O Le Tamā

Saunia e Brian K. Ashton

Fesoasoani Lua i le Au Peresitene Aoao o le Aoga Sa

I le avea ai ma atalii ma afafine agaga o le Atua, ua tofu i tatou taitoatasi ma le gafatia e avea ai e pei o le Tama. Ina ia faia lea mea, e tatau ona tatou tapuai atu i le Tama i le suafa o le Alo.

Mo lona olaga atoa, o lo’u toalua, o Melinda, sa taumafai ma lona loto atoa ina ia avea ma se soo faamaoni o Iesu Keriso. Ae, i le amataga o lona talavou, sa ia lagona le le agavaa mo le alofa o le Tama Faalelagi ma faamanuiaga ona sa ia malamalama sese i le natura [o le Atua]. O le mea na lelei ai, sa faaauau pea ona tausi e Melinda poloaiga e ui i le faanoanoa sa ia lagonaina. I nai tausaga talu ai, sa ia oo i se soloaiga o aafiaga na fesoasoani ia te ia e malamalama lelei ai i le natura o le Atua, e aofia ai Lona alofa mo Ana fanau ma Lona lotofaafetai mo a tatou taumafaiga e ui e le atoatoa, e fai Lana galuega.

Na ia faamatala mai le auala na faatosinaina ai o ia e lenei mea: “Ua ou lagonaina nei le mautinoa e aogā le fuafuaga a le Tama, o loo saofagā o Ia lava i lo tatou tulaga manuia, ma o loo Ia saunia mo i tatou ni lesona ma ni aafiaga tatou te manaomia e toe foi atu ai i Lona afioaga. Ua ou vaai atili nei ia te a’u lava ia ma isi e pei ona silasila mai ai le Atua ia i tatou. Ua mafai ona ou tausi, aoao atu, ma auauna atu ma le alofa atili ma le fefe laitiiti. Ou te lagona le filemu ma le talitonuga mautu nai lo le atuatuvale ma le le mautonu. Nai lo le lagonaina o le faamasinoina, ou te lagonaina le lagolagoina. Ua mautu atili lo’u faatuatua. Ou te lagonaina e le aunoa ma loloto atili le alofa o lo’u Tama.”

O le i ai “o se manatu sa’o e uiga i uiga faaletagata, uiga atoatoa, ma uiga paia o le [Tama Faalelagi]” e taua lea i le faatinoina o le faatuatua ia lava e maua ai le faaeaga. O se malamalamaaga sa’o e uiga i uiga faaletagata o le Tama Faalelagi e mafai ona suia ai le auala tatou te vaai ai ia i tatou lava ma isi ma fesoasoani ai tatou te malamalama i le alofa na’ua o le Atua mo Lana fanau ma Lona finagalo sili e fesoasoani mai ia tatou avea e faapei o Ia. O se manatu lē sa’o e uiga i Lona natura e mafai ona tatou lagonaina ai e peiseai o le a matuā le mafai lava ona tatou toe foi atu i Lona afioaga.

O lo’u faamoemoega i le asō o le aoao atu lea o ni manatu autu faaleaoaoga faavae e uiga i le Tama lea o le a mafai ai e i tatou taitoatasi, aemaise lava i latou o loo tuufesili pea pe alofa le Atua ia i latou, ina ia malamalama atili ai i Lona uiga faaletagata moni ma faatino ai le faatuatua tele ia te Ia, Lona Alo, ma Lana fuafuaga mo i tatou.

O Le Muai Olaga

I le muai olaga, na tatou fananau ai o ni agaga i ni Matua Faalelagi ma ola faatasi ma i La’ua o se aiga. Sa la’ua silafiaina i tatou, aoao i tatou, ma alolofa ia i tatou. Sa tatou matua mananao lava ia avea e pei o lo tatou Tama Faalelagi. Peitai, o le faia o lea mea, na tatou iloa ai e ao ia i tatou ona:

1. Maua ni tino faitino faamamaluina ma ola pea;

2. Ia faaipoipo ma fai ni aiga e ala i le mana faamau o le perisitua; ma

3. Maua le poto uma, mana, ma uiga paia.

O le mea lea, na foafoa ai e le Tama se fuafuaga lea o le a faataga ai i tatou i ni tuutuuga patino, ia maua ni tino faitino ia o le a ola pea ma faamamaluina i le Toetutu; faaipoipo ma fai ni aiga i le olaga faaletino pe, mo ē faamaoni sa le’i maua le avanoa, pe a mavae le olaga faaletino; alualu i luma agai atu i le atoatoa; ma mulimuli ane toe foi atu i o tatou Matua Faalelagi ma ola faatasi ma i La’ua ma o tatou aiga i se setete o le faaeaga ma le fiafia e faavavau.

