Tusitusiga Paia

O se faamaumauga o feutagaiga a le Atua ma Ana fanau

Pe ua e oo ea i le mauaina o se fuaitau i tusitusiga paia e foliga mai e tautala sa’o atu ia te oe? O loo i ai i tusitusiga paia le mana faaleagaga (tagai Luka 24:32; 2 Nifae 32:3). Latou te molimau mai o Iesu Keriso o lo tatou Faaola ma le Togiola ma e taitai atu i tatou ia te Ia o le puna o lo tatou faaolataga. Ua tuuina mai e lo tatou Tama Faalelagi alofa ia i tatou tusitusiga paia e aoao ai i tatou e uiga i Lana fuafuaga mo lo tatou fiafia, e fesoasoani ia i tatou ia maua se molimau i Lona Alo o Iesu Keriso, e taiala i tatou, e tuuina mai ia i tatou le faamoemoe, ma le tele o isi mea. I le talafaasolopito atoa, ua tusifaamaumauina ai e perofeta anamua ma aso nei savali paia latou te maua ma tala o feutagaiga a le Atua ma Ana fanau. Ua faamanuiaina i tatou i le mauaina o le afioga a le Atua i o tatou aso.

O A Tusitusiga Paia?

O tusitusiga paia o tusi paia ia o loo i ai afioga a le Atua, aoaoga a perofeta, ma tala musuia o feutagaiga a le Atua ma Ana fanau (tagai 2 Peteru 1:20–21). O Tusitusiga Paia aloa’ia a le Ekalesia a Iesu Keriso o le Au Paia o Aso e Gata Ai, ua faasino i ai o “tusi faavae”, e aofia ai le Tusi Paia, o le Tusi a Mamona, o le Mataupu Faavae ma Feagaiga, ma le Penina Tau Tele.

Vaaiga aoao i autu: Tusitusigapaia

O taiala fesootai mo le suesueina o le talalelei: Tusi Paia, Tusi a Mamona, Perofeta, Aoaoina Atu ma le Aoaoina Mai o le Talalelei a Iesu Keriso

Vaega 1

E Mafai e Tusitusiga Paia ona Aumaia Oe Ia Latalata Atili i Lou Tama Faalelagi ma Iesu Keriso

Na folafola mai e Elder D. Todd Christofferson e faapea, “O le faamoemoega tutotonu o tusitusiga paia uma o le faatumuina lea o o tatou agaga i le faatuatua i le Atua le Tama ma Lona Alo, o Iesu Keriso.”¹ O le savali ma le mana faaleagaga o tusitusiga paia e taitai atu ai i tatou i le faaolataga. Na aoao mai Peresitene Ezra Taft Benson, “O le afioga a le Atua, o loo maua i totonu o tusitusiga paia, … o loo i ai le mana e faamalosia ai le Au Paia ma faaauupegaina ai i le Agaga ina ia mafai ai ona latou tetee atu i le tiapolo, taofimau i mea lelei, ma maua ai le olioli i lenei olaga.”² O lau filifiliga e faitau ma suesue i tusitusiga paia o se laasaga taua agai i le avea e faapei o le Tama Faalelagi ma Iesu Keriso.

Mea e mafaufau i ai

Sa aoao mai Elder Robert D. Hales: “A tatou mananao e talanoa i le Atua, tatou te tatalo. Ma a tatou mananao ia te Ia e fetalai mai ia i tatou, tatou te suesue i tusitusiga paia.”³ O le a se taimi na e lagonaina ai sa saunia e tusitusiga paia ni tali mo oe? O le a se mea o le a e faasoa atu i isi e fesoasoani ai ia latou iloa e mafai e tusitusiga paia ona fesoasoani ia i latou ia maua tali mai le Atua?
Sa faamaumauina e le perofeta o Nifae le aafiaga sa ia faamoemoe o le a oo i ai le aufaitau o ana tusitusiga musuia. Faitau le 1 Nifae 6:1–6. E mafai faapefea e le malamalama i le faamoemoega o Nifae mo le tusiaina o lana tala ona aafia ai le ala e te suesueina ai le Tusi a Mamona?

Gaoioiga mo le aoao faatasi ma isi

Matamata faatasi le vitio “President Nelson—The Scriptures Teach Us about Jesus Christ (for Youth)” (0:59), ma vaavaai mo upumoni na folafola mai e Peresitene Russell M. Nelson e mafai ona tatou aoaoa mai tusitusiga paia. O le a sana tala e uiga i le taua o le faatofuina o i tatou lava i aso taitasi i tusitusiga paia?

