Pe Na Ou Pisi Tele e Auauna Atu?

Ngozi Francisca Okoro, Nigeria

I le 1997 sa faasalalau mai ai e le peresitene o la matou paranesi o le a faia se galuega faatino e auauna atu ai i o matou tuaoi e faataamilo i lo matou falelotu. Sa matou faia lea gaoioiga e fesootai atu ma tagata o le Ekalesia i le lalolagi atoa i le faamanatuina o le lona 150 tausaga o le taunuu atu o paionia o le Au Paia o Aso e Gata Ai i le Vanu o Sate Leki.

O le gaoioiga sa aofia ai le faamamaina o auala ma faatumu pu o auala. Sa fai mai le peresitene o le paranesi o le a matou palapalā ae atonu o le a aumaia e le gaoioiga se avanoa e talatalanoa ai ma isi e uiga i le Ekalesia.

Sa ou lei manatu o le a ou alu ona sa faatulaga e lo matou polofesa ni tautalaga faaopoopo i le taimi tonu lava lea o le gaoioiga. Na ou lagona o le a malamalama tagata uma, ae na ou tau i se tamai tusi e ta’ua o le Faatuatua i Tulaga Aao Uma. Ina ua ou faitau e uiga i le agai atu o le Au Paia i la latou savaliga o le ala agai i sisifo o le Iunaite Setete na maligi o’u loimata i le ootia. O nisi o le Au Paia na tuua o latou fale mananaia ae o i le toafa, ma le le mautinoa po o a mea o le a latou mauaina. O isi na agai pea i luma e ui ina ua maliliu uma tagata o o latou aiga i le ala. I le lotolotoi o ma’i, tiga, fiaaai, ma le mativa, sa latou talitonu afai latou te malaga atu i Sisifo, o le a saoloto i latou mai puapuaga.

Sa ou lagona le vaivai ona o le tele o osigataulaga a le Au Paia anamua, e oo lava i o latou lava ola i nisi taimi, ae ia vaai atu o loo agai pea i luma le Ekalesia. Ona o a latou osigataulaga ma le faatuatua, o lea ua ou aeae ai nei i faamanuiaga o le talalelei.

Ua ou matauina foi le faatauvaa o ni a’u taulaga e faia pe a faatusatusa i ai. Na valaaulia au e fai se auaunaga na o le lua itula ma faasoa atu le talalelei ma ni nai tagata, ao lea ua ou faia ni faanoi ou te le auai.

Na galo ia au tautalaga ma ou alu ai i le gaoioiga. Sa ou palapalā, ae na o mai tagata ma fesilisili mai e uiga i le Ekalesia. Na ou lagona le fiafia i lo’u auai, ma sa ou faauu mai le Iunivesite—e ui ina sa ou misia ni nai tautalaga.