Filifili le Malumalu
O le fautuaga lena mai i se fuainumera faatupulaia o le Au Paia o Aso e Gata Ai i Initia, o e ua iloa o faamanuiaga e oo mai i le o atu i le maota o le Alii.
E te matauina pe a e vaai i o latou mata. O loo i ai iina le olioli, faamoemoe ma le talitonu, o se vaaiga e afua ai ona soisoi pe a e fai atu, “Faamatala mai ou lagona e uiga i le malumalu.”
Mo le Au Paia o Aso e Gata Ai i Initia, o le faaipoipoga i le malumalu e aumaia ai se malamalama loloto, o se lagona ua ausia se mea, ma se tautinoga ia tausia e faavavau feagaiga a o latou opomauina folafolaga o le faavavau. E ui o le malumalu aupito latalata e faitau afe maila le mamao i Hong Kong, ae o loo faatupulaia pea le toatele o loo malaga atu i le maota o le Alii. I le taialaina e le tatalo, faatuatua ma le Agaga, ua latou filifili ai e faamauina i le malumalu. O nisi nei o o latou manatu ma tala.
Sailia le Malosi
O Viliamu Palahuta o le Paranesi Lua o Bangalore e faigaluega i se falefaamasino. Ua na iloa le tiga o le loto pe a vaai atu i faaipoipoga ua malepelepe. O se tasi lea o mafuaaga ua naunautai ai o ia ma lana ava e sailia le malosiaga i totonu o le malumalu.
“Pei lava o le tele o ulugalii, o nisi taimi e i ai lava nai mea iti e ao ona galueaiina,” o lana tala lea. “Ae peitai o le galueaiina o ia mea e sili atu ona faigofie pe a i ai sa la’ua vaaiga i le faavavau.”
Fai mai lona toalua o Sheela, o le o atu i le malumalu ua le gata ina fesoasoani ia te ia ma lana tane, ae ua fesoasoani foi i le la fanau o: Celesta, 13 tausaga, ma Doris, e 7. “Sa faamauina i matou o se aiga,” o le tala lea a Sheela. “O se faalogoga lelei. Na galo ia i matou le lalolagi i fafo, ae ua pei o se lagi mo i matou. Matou te talanoa i ai i taimi uma.”
“O se faamanuiaga lava le faamau atu i lau ava,” o le tala lea a Uso Palahuta. “Ona latou aumaia lea o la ma fanau teine i totonu, ua ofu papae, ia matou faatasi. Sa faamanatu mai ai ia te au le mama—mama i o tatou olaga ma totonu o o tatou aiga. O le mama ma le malumalu e o faatasi. Pe a tatou mama, ua folafola mai le Alii—i Lona maota o folafolaga—e faamanuiaina i tatou.”
E manatua e Celesta na galulue lona aiga, fuafua, ma teu tupe mo le lua tausaga ina ia mafai ona malaga i le malumalu. Ae o le mea aupito sili o nei mea uma, e na te manatua le i ai i le malumalu ma ona matua ma sa i ai foi iina isi o lona aiga e vaai i le faamauina o lona aiga. “Ina ua maea, sa matou uulima uma faatasi. Sa matou tilotilo i faaata ma mafaufau i le faavavau,” sa ia tomanatu ai. “Sa matagofie. Sa ou iloa sa ou manao ou te mafuta ma lo’u aiga e faavavau.”
Lua Faatele i le Lua Faatasia
I le tele o tausaga e tele mea lelei sa faia e le au uso o Tomasi o le Paranesi Fa o Hyderabad e avea ai ma faataitaiga lelei mo le tasi ma le isi. Ao talavou, sa avea i la’ua ma tagata o le Ekalesia i le taimi e tasi. Sa la galulue faatasi e uunaia lo la tina seia oo ina auai foi i le Ekalesia. Sa faamisiona uma le au uso i le Misiona a Bangalore i Initia. Sa la fesoasoani e faamafanafana i lo la tina ina ua maliu lo la tama. Ma e talu ai nei na faaipoipo ai i la’ua uma.
O le taimi nei ua faamauina Rejjie ma lona toalua o Metilda i le malumalu, ma i le mulimulitaia o a la’ua faataitaiga lelei, o Rennie ma lana ava o Kereti o le a faia foi faapea ise taimi lata mai.
