ma o le a tatou fausia le malo o le Atua.

E ono faigata, le mautonu, tiga, ma faalotovaivai le olaga. Ou te molimau atu o le mafutaga a le Agaga Paia, le malamalama o le talalelei a Iesu Keriso o le a aapa atu ia te oe e ui i le le mautonu, tiga, ma le pouliuli. Pe oo mai faafuasei pe i se auala malu, o le a tuuina atu e le mana faaleagaga mamalu le alofa faamalolo ma le faamafanafana i agaga mafatia o e ua salamo; aveese le pouliuli i le malamalama o le upumoni; ma suia le lotovaivai i le faamoemoe ia Keriso. O le a tatou vaai i le oo mai o nei faamanuiaga, ma o le a tatou iloa e ala i le molimau o le Agaga o le Alii o Iesu Keriso o loo galue i o tatou olaga. O le a “tofatumoanaina o [tatou avega] i le olioli i [lo tatou Faaola].”

Sa maua e lou tina ma lou tama se aafiaga i le tele o tausaga ua mavae lea na faaalia ai le taua o le mana o mata e vaai ma taliga e faalogo. I le 1982 sa valaauina ai o’u matua e auauna atu i le Misiona a Filipaina Davao. Ina ua tatala e lo’u tina le tusi ma vaai i le mea ua valaauina i ai i laua, sa alaga atu i lo’u tama, “Leai! E tatau ona e valaau atu ia i latou ma tau i ai e le mafai ona ta o i Filipaina. Latou te iloa e te sela.” Sa mafatia lo’u tama i le sela mo le tele o tausaga, ma sa matua popole lo’u tina ia te ia.

I nai po mulimuli ane sa fafagu ai e lou tina lou tama i le pe tusa ma le 2:30 i le vaveao. Sa fai atu o ia, “Merlin, na e lagona lena leo?”

“Leai, ou te lei lagona se leo.”

“Ia, e faatolu ona ou faalogo i le leo lava e tasi i lenei po, o fai mai, ‘Aisea e te popole ai? E te le iloa ua ou iloa e maua o ia i le sela? O le a ou tausia o ia, ma o le a ou tausia oe. Sauni e alu e galue i Filipaina.’”

Sa auauna atu lo’u tina ma lo’u tama i Filipaina ma maua se aafiaga matagofie. Sa avea le Agaga Paia ma o laua soa, ma sa faamanuiaina ma puipuia i laua. E lei i ai lava se faafitauli a lou tama i lona sela. Sa ia auauna atu o se fesoasoani muamua i le au peresitene o le misiona, ma sa la aoaoina ma lo’u tina le fia selau o faifeautalai ma le fia afe o Au Paia faamaoni i le sauniuniga mo le oo mai o uarota ma siteki i le motu o Mindanao. Sa faamanuiaina i laua ma mata e vaai ma taliga e faalogo.

Uso e ma tuafafine, ou te molimau atu ia Iesu Keriso. O loo soifua o Ia. O Ia o lo tatou Faaola ma Togiola. Ou te iloa afai tatou te taliaina o Ia i o tatou olaga ma ola i upumoni manino ma faigofie o Lana talalelei, o le a tatou olioli i le mafutaga ma le Agaga Paia. O le a tatou maua le meaalofa taua o mata e vaai ma taliga e faalogo. Ou te molimau atu ai i le suafa paia o Iesu Keriso, amene.

Faamatalaga

1. Mataio 4:24–25.

2. Tagai Ioane 6:66.

3. 3 Nifae 9:16.

4. Galuega 28:27; tagai foi Mataio 13:15.

5. Mataio 13:16.

6. Ioane 14:12.

7. Tagai Galuega 2:1–4.

8. Tagai, mo se faataitaiga, Galuega 10:9–15.

9. Tagai Enosa 1:3.

10. Tagai Galuega 2:42.

11. Tagai Galuega 4:8–12.

12. Tagai Thomas S. Monson, “Toe Tepa i Tua ma Agai i Luma,” Liahona, Me 2008, 90.

13. See Thomas S. Monson, “Ia Faamalosi ma Lototele,” Liahona, Me 2014, 66–69.

14. Tagai Thomas S. Monson, “Faatuatua i le Galuega o le Faaolataga,” Aoaoga Faaleautaitai i le Lalolagi Atoa, Iuni 2013, lds.org/broadcasts.

15. O le upu mauaina e tele ona uiga e taua i lenei tusiga: “o le fetuunaiga i le mafaufau po o lagona,” “o le faataga e ulufale atu,” e talia ai e moni, ia talitonu, ma ia faafeiloai (tagai Merriam-Webster’s Collegiate Dictionary, 11th ed. [2003], “receive”).

16. Tagai Mataupu Faavae ma Feagaigai 18:34–36; 68:3–4.

17. Na aoao mai e Peresitene Harold B. Lee o lenei molimau sa taua ina ia liua ai i le Alii (tagai “Be Loyal to the Royal within You” [Brigham Young University devotional, Sept. 11, 1973], 4, speeches.byu.edu ).

18. 1 Korinito 2:16.

19. Aelma 27:17; tagai foi Alema 31:38.