O Le Taimi Lenei
Afai o i ai se mea i lou olaga e te manaomia ona iloiloina, o le taimi la lenei.
I ni nai tausaga ua mavae, a o sauni mo se faigamalaga faapisinisi, sa amata ona ou lagonaina le tiga o lo’u fatafata. Ona o le popole tele, sa tonu ai i lo’u toalua na te faafeaoina a’u i la’u malaga. I le vaega muamua o le ma faigamalaga i le vaalele, sa faateteleina le tiga i le tulaga sa faigata ai ona ou mānava. Ina ua matou tulaueleele, sa ma tuua le malaevaalele ma o atu i le falemai i le lotoifale, lea, i le mavae ai o suesuega e tele, sa tautino mai ai e le fomai lo ma saogalemu e toe faaauau le ma faigamalaga.
Sa ma toe foi atu i le malaevaalele ma malaga ai i le ma nofoaga mulimuli. A o matou faaifoifo i lalo, sa saunoa mai le pailate i le alaleo ma talosaga mai ia te a’u ia faailoa atu a’u. Na sau le tagata faigaluega i luga o le vaalele, ma fai mai sa faato’a o latou mauaina se valaau faafuasei, ma fai mai ia te a’u o loo i ai se taavale o le falemai o loo faatali mai i le malaevaalele e ave ma’ua i le falemai.
Sa ma feosoi i le taavale a le falemai ma faataalise atu loa ma’ua i le potu o faalavelave faafuasei. O iina sa matou feiloai ai ma ni fomai popole se toalua, o ē sa faamatala mai sa vaaisesē lo’u ma’i ae e ogaoga le ma’i sa ia te a’u, o le pulmonary embolism, po o le alu’alutoto poloka, i o’u māmā, lea sa manaomia ai le togafitiga vave faafomai. Sa ta’u mai e fomai ia i ma’ua, o le toatele o gasegase e lē faasaoina i lenei tulaga. I le iloaina sa ma mamao ese mai le aiga ma sa lē mautinoa pe ua ma sauni mo na suiga o le olaga, sa faapea mai fomai afai o i ai se mea i ō ma’ua olaga e manaomia ona ma iloiloina, o le taimi la lenei e fai ai.
Ou te manatua lelei le toetoe o le taimi lava lena i le atuatuvale, sa suia atoa ai la’u vaaiga. O mea sa foliga mai na matua taua i sina taimi na muamua atu, ua faalēāno nei i ai. Sa vave ona me’i ese lo’u mafaufau mai le mafanafana ma popolega o lenei olaga ae see atu i se vaaiga e faavavau—o mafaufauga i aiga, o fanau, o lo’u toalua, ma i’u ane ai i se iloiloga o lo’u lava olaga.
Pe na faapefea mai i matou o se aiga ma tagata taitoatasi? Sa matou ola ea i o matou olaga e ōgatusa ma feagaiga sa matou osia ma i faamoemoega o le Alii, pe masalo na matou faatagaina ma le lē manatu i ai ia popolega o le lalolagi e faalavelave ia i matou mai i mea e aupito sili ona taua?
Ou te valaaulia outou e mafaufau i se lesona taua mai i lenei aafiaga: ina ia laa ese i tua mai le lalolagi ae toe iloilo lou olaga. Po o i upu a le fomai, afai o i ai se mea i lou olaga e te manaomia ona iloiloina, o le taimi la lenei.
Iloiloina o ō Tatou Olaga
Ua tatou ola i se lalolagi ua matuā anoanoa’i faamatalaga, ua puleaina e mea faalavefau ua matua faateteleina ia ua atili ai ona faigata tele ona faavasega i le vāvāō o lenei olaga ma taulai atu i mea e taua e faavavau. Ua tumu saisai o tatou olaga i aso uma i ulutala faatosina, o loo tuuina mai e tekinolosi ua matua saoasaoa le fesuisuiai i taimi uma.