Fai mai Rejjie, “Mai le taimi na ou auai ai i le Ekalesia, sa avea o se faagasologa o le suiga ma le faaleleia, le aoaoina o le ata o le faaolataga ma mulmuli ai.” “Ae peitai o le faamoemoega moni o le toe foi ma nonofo faatasi ma lo tatou Tama Faalelagi, lo tatou Tama agaalofa, o le o loo matua naunau mai ia tatou toe foi atu ia te Ia, o lea na Ia auina mai ai ia i tatou se Faaola, o Lona Alo o Iesu Keriso, ia laveaiina i tatou mai le agasala ma le oti e faavavau. Ou te faafetai i le talalelei a Iesu Keriso ua suia a’u ma lo’u aiga, ma o le alu atu i le malumalu o le faatumutumuga lea o na mea uma.”
Na faamatala e Rejjie faapea o se tasi o luitau na fetaiai ma i la’ua ma Matilda o le taumafaiga ia faatagaina e o la matua ona la faaipoipo aua e eseese a la’ua tapuaiga toe eseese foi a la’ua gagana. “Ae peitai, i totonu o le malumalu, e leai ni eseesega, ma o se faamanatu tele lea mo ma’ua.” Ua manatu o ia o le lumanai o Initia e ō le autalavou. “O i ta’ua o le a faia se eseesega,” o lana tala lea a o tilotilo atu ia Metilda. “O le ituaiga vaai mamao lena o loo ia i ma’ua. E manaomia le faatautaia o afiafi faaleaiga, suesuega a le aiga o tusitusiga paia ma tatalo faaleaiga, ma tumau ona tulimatai atu i le malumalu. O lo tatou lumanai lena.”
Na ioeina e Metilda: “Ina ua ou fesiligia o ia pe mafai faapefea ona malamalama ma agaalofa, fai mai a ia ona o le talalelei na faaleleia o ia. I lana misiona sa ia vaaia ai i se faataitaiga a le peresitene o le misiona i lona faia o lona faletua ma le faaaloalo ma le alofa. Tatou te vaaia foi lena lava mamanu i totonu o le malumalu. Ao tatou faaalia lena lava mamanu i o tatou olaga ma i se aso i a tatou fanau, o le a faamalosia le Ekalesia i Initia i lena faatosinaga.
Na faamatalaina e Rennie le auala na fetaui ai i lana paaga mo le lumanai ao auai atu i le seminare i le taimi a o sailiili o ia i le Ekalesia. “Na ou fia taalo kirikiti, peitai fai mai le faiaoga seminare, ‘E tatau ona e faamuamua le Atua,’ ma sa ou faia lava. E ui lava i lo’u matamuli, ae na ou sau ma nofo i le laina i tua.” I le laina i luma na ou vaai ai ia Kereti, o lē faatoa ono masina talu ona avea ma tagata o le Ekalesia. E ui lava ina avea i la’ua o se uo, ae faatoa la tafafao faamasani ina ua foi mai le misiona a Rennie. E manatua e Kereti, ina ua mautinoa o le a la faaipoipo, sa la o i o la’ua matua e faamautinoa ua sa’o la la’ua filifiliga.
Fai mai a ia, “Na ma aoaoina i le seminare le tatau ona ava i matua, ma sa ma manatuaina.”
Na faaopoopo mai Rennie, “Na latou fautua mai e tatau ona faamae’a muamua a ma a’oga, ma e ao ona ou faatali sei faaipoipo muamua lo’u uso. O lea na ma galulue ma faatalitali, ma o le vaega sili ona sa fetaui lelei le mae’a o a ma a’oga, ma le faaipoipo o lo’u uso, ma sa matua faagaeetia le tama o Kereti i la la’ua faaipoipoga. Ina ua vaai o ia i la la’ua faataitaiga lelei, sa ioe loa i le ma faaipoipoga, ma i lea lava auala na ma faaaloalo ai i o ma matua ma sa faapea ona saunia lelei le ma faaipoipoga.”
Fai mai Rennie o ona aafiaga ma Kereti o se taiala mo le malamalamaaga i faaipoipoga i le Ekalesia ma ua faalauteleina. “Fai mai a ia ina ua faatoa auai i le Ekalesia, o se mea tele le faaipoipo o le tagata o le Ekalesia i le isi. “Ma afai e oo i le malumalu, o le a sili atu lena. Peitai i le taimi nei, ua tatou malamalama i le auala e faaipoipo ai i totonu o le Ekalesia. Ia tatou mautinoa ua tatou saunia mo le malumalu. O le malumalu o le ki lea.”