Aoao atili

2 Nifae 4:15–16; Mataupu Faavae ma Feagaiga 18:34–36; 20:8–15
Russell M. Nelson, “Ola i Taitaiga Faatusi Paia,” Liahona, Nov. 2000, 16–18
“O Le Mana o le Upu,” Aoaoga a Taitai o le Ekalesia: Ezra Taft Benson (2014), 115–24
“Scriptures Are God’s Recipes for Happy Living, Said President Nelson” (vitio), ChurchofJesusChrist.org

Vaega 2

O Tusitusiga Paia o se Faaputuga Paia o Afioga a le Atua i Ana Fanau

O tagata o le Ekalesia a Iesu Keriso o le Au Paia o Aso e Gata Ai, e “talitonu i mea uma na faaali mai e le Atua, mea uma ua ia faaali mai nei, ma matou te talitonu foi o le a ia faaali mai le tele o mea silisili ma le taua i le Malo o le Atua i le lumanai” (Mataupu Faavae o le Faatuatua 1:9). O le tele o faaaliga a le Atua i Ana fanau o loo tusia i tusitusiga paia, lea e aofia ai le Tusi Paia, Tusi a Mamona, Mataupu Faavae ma Feagaiga, ma le Penina Tau Tele. O nei tusi ua ta’ua o “tusitusiga faavae” ma ua ta’ua o tusitusiga paia aloaia, pe ua faapaiaina, a le Ekalesia.

O le Tusi Paia o se faamaumauga o feutagaiga a le Atua ma Lona nuu, mai ona po o Atamu e oo mai i le taimi na soifua ai Aposetolo a Iesu Keriso. Ua vaevaeina le Tusi Paia i ni vaega se lua: o le Feagaiga Tuai ma le Feagaiga Fou. Ua aoao mai e le Feagaiga Tuai o le a afio mai le Mesia folafolaina o lo tatou Faaola ma le Togiola. O loo tusia i le Feagaiga Fou le soifuaga o Iesu Keriso ma Lana taulaga togiola ma le Toetu. O loo aofia ai foi aoaoga a Ana Aposetolo i tagata o le Ekalesia na faatuina e Iesu Keriso i lena taimi.
O le Tusi a Mamona o se faamaumauga paia o tagata o loo nonofo i le Itulagi i Sisifo i le va o le 2000 TLM ma le TA 400. O loo tauaveina le soaautu “O Se Tasi Molimau ia Iesu Keriso.” Sa tusia mo le faamoemoega o le “faatalitonuina … o Iutaia ma Nuuese o Iesu o le Keriso, o le Atua Faavavau” (itulau autu o le Tusi a Mamona).
O le Mataupu Faavae ma Feagaiga o loo i ai le tele o faaaliga i ona po nei na maua o se vaega o le Toefuataiga o le talalelei a Iesu Keriso. O le tele o nei faaaliga na maua e le Perofeta o Iosefa Samita i le seneturi lona sefuluiva.
O le Penina Tau Tele o loo i ai tusitusiga mai le tusi a Mose ma le tusi a Aperaamo. O loo aofia ai foi se vaega o faaliliuga a Iosefa Samita o le Tusi Paia, se vaega filifilia mai lana Talafaasolopito o le Ekalesia, ma Mataupu Faavae o le Faatuatua.

E faaopoopo atu i tusitusiga faavae, e manatulia e tagata o le Au Paia o Aso e Gata Ai ia upu musuia ma aoaoga a perofeta o aso nei e avea ma tusitusiga paia. “Soo se mea latou te tautala atu ai pe a uunaia ai e le Agaga Paia o tusitusiga paia ia” (Mataupu Faavae ma Feagaiga 68:4).

Mea e mafaufau i ai

Faitau le Alema 37:8–10, ma vaavaai mo auala na faia ai e tusitusiga paia se eseesega i tagata i ona po o Alema. O anafea na e vaaia ai faamanuiaga tutusa i lou olaga ma i olaga o i latou o siomia oe? O le fea o faamanuiaga o loo lisiina i lenei fuaitau o le a e faamoemoe i ai i le taimi nei i lou olaga?
Na vaai perofeta o le Tusi a Mamona o Liae ma Nifae i se faaaliga lea na avea ai le afioga a le Atua ma se āi u’amea (tagai 1 Nifae 8; 11). E mafai ona e iloiloina nei mataupu ma mafaufau pe aisea ua avea ai se ai uamea o se faatusa talafeagai mo le afioga a le Atua. O anafea na avea ai tusitusiga paia ma se ai uamea mo oe?

