O Fea Na Ou Sau Ai?

Betty Hollowell, Indiana, ISA

A’o ou laitiiti sa masani ona ou manatunatu, “O fea na ou sau ai? I le taele o lo’u loto na ou iloa na ou nofo i se isi mea ae ou te lei avea ma tagata ua ou i ai nei, ae ou te le iloa po o fea.

I le tele o tausaga sa ou fefe e ta’u i se tasi—e oo lava i o’u matua—ona o lo’u popole i tei ua latou manatu o a’u ua leaga lo’u ulu. Ae i se tasi o aso ao ou talavou lava, sa lava lo’u lototele ou te fesili ai i le faifeau o le matou lotu. “O fea sa tatou nonofo ai ae tatou te lei o mai i le lalolagi?” Sa ia fai mai e le tatau ona ou manatu i ia ituaiga mea. Fai mai, e leai se isi na mau i se isi mea ao lei fanau mai; tatou te lei i ai i se isi lava mea muamua.

Sa ou fefe atonu e sa’o a ia ma e leaga lo’u ulu, ae na le mafai lava ona tuueseina nei manatu mai lo’u mafaufau. Sa faaauau ona ou saili, ae leai se tasi na i ai ni tali.

Ina ua 18 o’u tausaga, na siitia lo matou aiga i se isi nofoaga. Sa ou manatu o le a sili atu le iloa e le faifeau i lo matou nuu fou nai lo le faifeau muamua, o lea na ou filifili ai e fai se tasi o a’u fesili. E tutusa lava lana tali: fai mai a ia e le se mea masani le manatu i na mea ma sa ia fautua mai ou te alu e vaai se fomai o le mafaufau.

Na uma loa lena, ou te lei toe alu lava i se lotu. Na maua sa’u galuega, fetaui i se alii talavou, ma sa ma faaipoipo. E lima tausaga mulimuli ane ae tatala le ma faaipoipoga. O lea na tapena ai a’u meatotino uma, o la’u fanau e toalua ma le tasi o loo faatalitali, ma toe foi i lo’u aiga.

I se taimi i lena lima tausaga, na liliu ai lo’u tina i Le Ekalesia a Iesu Keriso o le Au Paia o Aso e Gata Ai. Sa ia ta’ua le Ekalesia ina ua ou asiasi ia te ia ma fai mai ou te talanoa i faifeautalai. Mulimuli ane na ou talia, ae matou te lei feiloai, sa ou manatu o le a ou malie e talia le talanoaga ma faifeautalai, pe a la ta’u mai po o fea sa ou i ai ae ou te lei sau ma avea ma tagata ua ou i ai nei.

Sa ou te’i, e le gata ina sa la taliina la’u fesili ae na la ta’uina mai le tali mai totonu lava o le Tusi Paia (tagai Iopu 38:4–7; Ieremia 1:5; Iuta 1:6). Ina ua mavae lena, sa la mauaina la’u gauai atoatoa! O le la tali na fesoasoani ou te malamalama ai i le mafuaaga na ou lagona ai i lo’u olaga atoa na ou ola muamua. O lea la ua ou malamalama sa ou i ai i le muai olaga faatasi ma lo’u Tama Faalelagi.

E le’i umi ae avea a’u ma tagata o le Ekalesia. Mo le taimi muamua i lo’u olaga, ua ou lagona ai le avea ma se tasi ma e i ai so’u taunuuga e tulimata’i i ai—i le toe foi atu lea i lo’u aiga ma lo’u Tama Faalelagi.

Ou te faafetai na mafai ona tali e faifeautalai la’u fesili lea na le mafai ona tali e se isi.