O Le Auala Na Ou Iloa Ai
O Le Tuputupu Ae ia Iloaina
A o ou aoaoina ia aoaoga faavae o le talalelei, sa le i suia ai o’u tulaga faigata, ae sa ou lagona le fiafia atili.
Ina ua 14 o’u tausaga, na o mai ni faifeautalai o le Au Paia o Aso e Gata Ai i lo matou aiga ma aoaoina au ma lo’u tina. Sa vave ona la valaaulia i ma’ua e papatiso. Sa tetee lo’u tina, ae sa ou ioeina. I le toe tepa i tua, ou te lei iloa sa ou liua. Ou te manatu, e pei lava o le tele o talavou, sa na o lo’u saili e faia se mea e ese mai i mea e masani ai.
I le tausaga na sosoo ai sa ou alu ai i le lotu na o au lava. Ou te lei matua lagonaina faapea o a’u o se tasi o i latou, ma sa ou le malamalama tele i mea sa aoaoina. Ae sa ou toaga lava. I le tausaga na sosoo ai sa ou nofo ese mai lo’u aiga ma auai i se a’oga maualuga a le Ekalesia i le Aai o Mekisiko. E ui ina sa ou fiafia i le aoga maualuga i lo’u faatoa asiasi atu i ai ma galue malosi ina ia talia au (ma tauanau o’u matua ina ia ou auai), ae sa vave ona ou iloa e le faigofie le tuua ai na o au. Sa le’i i ai lava sa’u molimau. Sa ou le malamalama lava po o ai Iosefa Samita ma po o le a le mea na aoao mai e le Tusi a Mamona. Sa atili ai ona ou lagona lo’u le fetaui ai iina.
Ioe, ou te lei ta’uina i ou matua. Sa tele se taimi sa ou faatauanau ai i la’ua e faataga au ou te alu i lea aoga. Pe faapefea ona ou tautino atu atonu e le o se nofoaga lava lea mo au? Ona o lo’u faamaualuga, o lea sa na ona ou tauivi gugu ai.
Sa amata faateleina lo’u tulaga faigata ina ua ou maua tala o le a tete’a ou matua. Sa ou lagona na pei lava ua faaumatia lo’u lalolagi atoa.
O le taimi tonu lava lena na ave ai au e lo’u epikopo ma fesili mai po o a mai au. Sa ou faamatala atu ia te ia o’u mafatiaga ma faanoanoaga uma. “Na ou lagona e pei lava ou te le o toe iloa se isi lava mea,” o lau tala lea.
Sa amata ona aoao au e lena epikopo lelei e uiga i le talalelei. Sa ma amata i auala e fesootai moni atu ai lava i le Tama Faalelagi. I le aluga o taimi sa ma talanoa ai i le Togiola. Sa ia aoao mai au i upumoni o le talalelei, ma mo le taimi muamua, sa ou lagona ai sa i ai sa’u molimau. Sa ou fiafia sa i ai se mea sa ou pipiimau i ai i lena taimi o le le mautonu. E ui sa ou lagona le leai o se malosiaga e fesoasoani ai i lo’u aiga, ae sa mafai ona ou lagona le fiafia i le faalatalata atu i le Tama Faalelagi. Na ou iloa sa Ia silafia au, ma o lena na suia ai mea uma.
Atonu o se masani i tagata fou o le Ekalesia le lagona e pei ona sa ou lagonaina o le le fetaui. Sa ou aoaoina e le taua pe a e le malamalama i mea uma o le talalelei i se taimi vave. O le mea e taua o lou malamalama lea i lou sootaga i le Tama Faalelagi ma Lona faamoemoega ma fuafuaga mo lou olaga. E taua la lou malamalama na togiolaina au agasala e le Faaola ma e Na te silafia lelei oe, tusa lava pe leai se tasi. Na ou iloa loa nei aoaoga faavae, sa manino uma isi mea.
Faafetai i le alofa ma le aoaoina o au ma le onosai e lo’u epikopo, lea na avea ai le aoga maualuga o se taimi faamanuiaina o lo’u olaga. O le auai i le aoga maualuga a le Ekalesia na suia ai la’u vaaiga i le po o ai au ma le olaga o le a i ai. Ina ua ou faauu, sa ou nofo i le Aai o Mekisiko. O le mea muamua sa ou faia ina ua maua le mea ou te nofo ai o le saili lea o se uarota i le lotoifale ina ia faaauau ai le i ai o se nofoaga o le sulufaiga, o se nofoaga ou te tuputupu ae ai i le talalelei.
O sina taimi puupuu ina ua mavae lena, sa ou faamisiona ai i le Lotoa o le Malumalu i le Aai o Sate Leki. Sa ou maua se olioli maoae i le faasoaina atu i isi o le upumoni lea sa aumaia ia te au se faavae mautu i lenei taimi o le le mautonu o le olaga.
Ou te faafetai i le avea ai ma se tagata o le Ekalesia. Ou te iloa o loo silafia i tatou taitotasi e le Tama Faalelagi ma e i ai Sana fuafuaga mo o tatou olaga. O se faamanuiaga maoae le vaavaai atu o Ia tatalaina Lana fuafuaga mo au.
Ata pue mai le faaaloaloga a Sonia Padilla-Romero; auiliiliga mai O Le Afio Mai Faalua, saunia e Grant Romney Clawson