Ua ta’ua e tusitusiga paia lenei mea o le ata o le faaolataga. Sa tatou faafetai tele mo lenei fuafuaga lea, ina ua tuuina mai ia i tatou, sa tatou alalaga ma le olioli. Sa tatou taliaina uma tuutuuga o le fuafuaga, e aofia ai aafiaga ma luitau o le olaga faaletino ia o le a fesoasoani ia i tatou e atiae ia uiga paia.

Olaga Faaletino

I le olaga faaletino, ua tuuina mai ai e le Tama Faalelagi ia i tatou ni tuutuuga tatou te manaomia e alualu ai i luma i totonu o Lana fuafuaga. Na fanauina e le Tama ia Iesu Keriso i la le tino ma tuuina mai ia te Ia le fesoasoaniga faalelagi e faataunuu ai Lana misiona i la le tino. O le a faapena foi ona fesoasoani mai le Tama Faalelagi ia i tatou taitoatasi pe afai o le a tatou taumafai e tausi Ana poloaiga. Ua foai mai e le Tama ia i tatou le faitalia. O o tatou ola ua i ai i Ona aao, ma ua “iloa [o tatou] aso” ma “o le a le faitauina itiiti.” Ma ua Ia faamautinoa mai o le a i’u lava ina galulue mea uma mo le lelei o i latou e alolofa ia te Ia.

O le Tama Faalelagi lea e foai maia la tatou areto o le aso, lea e aofia ai uma meaai tatou te aia ma le malosi tatou te manaomia e tausi ai Ana poloaiga. E foai mai e le Tama meaalofa lelei. E faafofoga mai o Ia ma tali mai i a tatou tatalo. E laveai e le Tama Faalelagi i tatou mai le leaga pe a tatou faatagaina o Ia. E tutulu o Ia mo i tatou pe a tatou puapugatia. O le tumutumuga lava, o o tatou faamanuiaga uma e sau mai le Tama.

E taialaina ma tuu mai e le Tama Faalelagi ia i tatou aafiaga tatou te manaomia e fua i lo tatou malosi, vaivaiga, ma filifiliga ina ia mafai ona tatou fua maia ni fua lelei. E aoa’i e le Tama i tatou pe a tatau ai ona e alofa o Ia ia i tatou. O Ia o se “Tagata Fautua,” o le a fautua mai ia i tatou pe a tatou ōle atu.

O le Tama Faalelagi lea na te auina mai uma faatosinaga ma meaalofa a le Agaga Paia i o tatou olaga. E ala mai i le meaalofa o le Agaga Paia, o le mamalu—po o le atamai, malamalama, ma le mana—o le Tama e mafai ona mau ia i tatou. Afai o le a tatou taumafai e faateleina le malamalama ma le upumoni seia oo ina tatou manatu tasi i le mamalu o le Atua, o le a auina mai e le Tama Faalelagi le Agaga Paia o le Folafolaga e faamaufaailogaina i tatou i le ola e faavavau ma faaali mai Ona fofoga ia i tatou—a le o le olaga nei po le olaga a sau.

Pe a Mavae le Olaga Nei

I le lalolagi o agaga pe a mavae le olaga nei, e faaauau ai ona auina mai e le Tama Faalelagi le Agaga Paia ma auina mai faifeautalai ia i latou e manaomiaina le talalelei. E tali mai o Ia i tatalo ma fesoasoani ia i latou e le’i mauaina sauniga ia maua sauniga faaola mo i latou.

Na faatu a’e e le Tama Faalelagi Iesu Keriso ma tuu atu ia te Ia le mana e aumai ai le Toetu, aua o le auala lea tatou te maua ai ni tino ola pea. O le Togiola ma le Toetu o le Faaola tatou te toe foi atu ai i le afioaga o le Tama, lea o le a faamasinoina ai tatou e Iesu Keriso.