Gaoioiga mo le aoao faatasi ma isi

Mafaufau e matamata se vaega po o le vitio atoa “Scriptures Legacy” (22:29). Valaaulia le vaega e faasoa mai po o a tala na sili ona faagaeetia ai i latou e uiga i tagata o e na fesoasoani e faaavanoa mai tusitusiga paia ia i tatou i aso nei. E mafai faapefea e nei tala ona faatosinaina o tatou lagona e uiga i le suesueina o tusitusiga paia?

Aoao atili

1 Nifae 19:23; 3 Nifae 23:1–6, 14; Mataupu Faavae o le Faatuatua 1:8–9
Taiala i Tusitusiga Paia, “Tusi Paia,” “Tusi a Mamona,” “Mataupu Faavae ma Feagaiga,” “Penina Tau Tele,” Potutusi o le Talalelei
Russell M. Nelson, “Molimau Faatusi Paia,” Liahona, Nov. 2007, 43-45
D. Todd Christofferson, “O Le Faamanuiaga o Tusitusiga Paia,” Liahona, Me 2010, 32-35
“O Tusitusiga Paia, ‘O Faatanoa Tele o Vai Faaleagaga’,” Aoaoga a Peresitene o le Ekalesia: Harold B. Lee (2011], 59–68

Vaega 3

O le Suesueina o Tusitusiga Paia e Mafai Ona Aumaia ai le Malamalama ma le Upumoni i Lou Olaga

Ua faamanatu mai e perofeta uma o aso e gata ai ia i tatou le taua o le suesueina o tusitusiga paia. E avea tusitusiga paia ma se faamanuiaga tele ia i latou uma o e faaavanoaina se taimi e faitau ma aoao mai ai. Ao tatou suesue i upu a perofeta, e mafai ona tatou aoaoina upumoni ma maua le taitaiga mai le Agaga Paia. Sa lapata’ia e le Alii le Au Paia anamua: “Ma sa faapouliuligia o outou mafaufau i taimi ua mavae ona o le lē talitonu, ma ona sa outou manatu māmā i mea ua outou maua. … Salamo ma manatua le feagaiga fou, o le Tusi a Mamona lava lea ma poloaiga muamua ia na Ou tuuina atu [ia te i latou]” (Mataupu Faavae ma Feagaiga 84:54, 57). Ua i ai i tusitusiga paia le mana e aveese ai le pogisa e ala i le malamalama faaleagaga lea e oo mai e ala i le Agaga Paia pe a tatou faitau ma suesue i ai.

Mea e mafaufau i ai

I le Tusi a Mamona, sa taitaia le aiga o Liae i la latou malaga i le vao e se polo po o se tapasa e taua o le Liahona. Ina ua latou faatinoina le faatuatua ma le maelega, sa faaali mai e le Liahona le ala e tatau ona latou malaga ai. Faitau le Alema 37:38–47, ma vaavaai mo auala e ono auauna atu ai tusitusiga paia ia te oe i aso nei e pei ona faia e le Liahona mo le aiga o Liae. O le a se mea e mafai ona tatou faia e maua ai faamanuiaga faaleagaga uma o tusitusiga paia, po o afioga a Keriso?
O le taulotoina o se mau e mafai ona tuuina mai ai le fesoasoani faaleagaga ma le mana i taimi e manaomia ai. Toe faamanatu le saunoaga a Elder Richard G. Scott ”O Le Mana o Tusitusiga Paia.”⁴ O le a se mea ua e aoaoina mai lenei lauga e ono taitai atu ai oe e fetuunai le ala e te taulimaina ai au suesuega o tusitusiga paia?

Gaoioiga mo le aoao faatasi ma isi

E tele faamanuiaga folafolaina e o faatasi ma le suesueina o tusitusiga paia. Vaavaai mo faamanuiaga eseese ua folafola mai i fuaitau nei, ma talanoaina pe na faapefea ona e vaaia le faataunuuina o na faamanuiaga:

Aoao atili

2 Nifae 31:20; Iosefa Samita—Talafaasolopito 1:11–13, 73–74
“Mana o le Upu,” Aoaoga a Peresitene o le Ekalesia: Ezra Taft Benson (2014), 115–124
“Liken All Scriptures” (vitio), Potutusi o le Talalelei
O Tusitusiga Paia—O Se Suesuega Aupito Sili Ona Faamanuiaina,” Aoaoga a Peresitene o le Ekalesia: Howard W. Hunter (2015), 143–53
“Iloaina o Tusitusiga Paia mo i Tatou Lava,” Aoaoga a Peresitene o le Ekalesia: Spencer W. Kimball (2011), 59–68

O Isi Punaoa e uiga i Tusitusiga Paia