Ianuari 7–13.

Mataio 1; Luka 1

“Ia Faia ia te Au e tusa ma Lau Fetalaiga”

Amata i le faitauina o le Mataio 1 ma le Luka 1. Sau, Mulimuli Mai ia te Au—Mo Tagata Taitoatasi ma Aiga e mafai ona fesoasoani e te malamalama ai i mataupu nei, ma o lenei otootoga e mafai ona avatu ai ia te oe manatu faafaiaoga. Afai e te manaomia se fesoasoani faaopopopo e aoao ai tamaiti laiti, tagai i le “Taulimaina o Manaoga o Tamaiti Laiti” i le amataga o le punaoa lenei.

Tusifaamaumau Ou Lagona Uunai

Valaaulia le Fefaasoaai

Fai i tamaiti e nonofo i se li’o ona fai lea i se tamaitiiti e toatasi e faasoa mai se mea sa ia aoaoina mai tusitusiga paia i lenei vaiaso po o se isi taimi. E mafai e lena tamaitiiti ona faataavale se polo pe tusi i se isi tamaititi o le li’o, o ia lena o le a oo i ai le faasoa.

Aoao atu Aoaoga Faavae

Tamaiti Laiti Ifo

Mataio 1:18–25; Luka 1:26–38

Ua fofoga mai e agelu le fanau mai o Iesu.

Sa tofu asia e se agelu Maria ma Iosefa o le sa fofogaina atu i ai le fanau mai o Iesu Keriso. E mafai ona fesoasoani nei aafiaga i tamaiti e iloa ai le taua o le fanau mai o Keriso.

Gaoioiga e Mafai Ona Fai

• Valaaulia matua o se tamaitiiti e o mai i le vasega e laei mai pei o Maria ma Iosefa. Fai i ai e faasoa mai o la aafiaga e pei ona tusia i le Mataio 1:18–25 ma le Luka 1:26–38.

• Faamatala le tala i agelu na faaali atu ia Maria ma Iosefa, e pei ona tusia i nei fuaiupu. (Tagai foi “Mataupu 2: O Maria ma le Agelu” ma le “Mataupu 4: O Iosefa ma le Agelu,” Tala o le Feagaiga, 8–9, 12, po o vitio e o faatasi o i le LDS.org.) E mafai ona e faaali atu le ata o i le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga. Valaaulia tamaiti e tusi ni ata o tala o loo maua i le

• Valaaulia tamaiti e tusi ni ata o tala o loo maua i le Mataio 1:18–25 ma le Luka 1:26–38.

Luka 1:5–20, 57–63

E tali mai le Tama Faalelagi i a’u tatalo.

Atonu sa tatalo Sakaria ma Elisapeta mo se tamaitiiti mo le tele o tausaga. Na iu ina tali mai le Tama Faalelagi i a la tatalo i le auina mai lea o se atalii, o Ioane le Papatiso. E mafai faapefea ona e faaaogaina lenei tala e aoao atu ai tamaiti e tali mai le Tama Faalelagi i tatalo?

Gaoioiga e Mafai Ona Fai

• I au lava upu, faasoa mai le tala mai le Luka 1:5–20, 57–63. Atonu e te manao e toe faamatala faafia le tala. Tofi ni tamaiti e faia vaega a le agelu, Sakaria, ma Elisapeta ma faatino mai le tala. Faamamafa atu sa tali mai e le Tama Faalelagi ia tatalo a Elisapeta ma Sakaria, ma faasoa mai se aafiaga na tali ai au tatalo.

• Faaaoga le “Matou Te Ifo Atu,” Tusipese a Tamaiti, 18, po o se isi pese e aoao ai tamaiti i le ala e tatalo ai. E mafai foi ona usuina faatasi le “O Le Tatalo A le Tamaitiiti” Tusipese a Tamaiti, 6. O taimi uma lava e usu ai e tamaiti upu o le “tatalo” valaaulia i latou e punonou o latou ulu ma piilima.

• Fai i tamaiti taitasi e fai ia taga e faatusa i se mea e mafai ona ia tatalo ai. Tuu atu i isi tamaiti e mate mai po o a mea e faatusa i ai taga. E mafai ona latou sueina manatu i le itulau o le gaoioiga o le vaiaso lenei.

Luka 1:31–35

O Iesu Keriso o le Alo o le Atua.

O Iesu Keriso o le Alo o le Tama Faalelagi ma Maria. O le a se mea e mafai ona e faia e fesoasoani ai i tamaiti e aoao atili ia te Ia?

Gaoioiga e Mafai Ona Fai

• Faamatala i tamaiti na ta’u atu e le agelu ia Maria o le a faaigoa lana pepe i le Atalii o le Atua (tagai Luka 1:35). Fesoasoani i tamaiti e toe fai le fasifuaitau “O Iesu Keriso o le Alo o le Atua.” Fesoasoani ia malamalama tamaiti pe o ai matua o Iesu i le valaauliaina o i latou e tusi ni ata o o latou lava matua. A o latou faia le mea lea, ta’u i ai e i ai foi matua o Iesu—o Maria ma le Tama Faalelagi. E le gata i lea, sa poloaiina Iosefa e puipui ma vaai faalelei Iesu a o nofo ai o Ia i le lalolagi.