O i latou e faalagolago “i galuega, ma le alofa mutimutivale, ma le alofa tunoa o le Mesia Paia” o le a mauaina ni tino faamamaluina e pei o le Tama ma mau faatasi ma Ia “i se tulaga o le fiafia e lē gata.” O iina, o le a soloia ai e le Tama o tatou loimata uma ma fesoasoani ia i tatou ia faaauau pea i la tatou malaga e avea e faapei o Ia.

E pei ona e iloaina, o loo i ai e le aunoa le Tama Faalelagi iina mo i tatou.

O Le Uiga Faaletagata o le Tama

Ina ia avea e pei o le Tama, e tatau ona tatou atiae Ona uiga faaletagata. O uiga atoatoa ma uiga paia o le Tama Faalelagi e aofia ai mea nei:

• O le Tama e “Lē Gata ma Faavavau.”

• O Ia e amiotonu atoatoa, alofa mutimutivale, agalelei, loa-ona-talitiga, ma e finagalo mo le mea silisili mo i tatou.

• O le Tama Faalelagi o le alofa lava Ia.

• E tausi e Ia Ana feagaiga.

• E le sui o Ia.

• E le mafai ona pepelo o Ia.

• E le faailoga tagata le Tama.

• E silafia e Ia mea uma—tuanai, taimi nei, ma le lumanai—mai le amataga.

• E sili atu le atamai o le Tama Faalelagi nai lo tatou uma.

• Ua i ai i le Tama le mana uma ma faia mea uma e finagalo o Ia e fai.

Uso e ma tuafafine, e mafai ona tatou faatuatuaina ma faalagolago atu i le Tama. Ona e i ai se vaaiga e faavavau ia te Ia, ua mafai ai e le Tama Faalelagi ona silafia mea e le mafai ona tatou iloa. O Lona olioli, galuega ma le mamalu o le aumaia lea o lo tatou tino ola pea ma le faaeaga. O mea uma e faia e Ia e mo lo tatou manuia. E “finagalo [o Ia mo lo tatou] fiafia e faavavau e sili atu nai lo le [tatou] manao.” Ma Na te “le manaomia [i tatou] ona oo i se taimi e faigata atu i lo le mea tonu e manaomia mo [lo tatou] manuia pe mo le manuia o i latou [tatou te] alolofa i ai.” I se taunuuga, e taulai o Ia e fesoasoani mai ia i tatou ia alualu i luma, e le o le faamasinoina ma le ta’usalaina o i tatou.

Avea e Pei o Lo Tatou Tama

I le avea ai ma atalii ma afafine agaga o le Atua, ua tofu i tatou taitoatasi ma le gafatia e avea ai e pei o le Tama. Ina ia faia lea mea, e tatau ona tatou tapuai atu i le Tama i le suafa o le Alo. Tatou te faia lenei mea e ala i le taumafai e usiusitai i le finagalo o le Tama, e pei ona sa faia e le Faaola, ma e ala i le salamo faifai pea. A tatou faia nei mea, tatou te “maua le alofa tunoa mo le alofa tunoa” seia oo ina tatou maua le atoatoa o le Tama ma faaee mai ai “ona uiga faaletagata, uiga atoatoa, ma uiga paia.”

I le malamalama ai i le eseesega i le va o tagata faitino ua tatou i ai ma le tagata ua avea ai le Tama Faalelagi, e le o se mea e faate’ia ai le lagonaina e nisi o le avea e pei o le Tama e le mafai ona ausia. E ui i lea, o loo manino lava tusitusiga paia. Afai o le a tatou pipii atu i le faatuatua ia Keriso, salamo, ma saili atu i le alofa tunoa o le Atua e ala i le usiusitai, o le a avea lava i tatou e pei o le Tama i se taimi mulimuli. Ou te mafanafana lava i le mea moni e faapea o i latou o e taumafai ia usiusitai o le a “maua le alofa tunoa mo le alofa tunoa” ma e mulimuli ane “maua lona atoatoaga.” I nisi upu, o le a tatou le mafaia na o i tatou ona avea e pei o le Tama. Ae, o le a oo mai e ala i meaalofa o le alofa tunoa, o nisi e tetelē ae o le tele lava e laiti, ia e atiae i luga o le tasi ma le isi seia oo ina maua se atoatoaga. Ae, uso e ma tuafafine, o le a oo mai!