Atonu tatou te le iloaina le aafiaga o lenei siosiomaga pisi i o tatou olaga i aso taitasi ma filifiliga tatou te faia, vagana ua tatou faaaluina le taimi e mafaufau i ai. Tatou te ono iloa ai ua alu tele lo tatou olaga i nai faamatalaga e aumai e ni manatu taatele i le initoneti, vitio, ma ulutala faatosina. E ui e mata’ina ma faafiafiaina, ae o le tele o nei mea e itiiti se mea e faatatau i lo tatou alualu i luma e faavavau, ae ua latou mamanuina le ala tatou te vaai ai i lo tatou olaga faaletino.
O nei mea faalavefau faalelalolagi e mafai ona faatusaina i mea faalavefau i le miti a Liae. A o tatou agai i luma i le ala o feagaiga ma ō tatou lima o loo pipii mau i le āi u’amea, tatou te lagona atu ma vaaia i latou o loo “faatauemu ma tusitusi mai o latou tamatamailima” mai le fale tele ma le ateatea (1 Nifae 8:27). Atonu tatou te lē faamoemoe moni e faia lea mea, ae o nisi taimi tatou te tutu ai ma sui lo tatou taulaiga e fia vaai po o le a le mea ua vāvāō ai. O nisi o i tatou e oo lava ina faama’amulu le āi u’amea ae sosō atu atili mo se vaaiga lelei atu. O isi e ono pa’u’ū ese atoatoa “ona o i latou o e sa faatauemu mai ia te i latou” (1 Nifae 8:28).
Na lapataia i tatou e le Faaola “[ia faaeteete] … ne’i faamamafaina o outou loto [i] … le popole i mea a le olaga” (Luka 21:34). Ua faamanatu mai ia i tatou e faaaliga o aso nei e toatele ē e valaauina, ae toaitiiti ē e filifilia. E le filifilia i latou “aua ua pupū tele o latou loto … i mea o lenei lalolagi, ma saili viiga a tagata” (Mataupu Faavae ma Feagaiga 121:35; tagai foi i le fuaiupu e 34). O le iloiloina o ō tatou olaga tatou te maua ai se avanoa e laa ese ai i tua mai le lalolagi, mafaufau po o fea o tatou tutu ai i luga o le ala o feagaiga, ma, pe a manaomia, ia faia ni fetuunaiga e faamautinoa ai se pipiimau ma se taulaiga agai i luma.
Talu ai nei, i se faigalotu a le autalavou i le lalolagi atoa, sa valaaulia ai e Peresitene Russell M. Nelson le autalavou ia laa ese i tua mai le lalolagi, o ese mai ala faasalalau faaagafesootai e ala i le faia o se anapogi fitu-aso. Ma o le afiafi na tuanai atu nei, sa ia faia ai se valaaulia talitutusa i tuafafine o se vaega o le sauniga a tamaitai o le konafesi. Ona ia fai atu lea i le autalavou e matau soo se eseesega i le ala latou te lagona ai, o mea latou te mafaufau ai, e oo lava i le auala latou te mafaufau ai. Ona ia valaaulia lea o i latou “ia faia se iloiloga auiliili o le olaga faatasi ma le Alii … ina ia mautinoa o ou vae o loo tutū mausalī i le ala o feagaiga.” Sa ia uunaia i latou e faapea, afai o i ai ni mea i o latou olaga ia e manaomia ona sui, “o le asō o le taimi sili lea ona lelei e sui ai.”
I le iloiloina ai o mea i o tatou olaga e manaomia ona sui, atonu tatou te fesili ifo ia i tatou lava i se fesili aogā: E faapefea ona tatou tula’i a’e i luga o mea faalavefau o lenei lalolagi ma tumau mausali i le vaaiga mamao o le faavavau i o tatou luma atu?
I se lauga o le konafesi i le 2007 e faaautuina “Lelei, Lelei Tele, Lelei Silisili,” na aoao mai ai e Peresitene Dallin H. Oaks le auala e faamuamua ai filifiliga mai i le tele o ō tatou manaoga feteenai faalelalolagi. Na ia fautua mai, “E ao ona tatou tuuese nisi o mea lelei ina ia filifili ai mea isi mea e lelei atu pe silisili ona lelei aua latou te atiina ae ai le faatuatua i le Alii o Iesu Keriso ma faamalolosia ai o tatou aiga.”
