Faamalolosia o Auaiga ma Aiga

Suesue i mea nei, ma pe a talafeagai ai, ia talanoaina faatasi ma tuafafine e te asia. Faaaoga fesili e fesoasoani ia te oe e faamalolosia ai ou uso ma ia avea ai le Aualofa ma se vaega aoga o lou lava olaga.

Mai Tusitusiga Paia: Kenese 18:19; Mosaea 4:15; MFF 93:40; Mose 6:55–58

Faamalosia i Soo Se Avanoa

“E eseese i tatou taitoatasi i tulaga o aiga. O nisi aiga o loo i ai se tina ma se tama ma fanau i le fale. O nisi ulugalii ua le o toe i ai ni fanau i le fale. E toatele tagata o le Ekalesia e nofofua, ma o nisi o ni matua nofofua. O nisi o ni tina po o ni tama ua maliliu taitoalua o loo nonofo toatasi.

“E tusa lava po o le a le foliga o lo tatou aiga, e mafai e i tatou taitoatasi ona galulue e faamalosi o tatou lava aiga po o le fesoasoani e faamalolosia isi.

“[Na i ai se taimi] sa ou nofo ai i le fale o si o’u tei ma lona aiga. I lena afiafi ao lei o tamaiti e momoe, sa faia sa matou afiafi faaleaiga puupuu ma se tala faatusi paia. Sa faamatala e lo latou tama le aiga o Liae ma le ala na ia aoaoina ai lana fanau faapea e tatau lava ona latou pipiimau i le ai uamea, o le afioga lea a le Atua. O le piimau i le ai uamea o le a faasaogalemuina ai i latou ma taitai atu ai i latou i le olioli ma le fiafia. Afai latou te faamamulu le ai uamea, o le a i ai se tulaga matautia e malelemo ai i le vaitafe palapala.

“Ina ia faataitai atu lenei mea i tamaiti, na avea lo latou tina ma ‘ai uamea’ lea e tatau ona latou pipiimau ai, ma na fai lo latou tama ma tiapolo, lea na taumafai e toso ese tamaiti mai le saogalemu ma le fiafia. Sa fiafia tamaiti i le tala ma sa aoaoina ai le taua o le pipiimau i le ai uamea. Ina ua uma le tala faatusi paia ua oo i le taimi o le tatalo faaleaiga. …

O tusitusiga paia, o afiafi faaleaiga, ma tatalo faaleaiga o le a faamalolosia ai aiga. Tatou te manaomia avanoa uma e faamalolosia ai aiga ma lagolago atu ai le tasi i le isi ina ia tumau i le ala sa’o.”¹

Barbara Thompson, fesoasoani lua i le au peresitene aoao o le Aualofa.

O Le a Se Mea e Mafai ona Tatou Faia?

O a ni manatu mo le faamalolosia o auaiga ma aiga o le a e faasoa atu i ou uso? Ao e mafaufau loloto i o latou tulaga taitoatasi, o le a mafai ona aumai e le Agaga ia auala i lou mafaufau.
O a mea e faamuamua e mafai ona e suia i lenei masina e faamalosia atili ai lou lava auaiga ma le aiga?

Mai lo Tatou Talafaasolopito

Mai lava i le amataga e i ai i le Aualofa le tiute o le faamalolosia o auaiga ma aiga. Na aoao atu e le Perofeta o Iosefa i se fonotaga a uso o le Aualofa, “Pe a e alu i le fale, aua aua lava nei tuuina atu se upu ita po o se upu le alofa ia outou tane, ae ia avea le agalelei, alofa mama ma le alofa e faapaleina au galuega i le taimi lenei ma le agai atu i luma.”²

I le 1914 na saunoa atu ai Peresitene Iosefa F. Samita i uso o le Aualofa, “Po o fea lava o i ai le valea po o le vaivai o le malamalama e tusa ai ma le aiga, … o loo i ai lenei faalapotopotoga po ua i o outou aao foi, ma e ala i le faapaiaga ma musumusuga o loo i ai i le faalapotopotoga, ua saunia i latou e faasafua atu ia aoaoga e faatatau i na tiute taua.”³

Ata na saunia e Robert Casey