Ou te valaaulia outou ia faatuatuaina o loo silafia e le Tama Faalelagi le auala e faaeaina ai outou; saili atu i lana fesoasoani tumau i aso uma, ma fetaomi atu i luma ma le faatuatua ia Keriso e tusa lava pe e te le lagonaina le alofa o le Atua.

E tele mea tatou te le malamalama i ai e uiga i le avea e pei o le Tama. Ae e mafai ona ou molimau atu ma le mautinoa o le taumafai ia avea e pei o le Tama e tauia ai osigataulaga uma. O osigataulaga ia tatou te faia iinei i le olaga faaletino, po o le a lava le tele, e matua le mafaatusalia lava i le olioli, fiafia, ma le alofa lemafuatiaina o le a tatou lagonaina i le afioaga o le Atua. Afai o loo e tauivi e talitonu e tauia ai osigataulaga o loo talosagaina oe e fai, o loo valaau mai le Faaola ia te oe, e faapea, “Tou te lei malamalama lava i le tetele o faamanuiaga o i ai i le Tamā … ua saunia mo outou; … e lē mafai ona outou gafatia mea uma i le taimi nei; e ui i lea, ia fiafia, ona o le a Ou taitaia outou i le ala.”

Ou te molimau atu e alofa lo outou Tama Faalelagi ia te outou ma e finagalo ia outou toe mau faatasi ma Ia. I le suafa, o Iesu Keriso, amene.

Faamatalaga

1. E umia e le tusitala ia faamatalaga; tagai foi i le D. Melinda Ashton, “The Holy Ghost: Direction, Correction, and Warning” (Brigham Young University Women’s Conference, Apr. 28, 2016), byutv.org.

2. Lectures on Faith (1985), 38.

3. Tagai i le “O Le Aiga: O Se Folafolaga i le Lalolagi,” Liahona, Me 2017, 145; “Mother in Heaven,” Gospel Topics, topics.lds.org.

4. Sa faailoa mai e le Aposetolo o Paulo sa tatou iloaina lelei lava Tama lea o loo faananau atu pea o tatou agaga e valaau o ia ia Ava (Abba), o lona uiga “Daddy,” o se upu ua faapolopolo mo tama tatou te masani tele i ai (tagai i le Roma 8:15).

5. Tagai i le Mataupu Faavae ma Feagaiga 130:22.

6. Tagai i le Mataupu Faavae ma Feagaiga 132:19–20.

7. Tagai i le Mataio 5:48; tagai foi i le 2 Peteru 1:3–8.

8. O nei tuutuuga e aofia ai le tausiga o lo tatou uluai esetete (tagai i le Aperaamo 3:26) ona oo mai lea i le olaga faaletino ia faatinoina le faatuatua ia Iesu Keriso ma Lana Togiola, salamo, ia papatisoina i le faatofuina e se tasi o loo umiaina le pule o le perisitua a le Atua, mauaina o le meaalofa o le Agaga Paia, ma le tumau e oo i le iuga (tagai i le 3 Nifae 27:16–20).

9. Sa aoao mai Peresitene Dallin H. Oaks: “E i ai nisi ua faafofoga mai i lenei savali ua faapea ane, ‘Ae a la a’u?’ Ua matou iloa e toatele uso ma tuafafine lelei ma agavaa o le Au Paia o Aso e Gata Ai ua latou le maua i le taimi nei avanoa lelei ma mea taua o loo manaomia mo lo latou alualu i luma. O le nofotoatasi, lē fanau, maliu, ma le tete’a ma le toalua ua le taulau ai faamoemoega ma tolopo ai le faataunuuga o faamanuiaga folafolaina. … Ae o nei toatuga e le tumau. Ua folafola mai le Alii e faapea i le faavavau, e leai se faamanuiaga o le a teena mai i ona atalii ma afafine o e latou te tausia poloaiga, ma faamaoni i a latou feagaiga, ma mananao i mea e sa’o” (“O Le Fuafuaga Tele o le Fiafia,” Liahona, Ian. 1994, 87–88).

