Faagaloina O i Tatou lava i Sicily
Louis Menditto, Nevada, ISA
“O lo’u igoa o Omar Interdonato,” o le amataga lea o le i-meli. “O au o le tama tama a Fiorella Italia. Ou te faamoemoe o loo outou manatua pea lona papatisoga.”
I le tolusefulu tausaga muamua atu, sa tofia ai i ma’ua ma la’u soa i le motu o Sicily ma na ma auauna atu i Siracusa, o se aai matagofie i le talafatai o le Meititirane. O Aso Sa matou te feiloai ai ma nisi o le Au Paia i le eria i se vila tuai, e faia ai le sauniga faamanatuga i le potu malolo o le vila.
Sa faigata le galuega faafaifeautalai ma e le tele ni papatisoga. E sefuluono faifeautalai faamisiona na talai i le aai, lea sa faatele ona savalia. Ae a o ma suesueina ma la’u soa se faafanua o le aai i se tasi aso, na ma iloa ai se nuu laitiiti e tu pe tusa o ni nai maila mai lo ma fale i le faatausiusiuga o le aai.
Na ma sopoia laufanua e agai atu i le nuu, ma sa ma tootutuli i luga o se mafola o se ogaeleele e faaifo i se vanu, ma tuuina atu o ma loto ma agaga i le Atua. Ona amata lea ona ma savavali agai atu i totonu o le lavelave o fale e i ai i lena nuu.
Na faafeiloai i ma’ua i le faitotoa e se fafine e i le vaitausaga o le 40, e ofu uliuli—o se tu ma aga lea a Italia pe a mavae le maliu o se ua pele. Na suia le ma faafeiloai i le faitotoa i le faamamafaina atu o le ata o le faaolataga. Na faaulufale i ma’ua e le fafine ma sa matou feiloai ma ia ma lana fanau teine talavou e toalua, ma se tasi o a la uo. Na ma iloa e lei leva ona maliu le tane a le fafine ma e toafa lana fanau talavou o loo tausia. Na ma faaalia le ata O Le Sailiga a le Tagata mo le Fiafia ma sa valaaulia i ma’ua e toe o atu i le vaiaso e sosoo ai.
Na iu ina papatisoina le tina, lana tama tama matua ma lana fanau teine talavou e toalua, o lo latou tina matua, ma a latou uo. Ina ua mae’a la’u misiona, sa matou fesootai pea ma le aiga, ae, ina ua ou maua le i-meli, sa ou manatunatu pe o le a le mea na tupu ia Fiorella, le uo talavou a se tasi o teine.
“Sa faamaoni lo’u tina i le talalelei i lona olaga atoa, ae i le 1983 na faaipoipo ai i se tagata lelei o le Ekalesia mai le Paranesi o Messina ma faamauina ai i le malumalu,” na tusi mai ai lana tama tama. “Na ou fanau i le 1984, a o lou tuafafine o, Veronica o le 1987. Matou te malolosi uma i le Ekalesia. Na ou auauna atu faafaifeautalai i le Misiona i Italia Roma mai le 2005 i le 2007, i le faamoemoe e toe totogi le Alii i tauiviga uma a faifeautalai e toalua lea na filifili e talai atu le talalelei i se tamai aai i Florida!”
Sa i ai taimi ao ou i ai i le misiona sa ou manatunatu ai, pe o le lua tausaga o le ositaulaga ua tusa ai. Ae faauta i lo’u olioli tele (tagai ] MFF 18:15–16 ina ua iloa le suiga faavavau o le olaga o Fiorella ona na ma faia ma la’u soa se filifiliga e agai i luma, ma faagalo i ma’ua mo le galuega i isi i le motu o Sicily.