Auaunaga i le Ekalesia
Faamanuiaina e ala i Lo’u Valaauga
“Ua valaauina oe e le Alii e avea ma peresitene o la tatou Peraimeri,” o le tala lea a le peresitene o le paranesi ia te au. Faatoa tasi le tausaga talu ona ou tuua le vasega a le Lora ma faatoa lua tausaga talu ona ou papatiso i le Ekalesia. Na ou matua le talitonu.
“E leai so’u onosai lea e manaomia e aoao ai tamaiti,” na ou fai atu ai ia te ia.
“E te talitonu o lou valaauga e mai le Atua?” na ia fesili mai ai. “Pe a Ia valaauina i tatou, Na te faaagavaaina i tatou.”1
O ana upu na faatumulia ai au i le lagona mautinoa, ma na vave lava ona ou iloaina atonu e manaomia au e le Alii i le Peraimeri. Sa ou le iloaina pe faapefea ona faataunuu lo’u valaauga fou, ae na ou iloaina o le a Ia taitaiina au.
Sa ou naunau e fai le mea sili e mafai ona ou faia, ae i ni nai masina mulimuli ane na iloa ai ua maua lo’u tina i le kanesa. E le gata i lea, sa ou a’oga i le matata tau enisinia. Sa faigata ia te au ona fai uma o’u tiute i le aiga, iunivesite, ma le Peraimeri. Na amata ona vaivai lo’u agaga, ma i se tasi Aso Sa i le lotu sa faaletonu mea uma, ma na amata ona tafe ifo loimata.
O se tasi tagata o le uarota na iloaina ma tuuina mai se fautuaga matagofie: “Judith, o le auala sili e foia ai faafitauli o le tuuina atu o oe lava ia i le talalelei ma le faia o auaunaga i isi,” o lana tala lea. “I le faia o lena mea, o le a e vaaia ai le auala o le a faamama ai e le Alii au avega.”
Ao ou mulimuli i lana fautuaga faamalosiau, sa suia o’u uiga, na faamalosia lo’u faatuatua, ma sa faatumuina au i se naunautaiga e auauna i le Alii. Sa faaauau pea o’u tofotofoga, ae na ou tuuina atu atoa au lava i lo’u valaauga ma na ou tulimatai atu i le vaai i tamaiti i Aso Sa taitasi. Sa latou aoao mai ia te au se mea fou i vaiaso taitasi a o latou faaali mai ia te au a latou molimau e ala i a latou gaoioiga. Ao faagasolo pea masina, na ou vaai i le ala na foaina ai lo’u tagata e le Alii ma auala na ou atiina ae ai meaalofa ma taleni ou te lei iloaina sa ia te au.
O le tausaga na sosoo ai na ou tuua ai Barranquilla, Colombia, mo Bogotá mo se masina ma lo’u tina ona sa ia manaomia togafitiga malolosi mo le kanesa. I lena taimi sa ou tatalo e le aunoa ma sa ou lagona ai le latalata i le Alii. Sa ou filifili e sui la’u mataupu autu i le iunivesite, ma na ala mai se musumusuga, na ou iloa ai e finagalo le Alii e tuuina atu lo’u ola i le aoaoina o tamaiti. Ina ua ou foi atu i le aoga, sa amata loa ona ou galue i se faailoga i aoaoga faapitoa.
Na ou iloa na tuuina mai e le Tama Faalelagi ia te au lo’u valaauga i le Peraimeri e saunia ai au. Ao ou auauna atu, sa ou mauaina la’u matata moni lava, ma a o ou ola ai i le talalelei ma tuuina atu atoa au lava i le auaunaga, na ou lagonaina sa ou i ai i aao o le Alii.
O le molimau na ou mauaina ao auauna i le au peresitene o le Peraimeri ma mulimuli ane ai i le au peresitene o le Peraimeri a le Siteki na faamalosia ai au o se tagata o le Ekalesia. Na ou aoaoina auala e faiaoga ai ma le alofa, e vaai e pei ona vaai se tamaitiiti, ma saili le Alii mo taitaiga ma musumusuga.
O aso taitasi ou te faiaoga ai i se aoga e lua gagana i lo matou aai, ou te mafaufau ai i taumafaiga, luitau, ma faamanuiaga o na tausaga. O tamaiti na i ai i le Peraimeri i na vaitaimi ua autalavou nei, ae o loo susulu pea o latou mata i le alofa mo le Faaola ma Lana talalelei.
Ou te iloa a valaauina i tatou e le Alii, Na te aoaoina ma faafoeina i tatou ma tuuina taitai i o tatou ala e fesoasoani ia i tatou e ola ai i lenei talalelei matagofie a Iesu Keriso.
Taumatau: ata na tusia e Daniel Lewis