10. Tagai i le Mosaea 2:41.

11. Tagai i le Alema 42:5; ua ta’ua foi o le fuafuaga o le togiola (tagai, mo se faataitaiga, Iakopo 6:8) ma le fuafuaga o le fiafia (tagai i le Alema 42:8,16).

12. Tagai i le Iopu 38:4–7.

13. Tagai, mo se faataitaiga, Eperu 5:8; 12:11; Eteru 12:27. Ae soia ia o le mea muamua lava, o nisi o luitau o tatou feagai ai i le olaga faaletino e ono foliga mai i lo tatou malamalamaaga faatapulaaina o le a taofia i tatou mai le mauaina o nisi o o tatou faamanuiaga folafolaina sili ona faamoemoe i ai. E ui e foliga mai e feteenai nei mea, ae o le a foai mai lava e le Atua faamanuiaga folafolaina uma pe afai tatou te tumau faamaoni.,

14. Tagai i le Luka 1:31–35; Ioane 1:14; 1 Nifae 11:18–21; Taiala i Tusitusiga Paia, “Iesu Keriso,” scriptures.lds.org.

15. Tagai i le Mataupu Faavae ma Feagaiga 93:4–5, 16–17, 19–20.

16. Tagai i le Mose 7:32.

17. Mataupu Faavae ma Feagaiga 122:9.

18. Tagai i le Roma 8:28.

19. Tagai i le Mataio 6:11.

20. Tagai i le N. Eldon Tanner, “The Importance of Prayer,” Ensign, May 1974, 50–53.

21. Tagai i le Luka 11:10–13; Iakopo 1:17.

22. Tagai i le Luka 11:5–10; Faaliliuga a Iosefa Samita, Luka 11:5–6 (i le Luka 11:5, vaefaamatalaga a); 3 Nifae 13:6.

23. Tagai i le Mataio 6:13.

24. Tagai i le Mose 7:31–40.

25. Tagai i le Iakopo 1:17.

26. Tagai i le Ioane 15:1–2; Mataupu Faavae ma Feagaiga 122:6–7.

27. Tagai i le Eperu 12:5–11; Mataupu Faavae ma Feagaiga 95:1.

28. Mose 7:35.

29. Tagai i le Alema 37:12, 37.

30. Tagai i le Ioane 14:26; 2 Nifae 31:12.

31. Tagai i le Ioane 17:21–23, 26; Mataupu Faavae ma Feagaiga 93:36.

32. Tagai i le Mataupu Faavae ma Feagaiga 76:53; 88:67–68.

33. Tagai i le 1 Peteru 4:6. Sa saunoa Elder Melvin J. Ballard i le mafuaaga na ia papatisoina ai se alii ma auai ai i le Ekalesia, fai mai, “Sa faailoa mai ia te a’u o ona tuaa i le lalolagi o agaga ua leva ona latou taliaina le Talalelei ma sa tatalo ia i ai se tasi o lo latou aiga i le lalolagi e tatalaina le faitotoa mo i latou, ma sa taliaina a latou tatalo ma taitai atu ai e le Alii faifeautalai i le faitotoa o lenei alii” (i le Melvin R. Ballard, Melvin J. Ballard, Crusader for Righteousness [1966], 250).

34. Tagai i le Mamona 7:5–6; tagai foi i le Ioane 5:21, 26; 1 Korinito 6:14; 2 Nifae 9:11–12; Alema 40:2–3; 3 Nifae 27:14.

35. Tagai i le Ioane 5:22; Iakopo 6:9; Alema 11:44; Helamana 14:15–18. Ua faatoilaloina e le Togiola a Keriso aafiaga uma o le Pa’ū o Atamu, e aofia ai uma le oti faaletino ma faaleagaga, lea e tatau ona faatoilaloina uma e faataga ai i tatou e toe foi atu i le afioaga o lo tatou Tama Faalelagi. O i latou ua salamo i a latou agasala o le a mau faatasi ma le Tama ma le Alo i le faavavau. Peitai, o i latou e le salamo o le a puapuagatia i le oti faalua, lea ua mafua ona o a latou lava agasala (tagai i le Helamana 14:15–18).

36. 2 Nifae 2:8.

