Sa Ia Tau Mai Ia Te Au, “E Leai”
“O le inu e so outou o le uaina po o se mea inu malosi, faauta e le lelei lea, e le lelei foi i le silafaga a lo outou Tama” (MFF 89:5).
Sa ou manatu o la’u uo, o Chase, e na te faia soo se mea. Ina ua ou faaosoosoina o ia e puna ese mai le sitepu pito i luga i luma o lo matou fale, sa le gata ina ia faia, ae sa ia tamoe muamua lava!
Ina ua ou faaosoosoina o ia e tietie i le nofoa tietie faatamilo e faau i lalo, sa le gata i lona tietie ai, ae sa ia nofo i le nofoa pito i luma!
Ae ina ua ou fai i ai na te le mafai ona faamalo atu ia Julia—o le tamaitai aulelei i le aoga atoa—na le gata ina ia faamalo atu i ai, ae sa ia nofo ma talanoa atu ia te ia mo le lima minute!
Sa ou manatu e faia e Chase soo se mea lava. Seia oo mai i le aso, o le mea lea.
Toeitiiti lava o aso uma e sau ai Chase i lo matou fale. E matua felataa’i lava mea ma te nonofo ai. E na o le tasi le fale e va ai i ma’ua. Ae e le sau Chase i Aso Sa ma Aso Gafua. O Aso Sa e alu ai o ia i le lotu. I le Aso Gafua e i ai so latou po faapitoa faaleaiga. Sa ia valaaulia au i nisi taimi. Sa ai a matou keke sukalaki ma taaalo i ni taaloga. Sa manaia lava.
E masani lava ona sau Chase i lo matou fale e taalo pe a tuua le aoga. Ou te fiafia pe a sau o ia aua o loo faigaluega lo’u tina ma lo’u tama. O le taaalo ma Chase o se mea fiafia. Ma te fiafia e faia ni tausuaga. E faauo Chase ma tagata uma. Ou te le faalogo lava o ia faia se tala leaga e uiga i isi tagata—tusa lava pe o fai e isi.
O ananei sa ma taaalo pasiketipolo ai ma Chase. Sa fai lava si vevela, o lea sa ou fesili ai ia Chase pe fia inu.
“Ioe,” o le tala lea a Chase, ao ia faataavale le polo i le vao ma tamoe atu i luma o lo’u fale.
Sa ma savavali i totonu ma agai atu i le umukuka. A’o ou tatalaina le pusa aisa, o le malu mai o le ea na mafua ai ona tutu lauulu o ou lima. Ina ua ou autilo muamua atu i le pusaaisa, sa na o le vaiinu ma le susu lea na iloa atu. Ona, tau atu lea o o’u mata i se apa ua tatala o i le tulimanu.
Sa tuua e lo’u tama se apa pia o loo tatala. E na te le iloa lava pe a fai ai ni ta miti. Sa ou aumaia i fafo le apa.
“E te manao e faataitai?” o lau fesili lea.
“O le a?” o le fesili lea a Chase.
“O le pia,” o la’u tala lea. “E inu lava e lo’u tama i taimi uma. Na te le iloa lava pe a ta mitia.”
Sa tilotilo mai Chase ia te au. Sa o i luga ona fulufulu mata ma tuu ona lima i ona suilapalapa. Ona ia fai mai lea o se mea ou te le manatu o le a ou faalogo o ia fai mai ai.
“E leai!” o le tala lea a Chase.
“Sa e fai mai leai?” o lau fesili lea.
“E le lelei le pia mo oe,” o lana tala lea. “E le tatau ona ta inuina. E faaosoina ai oe e faia mea faavalevalea.”
“E leai pe a fai na o le tasi lava si au tamai miti,” o lau tala lea. “Vaai, o le a ou faataitai atua.”
Sa ou tuuina ae le apa i lo’u gutu, fai sina tamai miti, ma ataata. Sa le manaia le tofo, ae ou te lei manao e foliga fefe.
“Vaai? Pe ua sili atu ea lo’u valea ia te oe?” o lau fesili lea.
“Ou te manatu o le a ou alu i le fale,” o le tala lea a Chase. “Aua le toe inuina lena mea. E le o se mea lelei.”
A’o ou vaai atu ia Chase o savali i fafo o le faitotoa ma tamoe i le auala savali e agai atu i lona fale, sa le mafai ona taofia lo’u mafaufau pe aisea na le mafai ai ona mitiina sina tamai pia ae toeitiiti lava ona ia mafai ona faia soo se mea.
Sa toe fai se isi au tamai miti ina ua alu Chase. “Oka! E leaga moi lava lenei mea,” sa ou mafaufau ai ao ou toe tuuina le apa i le tulimanu o le pusa aisa.
Atonu ai lava e sa’o Chase.
Ata na tusia e Ioane Zamudio; Iesu Keriso, na saunia e Harry Anderson, faaaloaloga a le Falemataaga o Talafaasolopito o le Ekalesia.