Ou te fautua atu o mea lelei silisili i lenei olaga e faatotonugalemu ia Iesu Keriso ma le malamalama i upumoni e faavavau o le, o ai o Ia ma o ai i tatou i la tatou sootaga ia te Ia.
Saili le Upumoni
A o tatou saili ia iloa le Faaola, e lē tatau ona laaloa le tatou vaai i le upumoni taua o le, o ai i tatou ma pe aisea ua tatou i ai iinei. Ua faamanatu mai e Amoleka ia i tatou “o le olaga lenei o le taimi lea … e saunia ai e feiloai ma le Atua,” le taimi “ua tuuina mai ia i tatou e saunia ai mo le faavavau” (Alema 34:32–33). E pei ona faamanatu mai ia i tatou e se faaupuga lauiloa, “E lē o i tatou o ni tagata soifua o loo i ai se aafiaga faaleagaga. O i tatou o tagata faaleagaga o loo i ai se aafiaga faaletagata.”
O le malamalama ai i lo tatou tupuaga paia e taua i lo tatou alualu i luma e faavavau ma e mafai ona faasaoloto i tatou mai mea faalavefau o lenei olaga. Sa aoao mai le Faaola:
“Afai tou te tumau pea i la’u mataupu, o o’u soo moni outou;
“E iloa foi e outou le mea moni, e tuu sa’oloto foi outou e le upu moni” (Ioane 8:31–32).
Na folafola mai e Peresitene Iosefa F. Samita, “O le mea silisili a le tagata e mafai ona faataunuuina i lenei lalolagi o le faamasani lea o i latou i le mana o le upumoni, i lona auiliiliga, i lona atoatoaga, ina ia le mafai ai e faataitaiga ma amioga a meaola uma i lenei lalolagi ona liliueseina i latou mai le malamalama ua latou maua.”
I le lalolagi i le asō, o finauga i upumoni ua oo atu i se tulaga sili ona lavelave, ua manatu ai itu uma o le upumoni e peisea’i o se manatu fetāla’i e tatala i le faauigaga a le tagata lava ia. Sa maua e le taulealea o Iosefa Samita e faapea “sa matua tele na’uā le faanunununu ma le fefinauai” i lona olaga “sa le mafai … ona maua se faaiuga mautinoa po o ai ua sa’o ma o ai foi ua sese” (Iosefa Samita—Talafaasolopito 1:8). Sa “i le taulotoaiga o lenei taua o upu ma vevesi o taofi” lea sa ia saili ai le taitaiga faalelagi e ala i le sailia o le upumoni (Iosefa Samita—Talafaasolopito 1:10).
I le konafesi ia Aperila, sa aoao mai ai Peresitene Nelson, “Afai e ao ona tatou maua se faamoemoe o le suesueina o le tele o manatu ma filosofia a tagata ia e osofaia le upumoni, e tatau ona tatou aoao e maua ia faaaliga.” E tatau ona tatou aoao e faalagolago i le Agaga o le Upumoni, lea “e le mafai e le lalolagi ona talia o ia, auā, ua le vaaia o ia, ua le iloa foi o ia” (Ioane 14:17).
A o vave ona agai atu lenei lalolagi i isi mea moni sesē, e tatau ona tatou manatua upu a Iakopo e faapea “e tautala mai le Agaga i le upumoni ma e le pepelo. O le mea lea, e fetalai mai o ia e uiga i mea e pei ona i ai moni lava, ma e uiga i mea e pei o le a i ai moni lava; o le mea lea, ua faaali manino mai nei mea ia te i tatou, mo le olataga o o tatou agaga” (Iakopo 4:13).
Pe a tatou laa ese i tua mai le lalolagi ma iloilo o tatou olaga, o le taimi la lenei e mafaufau ai po o a suiga e manaomia ona tatou faia. E mafai ona tatou maua le faamoemoe sili i le iloaina o lo tatou Faataitaiga o Iesu Keriso ua toe taitaia foi le ala. A o lumanai ai Lona maliu ma le Toetu, a o Ia galue e fesoasoani ia i latou na siomia o Ia ia malamalama i Lana matafaioi paia, sa Ia faamanatu atu ia i latou “[tou te] maua le manuia ia te au. E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33). Ou te molimau atu ai ia te Ia i le suafa o Iesu Keriso, amene.