37. Tagai i le Mataupu Faavae ma Feagaiga 76:53; 88:67–68.

38. Mosaea 2:41.

39. Tagai i le Faaaliga 7:17.

40. Tagai i le Mose 7:30. E faaauau pea ona leoleo e le Tama Faalelagi ma tausi i latou i le malo teresitila e ala i auaunaga a Iesu Keriso ma isi tagata selesitila (tagai i le Mataupu Faavae ma Feagaiga 76:77, 87) ma i latou i le malo teresitila e ala i auaunaga a le Agaga Paia ma agelu (tagai i le Mataupu Faavae ma Feagaiga 76:86, 88).

41. Mose 7:35; tagai foi i le Salamo 90:2.

42. Tagai i le Salamo 103:6–8; Luka 6:36; Mose 7:30.

43. Tagai i le 1 Ioane 4:16.

44. Tagai i le Mataupu Faavae ma Feagaiga 84:40.

45. Tagai i le Iakopo 1:17.

46. Tagai i le Numera 23:19.

47. Tagai i le Galuega 10:34–35.

48. Tagai i le 1 Nifae 9:6; Mataupu Faavae ma Feagaiga 130:7.

49. Ua faauigaina e le Dictionary.com le intelligence (atamai) o le “gafatia mo le aoaoina, mafaufau, malamalama, ma mamanu faigofie o gaoioiga faalemafaufau; tomai e malamalama ai i upumoni, sootaga, mea moni, uiga, ma isi.” ma le “iloa.”

50. Tagai i le Aperaamo 3:19. O Iesu Keriso i le avea ai ma se tagata faamamaluina ma atoatoa e sili atu ona atamai nai lo i latou uma.

51. Tagai i le Faaaliga 21:22.

52. Tagai i le Aperaamo 3:17.

53. Tagai i le Mose 1:39.

54. Richard G. Scott, “Faalagolago i le Alii,” Liahona, Ian. 1996, 19.

55. Richard G. Scott, “Faalagolago i le Alii,” 17.

56. Tagai i le Ioane 5:22; Mose 1:39. O Satani faapea ma i tatou lava ia, tatou te ta’usalaina i tatou (tagai i le Faaaliga 12:10; Alema 12:14).

57. Tagai i le Ioane 4:23; Mataupu Faavae ma Feagaiga 18:40; 20:29.

58. Tagai i le 3 Nifae 11:11; Mataupu Faavae ma Feagaiga 93:11–19.

59. O le salamo o le faagasologa lea tatou te suia ai o tatou natura ina ia mafai ona tatou avea e pei o le Atua. O lea, e tatau ai ona tatou salamo pea lava pea, e le na o le salamo pe a tatou “faia se mea sese.”

60. Tagai i le Mataupu Faavae ma Feagaiga 93:19–20.

61. Lectures on Faith, 38; tagai foi i le Moronae 7:48; 10:32–33; Mataupu Faavae ma Feagaiga 76:56, 94–95; 84:33–38.

62. Mataupu Faavae ma Feagaiga 93:20; ua faaopoopo le faamamafa.

63. Tagai i le Moronae 10:32–33; Mataupu Faavae ma Feagaiga 76:69, 94–95.

64. Aisea e le mafai ai pe o le a le faaalia mai ai e le Atua nisi mea se tele atu e uiga i le faagasologa o le avea e pei o Ia? Ou te faamaoni lava ou te le iloa uma ni mafuaaga. Ae pe na o se lua ni mafuaaga ou te malamalama i ai. O le mafuaaga muamua o nisi mea e le mafai ona malamalama i ai i lo tatou tulaga faaletino (tagai i le Mataupu Faavae ma Feagaiga 78:17). E ono faatusatusa i le taumafai e faamalamalama le initoneti i se tasi na ola i le Seneturi lona sefulu. O le aano ma le vaaiga e le o i ai iina. Ma o le mafuaaga lona lua, o meaalofa o le alofa tunoa e tele ina o mai tonu ia i tatou ona e tatau ona tatou tigaina ma tauivi e ala i le le iloa o se mea.

65. O osigataulaga ua talosagaina i tatou e fai atonu e taua i le ausiaina o le atoatoa (tagai i le Eperu 11:40 [i le Eperu 11:40, vaefaamatalaga a]).

66. Tagai i le Roma 8:18.

67. Mataupu Faavae ma Feagaiga 78:17–18.