O Le Faataitaiga a le Peresitene
A e ulufale i le fale o Venikata ma Lina Dunna o le Paranesi Fa a Hyderabad, o le a tele naua faailoilo e iloa ai o lenei ulugalii fou e alofa faavalea le tasi i le isi. O se fu’a su’ilima mai le alii mo le aso fanau o le tamaitai o loo faamau i le puipui. O se tusi o ata o la la’ua faaipoipoga o lo o i luga o le laulau i tafatafa o le sofa. Ao la talanoa, e opo atu le alii i le tamaitai, ma o lona matafiafia e susua i le tele o taimi.
Na la faamatalaina le auala na la fetaui ai i gaoioiga fai a le Ekalesia ma le pogai o le fiafia tele o le tina o Lina ina ua fai le la faamau, ona sa la masani ma Venikata i le lotu. Ae sa i ai se faafitauli. Sa i ai se uso matua nofofua o Venikata, ma i Initia, sa taofia pea e nisi le tu e tatau ona faaipoipo muamua e matutua ao lei faaipoipo ia tei laiti. O ona matua, e fiafia i le Ekalesia ae le auai, na fau foi se fale ma e lei mananao i se faaipoipoga sei vagana ua mae’a le fale. “E lei fai mai ou matua leai, ae na mananao ma te faatali mo le tele o masina, po o se tausaga,” o le tomanatu lea a Venikata.
Na ia faaauau, “O le Agaga sa fesoasoani ia i ma’ua.” “Na ou lagona le uunaiga e ta’u atu i tagata uma o ma’ua ma Lina o loo galulue e fesoasoani e tapena mea uma, ae e taua foi le faaipoipo i le vave e tatau ai, ma e taua le amata i le o atu i le malumalu. Sa na ona ma manatunatu pea, ‘O le Alii o le a fesoasoani ia i ma’ua,’ ma sa Ia faia lava.”
O se falelotu fou o le Au Paia o Aso e Gata Ai faatoa tatala na faia ai le la faaipoipoga ma le taumafataga, ona malaga faavave ai lea e faamauina i le Malumalu o Hong Kong i Saina. Fai mai Lina “E toafitu i matou na malaga faatasi i le malumalu.” “O lea lava foi aso na faamauina ai ma’ua ma Venikata. Na mafai ona faamau atu lo’u tina, o lo’u uso ma a’u i lo’u tama ua maliu. O se aso ofoofogia tele i soo se itu.”
Fai mai Venikata, o le ua avea nei ma peresitene o le paranesi, o lona naunautaiga sili o le vaai i se malumalu i Initia i se aso. Fai mai a ia, “O le a avea lena o se faamanuiaga maoae.” “O le a fesoasoani ia i matou e fausia Siona i mea o loo matou i ai.”
O Se Faaipoipoga Taialaina
O le tala ia Parata ma Isala Poueli o le Paranesi Lua o Senai, e mafua sa’o mai i matua o Parata, o Satiata Poueli ma Suria Kumari, o e na faaipoipo i le 1981 ma auai i le Ekalesia i le 1991. I le 1993 na valaauina ai Satiata e avea ma peresitene o le paranesi. Ina ua mavae tausaga sa teuina ai se tupe ma sauniuni ao lei faapaiaina le Malumalu i Hong Kong, na la malaga ai i le Malumalu o Manila i Filipaina, e faamauina ai.
Ao faatupulaia lo la aiga ma faafaileleina i totonu o le talalelei, sa la aoaoina o la atalii e toalua i le taua o le alu i le malumalu. (O lo la atalii laitiiti o loo faamisiona i le taimi nei.) Sa faagaeetia le au Poueli ona ua fai le faamau a lo la atalii matua o Parata, ma o le faaipoipo i le malumalu o le fua taualuga o le fuafuaga. O Isala, le na faamau i ai o se tagata fou o le Ekalesia. Fai mai a ia, “Mai le aso muamua na ou feiloai ai i faifeautalai, na ou iloa ai o le talalelei e moni, ma na ou fiafia i ai.” Sa faatupuina le vavalalata o ia ma le aiga o le peresitene o le paranesi o i ai nei, le Au Isaako, o e na faafeiloaia i le Ekalesia e le au Powells.
E oo atu i le taimi o lona papatisoga, ua toe fa masina o le misiona a Parata. Fai mai Isala, “E fai mai pea le au Isaako e fetaui lelei o ia mo au, ae na ou manao e tolopo le faaipoipoga ae sei ou alu ou te faamisiona.” E ui lava ua faamaonia lena talosaga e le peresitene o le paranesi ma le misiona, ae na faamatala e Isala, “Na faafuasei lava ma e lei faamoemoeina le suia atoa o lo’u mafaufau. Na ou manao ou te tatalo mo se faaipoipoga.”