• Faasoa atu lau molimau o Iesu o le Alo o le Atua, e mafai ona maliu o Ia mo a tatou agasala ma toe ola mai. Faaali ni ata o le Faasatauroga o Iesu ma le Toetu (tagai Tusi Ata o le Talalelei, nu. 57, 59).

Aoao atu Aoaoga Faavae

Tamaiti Matutua Atu

Mataio 1:18–25; Luka 1:5–37

E leai lava se mea e le mafaia e le Atua.

O le faananau mai o Iesu ma Ioane le Papatiso sa na o mana lava o le Atua na mafai ai. O le aoao e uiga i nei vavega e mafai ona faamalolosia le faatuatua o tamaiti e i le Atua le mana e faia ai vavega i o latou olaga.

Gaoioiga e Mafai Ona Fai

• A o outou toeiloiloina ma tamaiti le Mataio 1:18–25 ma le Luka 1:5–37, fai fesili faapea i tamaiti “O le a sau tala e fai pe ana faapea o oe o Maria?” po o le “Mata o a ou lagona pe ana faapea o oe o Sakaria?”

• I ni faaupuga faigofie, faamatala ia tala o le fananau mai o Ioane le Papatiso ma Iesu Keriso. Fai i tamaiti e sii o latou lima pe a latou faalogo i se mea e ono le mafai e aunoa ma le mana o le Atua? O a isi tala e mafai ona faasoa e tamaiti lea na faia ai e le Atua se mea na foliga e le mafai?

• Fesoasoani i tamaiti e tauloto le Luka 1:37 Ina ia faia lenei mea, e mafai ona e tusia le fuaiupu i le laupapa ma valaaulia tamaiti e fai faatele. A uma taimi taitasi, tape se upu se tasi.

Mataio 1:21–25; Luka 1:30–35, 46–47

O Iesu Keriso o le Alo o le Atua.

O Iesu Keriso o le Alo o le Tama Faalelagi ma Maria. E mafai faapefea ona e fesoasoani i tamaiti e aoao lenei upumoni?

Gaoioiga e Mafai Ona Fai

• Fai i tamaiti e faitau le Luka 1:30--35, ma vaavaai mo tali i nei fesili: “O ai le tina o Iesu?” ma le “O ai le tama o Iesu?” Fesoasoani ia latou malamalama o Iesu Keriso ua na o le pau lea o le tagata o lona tama faaletino o le Tama Faalelagi (tagai foi 1 Nifae 11:18–21 ).

• A o outou faitauina nei fuaiupu, valaaulia tamaiti e sue igoa po o faalaniga o Iesu Keriso. O a uiga o nei igoa, ma o a foi mea o aoao mai ai i tatou e uiga ia Iesu?

• Faasoa mai lau molimau ia Iesu Keriso, ma valaaulia tamaiti e faasoa mai a latou molimau

O Le Faaali Atu o le Agelu ia Maria, saunia e John Scot

Luka 1:5–25; 57–80

E faafofoga ma tali mai le Tama Faalelagi i a’u tatalo.

E tali mai e le Atua tatalo ae le faapea o taimi uma e tali mai ai i auala tatou te faamoemoe i ai. E mafai faapefea ona e faaaoga le tala ia Sakaria ma Elisapeta e aoao atu ai tamaiti lenei upumoni?

Gaoioiga e Mafai Ona Fai

• Fesili i tamaiti pe o le a sa latou tala i se tasi sa tatalo mo se faamanuiaga ae e lei maua lava. Valaaulia i latou e mafaufau i lenei fesili ao latou faitau faatasi le Luka 1:5–25, 57–80. (Tagai foi “Mataupu 1: Elisapeta ma Sakaria” ma le “Mataupu 3: Ua Fanau Mai Ioane le Papatiso,” Tala o le Feagaiga Fou, 6–7, 10–11, po o vitio e o faatasi ai o i le LDS.org.) Mata o le a se mea e ta’u atu e Sakaria ma Elisapeta i se tasi ua manatu e lei tali maia ana tatalo?

• Vave valaaulia ni tamaiti e faasoa mai ni aafiaga o le taimi na tali mai ai e le Tama Faalelagi a latou tatalo. Faasoa mai se taimi na e lagona ai na tali mai au tatalo i se ala e te lei faamoemoeina.

• Valaaulia tamaiti e tusi se ata o se taimi na tali mai ai e le Tama Faalelagi se tatalo—aemaise o sa latou lava tatalo. Tuu atu latou te faasoa maia a latou ata na tusi i le vasega.

Fautuaina le Aoaoina i le Aiga

Valaaulia tamaiti e faasoa i o latou aiga ia ata na latou tusia ona fai lea i o latou aiga e faasoa mai ni taimi na tali mai ai e le Atua a latou tatalo.

Faaleleia o Lo Tatou Aoao Atu

Fesoasoani i tamaiti laiti e aoao mai tusitusiga paia. Ina ia fesoasoani i tamaiti e aoao mai tusitusiga paia, taulai i se fuaiupu se tasi o le mau pe na o se fasifuaitau autu foi. E mafai ona e valaaulia tamaiti e tutu i luga pe sii o latou lima pe a faalogo i lena upu po o le fasifuaitau. (Tagai Aoao Atu i le Ala a le Faaola, 21.)