O Faamalu a Paionia
“O le alofa moni o le alofa mama lea o Keriso, e tumau ia e faavavau” (Moronae 7:47).
Sara! Sara, nofo i luga!” o le tala lea a Christiana Larsen e lima tausaga i lona uso laitiiti. “Ua oo i le taimi e o ai.”
Sa taumafai Sara e tolu tausaga e pupula ona mata.
“Ae o la e pogisa fafo,” o lana tomumu lea ma le fiamoe.
“Ua ou iloa, ae na fai mai Mama e tatau ona tatou vave amata. E le o toe mamao ae alu le vaa i Amerika.’
Sa liliu mai le aiga o Larsen i le Ekalesia i Tenimaka. I le taimi nei o le a latou faia se malaga umi e faatasi atu ai i le Au Paia i le Vanu o Sate Leki.
Sa fesoasoani Christiana ia Sara e sauni. Ona toe tilotilo tasi atu lea ma loimata o teineiti i lo la potumoe manaia. Sa la iloa o le a umi se taimi ona faatoa la toe momoe lea i se moega mao’i.
“Aua nei galo lou faamalu, Sara,” o le tala faatopetope lea a Christiana ma piki i luga lona faamalu leise silika. “Fai mai Mama o le a ia tuufaatasia ma mea tatou te momoe ai.”
Na fai mai Mama ma Papa e le mafai ona la avea nisi mea e ese mai i mea o loo moomia mo le malaga i Amerika. A uma ona fafao faatasi mea e momoe ai, o lavalava, ma mea faigaluega, o le a leai se avanoa tele mo se isi mea. Ae sa tasi lava le mea sa tauanau atu e Christiana ma Sara e ave i lo latou nofoaga fou. Ae, sa tuu a la pepe taalo, o tusi, ma meataalo. Sa filifili e teineiti o la faamalu mananaia.
Ina ua oso ae le la, sa agai atu Christiana ma lona aiga i le vaa e malaga atu ai i Amerika. Sa fiafia i la’ua e o i Siona, e ui ina sa tuua a la uo, aiga, ma lo latou fale.
O le malaga i le sami sa umi ma faavaivai tagata. I luga o le vaa i le taimi o le vevela o le aoauli, sa faaaogaina e nei tamaitai e toalua o la faamalu mananaia e faamalu ai o la’ua ulu mai le la. A agi mai le savili i le itu sao, e alu lelei lava le vaa. A e a suia lona ala, e toe faafoi i tua le vaa, i le mamao e pei ona sa sau ai.
Ina ua taunuu le au Larsens i Amerika, sa faatau le latou taavale toso ma povi e amata ai le latou malaga umi i le Vanu o Sate Leki. Sa osooso ma vevela le tietiega i le taavale toso, o lea sa tele ina savavali ai Christiana ma Sara.
E pei o le toatele o aiga paionia, sa feagai le aiga o Christiana ma faigata ma mafatiaga i le ala. O le tuagane pepe o Christiana sa fanau i le taimi o la latou faigamalaga sa maliu ma tanu i le ala valevalenoa.
Ina ua taunuu le aiga o Larsen i le Vanu o Sate Leki i le 1857, sa fiafia Christiana e o i le lotu ma isi tamaiti o lana tupulaga. Sa fiafia Christiana ma Sara e ave o la faamalu i le lotu i Aso Sa uma e taofia mai ai le la vevela o le toafa mai o la foliga.
Ao faagasolo pea aso ma vaiaso, sa amata ona leai se tupe ma ni meaai a le aiga. I se tasi po sa faalogo ai Christiana o talanoa ona matua i le faafitauli. Sa fai mai lona tama na ia iloaina se aiga sa faamanuiaina i fua o fanua. E mafai ona fesuiai e le aiga o Larsen se mea mo se falaoamata. Ae o le a le mea e mafai ona latou ave e sui ai?
Sa faapea mai Christiana. “Papa, e mafai ona lua ave o ma faamalu ma Sara e sui ai.”
“Ae e te lua fiafia i o oulua faamalu, Christiana. E le mafai ona ou faia!”
“E leai se afaina, Papa,” o le tala lea a Christiana. “Tatou te manaomia tele le meaai nai lo faamalu.”
I le aso na sosoo ai na fesuiai ai e le tama o Christiana faamalu leise matagofie mo ni falaoamata. O le falaoamata sa maua ai le meaai mo le aiga atoa.
I lena po, ao sauni Christiana e moe, sa ia vaai ma le faanoanoa i le tulimanu sa tuu ai lana faamalu manaia. Ae ina ua ia manatua le falaoa manaia sa ia aia mo la latou meaai i lena afiafi, sa suia lona faanoanoa i le lotofaafetai. A’o faia lana tatalo i lena po, sa ia faafetai ai i le Tama Faalelagi mo lona faamalu matagofie, lea sa fesoasoani e fafagaina ai lona aiga.
Ata na tusia e Brian Call