Ina ua foi mai lana misiona, na faateia Parata ina ua talanoa atu nisi tagaga ia te ia e fetaui lelei Isala mo ia. E le’i leva ae o la feiloai mo se taimi puupuu i le faaipoipoga a le afafine o Peresitene Isaako ae e lei tele se la talanoaga. O le aganuu a Initia e fai si faamamalu mo faamasaniga a alii ma tamaitai, ma na mananao Parata ma Isala ia talafeagai lelei a la amio.
I le tolu vaiaso mulimuli ane sa tatalo ai ma manatunatu ia Isala i le mea e fai, ma sa faapena foi Parata. Fai mai Isala, “Sa faailoa mai e le Alii i le tele o ala o Parata o le tagata sa’o lea.” “Peitai sa ou taofiofi mamau pea. Sa ou tatalo, ‘Le Alii e, afai o le ala lea, ia faailoa mai ia te au pe faapefea ona ou talanoa atu ia te ia.’”
Fai mai Parata, “Sa ou talanoa i nisi o tagata e faatatau ia te ia, ma e leai lava se isi mea na latou ta’u mai ua na o le lelei. Na faafuasei ona ou manatu, ‘Ua tatau nei loa ona ou talanoa ia te ia,’ ae ou te le iloa pe faapefea. Na ou valaau i le tuafafine o Peresitene Isaako ma fesili ia te ia pe na te manatu ua talafeagai ona ou valaau.”
Na faaauau pea le tala a Isala, “Ao ou tatalo, na telefoni mai le tuafafine o le peresitene o le paranesi ma fai mai, ‘O loo fia talanoa Parata ia te oe. E mafai ona ou avea i ai lau numera?’” I le afa itula mulimuli ane ua la talanoa. Fai mai Parata, “E pei lava ua leva ni tausaga o ma masani.”
Na aoao Isala e uiga i le faaipoipoga faalemalumalu i le inisitituti ma iloa ai na te le talia se isi mea e itiiti ifo ai. O le lagona foi lea o Parata. Peitai e tatau ona la sefeina ni tupe e malaga ai i le malumalu, ma o lona uiga e tele uo ma tagata o le aiga, e aofia ai le tina ma le tama o Parata, o le a le lava ni tupe latou te malaga ai faatasi.
Na tomanatu Satiata, “E mamao le ala, ma e taugata femalagaaiga, ae na matou malilie e tatau ona la o.” “Na matou fai atu i ai o le a matou faailogaina faatasi ma i la’ua le aloaia faaletulafono a o lei tuua, ma talosagaina e pue ni ata se tele pe a mae’a le la faamauga. Ona matou toe faailogaina lea pe a la toe foi mai.
Sa faamatala e Satiata, “O loo matou aoaoina tupulaga faiae i le taua o le malumalu.” “Matou te fautuaina tagata uma ia o i le malumalu, ma e matou te mananao i a matou fanau e o foi iina.” Fai mai a ia ua matua faafiafiaina lava o ia i le ala o loo faaalia ai e Parata ma Isala lo la faaaloalo i o la matua, le aganuu a o latou tagata, ma lo la’ua faitalia.
Fai mai Parata, “I Initia e ta’u e tagata o ‘faaipoipoga taupuleina’ ma ‘faaipoipoga i le alofa’.” “Matou te lagona o mea uma na.” O le mea moni, e fiafia atu Parata ma Isala e ta’ua le la faaipoipoga o se “faaipoipoga taialaina.” Fai mai ia, “Na aumaia faatasi i ma’ua e o ma aiga ma uo ma faapea foi ma le Agaga.” “Ma te faamoemoe o le a taitaia pea le ma ulugalii e le Agaga.”
Ata na pueina e Richard M. Romney, vagana ua ta’ua; ata o le Malumalu o Hong Kong i Saina na pueina e Craig Dimond
Luga: Na malaga le aiga o Palahuta i le Malumalu o Hong Kong i Saina (agavale) ina ia faamauina O le malumalu e aupito latalata i Initia.
Luga, mai le tauagavale: Rejjie, Metilda, Kereti, ma Rennie Thomas. Lalo: Rennie ma Kereti e fiafia lava i le Aoga Sa i vaiaso taitasi.
Luga: E manatua e Venikata ma Lina Dunna le malaga atu i le malumalu i se vaega e toafitu. O le aso lava na faamauina ai i la’ua, na faamau ai foi Lina i lona tama ua maliu.
Taumatau: O le tala ia Parata ma Isala na amata moni lava i matua o Parata (itulau e sosoo). “O loo matou aoaoina le tupulaga faiae i le taua o le malumalu,” o le tala lea a le tamā o Parata Satiata.