O Le Mea Ua Tatou Talitonu I Ai

O Le Mama i Feusuaiga e Faamanuiaina ai o Tatou Olaga

O le legavia o lona uiga o le mama aiai i o tatou mafaufauga, upu, ma gaoioiga. O lenei mama i feusuaiga e “faafiafiaina ai le Atua.”¹ O lo tatou Tama Faalelagi na tuuina mai ia i tatou le mana paia o le foafoaga mo le faamoemoega o le aumaia o fanau ma mo le faaalia o le alofa i totonu o le faaipoipoga i le va o se alii ma se tamaitai. Ua Ia tuuina mai ia i tatou le tulafono o le legavia e puipuia ai i tatou mai le matautia e oo mai le faatinoina o lagona felata’i faaletino i fafo atu o le faaipoipoga.

Ua uma ona faataatia e le Tama Faalelagi tuaoi manino mo le legavia. Ua Ia poloaiina i tatou ia aua nei faia soo se sootaga faalefeusuaiga ae tatou te lei faaipoipo. A mae’a ona tatou faaipoipo, ua poloaiina i tatou ia faamaoni atoatoa i o tatou taitoalua.² Afai tatou te solia le tulafono o le legavia, ua tatou faia se agasala matautia.³ Na aoao mai le perofeta o Alema o agasala faalefeusuaiga e sili atu le matautia nai lo nisi agasala vagana ai le fasioti tagata po o le faafitia o le Agaga Paia.⁴

Ua faia e Satani le legavia ma le paia o le faaipoipoga o se mea ula pe a ia faaosoosoina i tatou e talitonu o amioga tau feusuaiga i fafo atu o le faaipoipoga e taliaina pau lava o le mea ia i ai le alofa i le alii ma le tamaitai. E le moni lena mea. O se agasala matautia lena e faaleagaina ai le mana na tuuina mai e le Atuai ia i tatou e foafoa ai le ola.⁵

Ua poloaiina i tatou uma e lo tatou Tama o i le Lagi ia ola i le tulafono o le legavia. O faamanuiaga o le tausia o lenei poloaiga ma taunuuga o le solia e tutusa mo i tatou taitoatasi, e tusa lava po o a o tatou uunaiga, manaoga, po o faaosoosoga faalefeusuaiga.

Afai ua tatou faia ni agasala faalefeusuaiga, o le a faamagaloina i tatou e le Alii pe afai tatou te salamo faamaoni.⁶ O le atuatuvale o le agasala e mafai ona suia i le filemu lelei o le faamagaloga.⁷

Ao tatou tausia i tatou lava ia mama mai feusuaiga, o le a sili atu ona tatou malamalama i le taitaiga a le Agaga Paia ma mauaina le malosi, faamafanafanaga, ma le puipuiga.⁸

1. E mafai ona e filifili nei ia mama ma aua lava nei toe suia. O nisi atonu e manatu e mafai ona latou faia ia agasala faalefeusuaiga ma le manatu e faigofie lava ona latou salamo mulimuli ane. O lenei uiga e faaalia ai le le faaaloalo i poloaiga a le Alii ma le le lava o le malamalama i le salamo ma le amiotonu.⁹

2. O le talafeagai lelei o laei ma foliga, e te faaali atu ai i le Atua ua e iloaina o lou tino o se foafoaga paia mai ia te Ia. O le tauagafau e uunaia ai le legavia.¹⁰

3. O ponokalafi e avea ma vaisu ma e faataumaoia ai. E aveesea ai lou faaaloalogia o oe lava ia ma le loto pulea ma e masani ona taitaiina atu ai i agasala mamafa faalefeusuaiga.¹¹

4. Afai o loo e tauivi ma faaosoosoga faalefeusuaiga, e aofia ai lagona o le fiafia i le itupa e tasi, e mafai ona e filifili e tetee i na faaosoosoga. O le Alii o le a “faia le ala e sola ese ai” ina ia e “mafai ona manumalo ai.”¹²

5. Afai na e faia ni solitulafono faalefeusuaiga, talanoa i lou epikopo po o le peresitene o le paranesi. O le a fesoasoani o ia ia te oe i le faagasologa o le salamo.¹³

6. Afai na avea oe ma se tasi ua aafia fua ona o se tosoteine, mataifale po o le toe ui i fanau, sauaina, po o isi solitulafono faalefeusuaiga, e le ta’usalaina oe i le agasala. O lou epikopo po o le peresitene o le paranesi e mafai ona fesoasoani e taialaina oe i le faagasologa o le faamalologa faalelagona.¹⁴

7. Afai o e nofofua ma o loo tafao faamasani, ia e faaaloalo i lau uo, fuafua ni gaoioiga lelei, ma ia aloese mai talanoaga po o gaoioiga na e faaosofia ai lagona faalefeusuaiga.

8. Afai ua faaipoipo, ia faamaoni i lou toalua i mafaufauga, upu, ma taga.¹⁵ O le faatafai i isi e le o se mea e talafeagai. Ia taumamao mai tulaga e ono faatupuina ai faaosoosoga.¹⁶

Faamatalaga

1. Iakopo 2:7.

2. Tagai i le MFF 42:22.

3. Tagai Esoto 20:14; 1 Tesalonia 4:3.

4. Tagai Alema 39:5.

5. Tagai i le 1Korinito 7:2–5.

6. Tagai Isaia 1:18.

7. Tagai i le MFF 58:42–43.

8. Mo nisi faamatalaga, tagai Mo Le Malosi o le Autalavou (2001), 26–28; Mataupu Faavae o le Talalelei (2009), 247–55; ma le Faamaoni i le Faatuatua (2004), “Legavia,” 87–92.

9. Tagai i le Alema 42:30.

10. Tagai i le Faamaoni i le Faatuatua “Tauagafau,” 173.

11. Tagai Alema 39:9; 3 Nifae 12:28–30; MFF 42:23; 121:45.

12. 1 Korinito 10:13; tagai foi Kenese 39:1–12.

13. Tagai Aoaoga a Peresitene o le Ekalesia: Spencer W. Kimball (2006), 39, 41–42, 44; tagai Mosaea 26:29.

14. Tagai i le Faamaoni i le Faatuatua “Sauaina,” 61.

15. Tagai Efeso 5:28; MFF 42:22–23.

16. Tagai 1 Tesalonia 5:22.

17. “O Le Aiga: O Se Folafolaga i le Lalolagi,” Liahona, Oke. 2004, 49.

“Tou te le iloa ea, o lo outou tino o le malumalu lea o le Agaga Paia ua i totonu ia te outou, o loo ua ia te outou mai le Atua, e le aia foi outou ia te outou?

“Aua ua faatauina outou i le tau: o lenei, ia outou vivii atu i le Atua i o outou tino, ma o outou agaga, o mea a le Atua ia” (1 Korinito 6:19–20).

“Matou te ta’utino atu o le poloaiga a le Atua i Lana fanau ia fanafanau ma uluola ma ia tumu ai le lalolagi, ua faamalosia ma faatumauina. Matou te toe ta’utino atu foi ua poloai mai le Atua, o mana paia o le foafoaina o fanau, ua na o le va lava o le alii ma le tamaitai ua faaipoipoina faaletulafono, o se tane ma le ava, e tatau ona faaaogaina ai.”¹⁷

Ata na saunia e Welden C. Andersen; Lana Leishman; Robert Casey; Jan Friis, © Henrik Als; Matthew Reier; ma John Luke